Yi eꞌchk txꞌacoꞌn yi ban Saúl nin yi toqueꞌn Ryos tan makleꞌn wutz
13
1 Ej i tzun bantz, nsken tzun yajin Saúl yi toqueꞌn tan cawuꞌn tibaj Israel. Nin te yi nsken el coboxix yob taꞌn tan cawuꞌn, 2 nin tzun eꞌ jeꞌ xtxaꞌol ox mil sanlar ẍchixoꞌl yi eꞌ xonl Israel. Cob mil eꞌ cyaj cyen teꞌj le tnum Micmas nin txoꞌlak eꞌchk wutz cwent Betel. Ma yi junt mil choꞌn tzun eꞌ cyajeꞌntz jakꞌ caꞌwl yi Jonatán, yi tetz cyꞌajl, le tnum Gabaa cwent chitanum yi eꞌ xonl Benjamín. Ma yi eꞌ mas wunak, nin tzun eꞌ aj ẍchakol Saúl xeꞌak chicaꞌl. 3 Xcyeꞌ tzun Jonatán scyeꞌj yi jun kꞌuꞌj sanlar filistey yi ateꞌ Gabaa tan qꞌuicyꞌlomiꞌn. Nin tzun quibit yi eꞌ filistey yi najlcheꞌ le cyetz chitanum, yi mbi cuꞌn bajij. Yi tbital yi rey Saúl yi nsken quibit yi eꞌ rey cwent filistey, nin tzun ben mantar iꞌ tan tocseꞌn chun tulak eꞌchk tnum cwent Israel, tan chibnol list quib tan oyintziꞌ.4 Cyakil cunin tzun yi eꞌ xonl Israel quibit yi xcyeꞌ Saúl tan chixiteꞌn cuꞌn yi jun kꞌuꞌj filisteyaꞌtz yi ateꞌ pon Gabaa tan qꞌuicyꞌlomiꞌn. Nin nchaꞌtz ja el chitxum tetz yi wiꞌnin ẍchiꞌcheꞌn chicꞌuꞌl yi eꞌ filistey scyeꞌj tan paj. Chimolol tzun quib cyakil yi eꞌ sanlar cwent Israel te Saúl le amaꞌl Gilgal tan ẍchꞌeyeꞌn iꞌ. 5 Iteꞌn nin eꞌ banaꞌs yi eꞌ filisteytz, nin baj cuꞌ chimolol quib tan oyintziꞌ scyeꞌj yi eꞌ xonl Israel. List quitaneꞌn junaklaj mil careꞌt tetz oyintziꞌ, tu kak mil sanlar yi ateꞌn teꞌj chej scyuchꞌ jun chin cꞌoloj sanlar yi xoꞌn cun tuꞌ quitaneꞌn, poro yi cyajlal yi eꞌaꞌtz niꞌ cuꞌn ban chi tajlal yi samlicyꞌ yi at tzi mar, yi qui nin ajlbeꞌn tetz. Ej nin choꞌn cweꞌn chicampamentz cyaꞌn le amaꞌl Micmas tetz cobox kꞌej, swutz len yi tnum Bet-avén.
6 Nin tzun eꞌ oc yi eꞌ xonl Israel wutz peꞌm, na yi xeꞌteꞌn yi oyintziꞌ, baꞌnt cuꞌn teleꞌn cyewal quib xoꞌlak cꞌub, tulak jul, nin tulak eꞌchk kotxꞌ. 7 Wiꞌnin eꞌ, eꞌ icyꞌ wi yi aꞌ Jordán, tan chicolol quib le amaꞌl cwent Gad nin cwent Galaad. Ma Saúl nin cyaj tetz Gilgal. Xomcheꞌ yi eꞌ tetz sanlar teꞌj, poro wiꞌnin chixobeꞌn. 8 Choꞌn tzun taꞌteꞌn Saúltz tetz juk kꞌej tan ẍchꞌiweꞌn yi wutzileꞌn Samuela quib yi bixeꞌ cyaꞌn. Poro qui nin na oponoꞌk chan Samuel Gilgal. Wiꞌnin tzun cyajeꞌn tzaj pakxuj yi eꞌ wunak bantz tan paj yi quinin na oponoꞌk Samuel. 9 Cawuneꞌn tzun Saúltz, i tzun taltz:
—Na waj cobox awun tan chipateꞌn cuꞌn tetz katxꞌixwatz tan jaleꞌn cuybil kapaj tetz Ryos. Nin na waj coboxt tan ẍchajleꞌn yi ja wiꞌt kabansaj kib swutz Ryos. Iꞌ tzun octz tan pateꞌn yi eꞌchk txꞌixwatzaꞌtz.b
10 I nin tzun na baj wiꞌ yi pateꞌn yi txꞌixwatzaꞌtz yi toponeꞌn wutzileꞌn Samuel. Lajkeꞌl nin tzun beneꞌn Saúl tan cꞌulcheꞌn, nin tan kꞌajlaꞌn tetz. 11 Ma Samuel nin octz tan yajleꞌn:
—¿Nxac ncuꞌ acawul awib tan banleꞌn yi munlaꞌtz? stzun Samuel tetz.
