Yi xcyeweꞌn Saúl scyeꞌj yi eꞌ amonita
11
1 I tzun bantz, yi teleꞌn cobox kꞌej, nin tzun eꞌ opon yi chireyil yi eꞌ aj Amón yi na biꞌaj Nahas tu yi tetz sanlar tan chixuxeꞌn yi eꞌ aj Jabes cwent Galaad. Ej i tzun cyal yi eꞌ aj Jabes scyetz:
—Baꞌnt cuꞌn yi bnixok jun trat kakꞌun tuchꞌuꞌ, na yi oꞌ ketz list oꞌ tan koqueꞌn jakꞌ caꞌwluꞌ, nin baꞌn lcawunuꞌ skeꞌj, cheꞌch tzun yi eꞌ aj Jabes bantz.
2 Poro yi Nahas yi chireyil yi eꞌ aj Amón nin tal:
—Baꞌn tzimban jun trat tzituchꞌ, poro ntin ko cuj itaꞌn yil noꞌc tan telseꞌn len yi bakꞌ iwutz yi at le isbal, bantz teleꞌn itxꞌix tircuꞌn axwok yi axwok xonl Israel, stzun yi reyaꞌtz bantz.
3 Je tzun cyal yi eꞌ wutzileꞌn tijl cꞌuꞌlal tetz yi rey Nahas:
—Takꞌuꞌ bin amaꞌl sketz tetz juk kꞌej, tan chibeneꞌn chakum kaꞌn ẍchixoꞌl yi eꞌ mas kaxonl beneꞌn tziꞌn Israel, nin ko cyaꞌl tzꞌoc tan kuchꞌeyeꞌn, baꞌn tzun lbanuꞌ yi tajbiluꞌ-tz skeꞌj, cheꞌch tzun bantz tetz yi chireyil yi eꞌ aj Amón.
4 Nin tzun eꞌ opon yi eꞌ chakumtz Gabaa, kale atit caꞌl Saúl, nin tzun baj chitxoliltz ẍchixoꞌl wunak yi mbi cuꞌn bajij cwent Jabes. Yi quibital yi eꞌ wunak yi xtxolbilaꞌtz, tircunin tzun eꞌ cyokꞌeꞌntz. Wiꞌnin chiẍchꞌineꞌn tan oꞌkl scyeꞌj chixonl. 5 Ej, uleꞌn nin tzun ban Saúl tu cob wacẍ, na choꞌn sajeꞌn iꞌ le tetz cojbil:
—¿Mbi tzun na bajij, mbi tzuntz yi wiꞌnin cyokꞌeꞌn cyakil wunak? stzun Saúl bantz.
Chitxolil tzuntz tetz Saúl yi mbi cuꞌn quibit scyetz yi chichakum yi eꞌ aj Jabes.
6 Yi tbital Saúl yi xtxolbilaꞌtz, toqueꞌn tzun lacꞌp yi espíritu Kataj twankil, nin tzun jal jun chin chiꞌch cꞌuꞌlal tetz. 7 Nin tzun eꞌ quim yi cob wacẍ taꞌn. Piẍuꞌn cuꞌn tzun tulej chiwankil, nin tzun eꞌ ben ẍchakol cobox chakum lakak amaꞌl cwent Israel. Cyꞌaꞌn len jujun piẍ te yi wacẍaꞌtz cyaꞌn. I tzun na cyal yi eꞌ chakumtz ẍchixoꞌl wunak: “Yaꞌstzun sbajok chi taneꞌn yi jun piẍ wacẍeꞌj, te cyawun yi eꞌ yi quil chixom nin scyeꞌj Saúl tu wutzileꞌn Samuel tan oyintziꞌ,” cheꞌch tzun na bantz. Nin tzun eꞌ xob yi eꞌ wunaktz, nin cyakil cunin tzun eꞌ, eꞌ ban list quib, nin junit tzun ban chitxumuꞌntz. Nin tzun eꞌ baj ben xomoktz scyeꞌj Saúl tu wutzileꞌn Samuel.
