Yi tajeꞌn chipaksal yi eꞌ filistey yi caẍaꞌ kale atit yi caꞌwl Kataj
6
1 Ej nsken tzun el jukix xawtz tan yi caẍaꞌ ẍchixoꞌl yi eꞌ filistey. 2 Cyoqueꞌn tzun yi eꞌ filistey tan chichakleꞌn yi eꞌ nachol, scyuchꞌ yi eꞌ aj wutz mes, tan jakleꞌn scyetz yi mbil chiban te yi caẍaꞌ:—¿Mbil kaban te yi caẍaꞌ kale atit yi caꞌwl Ryos? Cyaltzajuꞌ sketz yi ẍeꞌn lkaban tan toponseꞌn junt tir le tetz luwaril, cheꞌch yi eꞌ filistey bantz.
3 —Yi ko yaꞌtz itajbil tan tajeꞌn junt tir yi caẍaꞌ kale atit yi caꞌwl Ryos, tajweꞌn tan xomeꞌn nin cobox oy teꞌj tan cweꞌn tzaj xtxumuꞌn Ryos tan yi mbi cuꞌn mibanwok teꞌj iꞌ. Ej quiꞌct tzun iyab sbneꞌ-tz, na tzꞌicyꞌpon yi yaꞌbil yi at te iwankil, nin tzꞌelpon itxum tetz yi mbi tzuntz yi ntakꞌ iꞌ icaws, cheꞌch tzun yi eꞌ nachol bantz scyetz yi eꞌ filistey.
4 —¿Poro mbiꞌtz lkoy tetz Ryos? cheꞌch.
—Oywok nin oꞌ teblal tumor yi oro cun, jun tetz jujun wiꞌtz itajcawil, nin oꞌ teblal itxꞌij tetz oro cun, na nicyꞌnintuꞌ yaꞌbil na cxtzan tan tijleꞌn scyuchꞌ yi eꞌ wiꞌtz itajcawil. 5 Chaꞌstzun te banwok yi eꞌchk teblalaꞌtz tetz tumor tu itxꞌij yi na chitzan tan poꞌtzeꞌn tircuꞌn tzoneꞌj le itanum, nin akꞌwok kꞌej yi chiRyosil yi eꞌ xonl Israel. Ko peꞌ lcutzaj xtxumuꞌn tan quiꞌt toqueꞌn tan kacawseꞌn, nin tan quiꞌt toqueꞌn tan chicawseꞌn yi eꞌ karyosil tu eꞌchk kacojbil. 6 ¿Mbi tzuntz yi chin chcan nin iwiꞌ chi eꞌ banakeꞌ yi eꞌ aj Egipto tu chireyil? Na jalen cuꞌn yi toqueꞌn Ryos tan chicawseꞌn cunin, ej kalenaꞌs tzun teleꞌn chitzakpul yi eꞌ xonl Israeltz. 7 Bnixoken jun acꞌaj careꞌt, nin cyꞌajwok tzaj cob tij wacẍ yi na chitxutxuneꞌt cyal scyeꞌj, nin yi qui naꞌwnakeꞌt tan jeꞌn yucuꞌ teꞌj chikul. Cꞌalwokeꞌ cyen sjuꞌ yi careꞌt, nin quil cheꞌ itzakp nin yi cyal scyeꞌj, ma na chicyajk tuꞌ yi eꞌ niꞌ tul peꞌm. 8 Nin tzun ljeꞌ nin yi caẍaꞌ tetz Ryos itaꞌn tib yi careꞌtaꞌtz, nin benk jun tal cuꞌlbil xlaj, kalel cweꞌt nin yi eꞌchk teblal yi tzitoyeꞌ tetz Ryos tan cuꞌswutzil. Ej baꞌn tzun chijut nin yi eꞌ wacẍ yi careꞌt. Chichuc chibentz. 9 Poro tajweꞌn tan itilol, yi ko choꞌn lchiben yi eꞌ wacẍ tul yi beꞌ yi na opon jalen Bet-semes, kale sajnakit yi caẍaꞌ tetz Ryos. Slajluchaxk tzuntz yi iꞌtz Ryos yi na tzan tan icawseꞌn. Ma kol ben tul junt beꞌ, tzꞌelpon tzun katxumtz tetz yi iꞌtz isuert nin iteꞌtz yi mmoꞌc tzaj pokꞌ yi jun chin yaꞌbilaꞌtz tzixoꞌl, cheꞌch tzun yi eꞌ nachol bantz scyetz yi eꞌ filistey.
