Yi chicꞌulul quib Saúl tu Samuel
9
1 Ej i tzun bantz ẍchixoꞌl yi eꞌ xonl kꞌajtzun Benjamín, at tzun jun yaj na biꞌaj Quis, yi taj na biꞌaj Abiel, nin Zeror biꞌ yi cyꞌeꞌx. Ma yi tacyꞌeꞌx Becorat biꞌ, iꞌ cyꞌajl kꞌajtzun Afía. Nin yi Quisaꞌtz, iꞌtz jun yaj yi at kꞌej ẍchixoꞌl yi eꞌ wunak. 2 Ej nin at jun balaj cyꞌajl iꞌ yi na biꞌaj Saúl. Nin ẍchixoꞌl cyakil yi eꞌ xonl Israel quiꞌc nin junt yi cheꞌn nink yubeꞌnil chi yi jun xicyaꞌtz, na cyaꞌl jun najk jepon te wutz tkan.3 Ej i tzun bantz, nin tzun eꞌ txꞌakxij yi eꞌ buruꞌ tetz Quis, i tzun taltz tetz yi cyꞌajlaꞌtz:
—Wek cuꞌn awib, nin quiloꞌk tan chijoyleꞌn kaburuꞌ yi ja chitxꞌakxij, nin baꞌn xom nin jun mos tzawuchꞌ.
4 Eꞌ beneꞌn tzun Saúl tan joyoꞌn, choꞌn tzun quicyꞌeꞌntz xoꞌl wutz cwent Efraín, nin eꞌ icyꞌtz cwent yi amaꞌl Salisa. Poro qui nin eꞌ jal yi buruꞌ cyaꞌn. Nchaꞌtz baj chixoꞌmbel yi amaꞌl cwent Saalim nin tul yi amaꞌl cwent Benjamín, poro qui nin eꞌ jal cyaꞌn. 5 Ma yi cyoponeꞌn le amaꞌl cwent Zuf, nin tzun tal Saúl tetz yi mos yi xomij teꞌj:
—Baꞌnt cuꞌn lkapakxij, na qui cunin batz mas na bisun tzaj intaj skeꞌj, nin nkꞌeꞌtz scyeꞌj yi eꞌ buruꞌ.
6 Stzajeꞌn tzun stzaꞌwel yi mos Saúl tetz:
—At jun elsanl stziꞌ Ryos yi at wiꞌnin kꞌej ẍchixoꞌl yi eꞌ wunak, le yi tnum yi at nakaꞌj tzoneꞌj. Tircuꞌn yi eꞌchk takleꞌn yi na tal, na el cuꞌn teꞌj. Quin teꞌj, ko ptzun ltal sketz yi naꞌ lkaꞌj nint.
7 —Quin bin, stzun Saúl. —¿Poro mbil kacyꞌaj nin tetz? Na quiꞌc pam cyꞌaꞌn kaꞌn tul cuꞌlbil kawaꞌ. Quiꞌc jun takleꞌn cyꞌaꞌn kaꞌn tan toyeꞌn cyen tetz yi elsanl stziꞌ Ryosaꞌtz.
8 —Poro cyꞌaꞌn jun tal piẍ tal sakal waꞌn, baꞌn lkakꞌ tetz tan tlol yi mbi beꞌ-il kucyꞌaj, stzun yi mos bantz tetz Saúl.
9 (Te yi jun tiempaꞌtz ja aꞌlchij “ilol tetz” scyetz yi eꞌ elsanl stziꞌ Ryos. Yaꞌstzun chibiꞌ tenẍchan.)
10 —Quin bin, stzun Saúl. —Quin kileꞌ tzaj.
Nin tzun eꞌ bentz chicabil le tnum kale najleꞌt yi elsanl stziꞌ Ryosaꞌtz.
11 I tzun te na chixon tan chijeꞌn poneꞌnt le tnum, nin tzun cuꞌ chicꞌulul quibtz scyuchꞌ cobox xun aj tzꞌyaꞌinl nin tzun chijaktz:
—¿Choꞌn peꞌ at yi elsanl stziꞌ Ryos le tnumeꞌj?
12 —Chaꞌtz, poro at tzaj nin muꞌẍt tan itponeꞌn. Or itkan na ja ul jaluꞌ tzoneꞌj, tan pateꞌn jun txꞌixwatz le amaꞌl yi wiꞌnin xanil. 13 Nin yil cxoponwoktz, joywok chan yi yajaꞌtz, te ntaxk ben te jun waꞌaꞌn yi sbajok. Na yi eꞌ wunak yi ẍchimoleꞌ quibtz, quil chiwan chan jalen yil tzꞌopon, na iꞌ sjakonk banl Kataj tibaj yi txꞌixwatz. Ej kalenaꞌs tzun lchiwan cyakil yi eꞌ txocum. Quibeneꞌnk chan, te ntaxk ben te yi waꞌaꞌnaꞌtz.