8 I tzun yi toqueꞌn Saúl tan cyajleꞌn yi yaj yi xomcheꞌ teꞌj le tnum Bezec, ox tzun cient mil yi eꞌ len aj Israel, nin junaklaj mil yi eꞌ len aj Judá. Yaꞌstzun cyajlal yi yaj yi chimol quibtz. 9 Ej i tzun tal Saúl scyetz yi eꞌ chakum yi eꞌ saj cwent Jabes:
—Banwok pawor tan talcheꞌn scyetz yi eꞌ aj Jabes yi kopon eklen chajcuꞌn kꞌej tan chicolcheꞌn ẍchikꞌab chicontr, stzun Saúl bantz scyetz. Nin tzun eꞌ aj yi eꞌ chakum.
Ma yi cyoponeꞌn, nin tzun chitxol yi stziblal yi tal Saúl scyetz. Wiꞌnin tzun chitzatzineꞌn yi eꞌ aj Jabes yi quibital yi jun balaj stziblalaꞌtz. 10 I tzun cyaltz tetz Nahas yi chireyil yi eꞌ aj Amón, yi chicontr:
—Iluꞌ jun cꞌoloj rey, eklen kocpon jakꞌ caꞌwluꞌ, nin baꞌn sbanuꞌ yi tajbiluꞌ skeꞌj, cheꞌch bantz tetz.
11 Ma le junt eklok nin tzun oc Saúl tan chinucꞌleꞌn yi eꞌ sanlar. Ox tzun kꞌuꞌj eꞌ tulejtz. Taxk nin tzun ul skil yi cyocomponeꞌn pokꞌtz ẍchixoꞌl yi eꞌ aj Amón. Chin xoꞌwbil nin ban, na wiꞌnin contr eꞌ quim. Jalaj cunin tzun kꞌej ban yi jun chin oyintziꞌaꞌtz.
Ma yi eꞌ contr yi eꞌ el colpuj, eꞌ baj el tunin tzun xit-tz tan coloꞌn ib. Quiꞌc nin cob yi junitk eꞌ beneꞌt, ma na eꞌ el tunin xit. 12 At tzun jujun aj Jabes cyaltz tetz Saúl:
—¿Naꞌ scyetz yi eꞌaꞌtz yi cabej chicꞌuꞌl tan toqueꞌn Saúl tetz kareyil? Chisajken yi eꞌaꞌtz skawutz jalcuꞌn, tan cyeleꞌn cuꞌn kaꞌn swutz, cheꞌch tzun bantz.
13 Qui nin tzun takꞌ Saúl amaꞌltz scyetz tan chibnol yi cyajbil:
—Cyaꞌl jun squimok jaluꞌ, na ja oc Kataj Ryos tan kuchꞌeyeꞌn cyakil oꞌ, yi oꞌ xonl Israel, stzun Saúl bantz.
14 Ma Samuel nin taltz scyetz chicyakil:
—Quin jalen Gilgal tan bixbajeꞌn yi caꞌwl tkꞌab Saúl.
15 Chicyakil cunin tzun eꞌ, eꞌ bentz Gilgal, nin swutz cuꞌn Kataj Ryos, nin ẍchiwutz cuꞌn cyakil yi eꞌ wunak, yi bixeweꞌn cyen Saúl tetz rey. Nin tzun eꞌ octz tan pateꞌn chitxꞌixwatz swutz Kataj tan ẍchajleꞌn yi at tzatzin paz ẍchixoꞌl tu Ryos.
Wiꞌnin tzun chitzatzineꞌn yi eꞌ wunak te Saúl, nin nchaꞌtz Saúl wiꞌnin stzatzineꞌntz te yi mbi cuꞌn bajij. Yaꞌstzun bantz yi bixeweꞌn yi bajx rey cwent Israel.