Yi cyajeꞌn cyen tkꞌol wutzileꞌn Samuel yi caꞌwl tkꞌab Saúl
12
1 Ej nin tzun jilon Samuel ẍchiwutz cyakil yi eꞌ xonl Israel, i tzun taltz:—Chinch wetz ja lajluchax ẍchiwutzuꞌ yi ja imban yi cyajbiluꞌ, na ja bixeꞌ jun chireyiluꞌ waꞌn. 2 Nin je yi reyeꞌj yi tzꞌocpon tan chicaweꞌnuꞌ. Ma in wetz ja tijin wetz incꞌuꞌl nin ja skojax inwiꞌ, nin yi eꞌ innitxajil ateꞌ ẍchixoꞌluꞌ. Jetz yi in tzaj acꞌaj ja noꞌc tan chicaweꞌnuꞌ. 3 Ma jaluꞌ yi in wetz, cyaꞌl cunin nnoꞌqueꞌt tan majleꞌn tawun jun, nka jak noꞌc tan telseꞌn kꞌej jun ẍchixoꞌluꞌ. Nka jak intzꞌam xoꞌc tetz jun. Ko nkꞌeꞌtz bintzi na chintzan tan talcheꞌn, baꞌn lchoꞌcuꞌ tan inxochleꞌn tetz Kataj nin tetz yi rey yi ja jeꞌ xtxaꞌol iꞌ, nin list wutaneꞌn tan inchojol yi injuchbeꞌn.
4 —Quiꞌ, quiꞌc jun tir yi jajk ocuꞌ tan telseꞌn kakꞌej nka tan kabuchleꞌn, nin quiꞌc jun tir jajk ocuꞌ tan xoꞌquiꞌn skaxoꞌl, cheꞌch tetz.
5 —Yi Kataj tuml yi rey yi ja jeꞌ xtxaꞌol iꞌ, yaꞌstzun testiw teꞌj, yi quiꞌc impaltil ẍchiwutzuꞌ, stzun wutzileꞌn Samuel banintz scyetz cyakil.
—Bintzij, yaꞌstzun yi mero xtxolbil, cheꞌch yi eꞌ wunak bantz.
6 Nchaꞌtz tal Samuel yi xtxolbileꞌj:
—Yi Kataj yi kaRyosil, iꞌ oc tan cyelseneꞌl tzaj yi eꞌ kamam kateꞌ jakꞌ chicaꞌwl yi eꞌ aj Egipto, nin eꞌ xcon Moisés taꞌn tu Aaróna tetz chibajxom tan cyelseneꞌl tzaj. 7 Chaꞌstzun te quibit tzaj cuninuꞌ cyakil yi tzintxoleꞌ, nin Kataj testiw teꞌj. Katxumeꞌ yi eꞌchk takleꞌn balaj yi mban iꞌ scyeꞌjuꞌ nin katxumeꞌ cyakil yi eꞌchk takleꞌn balaj yi mban cyen te yi ateꞌ tzaj yi kamam kateꞌ. 8 Te yi cyoponeꞌn kꞌajtzun kamam Jacow scyuchꞌ yi eꞌ mas xonl iꞌ le amaꞌl Egipto, eꞌ octz yi eꞌ aj Egipto tan chibuchleꞌntz. El tzun chitziꞌ-tz tan jakleꞌn ẍchꞌeybil cyetz tetz Kataj,b nin tzun ben ẍchakol iꞌ Moisés tu Aarón tan cyelseneꞌl liwr ẍchikꞌab yi eꞌ aj Egiptojaꞌtz, tan cyuleꞌn tan chinajeweꞌn le luwareꞌj. 9 Poro yi eꞌ cyetz, nin el Kataj Ryos te chicꞌuꞌl. Nin tan paj yi yaꞌtz eꞌ ban, nin tzun takꞌ Kataj amaꞌltz tan cawuneꞌn Sísarac squibaj, yi wiꞌtz cyajcawil yi eꞌ sanlar yi rey Jabín, yi na cawun cwent Hazor. Nchaꞌtz eꞌ cawun yi eꞌ filisteyd squibaj, tu yi eꞌ rey cwent Moabe yi eꞌ oc tan oyintziꞌ scyeꞌj.