14 Cyenin tzun eꞌ beneꞌntz le tnum. Na chopon cunin yi teleꞌn tzaj Samuel, tan beneꞌn tan waꞌaꞌn.
15 Ma ewtok cyen nin jilon Kataj tetz Samuel, itzun taltz: 16 “Chwaꞌn nintz eklen tzꞌopon jun yaj waꞌn tzaweꞌj, yi choꞌn tzꞌopon tzaj ẍchixoꞌl yi eꞌ xonl kꞌajtzun Benjamín. Nin tajweꞌn tan jeꞌn cojol aceit twiꞌ tan xansajeꞌn tetz chireyil yi eꞌ intanum. Iꞌ tzꞌocpon tan chicolpeꞌn len ẍchikꞌab yi eꞌ filistey, na ja el inkꞌajab scyeꞌj yi eꞌ intanum te yi na opon toꞌkl chicꞌuꞌl tzinwutz,” stzun Kataj ban tetz Samuel.
17 Ma yi beneꞌn tilol Samuel wutz Saúl, nin tzun tal Kataj tetz: “Samuel, xmaynin yi yaj yi tzꞌul tziꞌneꞌj, iꞌtz yi jun yi wal tzatz ewt. Tzꞌocpon iꞌ tan chicaweꞌn yi eꞌ intanum,” stzun Kataj.
18 Ej i tzun te yi nsken ocpon Saúl stzi puertil yi tnum, nin tzun bentz tan yol tu Samuel, i tzun taltz:
—Bneꞌuꞌ jun pawor swetz, naꞌ atit cyent caꞌl yi elsanl stziꞌ Ryos tzoneꞌj, stzun Saúl.
19 —I tzun inaꞌs, chij Samuel, —xompon jalen wiꞌwtz kalel bajijeꞌt jun waꞌaꞌn. Chinjepon chan tan kawaneꞌn. Nin eklen jalchan cuꞌn swaleꞌ tzatz cyakil yi mbi cuꞌn na awaj tzꞌel atxum tetz. Baꞌn tzun cẍaꞌjtz xe anajbil. 20 Quiꞌt cẍbisun scye yi eꞌ aburuꞌ, yi eꞌ txꞌakxij oxix kꞌej. Quiꞌt cẍbisun scyeꞌj, na ja wiꞌt chijal cyeraꞌtz. Ej nin nchaꞌtz, cyakil yi meꞌbiꞌl yi at tzoneꞌj Israel iꞌtz awetz sbneꞌ tu anajal, stzun Samuel tetz Saúl.
21 —¡Poro yi in wetz in tuꞌ jun xonl kꞌajtzun Benjamín, nin yi oꞌ ketz coboxeꞌn tal kaxoneꞌn, ẍchiwutz yi eꞌ mas kꞌuꞌj xonl Israel! Nchaꞌtz yi eꞌ wetz intaj quiꞌc cyetz chikꞌej ẍchixoꞌl yi eꞌ mas xonl kꞌajtzun Benjamín. Qui na pujx waꞌn ¿mbi tzuntz yi choꞌn na tzan tzajuꞌ tan talcheꞌn yi xtxolbilaꞌseꞌj swetz? chij Saúl.
22 Ej nin tzun eꞌ ben tcyꞌal Samuel yi Saúl tuml yi mos iꞌ jalen le caꞌl kale chimoloneꞌt quib junaklaj loꞌ wunak, nin tzun eꞌ cꞌoleꞌ-tz taꞌn ẍchixoꞌl yi eꞌ yi at chikꞌej. 23 Nin tzun ben tlol Samuel tetz yi aj csinuꞌ:
—Cyꞌaj tzaj noc yi jun balaj piẍ chiꞌbaj yi wakꞌ tzatz tan jeꞌn acolol.
24 Lajkeꞌl nin tzun beneꞌn yi aj csinuꞌ-tz tan ticyꞌleꞌn tzaj jun chin letxaj chiꞌbaj, nin ben tkꞌoltz tetz Saúl. I tzun tal Samuel tetz:
—Yaꞌstzun achib yi jatxijt waꞌn tetz atz. Baꞌn lbaj awaꞌn, na jatxijt yi chiꞌbajaꞌtz te yi ntaxk cheꞌ intxoc yi eꞌ yi at chikꞌej tan waꞌaꞌn skuchꞌ jaluꞌ.
Tul yi jun kꞌejaꞌtz yaꞌstzun waneꞌn Saúl tu Samuel.
25 I tzun yi cyeleꞌn tzajtz le amaꞌlaꞌtz, chicweꞌn muleꞌn xoꞌl caꞌl, nin tzun chiban list jun witbil tan witeꞌn cyen Saúl le caꞌp chup. 26 Choꞌn tzun witeꞌn cyen Saúl. Ma le junt eklok, nin tzun chakon Samuel tetz Saúl:
—Or cꞌasen, na ja opon oril tan awucyꞌalt abeꞌ, stzun Samuel.
Cꞌaseꞌn nin tzun ban Saúl, nin tzun eꞌ eltzajtz tbeꞌ.
27 Ma yi cyeleꞌn tzaj solteꞌjeꞌltzaj yi tnum, nin tzun tal Samuel tetz Saúl:
—Bajxokeꞌn yi amos awaꞌn, na tajweꞌn tan intxolil yi tajbil Ryos tzatz, chij Samuel.