Yi mbi cuꞌn ban Jonatán
14
1 Ma Jonatán yi cyꞌajl Saúl, nin tal tetz yi aj chꞌeyum yi xomij teꞌj:—Xomen tzaj sweꞌj, kicyꞌoken jalaj cyꞌen yi tzanlaꞌ nin cheꞌ kabiyeꞌ cyakil yi jun kꞌuꞌj filistey yi ateꞌ-tz wiꞌwtz, stzun iꞌ tetz yi ẍchꞌeyum.
Poro qui nin tal Jonatán yi xtxumuꞌn tetz Saúl, yi taj. 2 Choꞌn tzun at cyen tetz Saúl le campament yi at jakꞌ jun wiꞌ granado yi ateꞌn wi jun juꞌwutz, kale na oqueꞌt yakꞌpeꞌn triw, tuml yi kak cient sanlar yi xomcheꞌ teꞌj. 3 Nin yi cyꞌanl tetz yi efod iꞌtz Ahías cyꞌajl Ahitob nin xonl Icabod, cyꞌajl Finees nin iꞌ jun mam yi kꞌajtzun Elí yi wiꞌtz paleꞌ banak tetz Kataj le tnum Siló.
Poro cyaꞌl nin jun el xtxum tetz ko nin el Jonatán ẍchixoꞌl. 4 Ma yi iꞌ tetz, ntin na tzan tan xtxumleꞌn yi ẍeꞌn tzꞌopon kale ateꞌt yi jun kꞌuꞌj filistey. Nin yi beꞌ choꞌn na icyꞌ cuꞌn txoꞌl cob wutz cꞌub yi chin wutz tkan nin yi na biꞌaj Boses nin Sene. 5 Jun wutz cꞌubaꞌtz at swutz len Micmas, nin yi junt swutzoꞌc tzaj Gabaa.
6 Ej i tzun tal Jonatán tetz yi ẍchꞌeyum:
—Quin sweꞌj, kicyꞌoken le jalajt, kale ateꞌt yi jun kꞌuꞌj kacontraꞌtz. Qui cunin batz tzꞌoc Kataj tan kuchꞌeyeꞌn, na quiꞌc nin qꞌuixbel swutz Kataj tan tkꞌol amaꞌl sketz tan katxꞌaconeꞌn, quiꞌc na ban ko jun cꞌoloj cunin oꞌ nka coboxeꞌn tal kaxoneꞌn.
7 —Bneꞌuꞌ tircuꞌn yi mbiꞌtz na icyꞌ tcꞌuꞌluꞌ, na yi in wetz list wutaneꞌn tan ẍchꞌeyeꞌnuꞌ, stzun yi ẍchꞌeyum Jonatán tetz.
8 —Kicyꞌoken jalcuꞌneꞌj kale ateꞌt, nin baꞌn kachaj nin kib scyetz. 9 Nin kol cyal tzaj sketz yi kaxcyek cuntuꞌs kale atoꞌt jalen yil chicuꞌul skeꞌj, baꞌn lkacyajtz tan chichꞌiweꞌn. 10 Poro kol cyal sketz tan kajeꞌn poneꞌn kale ateꞌt cyetz, baꞌn tzun kaban cyajbiltz, na yaꞌstzun techl sbneꞌ yi stkꞌeꞌ Kataj amaꞌl sketz tan kaxcyeweꞌn scyeꞌj, stzun Jonatán bantz.
11 I nin tzun cyulejtz quib yi tal Jonatán, nin tzun eꞌ opontz ẍchinakaꞌjil chicontr, ma yi sajeꞌn quilol chicontr i tzun cyaltz: “Xmaywok nin yi eꞌ hebrey yi tzan cyeleꞌn tzaj tulak eꞌchk jul kale cyewuneꞌt quib,” cheꞌch tzun bantz squibil quib. 12 Nin tzun eꞌ ẍchꞌin tzajtz scyetz Jonatán:
—¡Cajeꞌnwok tzaj tzoneꞌj, nin skatxoleꞌ jun takleꞌn tzitetz! cheꞌch scyetz.
