Yi bixeweꞌn Saúl tan Samuel tetz rey cwent Israel
10
1 I tzun bantz, nintzun ben Samuel tan kojlejeꞌn muꞌẍ aceitil oliw twiꞌ Saúl, i tzun taltz tetz:—Ja cẍbixeꞌ tan Kataj tan awoqueꞌn tetz chireyil yi eꞌ tetz tanum Israel. Aẍ ẍocpon tan chicaweꞌn, nin tan chicolcheꞌn ẍchikꞌab chicontr. Nin yi aceiteꞌj, yaꞌstzun techl yi ja wiꞌt cẍjeꞌ txaꞌij. 2 Ma jaluꞌ, ncẍaꞌjeꞌn. Nin yil cẍopon te yi nich kale ocnakit cyen yi wankil Raquel le amaꞌl Selsa cwent Benjamín, ẍchinojk quen cob yaj tzaweꞌj, nin scyaleꞌ tzatz yi ten chijal yi cob buruꞌ yi na cxtzanwok tan chijoyleꞌn. Nchaꞌtz scyaleꞌ yi quiꞌt na bisun ataj scyeꞌj, ma na choꞌn na bisun tziteꞌj jaluꞌ. Na qui na tbit yi naꞌ atixeꞌt, nin na tzan tan xtxumleꞌn yi mbil sban tan ijoyleꞌn.
3 ”Ej, ma yil cẍopon nakaꞌjil yi bakch yi at Tabor, cẍnojkcyen scyeꞌj ox yaj, jeꞌn mul ateꞌt tan cyoponeꞌn tan lokꞌeꞌn wutz kaRyosil le tnum Betel. At jun kinij ox chiw taꞌn, ma junt cyꞌaꞌn ox pam taꞌn, nin yi junt ekaꞌn jun tzꞌuꞌm win taꞌn. 4 Ẍchitziwunk tzatz, nin scyoyeꞌ cyen cob apam, nin baꞌn tzatzꞌam. 5 Ej oponeꞌn nintzun tzabneꞌ-tz le amaꞌl Gabaa tetz Kataj, kale ateꞌt jun kꞌuꞌj sanlar filistey. Ma yil cẍoꞌc le tnum, cẍnojk cyen tzuntz scyeꞌj cobox elsanl stziꞌ Ryos yi cweꞌn mul ateꞌt. Sajnakeꞌ nin le kꞌajbil Kataj, nin bajxcheꞌ aj bitz ẍchiwutz cyꞌaꞌn len arpa cyaꞌn tu suꞌ tu salterio, nin pandero. 6 Ej tzꞌocpon tzun yi espíritu Kataj tawankil, nin cẍocpon tzun tan xtxoleꞌn eꞌchk xtxolbil yi ntin yi espíritu Kataj stzꞌaꞌlonk tzatz, nin jepon txꞌixpuj awajtzaꞌkl. Nkꞌeꞌtz niꞌcuꞌn sbneꞌ awajtzaꞌkl chi awutaneꞌn jalcuꞌneꞌj.
7 ”Yil bajij yi xtxolbilaꞌtz tzaweꞌj, baꞌn tzaban yi awajbil yi baꞌn le awutz atz, na ilen nin xomok Kataj tan awuchꞌeyeꞌn. 8 Ej nin yil bajij yi xtxolbilaꞌtz tzaweꞌj, or tzun tzabeneꞌntz Gilgal, na choꞌn skileꞌ kib junt tir tzawuchꞌ choneꞌj, na nopontz tan toyeꞌn eꞌchk txꞌixwatz yi patuꞌn cuꞌn sbneꞌ, nin tan toyeꞌn eꞌchk oy yi na ẍchaj yi ja wiꞌt kabansaj kib tu Ryos. Baꞌn tzun cẍcyajtz Gilgal tetz juk kꞌej, jalen cuꞌn yil nopontz tan talcheꞌn tzatz yi mbiꞌtz tajweꞌn tan abnol, stzun yi wutzileꞌn Samuel bantz tetz Saúl.