10 ”Yi bajijeꞌn cyakil yi xtxolbilaꞌtz, nin tzun el chitxumtz tetz yi iꞌtz chipaj, na nin chijuch quil swutz Ryos, yi cyoqueꞌn tan lokꞌeꞌn wutz eꞌchk teblal Baal tu Astarté. Yi lajluchaxeꞌn yi chipaltilaꞌtz ẍchiwutz, nin tzun cuꞌ chiwutz tetz Kataj tan toqueꞌn tan quichꞌeyeꞌn ẍchikꞌab chicontr, nin tzun chisuktz yi ntin at cyocbil tan lokꞌeꞌn wutz iꞌ.f
11 ”Ej tan yi xtxolbilaꞌtz nin tzun eꞌ saj ẍchakol Kataj Jerobaal,g Barac,h Jeftéi tu in wetz yi in Samuel,j tan koqueꞌn tan cyelseꞌn lenuꞌ liwr ẍchikꞌab chicontruꞌ, tan jaleꞌn tzatzin paz. 12 Ma jaluꞌ, yi nquiluꞌ yi at tulbil Nahas yi chireyil yi eꞌ amonita tan oyintziꞌ scyeꞌjuꞌ, ja chijakuꞌ tan bixeweꞌn jun chireyiluꞌ waꞌn tan toqueꞌn tan chicaweꞌnuꞌ.k Lastum, qui nin na el chitxumuꞌ tetz yi cyeruꞌ chireyiluꞌ iꞌtz Kataj yi kaRyosil. 13 Poro, je bin yi reyeꞌj yi ja chijakuꞌ tetz Kataj. Iꞌ mmakꞌon scyeruꞌ. 14 I bin jaluꞌ, yi chitareyuꞌ iꞌtz, tan lokꞌeꞌn wutz yi Kataj Ryosaꞌtz, nin tan cyoqueꞌnuꞌ cꞌulutxum jak caꞌwl iꞌ. Tajweꞌn yil chibanuꞌ taneꞌn yi mbi cuꞌn ltal iꞌ scyeruꞌ, na cyakil eꞌuꞌ tuml chireyiluꞌ tajweꞌn yil chixomuꞌ teꞌj yi mbi cuꞌn ltal Kataj yi kaRyosil scyeruꞌ. 15 Na ko quil chibanuꞌ yi tetz tajbil, nin ko quil choꞌcuꞌ cꞌulutxum jakꞌ caꞌwl iꞌ, tzꞌocpon tzuntz tan chicawseꞌnuꞌ tuml chireyiluꞌ.
16 ”Ma jaluꞌ quil chiyucanuꞌ. Tajweꞌn yil chicyajuꞌ tzoneꞌj, nin squileꞌ jun chin techl yi tzꞌul kojol Kataj. 17 Te yi tiempeꞌj yaꞌstzun yi tiemp tan jeꞌseꞌn yi cosech tetz triw, nin quiꞌc jun tir yi na cuꞌ aꞌbal tul yi tiempeꞌj, poro yi jaluꞌ, copon inwutz tetz Kataj, tan sajeꞌn jun chin aꞌbal tu kꞌancyok taꞌn, bantz teleꞌn chitxumuꞌ tetz, yi ploj yi cyajtzaꞌkluꞌ swutz iꞌ yi nchijakuꞌ jun chireyiluꞌ tetz.
18 Toqueꞌn tzun Samueltz tan nachleꞌn Kataj, nin jalcuꞌn xeꞌtij jun chin cyekꞌekꞌ aꞌbaltz, yi wiꞌnin kꞌancyoktz tul. Chicyakil cunin tzun yi eꞌ wunak eꞌ xobtz tetz Ryos nin tetz Samuel. 19 Cyakil cunin tzun eꞌ cyal yi xtxolbileꞌj tetz Samuel:
—Bneꞌuꞌ jun pawor sketz, yi oꞌ ẍchakumuꞌ, cuk wutzuꞌ tetz yi Ryosuꞌ tan qui kaxiteꞌn cuꞌn. At wiꞌnin kapaj katxꞌokꞌbeꞌn swutz iꞌ, nin ja jal mas kil swutz iꞌ yi nkajak junt kareyil yi apart swutz iꞌ, cheꞌch tzun bantz.
20 —Quil chixobuꞌ tetz, poro bintzij nin yi chin ploj nin mban cyajtzaꞌkluꞌ, poro quil chiẍkanslen quibuꞌ jakꞌ caꞌwl Kataj, ma na choꞌkuꞌ tan cꞌuꞌlajeꞌn tetz cuꞌn cyalmaꞌuꞌ. 21 Quil choꞌcuꞌ tan lokꞌeꞌn wutz eꞌchk ryos yi banij cuntuꞌ taneꞌn, yi quil chixcyeꞌ tan claxeꞌn jun, na banij cuntuꞌ quitaneꞌn. 22 Na kol choꞌcuꞌ tan takꞌleꞌn keꞌj Kataj tetz cuꞌn cyalmaꞌuꞌ, quil tzꞌoc tan chicawseꞌnuꞌ. Na yi tetz tajbil iꞌtz yil choꞌcuꞌ tetz mero tanum iꞌ. 23 Ma yi in wetz, sjalok wil swutz Kataj yi nink chintaneꞌ tan cꞌucheꞌn chibanluꞌ tetz. Nchaꞌtz tajweꞌn noꞌc tan ẍchajleꞌn scyeruꞌ yi ẍeꞌn chibanuꞌ tan chixomeꞌnuꞌ te yi balaj ajtzaꞌkl yi jicyuch teꞌj, bantz quil jal chipaltiluꞌ swutz iꞌ. 24 Yi eꞌ cyeruꞌ ntinaꞌtz na taj yil chibanuꞌ taneꞌn yi tajbil Kataj, nin yil choꞌcuꞌ tan cꞌuꞌlajeꞌn iꞌ tetz cuꞌn cyalmaꞌuꞌ, nin yil tzꞌulk txꞌakx ẍchicꞌuꞌluꞌ yi wiꞌnin eꞌchk takleꞌn balaj na ban iꞌ skaxoꞌl. 25 Poro tzꞌok te cyajaluꞌ, kol chipajuꞌ caꞌwl Kataj, nin lchibanuꞌ cyeruꞌ cyajbiluꞌ, jun cuꞌn yol tzꞌocpon iꞌ tan chicawseꞌnuꞌ tuml chireyiluꞌ, stzun wutzileꞌn Samuel bantz scyetz.