—Quin kajeken, chij Jonatán tetz yi ẍchꞌeyum, —na iꞌtz jun techl yi stkꞌeꞌ Kataj amaꞌl sketz tan kaxcyeweꞌn scye kacontr, yi oꞌ ketz yi oꞌ xonl Israel, stzun iꞌ bantz.
13 Eꞌ jeꞌn tzun lacꞌan Jonatán wutz cꞌubaꞌtz tu yi ẍchꞌeyum, nin yi eꞌ contr yi na cheꞌ noj quen swutz Jonatán na cheꞌ toltzaj, ej nin list yi mos yi xomt tzaj tan chiwiꞌtzeꞌn cuꞌn. 14 Te jun tiraꞌtz eꞌ quim loꞌ junak contr cyakꞌun Jonatán, tul jun amaꞌlaꞌtz. 15 Cyakil cunin tzun yi eꞌ mas contr, yi eꞌ cyaj cyen nakaꞌjil Micmas, eꞌ xob lentz. Nchaꞌtz eꞌ ban yi cobox kꞌuꞌj yi cuꞌ chijatxol quib, wiꞌnin chixobeꞌntz. Nin te iteꞌn nin tiempaꞌtz mbajij jun chin wutzileꞌn coblaj nob. Pyort cunin tzun eꞌ ban yi eꞌ contr tan xoꞌw.
16 Ma yi eꞌ xkꞌukwil Saúl yi ateꞌ nakaꞌjil Gabaa le amaꞌl cwent yi xonl Benjamín, nin tzun ben quiloltz yi wiꞌnin cyojkeleꞌn yi eꞌ filistey tan coloꞌn ib. 17 Tlol tzun Saúl scyetz yi eꞌ tetz sanlar:
—Na waj yil jeꞌ list itaꞌn tan tilweꞌn yi ko tzꞌaknak len itajlal.
Ma yi baj jeꞌn tzaj chibiꞌ, nin tzun quiltz yi quiꞌct Jonatán tu yi ẍchꞌeyum at-tz ẍchixoꞌl. 18 Ej nin tan paj yi choꞌn at yi efod ẍchixoꞌl te tiempaꞌtz, nin tzun tal Saúl tetz Ahías:
—Cyꞌaj tzaj yi efod Kataj tzoneꞌj.
19 Nin te yi na jilon nin Saúl tetz yi paleꞌ, wiꞌnin tzun chixobeꞌn yi eꞌ filistey, na wiꞌnin chinilcaneꞌn tan coloꞌn ib. Ej nin quiꞌt na pujx cyaꞌn yi ẍeꞌn lchiban. Tlol tzun Saúl tetz yi paleꞌ:
—Baꞌnt cuꞌn quiꞌt tzacyꞌaj tzaj yi efodaꞌtz.
20 Le rat nin beneꞌn Saúl tan chimolcheꞌn yi eꞌ tetz sanlar, nin tzun eꞌ bentz tan oyintziꞌ scyeꞌj yi eꞌ filistey. Chin xoꞌwbil nin yi xoꞌw yi ateꞌ cuꞌnt yi eꞌ filistey, na eꞌ teꞌn na chibiy quib squibil quib.
21 Ma yi eꞌ xonl Israel yi nimix tiemp cyaꞌn ẍchixoꞌl yi eꞌ filistey, lajkeꞌl nin xomeꞌn chiwiꞌ scyeꞌj chitanum, na nin eꞌ oc tan quichꞌeyeꞌn yi eꞌ sanlar yi xomcheꞌ scyeꞌj Saúl tu Jonatán. 22 Nchaꞌtz yi eꞌ xonl Israel, yi eꞌ xonl kꞌajtzun Efraín, yi ateꞌ xoꞌlak wutz tan ew ib, yi quibital yi wiꞌnin cyeleꞌn ojk yi eꞌ filistey tan coloꞌn ib, nin tzun eꞌ xom nintz wutz chicoc tan chiwiꞌtzeꞌn cuꞌn. 23 Yi jun oyintziꞌaꞌtz opon jalen le amaꞌl cwent Bet-avén, na nin oc Ryos tan quichꞌeyeꞌn yi eꞌ xonl Israel tul jun chin oyintziꞌaꞌtz.
