Yi chijakol yi eꞌ wunak tetz Samuel tan bixeweꞌn jun chireyil taꞌn
8
1 I tzun bantz yi tijineꞌn cꞌuꞌl Samuel, nintzun eꞌ bixeꞌ yi cob cyꞌajltz taꞌn tetz wiꞌtz ajcaw cwent Israel. 2 Yi bajx cyꞌajol na biꞌaj Joel, ma yi caꞌp na biꞌaj Abías, nin choꞌn ateꞌ-tz Beerseba tan cawuꞌn. 3 Poro yi cob cyꞌajolaꞌtz quinin eꞌ xom te tajtzaꞌkl chitaj, ma na ẍkantzaj nink na cyaj. Nchaꞌtz wiꞌnin na chitzꞌam xoꞌc, nin qui nin eꞌ cawun skꞌil cuꞌn, ma na nin na jeꞌ chikꞌab ẍchiwiꞌ yi eꞌ yi junt len cyajtzaꞌkl.4 Jeꞌn tzun chimolol quib cyakil yi eꞌ wutzileꞌn bajxom nin eꞌ bentz jalen Ramá tan yol tetz Samuel. 5 Nin je cyal tetz: “Yi iluꞌ teruꞌ ja tijin cꞌuꞌluꞌ, nin yi eꞌ cyꞌajluꞌ nkꞌeꞌtz niꞌcuꞌn balajil cyajtzaꞌkl chi teruꞌ tajtzaꞌkluꞌ. Chaꞌstzun te ja kuꞌl tan talcheꞌn teruꞌ yi nink bixbajuꞌ jun kareyil, yil tzꞌoc tan kacaweꞌn, chi na bajij tulak eꞌchk tnum beneꞌn tziꞌn,”a cheꞌch bantz.
6 Nin tzun jeꞌ lajpuj muꞌẍ wiꞌ Samueltz tan yi xtxolbil yi tbit, nintzun bentz tan nachleꞌn Kataj. 7 Tlol tzun Kataj tetz: “Banaj taneꞌn yi mbi cuꞌn lchijak yi eꞌ atanum tzatz, na qui na elepont yi ik aẍ na chitzan tan telseꞌn akꞌej, ma na iꞌtz wetz inkꞌej yi na chitzan tan telseꞌn. Na qui na cyaj yil noꞌc tan chicaweꞌn. 8 Jetz yi cyeleꞌn tzaj waꞌn jakꞌ chicaꞌwl yi eꞌ aj Egipto, niꞌcuꞌn xtxolbil nchiban sweꞌj, chi na chitzan tan banleꞌn tzaweꞌj jaluꞌ, na ilen nin ja chincyaj cyen quilol tan lokꞌeꞌn chiwutz jun cꞌolojt ryos. 9 Chaꞌstzun te banaj yi mbiꞌtz na el cyalmaꞌ teꞌj. Poro bajx txol nin cunin scyetz yi mbiꞌtz tajweꞌn tan cyakꞌol tetz yi rey yi scawunk squibaj,” stzun Kataj bantz tetz Samuel.
