7
1 Ej cyoponeꞌn tzun yi eꞌ aj Quiriat-jearim tan ticyꞌleꞌn yi caẍaꞌaꞌtz, choꞌn tzun toqueꞌntz cyaꞌn xe caꞌl Abinadab, yi choꞌn at wi jun tal jocoꞌj xoꞌl wutz. Nin tzun bixeꞌ Eleazar cyaꞌn, jun cyꞌajl Abinadab, tan qꞌuicyꞌleꞌn yi caẍaꞌ kale atit yi caꞌwl Kataj.a Yi toqueꞌn Samuel tetz chibajxomil yi eꞌ xonl Israel
2 Ej i tzun bantz yi nsken wiꞌt el junakix yob yi toponleꞌnix yi caẍaꞌ Quiriat-jearim, nintzun eꞌ oc cyakil yi eꞌ xonl Israel tan joyleꞌn Kataj tetz cuꞌn cyalmaꞌ. 3 Nin tan yi xtxolbilaꞌtz, nin tzun tal Samueltz scyetz cyakil yi eꞌ wunak: “Ko tetz cuꞌn cyalmaꞌuꞌ na cyajuꞌ choponuꞌ junt tir swutz Kataj Ryos, chin tajweꞌn cunin yi quiꞌt chilokꞌuꞌ wutz eꞌchk chiryosil yi eꞌ awer nak, tu yi eꞌchk teblal Astarté yi at ẍchixoꞌluꞌ. Tajweꞌn bixeꞌ cyanuꞌ tan cyoqueꞌnuꞌ cꞌulutxum jakꞌ caꞌwl Kataj. Ko yaꞌtz chibanuꞌ tzꞌocpon tzun iꞌ-tz tan chilajeꞌn len yi eꞌ filistey yi na chicawun squibuꞌ,” stzun Samuel bantz.
4 I nin tzun cyulej yi eꞌ xonl Israel quib yi tal Samuel scyetz. Nin el chicꞌoxol cyakil yi eꞌchk teblal ryos chi taneꞌn teblal Baal nin teblal Astarté. Ntin tzun Kataj eꞌ octz tan cꞌuꞌlajeꞌn. 5 Ej nintzun el jun caꞌwl tan Samuel: “Eꞌuꞌ xonl Israel chimoleꞌ quibuꞌ tircuꞌn eꞌuꞌ, le amaꞌl Mizpa, na copon inwutz tetz Kataj tan jakleꞌn cuybil chipajuꞌ,” chij Samuel. 6 Toponeꞌn tzun chimolol quib cyakil yi eꞌ nim juy le tnum Mizpa, nin tzun eꞌ octz tan jeꞌseꞌn tzaj aꞌ tjul nin ben chikojoltz wuxtxꞌotxꞌ chi jun oy tetz cuꞌswutzil swutz Kataj. Te yi jun kꞌejaꞌtz chimucꞌ weꞌj, nin cyaltz ẍchiwutz chicyakil cuꞌn, yi jun cuꞌn eꞌ pajol caꞌwl swutz Ryos. Nin taꞌsteꞌn nin bixeweꞌt Samueltz tetz chibajxom.
7 I tzun yi toponeꞌn stziblal ẍchiwiꞌ yi eꞌ filistey, yi choꞌn chimoloꞌn quib yi eꞌ xonl Israel Mizpa, nin tzun eꞌ ben yi wiꞌtz cyajcawiltz scyuchꞌ chisanlar tan oyintziꞌ scyeꞌj. Ma yi quibital eꞌ xonl Israel yi oponeꞌn ateꞌt chicontr tan chibiyleꞌn cuꞌn, nintzun eꞌ xobtz. 8 I tzun cyaltz tetz Samuel: “Baneꞌuꞌ pawor, cuk wutzuꞌ tetz Kataj tan jakleꞌn ẍchꞌeybil ketz tetz, bantz toqueꞌn iꞌ tan kacolcheꞌn ẍchikꞌab yi eꞌ filistey,” cheꞌch bantz.
9 Toqueꞌn tzun Samueltz tan pateꞌn jun tal neꞌẍ cneꞌr tetz Kataj. Patuꞌn cunin tzun bantz taꞌn tetz chitxꞌixwatz. Ej nintzun cuꞌ wutz iꞌ tetz Kataj tan toqueꞌn tan chicolcheꞌn yi eꞌ tetz tanumil. Ej nin tbit Kataj yi cuꞌswutzil yi ban Samuel tetz. 10 I tzun te yi na tzan Samuel tan pateꞌn yi txꞌixwatz, uleꞌn nin tzun ateꞌt yi eꞌ filisteytz nakaꞌj, nintzun saj jun chin wutzileꞌn kꞌancyok tan Kataj tan chixoꞌwseꞌn, nin tan yi jun chin kꞌancyokaꞌtz eꞌ el ojkuj yi eꞌ filisteyaꞌtz. 11 Cyeleꞌn tzaj tzun nil yi eꞌ xonl Israeltz Mizpa tan chitzꞌamleꞌn. Eꞌ oc tan chibiyleꞌn cuꞌn tul beꞌ licuꞌnak tziꞌn, jalen tzakꞌ cuꞌn yi tnum Bet-car. 12 Ej cweꞌn tzun nucꞌul Samuel jun cꞌub le mojomil yi amaꞌl Mizpa tu Sen, nin tzun oc biꞌ-tz taꞌn tetz Eben-ezer.b Ej nin tal iꞌ: “Sajleꞌn tunintz ja oc Kataj tan kuchꞌeyeꞌn, jalen jaluꞌ.”
13 Yaꞌstzun ban yi cyeleꞌn cuꞌn yi eꞌ filistey swutz, nin quiꞌt jal junt tir chiwalor tan cambeꞌn yi amaꞌl cwent Israel, nin te yi tiemp yi taꞌteꞌn Samuel ẍchixoꞌl, ilen nin ja oc Kataj tan quichꞌeyeꞌn ẍchikꞌab yi eꞌ filisteyaꞌtz. 14 Yi eꞌchk amaꞌl yi eꞌ xcyeꞌ yi eꞌ filistey tan majleꞌn len cwent Israel, el liwr jakꞌ chicaꞌwl, tuml cyakil yi amaꞌl yi at cwent Ecrón jalen Gat. Ej nin oc junt tir cwent Israel. Yaꞌstzun bantz yi chicambal yi eꞌ xonl Israel cyakil chitxꞌotxꞌ junt tir ẍchikꞌab yi eꞌ filistey. Nchaꞌtz jal junt tir tzatzin paz ẍchixoꞌl yi eꞌ xonl Israel scyuchꞌ yi eꞌ amorreo.
15 Yi Samuel iꞌ wiꞌtz aj pujul xtisyaꞌ ban cwent Israel jalen yi quimeꞌn. 16 Nin cyakil nin yob na benak iꞌ Betel, Gilgal nin Mizpa, tan pujleꞌn eꞌchk oyintziꞌ ẍchixoꞌl yi eꞌ xonl Israel. 17 Ma yi na pakxtzaj, choꞌn tzun na opontz Ramá, na yaꞌstzun kale atit yi caꞌl iꞌ. Nchaꞌtz na oc iꞌ tan chicaweꞌn nin tan pujleꞌn eꞌchk oyintziꞌ cwent cyakil Israel. Nin bnix jun altar tetz Kataj taꞌn le amaꞌlaꞌtz, Ramá.