Yi chicambal yi eꞌ filistey yi caẍaꞌ kale atit yi caꞌwl Ryos
4
1 Ej i tzun bantz, nin cuꞌ chimolol quib yi eꞌ filistey tan oyintziꞌ scyeꞌj yi eꞌ xonl Israel, nin yi eꞌ xonl Israel, eꞌ eltzajtz tan oyintziꞌ scyuchꞌ. Choꞌn tzun bnixeꞌn chi campament cyaꞌn yi amaꞌl yi na biꞌaj Eben-ezer. Ma yi eꞌ filistey choꞌn tzun cweꞌntz chicampamentz cyaꞌn le amaꞌl cwent yi tnum Afec. 2 Cyoqueꞌn tzun yi eꞌ xonl Israel tan oyintziꞌ scyuchꞌ yi eꞌ filistey. Ma yi stzajeꞌn wiꞌ yi oyintziꞌ quinin tzun eꞌ xcyeꞌ cyen yi eꞌ xonl Israel scyeꞌj, na nin eꞌ quim cyaj mil chisanlar tul yi jun chin oyintziꞌaꞌtz. 3 Yi chipakxeꞌnt tzaj yi eꞌ sanlar cwent Israel kale ateꞌt yi eꞌ mas chitanum, nin tzun cyal yi eꞌ wutzileꞌn yi ateꞌ cyen: “¿Mbi tzuntz ja takꞌ Kataj Ryos amaꞌl tan chitxꞌaconeꞌn yi eꞌ filistey skeꞌj jaluꞌ? Baꞌnt cuꞌn quin tan ticyꞌleꞌn yi caẍaꞌ kale atit yi caꞌwl Ryos, yi at Siló. Baꞌn tzun sbajxok skawutz tan toqueꞌn tan kacolcheꞌn ẍchikꞌab kacontr,” cheꞌch tzun bantz.4 Ej, yaꞌtz nin tzun quilejtz, nin ben chichakol cobox sanlar jalen Siló, nin saj chicyꞌal yi caẍaꞌ kale colijeꞌt yi caꞌwl Kataj, yi Kataj Jehová yi cyaꞌl na xcyeꞌ quen teꞌj, yi choꞌn at cꞌolchbil squibaj yi eꞌ querubim.a Ej nin xomcheꞌ yi cob cyꞌajl Elí yi Ofni tu Finees te yi caẍaꞌaꞌtz. 5 I tzun bantz yi tocomponeꞌn yi caẍaꞌaꞌtz ẍchixoꞌl yi eꞌ xonl Israel, cyakil cunin tzun eꞌ, eꞌ ẍchꞌintz tan tzatziꞌn. Nin chin chiwiꞌ nin eꞌ ban tan sichꞌ, na nicyꞌt nin yi wutz wiꞌnin jincaneꞌn tan yi sichꞌ.
6 Yi beneꞌn quibital yi eꞌ filistey, nintzun chijaktz squibil quib: “¿Mbi tzuntz wiꞌnin sichꞌ na bajij le amaꞌl kale ateꞌt yi eꞌ hebrey?” cheꞌch bantz. Ma yi teleꞌn chitxum tetz yi iꞌtz tan paj yi oponeꞌn ban yi caẍaꞌ tetz Ryos, 7 nin tzun eꞌ xobtz: “¡Ja opon chiRyosil ẍchixoꞌl! ¡Lastum oꞌ jaluꞌ, na anaꞌ cunin skileꞌ yi jun xtxolbilaꞌtz! 8 ¡Lastum oꞌ jaluꞌ! ¿Naꞌ tzun jun xcyek tan kuchꞌeyeꞌn tkꞌab yi Ryosaꞌtz yi wiꞌnin ẍchamil? ¡Na xcyeꞌnak iꞌ tan chixiteꞌn cuꞌn yi eꞌ aj Egipto tan eꞌchk lmak yaꞌbil! 9 Kaquiwsaj bin kib, yi oꞌ ketz yi oꞌ sanlar, nin quin tan oyintziꞌ scyeꞌj. Na qui na kaj koꞌc tetz chiꞌesclaw yi eꞌ hebreyaꞌtz, chi eꞌ banakeꞌ cyetz jakꞌ kacaꞌwl,” cheꞌch tzun bantz squibil quib.
