Yi bixeweꞌn Luwiy tetz rey
16
1 I tzun bantz nin jilon Kataj Ryos tetz Samuel:—¿Tonaꞌ nin lcyaj cyen yi bis awaꞌn te Saúl? Quiꞌt na waj yi tzꞌicyꞌ mas tiemp taꞌn tetz rey. Quiloꞌk tan nojseꞌn cuꞌn yi tucꞌ tan aceit, na na waj yil cẍben xe caꞌl Isaí, yi aj Belén, na ja wiꞌt bixeꞌ waꞌn tan toqueꞌn cyen jun scyetz yi eꞌ cyꞌajl tetz rey.
2 —¿Poro ẍeꞌn tzimban tan qui tbital Saúl? stzun Samuel, —¡na kol tbit, ẍchinquimok taꞌn!
—Cyꞌaj nin jun neꞌẍ wacẍ yi tij, nin baꞌn tzawal yi choꞌn ncẍben tan toyeꞌn swetz. 3 Nin baꞌn tzatxoc Isaí tan toponeꞌn te jun kꞌejlalaꞌtz, nin swaleꞌ tzatz yi mbiꞌtz tzaban. Nin baꞌn jeꞌ cojij aceit twiꞌ yi jun yil wal tzatz, yi tzꞌocpon tetz rey, stzun Kataj.
4 I nin tzun tulej Samuel quib yi tal Kataj tetz.
Yi toponeꞌn iꞌ Belén, nin tzun eꞌ el tzaj yi eꞌ wutzileꞌn ajcaw tetz tnum tan cꞌulcheꞌn, poro ilen nin na chixob muꞌẍ tal.
—¿Nkꞌeꞌtz peꞌ oyintziꞌ mantaruꞌ? cheꞌch bantz tetz.
5 —Quiꞌ stzun Samuel, —choꞌn nnuꞌl tzoneꞌj tan toyeꞌn jun intxꞌixwatz tetz Ryos. Chaꞌstzun te chixanseꞌ quibuꞌ, na ẍchixomok ninuꞌ sweꞌj tan pateꞌn yi txꞌixwatz, stzun Samuel.
Nchaꞌtz oc Samuel tan chixanseꞌn Isaí scyuchꞌ yi eꞌ cyꞌajl, nin oc tan chitxocleꞌn tan cyoponeꞌn te jun kꞌejaꞌtz. 6 Ma yi cyoponeꞌn Isaí scyuchꞌ yi eꞌ cyꞌajl, nin tzun ben tilol Samuel wutz Eliab nin tzun xtxum: “Jun cuꞌn yol yi jun yajeꞌj, yaꞌstzun yi jun yi ja jeꞌ xtxaꞌol Ryos tan toqueꞌn tetz rey.” 7 Poro nin tal Kataj tetz:
—Quil cxubsij tan yi eꞌchk takleꞌn yi na awil nin, nin quil tzatxum yi iꞌtz tan paj yi nim wutz tkan yil tzꞌoc waꞌn tetz rey. Na qui na chinxom te yi eꞌchk takleꞌn yi na til jun wunak, na yi wetz na wil yi ẍeꞌn taneꞌn te talmaꞌ jun, nin yaꞌstzun yi xomchin teꞌj, stzun Kataj tetz Samuel.
8 Ẍchakol tzun Isaí Abinadab yi cyꞌajl, nin tzun ẍchajtz tetz Samuel. Poro nin tal Samuel:
—Nchaꞌtz yi juneꞌj nkꞌeꞌtz yi jun yi ja jeꞌ xtxaꞌol Ryos.
9 Ej nin ẍchakol tzun Isaí yi Sama, poro nin tal Samuel:
—Nchaꞌtz yi junteꞌj, nkꞌeꞌtz yi tajbil Ryos.
10 Juk tzun cyꞌajl Isaí ẍchaj tetz Samuel, poro nin tal Samuel tetz, yi quiꞌc jun scyetz yi jukaꞌtz yi jajk jeꞌ xtxaꞌol Ryos. 11 Ej wiꞌtzbilt len jakol iꞌ:
—¿Quiꞌct peꞌ mas acyꞌajl?
—At jun tal inchꞌiꞌp, iꞌ tuꞌ jun pstor kawun, stzun Isaí.