10 Nin tzun oc Samuel tan xtxoleꞌn tircuꞌn yi mbi cuꞌn tal Kataj scyetz yi eꞌ xonl Israel yi na chitzan tan jakleꞌn jun chireyil. 11 Nin je yol iꞌeꞌj:
—Je yi xtxolbileꞌj yi sbajok tziteꞌj, yil cawun yi rey tzitibaj yi na cxtzanwok tan jakleꞌn: Tzꞌocpon tan chimolcheꞌn yi eꞌ icyꞌajl tan cyoqueꞌn tetz sanlar, at chocpon taꞌn tan toleꞌn careꞌt tetz oyintziꞌ, nin at eꞌ yi chijepon te chej tan oyintziꞌ, nin at eꞌ yi quikan cuntuꞌ nchiben, nin at eꞌ yi chocpon taꞌn tetz qꞌuicyꞌlom tetz. 12 At eꞌ chocpon taꞌn tetz cyajcawil jun mil sanlar, nin at eꞌ chocpon taꞌn tetz ajcaw scyeꞌj nicyꞌ cient ntziꞌ. At eꞌ tzixoꞌlwok yi chocpon taꞌn tan ẍchꞌocleꞌn yi tetz cojbil, nin at eꞌ yi chocpon taꞌn tan jeꞌseꞌn yi tetz cosech, nin at eꞌ yi chocpon taꞌn tan banleꞌn eꞌchk maꞌcl tetz oyintziꞌ, nin tan banleꞌn eꞌchk careꞌt tetz oyintziꞌ. 13 Nchaꞌtz chocpon imeꞌl taꞌn tetz mos xe caꞌl, at chocpon taꞌn tan banleꞌn perfum, nin at chocpon tan banleꞌn waꞌ, nin at chocpon tan banleꞌn pam. 14 Stetzajeꞌ yi chumbalaj icojbil nin stetzajeꞌ yi eꞌchk icojbil yi chumbalaj nin taneꞌn yi icosech uva tul. Nin stetzajeꞌ cyakil yi eꞌchk icojbil kale atit balaj cosech oliw, nin choꞌn stkꞌeꞌ scyetz yi eꞌ ajcaw yi ateꞌ xlaj tan cawuꞌn nin scyetz yi eꞌ yi na chakꞌuj jakꞌ caꞌwl. 15 Tzꞌelpon tcyꞌal cyaj part te yi ixiꞌn triw tu uva yi na jeꞌ itaꞌn, nin choꞌn stkꞌeꞌ scyetz yi eꞌ wiꞌtz ajcawb yi ateꞌ jakꞌ caꞌwl, tan cawuꞌn. 16 Nchaꞌtz tzꞌelpon majol cobox imos yi ateꞌ tan akꞌun tzituchꞌ. Nchaꞌtz tzꞌelpon majol yi eꞌ iwacẍ tu buruꞌ nin tor, chocpon taꞌn tan akꞌun wi yi tetz cojbil. 17 Stetzajeꞌ jujun te lajuj itawun. Nchaꞌtz axwok cxocponwok tetz esclaw jakꞌ caꞌwl. 18 Nin yil tzꞌopon yi kꞌejlal yil tzꞌajeꞌn ikꞌab xoꞌl iwiꞌ tan paj yi ireyilaꞌtz yi na cxtzan tan jakleꞌn jaluꞌ, quiꞌt tzun tbit Kataj iyoltz, mpe nink cuꞌ iwutz tetz, stzun Samuel bantz scyetz cyakil cuꞌn.
19 Poro yi eꞌ wunak, qui nin ocpon muꞌẍ tal yi yol Samuel teꞌj chiwiꞌ. Qui nin eꞌ oc tan xtxumleꞌn, na je cyaleꞌj:
—Quiꞌc na ban, yi ketz yi na kaj iꞌtz jun kareyil, 20 tan koqueꞌn chi quitaneꞌn yi eꞌ mas wunak beneꞌn tziꞌn yi at chireyil. Nin na kaj yil cawun skibaj, nin na kaj yil bajxij skawutz tulak oyintziꞌ, cheꞌch tzun bantz.
21 Yi wiꞌt bajeꞌn tbital Samuel tircuꞌn chiyol yi eꞌ tanum, nin tzun ben xtxoliltz tetz Kataj, 22 i tzun tal Kataj tetz:
—Quiꞌc na ban, banaj taneꞌn chiyol, nin joyaj jun chireyil.
Ej, nin tzun tal Samuel cuj scyetz yi eꞌ wiꞌtz bajxomaꞌtz. Nin cawunintz scyetz tan cyajeꞌn lakak chiꞌamaꞌl kale eꞌ siteꞌt.