10 Chibeneꞌn tzun eꞌ filisteyaꞌtz tan oyintziꞌ scyeꞌj yi eꞌ xonl Israel, nin eꞌ txꞌacon scyeꞌj, na nin eꞌ el ojkuj yi eꞌ xonl Israel tan col ib jalen le amaꞌl kale atit chimantial.b Yi jun oyintziꞌaꞌtz chin xoꞌwbil nin ban, na eꞌ quim junaklaj mil sanlar cwent Israel yi xoꞌn cuntuꞌ quitaneꞌn. 11 Nchaꞌtz ja chicambaj yi eꞌ filistey yi caẍaꞌ kale at cuꞌn eꞌchk caꞌwl Kataj, nin eꞌ cuꞌ cyen biyij yi cob cyꞌajl Elí, yi Ofni tu Finees. 12 Poro te yi na tzan yi oyintziꞌaꞌtz nin tzun el tzaj ojkuj jun sanlar aj Benjamín ẍchixoꞌl. Elnak nin tcyaꞌj yi toponeꞌn Siló. Katznakt beꞌch tetz yi toponeꞌn, nin chin puklajt nin yi xoꞌl wiꞌ, tan ẍchajleꞌn yi wiꞌnin na bisun. 13 Yi toponeꞌn, choꞌn cꞌolchij Elí stziꞌ yi puertil yi caꞌl Kataj, nin choꞌn nin ajnak nin wutz tbeꞌ, na wiꞌnin bisuneꞌn te yi caẍaꞌ kale at cuꞌn eꞌchk caꞌwl Kataj. Ma yi jun sanlaraꞌtz, yi tocomponeꞌn tnum nin xtxol yi mbi cuꞌn mbajij scyeꞌj yi eꞌ sanlar cwent Israel. Ej nin le rat nin chixeꞌteꞌn tzun cyakil yi eꞌ xonl Israel tan oꞌkl. 14 Yi beneꞌn tbital Elí yi chunaꞌn yi na bajij, nintzun jaktz:
—¿Mbi tzun na chokꞌ wunak teꞌj?
Oponeꞌn nin tzun ban yi sanlar kale atit Elí, tan xtxoleꞌn tetz yi mbi cuꞌn mbajij. 15 Te yi tiempaꞌtz yi Elí nsken biꞌẍin, na jun mutxꞌ tu wajxaklajix yob taꞌn, nin quiꞌt na aꞌw wutz, na nsken oc tetz moyiꞌẍ. 16 Nin je yol sanlareꞌj ban tetz Elí:
—Sajnakin tul oyintziꞌ jalcuꞌneꞌj. Mpen tuꞌ nchinclax tul yi jun chin oyintziꞌaꞌtz, chij yi sanlar.
—Aẍ jun cꞌoloj sanlar, ¿mbi mbajij?
17 —Yi oꞌ xonl Israel ja keꞌl ojkuj ẍchiwutz yi eꞌ filistey. Qui nin nkaxcyeꞌ scyeꞌj, stzun yi sanlar, —nchaꞌtz ja wiꞌt cheꞌl cuꞌn jun cꞌoloj kasanlar swutz, scyuchꞌ yi cob cyꞌajluꞌ. Nin yi caẍaꞌ kale at cuꞌn eꞌchk caꞌwl Kataj, ja wiꞌt ben quicyꞌal yi eꞌ filistey, stzun yi sanlar bantz tetz Elí.
18 Ntinaꞌtz tbit Elí, nin ajeꞌn nin ban pacꞌloktz kale cꞌolcheꞌt xlaj yi puert. Nin tan paj yi nsken tijin cꞌuꞌl, nin tan paj yi nim cꞌatzaj, qui tzun ẍchaj yi wankil yi tponeꞌn pacꞌlok wuxtxꞌotxꞌ, na nin wakꞌxij yi bakil kul nin quim. Caꞌwunak yob ban iꞌ tan chicaweꞌn yi eꞌ xonl Israel.
19 Ma yi tlib Elí, yi txkel Finees txant tan tuleꞌn yos tuchꞌ te tiempaꞌtz, poro xeꞌteꞌn nin ban tan il, tan tuleꞌn yos tuchꞌ tan paj yi tbital yi nsken ben quicyꞌal yi eꞌ filistey yi caẍaꞌ tetz Kataj, nin yi nsken chiquim yi chmil tu yi jiꞌ. Chin qꞌuixcꞌuj nin tzun bantz yi titzꞌeꞌn yi niꞌ. 20 Yi quilol yi eꞌ xnaꞌn yi ateꞌ tan qꞌuicyꞌleꞌn, yi jalt nin tan quimeꞌn, nintzun cyaltz tetz: “Quiꞌt cẍbisun, na ja ul itzꞌok jun tal awal yi xicy”, cheꞌch tetz. Poro yi iꞌ tetz qui nin tbit chiyol. 21-22 Poro ntaxk quim ja oc Icabodc taꞌn tetz biꞌ yi tal niꞌ-tz, nin tal: “Lastum yi oꞌ xonl Israel ja el kakꞌej, na yi eꞌ filistey ja el chimajol yi caẍaꞌ kale at cuꞌn eꞌchk caꞌwl Kataj.”