9 Na chijatx cuntunin quib Samuel tu Saúl yi jeꞌn xtxꞌixpul Kataj yi tajtzaꞌkl Saúl, nin tul yi jun kꞌejaꞌtz bajij cyakil yi techl chi alijt tan Samuel tetz.
10 Ej i tzun yi cyoponeꞌn Saúl tu yi mos yi xomij teꞌj Gabaa, eꞌ el tzaj jun kꞌuꞌj elsanl stziꞌ Ryos tan chicꞌulcheꞌn. Nin tzun oc lacꞌpuj yi espíritu cwent Kataj twankil Saúl, nin tzun oc iꞌ-tz tan xtxoleꞌn yi yol Ryos chi quitaneꞌn yi eꞌ mas elsanl stziꞌ Kataj. 11 Ma yi eꞌ wunak yi cyajskeꞌn wutz Saúl, nin yi quilol yi mbi cuꞌn bajij teꞌj iꞌ, nin tzun cyaltz squibil quib: “¿Mbi tzun mbajij teꞌj yi cyꞌajl Quis? ¿Iꞌ poloꞌ jun elsanl stziꞌ Ryos?” cheꞌch tzun bantz. 12 At tzun jun ẍchixoꞌl yi eꞌ wunakaꞌtz yi tal: “¿Ma yi eꞌ mas elsanl stziꞌ Ryoseꞌj, naꞌ tzun cyetz chitaj? Quiꞌc na ban yi naꞌ scyetz taj jun, na alchok scyetz baꞌn tzꞌoc tetz elsanl stziꞌ Ryos.” Tan yi xtxolbilaꞌtz, ja xeꞌtij yi yoleꞌj ẍchixoꞌl wunak: “¿Ja ptzun loꞌ oc Saúl tetz jun elsanl stziꞌ Ryos?”a
13 Ma yi bajeꞌn wiꞌ yi xtxolbilaꞌtz nin tzun aj Saúl xe caꞌl. 14 Ej nin yi cyoponeꞌn, nin tzun jak yi titzꞌun yi taj Saúl scyetz:
—¿Naꞌ cxaꞌkeꞌtwok?
—Choꞌn nxkaꞌk tan chijoyleꞌn yi buruꞌ yi eꞌ txꞌakxij. Poro tan paj yi qui nin na chijal kaꞌn, nin tzun oꞌ bentz tan jakleꞌn tetz wutzileꞌn Samuel, cheꞌch.
15 —¿Mbi tzun tal Samuel tzitetz? ¡Txolaj swetz! stzun yi titzꞌun yi taj Saúl tetz.
16 —Clar cunin tal iꞌ sketz yi ten wiꞌt chijal yi buruꞌ, stzun Saúl. Poro quinin xtxol Saúl, yi mbi cuꞌn aꞌlchij tetz te yi cawuꞌn yi at tocbil iꞌ teꞌj.
17 Yi teleꞌn tiemp nin tzun oc Samuel tan chichakleꞌn tzaj cyakil yi eꞌ xonl Israel tan lokꞌeꞌn wutz Kataj le tnum Mizpa, 18 nin je tal iꞌeꞌj:
—Je yol Katajeꞌj, yi ketz kaRyosil: “Axwok jun cꞌoloj xonl Israel, in ncxeꞌlsan tzaj jakꞌ chicaꞌwl yi eꞌ aj Egipto, ja cxeꞌlwok waꞌn liwr ẍchikꞌab, nin ilen nin ja cxeꞌl waꞌn liwr ẍchikꞌab alchok wunakil yi ja choꞌc tan ibuchleꞌn,” chij Kataj. 19 Ma jaluꞌ yi eꞌ cyeruꞌ na chitzanuꞌ tan pajleꞌn caꞌwl kaRyosil, yi ilenin ja oc tan kelseꞌneꞌl tzaj ẍchikꞌab kacontr, nin yi ilenin ja oc tan kelseꞌneꞌl tzaj tul sotz cꞌuꞌlal. Nin ja choꞌcuꞌ tetz pajol caꞌwl tan paj yi nchijakuꞌ jun chireyiluꞌ yil tzꞌoc tan chicaweꞌnuꞌ. Chaꞌstzun te tajweꞌn tan cyuleꞌnuꞌ swutz Kataj. Chimoleꞌ tzaj quibuꞌ, eꞌuꞌ coblaj kꞌuꞌj xonl Israel, nin tajweꞌn chuꞌluꞌ chijunalenuꞌ yi jujun kꞌuꞌj eꞌuꞌ, stzun Samuel bantz scyetz.
