Yi mbi cuꞌn bajij ẍchixoꞌl yi eꞌ filistey te yi taꞌteꞌn yi caẍaꞌ ẍchixoꞌl
5
1 I tzun bantz yi chicambal yi eꞌ filistey yi caẍaꞌ kale at cuꞌn eꞌchk caꞌwl Kataj, nin tzun eltzaj quicyꞌaltz le amaꞌl Eben-ezer, nin choꞌn tzun toponeꞌntz cyaꞌn le tnum Asdod. 2 Ma yi toponeꞌn le tnumaꞌtz, cyenin tzun beneꞌn quicyꞌaltz nin octz cyaꞌn le tyoẍil jun ryos yi na biꞌaj Dagón. Choꞌn tzun toqueꞌn cyentz cyakꞌun xlaj yi jun ryosaꞌtz. 3 Ma le junt eklok chin jalchan cunin cyoponeꞌn yi eꞌ aj Asdod le tyoẍaꞌtz, nin tzun eꞌ nojquentz te Dagón yi chiryosil yi choꞌn joklij wuxtxꞌotxꞌ, swutz yi caẍaꞌ kale at cuꞌn eꞌchk caꞌwl Kataj Ryos. Nin tzun jeꞌ chitxicbaltz le luwaril. 4 Ma le junt eklok chin jalchan cunin cyoponeꞌn junt tir, nin eꞌ nojquen junt tir te yi chiryosil Dagón yi joklij junt tir wuxtxꞌotxꞌ, swutz yi caẍaꞌ kale at cuꞌn eꞌchk caꞌwl Kataj. Elnak yi wiꞌ tu yi cob kꞌab, nin choꞌn ateꞌeꞌn tibaj yi tzeꞌ yi tijom tetz yi marquil yi puert. 5 Chaꞌstzun te jetzaꞌtz qui na jeꞌ quikan yi eꞌ paleꞌ tetz Dagón wi yi jun tzeꞌaꞌtz, ma na tzꞌitpuꞌn na chicyꞌ tibaj yi na choꞌc le chityoẍ.6 Ej nin tzun oc Kataj tan chixoꞌwseꞌn, nin tan chicawseꞌn cunin yi eꞌ aj Asdod tu cyakil yi eꞌ wunak yi ateꞌ jakꞌ chicaꞌwl, na nin eluꞌl eꞌchk lmak txꞌaꞌc scyeꞌj chi taneꞌn skꞌewl. 7 Yi quilol yi eꞌ aj Asdod yi mbi cuꞌn na bajij ẍchixoꞌl, nintzun cyaltz: “Tajweꞌn tan teleꞌn chan ticyꞌleꞌn yi caẍaꞌ tetz chiRyosil yi eꞌ xonl Israel skaxoꞌl, na yi jun ryosaꞌtz na tzan tan kacawseꞌn, nin nchaꞌtz na tzan tan cawseꞌn yi karyosil Dagón,” cheꞌch tzun bantz.
8 Chaꞌstzun te beneꞌn chimantar tan chichakleꞌn cyakil yi wiꞌtz cyajcawil yi eꞌ filistey, nin ja chijak scyetz yi eꞌ wiꞌtz ajcawaꞌtz:
—¿Mbil kaban te yi caẍaꞌ tetz chiRyosil yi eꞌ xonl Israel? cheꞌch.
—Baꞌnt cuꞌn yil ben ticyꞌleꞌn le tnum Gat, cheꞌch tzun yi eꞌ wiꞌtz ajcaw bantz.
I nin tzun bantz, nin ben quicyꞌal yi eꞌ filistey yi caẍaꞌ kale at cuꞌn eꞌchk caꞌwl Kataj le amaꞌlaꞌtz. 9 Ma yi toponeꞌn yi caẍaꞌ le jun tnumaꞌtz, nin tzun oc jun chin xoꞌwtz tan Kataj scyetz yi eꞌ wunakaꞌtz yi najlcheꞌ Gat, na nin eluꞌl txꞌaꞌc scyeꞌj nim juy, jun jilwutz txꞌaꞌc yi chin xoꞌwbil nin. 10 Ej nin tzun elt junt tir yi caẍaꞌ kale at cuꞌn eꞌchk caꞌwl Kataj cyakꞌun yi eꞌ filistey. Choꞌn tzun toponeꞌntz cyakꞌun Ecrón. Poro yi toponeꞌntz cyakil cunin tzun yi eꞌ aj Ecrón eꞌ ẍchꞌintz: “¡Ja ul yi caẍaꞌ tetz yi Ryos cwent Israel tzoneꞌj skaxoꞌl tan kabiyleꞌn cuꞌn!” cheꞌch tzun bantz.
11 Nin tan paj yi cyakil wunak jalt nin tan chiquimeꞌn tan xoꞌw, tan yi chicaws yi takꞌ Kataj Ryos, nin tzun ben chimantartz tan chichakleꞌn tzaj cyakil yi eꞌ wiꞌtz cyajcawil yi eꞌ filistey. I tzun cyaltz scyetz: “Chicyꞌajlenuꞌ yi caẍaꞌ tetz chiRyosil yi eꞌ xonl Israel tzoneꞌj. Baꞌnt cuꞌn tzꞌajk junt tir, bantz quil keꞌl cuꞌn swutz kacyakil cuꞌn taꞌn,” cheꞌch tzun yi eꞌ aj Ecrón bantz.
12 Wiꞌnin tzun chiẍchꞌineꞌn yi eꞌ wunak. Wiꞌnin na chichꞌayneꞌ tkꞌab yi chicaws, na wiꞌnin chiquimeꞌn. Ma yi eꞌ yi qui na chiquim chin qꞌuixcꞌuj nin ateꞌ cuꞌnt, na nojnak cyakil chiwankil tan txꞌaꞌc yi chin xoꞌwbil nin.