Yi teleꞌn kꞌej yi rey Saúl swutz Ryos
15
1 I tzun bantz nin tal Samuel yi xtxolbileꞌj tetz Saúl:—I inaꞌtz yi jun yi nsaj ẍchakol Kataj tan abixbajeꞌn tetz rey cwent Israel yi tanum iꞌ.a Chaꞌstzun te banaj taneꞌn yi mbiꞌtz tetz tajbil. 2 Ej nin je yol Kataj Ryos yi cyaꞌl na xcyeꞌ quen teꞌj: “Nocpon tan chicawseꞌn yi eꞌ amalecita, na ja chicuꞌ le chibeꞌb yi eꞌ imam iteꞌ tan chimakleꞌn te yi cyeleꞌn tzaj jakꞌ chicaꞌwl yi eꞌ aj Egipto. 3 Chaꞌstzun te tajweꞌn tan abeneꞌn tan chibiyleꞌn cuꞌn tuml cyakil yi at scyuchꞌak. Nin quil tzꞌel akꞌajab scyeꞌj. Biyweꞌ cuꞌn cyakil yi eꞌ yaj tu xnaꞌn, scyuchꞌ chinitxajil. Quiꞌc na ban ko txeꞌn cheꞌl te chitxuꞌtx. Nin biyweꞌ cuꞌn cyakil yi eꞌ cyawun, chi taneꞌn mam tor tu wacẍ tu eꞌchk cneruꞌ tu camey tu eꞌchk buruꞌ. Tajweꞌn tan teleꞌn cuꞌn chicyakil swutz,” chij Kataj, stzun Samuel.
4 Nintzun eꞌ ẍchak Saúl cyakil yi eꞌ tetz sanlar le amaꞌl Telaim. Nin octz tan tilweꞌn yi ko list quitaneꞌn tu chimaꞌcl tan chibeneꞌn tan oyintziꞌ. Nin tzun eꞌ mol quib. Yi cyajlal, iꞌtz cob cient mil sanlar xonl Israel nin lajuj mil yi eꞌ cuꞌn aj Judá. 5 Chibeneꞌn tzun Saúl le lmak tnum cwent eꞌ amalecita, nin tzun eꞌ ban list quib tan oyintziꞌ nakaꞌjil jun tal tzanlaꞌ. 6 I tzun taltz scyetz yi eꞌ quenita yi ateꞌ ẍchixoꞌl yi eꞌ amalecita:
—¡Quiteleꞌnk ẍchixoꞌl yi eꞌ amalecita, bantz quil cxeꞌlwok cuꞌn kaꞌn swutz! Na yi eꞌ itetz imam iteꞌ ja chichaj yi banl cyalmaꞌ scyetz yi eꞌ kamam kateꞌ yi cyeleꞌn tzaj Egipto.
Cyeleꞌn tzaj tzun eꞌ quenita ẍchixoꞌl yi eꞌ amalecita.
7 Ej nin tzun oc Saúl scyuchꞌ yi eꞌ sanlar tan chibiyleꞌn cuꞌn cyakil yi eꞌ amalecitaꞌtz le amaꞌl Havila jalen te yi amaꞌl cwent Shur, yi choꞌn at swutz cunin mojomil Egipto, nin eꞌ xcyeꞌ tan chibiyleꞌn cuꞌn. 8 Nchaꞌtz txꞌamxij Agag yi chireyil taꞌn, nin eꞌ quim len cyakil yi eꞌ sanlar yi reyaꞌtz tan spar. 9 Ma yi Agag qui nin quim cyaꞌn, nin qui eꞌ quim yi eꞌchk balaj awun cyaꞌn chi taneꞌn cneꞌr tu mam tor. Nin qui nin eꞌ quim yi eꞌchk neꞌẍ wacẍ cyaꞌn yi chin chicꞌatzaj nin. Nin qui nin xit yi eꞌchk takleꞌn cyaꞌn yi wiꞌnin jamel, ma na ntin xit yi eꞌchk takleꞌn yi quiꞌc mas jamel.
10 Yi wiꞌt bajijeꞌn yi xtxolbilaꞌtz nin tzun jilon Kataj tetz Samuel yi wiꞌtz paleꞌ:
11 —Lastum yi nwakꞌ amaꞌl tetz Saúl tan toqueꞌn cyen tetz rey, na ja el xajsal tib sweꞌj, na qui nin mban iꞌ taneꞌn yi wetz wajbil, stzun Kataj.