—Max cꞌuꞌluꞌ, poro iꞌtz tan paj yi wiꞌnin cyajeꞌn yi eꞌ wunak na qui nin na uꞌluꞌ te yi kꞌejlal yi bixbaꞌnt kaꞌn, nin yi eꞌ filistey ja ul chimolol quib Micmas. 12 Chaꞌstzun te mintxum yi quicunin batz chuꞌl chan tan oyintziꞌ skeꞌj tzoneꞌj, nin ntaxk nin kabnaj kib tkꞌab Kataj. Ja tzun imbuch wib tan pateꞌn yi txꞌixwatz, stzun Saúl bantz.
13 —¡Quiꞌc muꞌẍ xtxolbil yi awajtzaꞌkl yi ncuꞌ abnol! Yi nink maban taneꞌn yi caꞌwl yi tal Kataj Ryos tzatz, ja kloꞌ cẍbixeꞌ taꞌn tetz rey cwent Israel tetz cyakil tiemp nin ẍchixconk kloꞌ yi eꞌ axonl sbneꞌ opon tunintz, poro yi jaluꞌ nkꞌeꞌtz sbneꞌ. 14 Ma jaluꞌ, quiꞌt choꞌc yi eꞌ axonl tan cawuꞌn sbneꞌ opon tunintz, na tzꞌocpon Kataj Ryos tan joyleꞌn jun yi baꞌn kꞌukeꞌ cꞌuꞌl iꞌ teꞌjc tan cawuneꞌn squibaj yi eꞌ tanum iꞌ, na yi aẍatz qui nin ncẍeꞌl cuꞌn te yi caꞌwl yi talnak iꞌ tzatz, stzun wutzileꞌn Samuel bantz tetz Saúl.
15 Ej eleꞌn nin tzun ban Samueltz le tnum Gilgal nin icyꞌ tcyꞌaj yi tetz beꞌ tan tponeꞌn Gabaa cwent Benjamín. Ma yi eꞌ mas sanlar nin eꞌ ben xomok teꞌj Saúl tan oyintziꞌ. Yi toqueꞌn Saúltz tan cyajleꞌn yi eꞌ sanlar yi xomcheꞌ teꞌj, ja jepon tajlal tetz kak cient chixoneꞌn. 16 Yi Saúl tu yi cyꞌajl Jonatán scyuchꞌ yi eꞌ sanlar yi xomcheꞌ scyeꞌj, choꞌn tzun eꞌ cyajeꞌn cyentz le amaꞌl Gabaa cwent Benjamín, ma yi eꞌ filistey choꞌn tzun cyaꞌteꞌntz tan chꞌiwaꞌn le amaꞌl Micmas. 17 Ej nin at ox kꞌuꞌj filistey eꞌ eltz le amaꞌl kale ateꞌt tan ujleꞌn. At jun kꞌuꞌj choꞌn beneꞌn tul yi beꞌ yi na opon Ofra, jun amaꞌl cwent yi tnum Sual. 18 Ma junt kꞌuꞌj choꞌn eꞌ beneꞌn jalen Bet-orón. Nin yi toxiꞌn kꞌuꞌj filistey choꞌn cyoponeꞌn wi jun juꞌwtz yi at tibeꞌn yi jocoꞌj tetz Zeboim yi na tzaj pont te yi amaꞌl yi tzꞌinunin tuꞌ.
19 Ej i tzun, te yi jun tiempaꞌtz, qui nin cyakꞌ amaꞌl yi eꞌ filistey tan xconeꞌn jun txakꞌol chꞌichꞌ ẍchixoꞌl yi eꞌ xonl Israel na nin chitxum yi eꞌ filistey yi tan paj yi quiꞌc jun txakꞌol chꞌichꞌ ẍchixoꞌl, quil bnix eꞌchk chispar tu lans cyaꞌn tan oyintziꞌ scyeꞌj. 20 Chaꞌstzun te choꞌn na chopon yi eꞌ xonl Israel ẍchixoꞌl yi eꞌ filistey tan jeꞌseꞌn wiꞌ chimaꞌcl, chi taneꞌn chꞌoc, tu eꞌchk cchiluꞌ. 21 Nin chin car nin na chichoj yi eꞌ xonl Israel tan jeꞌseꞌn wiꞌ chimaꞌcl. Cob cuꞌn tir jeꞌnak jamel. 22 Chaꞌstzun te cyakil yi eꞌ sanlar yi xomcheꞌ scyeꞌj Saúl tu Jonatán yi cyꞌajl iꞌ, quiꞌc jun spar cyꞌaꞌn cyaꞌn, ma na ntin yi eꞌ cob cyetz. 23 Ej nin tzun eꞌ icyꞌ tzaj jun kꞌuꞌj chisanlar yi eꞌ filistey txoꞌl wutz cwent Micmas.