10 I nin tzun cyulej yi eꞌ filistey, quib yi cyal yi eꞌ nachol. Nin jal cob wacẍ cyaꞌn yi na chitxutxuneꞌt cyal scyeꞌj. Nin oc cyen chilamol yi cyaltz tul peꞌm, nin eꞌ oc nin cꞌalij yi eꞌ wacẍaꞌtz sjuꞌ yi careꞌt. 11 Nin tzun jeꞌ nin yi caẍaꞌ tetz Ryos cyaꞌn tibaj yi careꞌt, nin oc nin yi cuꞌlbil xlaj kale atit eꞌch teblal yi tumor tu yi teblal yi eꞌchk itxꞌij. 12 Beneꞌn nin tzun eꞌ ban yi eꞌ wacẍ tul yi beꞌ yi na ben jalen Bet-semes. Wiꞌnin chiẍchꞌineꞌn yi eꞌ wacẍaꞌtz, nin sbejnin eꞌ beneꞌn tul yi jun beꞌaꞌtz. Ntinaꞌtz jun beꞌ ben quicyꞌaltz. Xomcheꞌ nin yi eꞌ filistey wutz coc yi caẍaꞌ jalen te yi mojomil yi amaꞌl cwent Bet-semes. 13 Yi beneꞌn quilol yi eꞌ wunak cwent Bet-semes yi ateꞌ jocoꞌj tan jeꞌseꞌn chicosech tetz triw, yi oponeꞌn atit junt tir yi caẍaꞌ Ryos ẍchixoꞌl, wiꞌnin tzun chitzatzineꞌntz teꞌj. 14 Yi toponeꞌn yi careꞌt le jocoꞌj cwent Josué yi aj Bet-semes, choꞌn tzun taqueweꞌntz kale atit jun chin cꞌub yi chin wutzileꞌn nin. Nin tzun xcon yi careꞌt cyakꞌun yi eꞌ aj Bet-semes tetz siꞌ, nin eꞌ octz tan toyeꞌn yi cob wacẍ tetz Kataj tetz chitxꞌixwatz yi patuꞌn cuꞌn ban. 15 Nsken tzun wiꞌt cutzaj yi caẍaꞌ tu yi cuꞌlbil kale atit yi eꞌchk teblal yi oro cuꞌn cyakꞌun yi eꞌ xonl kꞌajtzun Leví. Choꞌn tzun jeꞌn chikꞌoltz tibaj yi jun chin cꞌub. Te yi jun kꞌejaꞌtz yi eꞌ aj Bet-semes wiꞌnin tzun oy opontz cyaꞌn nin wiꞌnin chitxꞌixwatz chipat-tz tetz Kataj. 16 Yi beneꞌn quilol yi oꞌ wiꞌtz cyajcawil yi eꞌ filistey yi mbi cuꞌn bajijtz, nin tzun eꞌ pakxijt jalen Ecrón tul iteꞌn nin kꞌejaꞌtz.
17 Yi oꞌ teblal tumor yi oro cuꞌn yi cyakꞌ yi eꞌ filistey tan cuꞌswutzil swutz Kataj Ryos, iꞌtz jun oy yi ncyakꞌ yi eꞌ ajcaw yi najlcheꞌ lakak tnum Asdod, Gaza, Ascalón, Gat tu Ecrón na yaꞌstzun yi eꞌchk tnum yi oc Kataj tan chicawseꞌn. 18 Ma yi tajlal yi eꞌchk teblal itxꞌij, yaꞌstzun tajlal yi eꞌchk tnum yi at jakꞌ chicaꞌwl yi oꞌ wiꞌtz ajcawaꞌtz, yi eꞌchk chin lmak tnum yi tapij cuꞌn solteꞌj, tu yi eꞌchk tal neꞌẍ aldey cwent eꞌch tnumaꞌtz. Ej, nin iẍnin at yi jun chin wutzileꞌn cꞌubaꞌtz jaluꞌ, le amaꞌl cwent Josué yi aj Bet-semes.
19 Ej i tzun bantz, nin tzun eꞌ quim cobox aj Bet-semes tan Kataj, na nin eꞌ oc tan xkꞌukeꞌn tul yi caẍaꞌ kale at cuꞌn eꞌchk caꞌwl Kataj. Ox cꞌal tu lajuj yaj eꞌ quim. Tircunin tzun yi eꞌ aj Bet-semes cyokꞌlej chiwutz yi eꞌ almaꞌaꞌtz. 20 Cyalol tzun yi eꞌ aj Bet-semes: “Cyaꞌl jun at yi nink xcyeꞌ cuꞌn swutz yi Ryoseꞌj yi chin tzꞌaknak cunin, yi quiꞌc muꞌẍ il cꞌol teꞌj. ¿Naꞌ tzun tzꞌoponeꞌt iꞌ, bantz teleꞌn skaxoꞌl?” cheꞌch tzun bantz. 21 Nin tzun ben stziblaltz cyaꞌn ẍchiwiꞌ yi eꞌ aj Quiriat-jearim: “Yi eꞌ filistey ja aj tzaj chipaksal yi caẍaꞌ kale atit yi quiwel yol Kataj, nin baꞌn chuꞌluꞌ tan ticyꞌleꞌn nin,” cheꞌch tzun banintz.