20 Ej nin tzun eꞌ saj ẍchakol Samuel cyakil yi eꞌ kꞌuꞌj xonl Israel tan sajeꞌn chiẍkansal quib nakaꞌj. I tzun yi jun kꞌuꞌj xonl Efraín eꞌ jeꞌ txaꞌijtz, na choꞌn nojeꞌn cyen yi techl scyeꞌj. 21 Nin tzun eꞌ saj ẍchakol cyakil yi eꞌ xonl Benjamín. Ma yi cyuleꞌn nakaꞌj, choꞌn tzun nojeꞌn cuꞌn yi swert squibaj yi eꞌ xonl Matri, wiꞌtzbilt len nojeꞌn cyen yi techl teꞌj Saúl yi cyꞌajl Quis. Nin tzun eꞌ octz tan joyleꞌn ẍchixoꞌl, poro qui nin jal cyaꞌn. 22 Nin tzun chijaktz tetz Kataj, yi naꞌ atit cyent Saúl. Nin tzun tal Kataj yi at Saúl nakaꞌj, nin yi choꞌn tewaꞌn tib xoꞌl eꞌchk cyektz. 23 Lajkeꞌl nin tzun eꞌ beneꞌn niltz tan telseneꞌl tzaj kale tewaneꞌt tib. Ma yi ẍchajxeꞌn Saúl ẍchiwutz cyakil, nin tzun iꞌlwijtz yi chin wutz tkan nin iꞌ, nin yi cyaꞌl nin jun xonl Israel najk jepon wutz tkan te yi xulchub. 24 Nin tzun jak Samuel scyetz cyakil:
—¿Na peꞌ quil ninuꞌ yi jun yi ja jeꞌ xtxaꞌol Kataj tan toqueꞌn tetz chireyiluꞌ? ¡Cyaꞌl nin jun ẍchixoꞌluꞌ eꞌuꞌ jun cꞌoloj tanum Israel, yi cheꞌnk chi iꞌ!
—¡Yaꞌstzun kareyil! cheꞌch tzun yi eꞌ wunak bantz.
25 Nin oc Samueltz tan xtxoleꞌn cyakil yi eꞌchk caꞌwl yi tajweꞌn tan chibnol taneꞌn, nin cuꞌ stzꞌibaltz tul jun liwr yi choꞌn cyajeꞌn cyen le caꞌl Kataj. Yi stzajeꞌn wiꞌ cyakil, nin tzun tal scyetz cyakil tan cyajeꞌn xeꞌak chicaꞌl. 26 Nchaꞌtz Saúl nin aj xe tetz caꞌl jalen Gabaa, nin tzun oc tan Kataj le chiwiꞌ cobox yi chin cham nin eꞌ, tan chixomeꞌn nin tetz xkꞌajlab Saúl. 27 Poro ilen nin at eꞌ yi eꞌ oc tan yolcheꞌn Saúl: “¿I ptzun nocxaꞌseꞌj tzꞌocpontz tan kacolcheꞌn ẍchikꞌab kacontr taneꞌntz?” Wiꞌnin eꞌ, eꞌ oc tan telseꞌn kꞌej Saúl, nin qui nin cyakꞌ kꞌej. Poro qui nin oc iꞌ tan xtxumleꞌn chiyol. Yaꞌstzun bantz yi jeꞌn txaꞌij Saúl tetz yi bajx rey cwent Israel.