Wiꞌnin bisuneꞌn Samuel yi tbital yi yol Kataj, nin baj cuꞌn akꞌbaltz taꞌn tan cuꞌswutzil swutz Kataj tan cweꞌn tzaj xtxumuꞌn te Saúl. 12 Ma le junt eklok chin bixeꞌ skil nin, beneꞌn Samuel tan cꞌulcheꞌn Saúl. Poro nin aꞌlchij tetz yi choꞌn beneꞌn Saúl jalen Carmel, na nin bnix jun cꞌub taꞌn tan takꞌleꞌn kꞌej iꞌ tan yi jun chin oyintziꞌ. Ntin aꞌtij jun tkujtz, ma yi bnixeꞌn, icyꞌeꞌn nin bantz jalen Gilgal. 13 Beneꞌn tzun Samuel jalen Gilgal tan yol tu Saúl. Yi toponeꞌn, bajx jiloneꞌn tzaj Saúl tetz:
—Takꞌ tzaj Kataj wiꞌnin banl talmaꞌ tibuꞌ. Nin yi in wetz ja neꞌl cuꞌn te yol Kataj yi ntal swetz.
14 —Ma jaluꞌ ko ja cẍeꞌl cuꞌn te yol yi ntal Kataj tzatz, ¿mbi tzuntz yi itzꞌeꞌt nin yi eꞌ cneꞌr scyuchꞌ yi eꞌ mam tor yi na wit nin yi na chiẍchꞌin? stzun Samuel.
15 —Choꞌn chisaj ticyꞌleꞌn le chitnum yi eꞌ amalecita stzun Saúl bantz, —na cyakil yi eꞌ sanlar ja saj chicyꞌal yi eꞌchk chumbalaj mam tor tu eꞌchk balaj cneꞌr tan toyeꞌn tetz Kataj tetz chitxꞌixwatz yi patuꞌn cuꞌn sbneꞌ chiwankil. Ntinaꞌtz mmuꞌl kaꞌn. Poro tircuꞌn yi eꞌ mas ja chiquim kaꞌn, stzun Saúl bantz tetz wutzileꞌn Samuel.
16 —¡Ẍcꞌabneꞌ cyen tuꞌ! nin bit tzaj cyakil yi mbi cuꞌn tal Kataj swetz ewt akaleꞌn, chij Samuel. 17 —Te ntaxk cẍoꞌc tetz rey, quiꞌc akꞌej at, poro yi jaluꞌ aẍ yi wiꞌtz ajcaw squibaj cyakil yi coblaj kꞌuꞌj xonl Israel, na ja cẍbixeꞌ tan Kataj tetz chireyil. 18 Nin ko ja cawun Kataj tan awoqueꞌn tan chixiteꞌn cuꞌn yi eꞌ juchul ilaꞌtz, nin tan chitzajseꞌn cunin, 19 ¿nxac tzun yi ja apaj caꞌwl iꞌ? Na ja ben acꞌuꞌl te chimeꞌbiꞌl yi eꞌ acontr, nin ja ajuch awil swutz Kataj tan paj, chij Samuel tetz Saúl.
20 —¡Quiꞌ Taꞌ! Qui mimpaj caꞌwl iꞌ, ma na ja noꞌc cꞌulutxum jakꞌ caꞌwl iꞌ. Ja imban taneꞌn yi tetz caꞌwl yi tal swetz, na ja ul yi rey Agag waꞌn pres, yi chireyil yi eꞌ amalecitaꞌtz, nin tircuꞌn chiwunakil ja cheꞌl cuꞌn waꞌn swutz. 21 Poro iꞌtz yi eꞌ sanlar yi ja jeꞌ chicambal eꞌchk mam tor tu eꞌchk cneꞌr. Ntin yi eꞌchk takleꞌn balaj njeꞌ chicambal, tan toyeꞌn tetz Kataj yi kaRyosil le amaꞌl Gilgal, chij Saúl tetz Samuel.
Stzaꞌwel tzun Samuel tetz:
22 “Mas balaj swutz Kataj yi nink kaban taneꞌn yi tetz tajbil,
swutz yil koy eꞌchk oy, tu eꞌchk txꞌixwatz yi patuꞌn cuꞌn tetz.
Baꞌn tcuꞌn yil kaban taneꞌn yi tetz tajbil, nin yil kubit yi tetz yol,
swutz yil koꞌc tan toyeꞌn eꞌchk txꞌixwatz, tu ẍepuꞌil cneruꞌ wi tetz altar.c
23 Na yi eꞌ yi na chipaj caꞌwl Kataj Ryos,
niꞌcuꞌn cyetz quilaꞌtz chi til jun aj cun.