Yi xconeꞌn biꞌ Ryos tan Saúl tetz quiwel yi yol iꞌ
24 Ej i tzun bantz te jun kꞌejaꞌtz eꞌ kꞌeꞌx cunin yi eꞌ sanlar tan oyintziꞌ, na cyaꞌl nin jun nink wan, na nin tal Saúl: “Sak swutz Ryos yi ẍchicawsok cyakil yi eꞌ yil chiwan te yi ntaxk cuꞌ kꞌej, nin te yi ntaxk wicyꞌsaj incꞌuꞌl scyeꞌj yi eꞌ incontr” stzun Saúl scyetz.
25 I tzun bantz yi cyoponeꞌn yi eꞌ sanlar xoꞌl tzeꞌ, nin quil yi at wiꞌnin taꞌal cabil wunak txuc yi sajnak tuꞌ chꞌul jalen wuxtxꞌotxꞌ. 26 Nin niꞌcuꞌn taneꞌn yi cabaꞌtz chi neꞌẍ tzanlaꞌ yi na xon xoꞌl tzeꞌ. Poro cyaꞌl nin jun nink pil muꞌẍ tal, na wiꞌnin chixobeꞌn tan yi yol yi tal Saúl scyetz. 27 Ma Jonatán quiꞌc iꞌ at yi tlol yi taj yi yolaꞌtz scyetz yi eꞌ sanlar, nin tzun ben pitol wiꞌ yi txꞌamij yi cyꞌaꞌn taꞌn tul yi cabaꞌtz, nin jeꞌ bajsaltz. Le rat nin jaleꞌn walor iꞌ. 28 Nin tzun ben tlol jun sanlar tetz Jonatán:
—Yi tajuꞌ ja tal jun xtxolbil sketz yi tajweꞌn tan keleꞌn cuꞌn teꞌj, nin ja tal yi alchok scyetz yil wan jaluꞌ, jun cuꞌn yol scawsok tan Ryos. Chaꞌstzun te quiꞌc kawalor na txeꞌn kawan, chij.
29 —Ntin na tzan intaj tan chibuchleꞌn yi eꞌ katanum. Xmay tzaj in, ja jal muꞌẍ inwalor tan tuꞌ yi njeꞌ impilul muꞌẍ tal te yi taꞌal cabeꞌj. 30 Nchaꞌtz kloꞌ quitaneꞌn cyeruꞌ yi nink nchiwanuꞌ te yi eꞌchk takleꞌn yi ja chixcyeꞌuꞌ tan majleꞌn len scyetz yi eꞌ kacontr. ¡Yi nink nchiwanuꞌ mbi nin kloꞌ nchiban yi eꞌ filistey ẍchikꞌabuꞌ, ja kloꞌ chitzaj tircuꞌn! stzun Jonatán bantz.
31 Te jun kꞌejaꞌtz eꞌ xcyeꞌ yi eꞌ xonl Israel scyeꞌj yi eꞌ filistey. Yi oyintziꞌ xeꞌtij nakaꞌjil Micmas nin opon jalen Ajalón. Poro cyakil yi eꞌ sanlar xonl Israel nsken chikꞌeꞌxij tan paj quiꞌc jun takleꞌn baj cyaꞌn. 32 Ej nin tan paj yi na chiquimlen tan weꞌj, eꞌ beneꞌn tzuntz tan bajseꞌn yi eꞌchk awun yi el chimajol scyetz chicontr, chi taneꞌn cneꞌr, wacẍ tu neꞌẍ tor. Nin oc chꞌichꞌ cyaꞌntz jakꞌ chikul wuxtxꞌotxꞌ tuꞌ, nin ja baj yi chiꞌbajaꞌtz cyaꞌn yi txaꞌxeꞌt, yi atit nin ẍchꞌel. 33 Poro at eꞌ, eꞌ xochon tetz Saúl:
—At eꞌ na chitzan tan juchleꞌn quil swutz Kataj, na na chitzan tan bajseꞌn chiꞌbaj yi atit nin ẍchꞌel, cheꞌch.a
—¡Cyakil cuꞌn eꞌuꞌ, eꞌ len cuꞌnuꞌ pajol caꞌwl! Tzꞌulken jun cꞌub cyanuꞌ tzoneꞌj yi nim, tetz jun altar. 34 Nchaꞌtz cyalninuꞌ scyetz cyakil yi eꞌ sanlar yi ẍchijunal cuꞌn tzꞌulken jun mam tor cyaꞌn tzoneꞌj, nka jun cneꞌr, bantz toqueꞌn chꞌichꞌ cyaꞌn jakꞌ kul, nin baꞌn tzun chibajseꞌntz, bantz quiꞌt chijuch quil swutz Ryos, tan tuꞌ bajseꞌn txaꞌx chiꞌbaj yi atit ẍchꞌel, stzun Saúl bantz.