—Benk bin joyol tetz, stzun Samuel, —na quil xeꞌtij kamunl ko quiꞌc at skaxoꞌl.
12 Nin tzun ben mantar Isaí tan ẍchakleꞌn. Nin til Samuel, yi chin sak nin wankil yi jun tal xicyaꞌtz, chin yubeꞌn nin wutz, nin chumbalaj nin iꞌ. Nin tzun tal Kataj tetz Samuel:
—I tzun iꞌaꞌs. Baꞌn tzabixbaj iꞌ tetz rey, stzun Kataj.
13 Jeꞌn tzun tcyꞌal Samuel yi cuꞌlbil aceit, nin ẍchiwutz cuꞌn yi eꞌ stzicy yi bixeweꞌn cyen tan toqueꞌn tetz rey. Yi biꞌ iꞌ iꞌtz Luwiy. Nin jetzaꞌtz te jun kꞌejaꞌtz toqueꞌn lacꞌpuj yi espíritu Kataj teꞌj iꞌ.
Ma Samuel nin tzun aj junt tir le tnum Ramá.
Yi toqueꞌn Luwiy tetz ẍchakum Saúl
14 Te yi na bajij yi xtxolbilaꞌtz nin tzun cyaj cyen tilol yi espíritu Kataj yi Saúl, nin opon jun espíritu akꞌol bis tan Kataj tan xuxeꞌn iꞌ. 15 Chaꞌstzun te yi eꞌ mos nin cyal tetz:
—Iluꞌ jun cꞌoloj kajcawil, na el xtxumuꞌ tetz yi at jun espíritu yi na akꞌon bis yi ja ul tan Kataj Ryos tan xuxeꞌnuꞌ. 16 Chaꞌstzun te cawunk tzajuꞌ sketz tan kabeneꞌn tan joyleꞌn jun yi list tan tocseꞌn yi arpa, bantz yil tbit ninuꞌ yi balaj kulil, quiꞌt nachonuꞌ te yi jun espíritujaꞌtz yi na tzan tan xuxeꞌnuꞌ.
17 —Joywok bin jun yi chumbalaj nin tzꞌoc yi arpa taꞌn, nin baꞌn tzꞌul tzoneꞌj, stzun Saúl bantz.
18 Ej nin tzun tal jun ẍchixoꞌl yi eꞌ mos:
—Ilen nin ja wil jun ẍchixoꞌl yi eꞌ cyꞌajl Isaí yi aj Belén, yi baꞌn na xcyeꞌ tan tocseꞌn yi arpa. Nchaꞌtz iꞌ jun aj oyintziꞌinl yi qui na xob tetz jun, nin chin list nin iꞌ tan yol. Nin ilen nin xomij Kataj tan ẍchꞌeyeꞌn.
19 Eꞌ ben tzun cobox chakum tan Saúl te Isaí, tan talcheꞌn: “Chaktzajuꞌ yi cyꞌajluꞌ tzinwutz, yi jun yi na biꞌaj Luwiy, yi pstor cneꞌr.” 20 Ej nin tzun ben ẍchakol Isaí yi Luwiy te Saúl. Nin ben tcyꞌal Luwiy jun buruꞌ yi ekaꞌn pam taꞌn, tu jun tzꞌuꞌm nojnak tan win, tu jun tal neꞌẍ chiw. 21 Yaꞌstzun cyꞌaꞌntz tan Luwiy yi toponeꞌn swutz Saúl nin tzun cyajtz jakꞌ caꞌwl iꞌ. Yi teleꞌn tiemp wiꞌnin tzun na tzatzin Saúl teꞌj nin bixeꞌ-tz tetz ẍchꞌeyum. 22 Ej nin tzun opon jun xtxolbil tan Saúl twiꞌ Isaí, tan jakleꞌn amaꞌl tetz tan cyajeꞌn cyen Luwiy teꞌj tetz cyakil tiemp, na wiꞌnin na pekꞌ iꞌ teꞌj. 23 I tzun yi na oc yi jun espíritujaꞌtz yi na akꞌon bis tan xuxeꞌn Saúl, nin tzun na oc Luwiy tan tocseꞌn yi arpa, nin tan yi bitz na cutzaj xtxumuꞌn Saúl. Ma yi jun espíritujaꞌtz nin tzun na col cyen Saúl.