Nka niꞌcuꞌn quil tu jun yi na oc tan lokꞌeꞌn wutz eꞌchk ryos yi banij cuntuꞌ.
Niꞌcuꞌn tzun tajtzaꞌkl jun yi na paj caꞌwl Ryos tu eꞌchk ajtzaꞌklaꞌtz.
Ej nin tan paj yi qui nin ncxom te yi tetz caꞌwl,
nchaꞌtz tzun iꞌ tetz, quiꞌt xom tzaweꞌj yil ẍcawun,” stzun Samuel tetz Saúl.
24 —Bintzij, chij Saúl, ja injuch wil, na qui nin mimban taneꞌn yi caꞌwl Kataj, nin qui nin mimban taneꞌn yi teruꞌ yoluꞌ, yi taluꞌ swetz. Ma na ja chinxob scyetz yi eꞌ wunak yi xomcheꞌ sweꞌj, nin ja xom inwiꞌ scyeꞌj. 25 Poro bneꞌuꞌ pawor tan cuyleꞌn impaj, nin baꞌn yi nink xomninuꞌ sweꞌj tan cꞌuꞌlajeꞌn Kataj.
26 —Quiꞌt chinxomnin tzaweꞌj, stzun Samuel tetz, —na yi aẍatz qui nin maban taneꞌn yi caꞌwl Kataj. Nchaꞌtz tzun iꞌ tetz quiꞌt xom tzaweꞌj yil ẍcawun tibaj Israel.
27 Jeꞌn tzun paksal tib Samuel nin eleꞌn nin tzaj bantz. Poro nin saj Saúl tan stzꞌamleꞌn yi xbuꞌk yi at cuꞌn tzkul. Nin tzun el katz jun piẍ teꞌj.
28 —I cunin tzun iꞌaꞌtz mban Kataj tzaweꞌj, chi mawulej yi beꞌch wetz. Na ja wiꞌt el tcyꞌal yi caꞌwl takꞌab tan cawuꞌn cwent Israel nin choꞌn stkꞌeꞌ yi caꞌwl tetz junt atanum, yi mas balaj xtxumuꞌn tzawutz atz. 29 Na yi Kataj Ryos, yi na akꞌon kꞌej Israel, nkꞌeꞌtz laꞌj iꞌ, nin qui na xtxꞌixpuj tajtzaꞌkl, na nkꞌeꞌtz jun wunak tuꞌ yi qui na el cuꞌn te yol, stzun Samuel tetz Saúl.
30 —Bintzij, ja injuch wil, stzun Saúl ban junt tir, —poro bneꞌuꞌ pawor swetz yi nink takꞌuꞌ inkꞌej chi jun rey ẍchiwutz yi eꞌ wiꞌ banl wiꞌ, nin ẍchiwutz tircuꞌn yi eꞌ wunak. Chaꞌstzun te bneꞌuꞌ pawor tan beneꞌnuꞌ sweꞌj tan cꞌuꞌlajeꞌn Ryos, yi tajcawiluꞌ, stzun Saúl tetz.
—Sajk ticyꞌleꞌn Agag tzinwutz, yi rey cwent yi tnum Amalec. Nin tzun opon ticyꞌleꞌn Agag, poro quiꞌc jun yol na tal, na le tetz xtxumuꞌn iꞌtz yi nsken wiꞌt el liwr swutz jun quimichil yi chin qꞌuixcꞌuj nin. 33 Ej i tzun tal Samuel tetz:
—Tan yi aspar ja cxcyeꞌ tan chibiyleꞌn cuꞌn jun cꞌoloj cyal xnaꞌn. Nin iteꞌn nin xtxolbilaꞌtz sbajok teꞌj atxuꞌ, na ẍquimok tan spar.
Quiꞌc junt yol tal Samuel. Oqueꞌn nin bantz tan ẍekꞌleꞌn cuꞌn wankil yi reyaꞌtz swutz Kataj, le tnum Gilgal. 34 Ej icyꞌeꞌn nin tzun ban Samuel jalen Ramá. Ma Saúl, nin pakxij xe tetz caꞌl le tnum Gabaa. 35 Nin jetzaꞌtz quiꞌt til Samuel wutz Saúl, poro ilen nin ja bisun iꞌ tan paj yi njeꞌ xtxꞌixpul Ryos yi tajtzaꞌkl yi toqueꞌn cyen Saúl tetz rey.