Inin tzun cyulejaꞌtz. Te iteꞌn nin akaleꞌnaꞌtz eꞌ baj opon. Cyꞌaꞌn len cyawun cyaꞌn tan chibiyleꞌn cuꞌn.
35 Nin tzun bnix jun altaraꞌtz tan Saúl. Yaꞌstzun yi bajx altar yi bnix taꞌn tetz Kataj. 36 Ej ma bajeꞌn wiꞌ yi xtxolbilaꞌtz tlol tzun:
—Baꞌn lkaben jaluꞌ lakꞌbal tan chixiteꞌn cuꞌn yi eꞌ filistey yi ja chiclax cyen, nin kamajeꞌl tzaj cyakil yi colijeꞌt cyaꞌn jalen cuꞌn yil tzꞌul skil, nin cheꞌ kaxiteꞌ cuꞌn chicyakil cuꞌn.
—Cuj, cheꞌch yi eꞌ sanlar, bneꞌuꞌ yi tajbiluꞌ, cheꞌch.
Ma yi paleꞌ nin tal:
—Baꞌnt cuꞌn bajx kajakeꞌ tetz Kataj yi mbiꞌtz tetz tajbil.
37 Ej, toqueꞌn tzun Saúl tan jakleꞌn tetz Kataj:
—¿Baꞌn peꞌ kol kaben tan chixiteꞌn cuꞌn yi eꞌ filistey? ¿Stkꞌeꞌ peꞌuꞌ amaꞌl sketz tan kaxcyeweꞌn cunin scyeꞌj? stzun Saúl bantz.
—Chiẍkank tzaj cyakil yi eꞌ wiꞌtz ajcaw, nin kajoyeꞌ puntil tan jalseꞌn yi aj paj. 39 Na jun cuꞌn yol, tan biꞌ Kataj Ryos, yi kaRyosil yi oꞌ xonl Israel yi squimok yi aj paj yil lajluchax yi naꞌ scyetz iꞌ. Nin quiꞌc na ban yi ko iꞌtz yi incyꞌajl Jonatán yi aj paj, tajweꞌn tan quimeꞌn iꞌ, stzun Saúl.
Cyaꞌl nin tzun jun jumintz ẍchixoꞌl yi eꞌ sanlar. 40 Chaꞌstzun te tlol Saúl scyetz cyakil yi eꞌ xonl Israel:
—Chicyajktuꞌwuꞌ-tzeꞌj, ma yi in wetz tu incyꞌajl skacyajk le jalajteꞌj.
—Bneꞌuꞌ yi tajbiluꞌ, cheꞌch tzun cyakil yi eꞌ sanlar.
41 Jakol tzun Saúl tetz Ryos:
—Iluꞌ jun cꞌoloj wajcawil, nin iluꞌ kaRyosil yi oꞌ xonl Israel ¿mbi tzuntz yi qui na stzaꞌw tzajuꞌ inyol? Ma jaluꞌ tan lajluchaxeꞌn yi ko choꞌn at yi aj pajol caꞌwl skaxoꞌl tu incyꞌajl, yil katxꞌilun, tajweꞌn tan xtxekuneꞌn tzaj yi Urim. Ma kol txekuntzaj yi Tumimb na tzun elepontz yi iꞌtz chipaj tircuꞌn yi eꞌ tanumuꞌ, yi eꞌ nitxajiluꞌ, stzun Saúl bantz tetz Kataj.
Yi cyoqueꞌn tan txꞌiluꞌn, choꞌn tzun nojeꞌn quentz te Jonatán tu taj, nin lajluchax yi quiꞌc chipaj yi eꞌ mas wunak teꞌj.
42 —Ma jaluꞌ chitxꞌilunkuꞌ skeꞌj ketz, yi in wetz tu incyꞌajl, stzun Saúl.
—Txol tzaj tircuꞌn swetz yi mbi cuꞌn mbaj abnol.
Nin tzun octz tan xtxoleꞌn tircuꞌn.
—Yi puntil iꞌtz ja baj muꞌẍ taꞌal cabil wunak txuc waꞌn, na nin mben impitol juꞌ yi intxꞌamij yi cyꞌaꞌn waꞌn. Poro list wutaneꞌn tan inquimeꞌn, stzun Jonatán.
44 —¡Nink tzꞌoc Kataj tan incawseꞌn cunin ko quil cẍquim waꞌn! stzun Saúl.
45 Ej i tzun cyal cyakil yi eꞌ sanlar tetz Saúl:
—¡Poro ẍeꞌn tzꞌocuꞌ tan biyleꞌn cuꞌn Jonatán, na tan iꞌ ja jal kꞌej Israel yi xcyeweꞌn scyeꞌj yi eꞌ kacontr wutz cꞌub! ¡Quiꞌc rmeril tan cweꞌn biyij! ¡Na tan biꞌ Kataj quiꞌc jun xiꞌil wiꞌ Jonatán nink tzꞌel cꞌapluꞌn! Na yi txꞌacoꞌn yi nkaban scye kacontr jaluꞌ iꞌtz tan tuꞌ yi ja oc Ryos tan ẍchꞌeyeꞌn iꞌ, cheꞌch tzun bantz.
Nin tan yi xtxolbilaꞌtz eꞌ xcyeꞌ yi eꞌ wunak tan colpeꞌn Jonatán tkꞌab quimichil.
46 Ma Saúl quiꞌt tzun xtxumtz tan chibeneꞌn tan chiwiꞌtzeꞌn cuꞌn yi eꞌ filistey, yi eꞌ pakxij junt tir le chitanum.
47 Tan tuꞌ yi xtxolbilaꞌtz toqueꞌn tzun Saúl tan caweꞌn cyakil yi amaꞌl cwent Israel. Nin cyakil tiemp nin oc iꞌ tan oyintziꞌ scyuchꞌ yi eꞌ contr te yi tetz tanum, yi eꞌaꞌs iꞌtz yi eꞌ aj Moab, yi eꞌ aj Amón, yi eꞌ aj Edom, tu yi rey cwent Soba, scyuchꞌ yi eꞌ filistey. Alchok amaꞌlil kale na beneꞌt Saúl tan oyintziꞌ, ilen nin ja xcyeꞌ iꞌ scyeꞌj. 48 Nchaꞌtz oc tan chimolcheꞌn jun cꞌoloj sanlar, nin xcyeꞌ tan chixiteꞌn cuꞌn yi eꞌ xonl Amalec. Nin tan yi xtxolbilaꞌtz nin xcyeꞌ iꞌ tan chisotzajeꞌn cuꞌn yi eꞌ alkꞌom yi na choꞌc tan alakꞌ scyeꞌj wunak tbeꞌ.
49 Yi eꞌ nitxajil Saúl yi eꞌ jal iꞌtz: Jonatán, Isúi, tu Malquisúa, tu cob meꞌl, yi bajx na biꞌaj Merab, nin yi caꞌp na biꞌaj Mical. 50 Nin yi txkel Saúl iꞌtz Ahinoam, meꞌl Ahimaas. Nin yi wiꞌtz ajcaw squibaj yi eꞌ sanlar Saúl na biꞌaj Abner, cyꞌajl Ner yi quitzꞌun quitzicy quib tu taj Saúl. 51 Ma Quis, yi taj Saúl tu Ner yi taj Abner, eꞌ cyꞌajl kꞌajtzun wutzileꞌn Abiel.
52 Te yi tiemp yi cawuneꞌn Saúl cwent Israel, ilenin ja jal eꞌchk oyintziꞌ ẍchixoꞌl scyuchꞌ yi eꞌ filistey. Chaꞌstzun te yi njal jun balaj yaj yi at ẍchamil tu walor tan Saúl, ja oc taꞌn ẍchixoꞌl yi tajlal yi tetz sanlar.