Rut 4

Yi toqueꞌn Rut tetz txkel Booz

1 I tzun bantz yi tajeꞌn tzaj Rut nintzun ben Booz jalen juꞌ caꞌl tan ẍchꞌiweꞌn yi junt xonl. Na yaꞌstzun yi amaꞌl kale na chimolwit quib cyakil wunak. Watok cunin cꞌoleꞌ cuꞌntz yi ticyꞌeꞌn cuꞌn yi jun xonlaꞌtz yi nsken tal iꞌ tetz Rut yi at rmeril tan toqueꞌn tan colpeꞌn iꞌ.

—Or teruꞌ cꞌolekuꞌ tzoneꞌj, chij Booz banintz tetz.

Nintzun opontz, nin cꞌoleꞌ cuꞌntz. 2 Nintzun eꞌ saj ẍchakol Booz lajuj ajcaw tetz tnum. Yi cyuleꞌn nin jak iꞌ pawor scyetz tan chicꞌoleweꞌn cuꞌn scyeꞌj. Nintzun eꞌ baj cꞌoleꞌ cuꞌntz. 3 Nintzun ben tlol iꞌ-tz tetz yi xonl:

—Yi Noemí ja pakx tzaj iꞌ Moab. Ja tzun xtxum iꞌ tan beneꞌn jun piẍ tetz yi xtxꞌotxꞌ cꞌaꞌy, yi xtxꞌotxꞌbeꞌn kꞌajtzun kaxonl Elimelec. 4 Chaꞌstzun te minchakuꞌ tan tbitaluꞌ, ej nin tan wital yi ko na tajuꞌ slokꞌuꞌ. Na, na kloꞌ waj yil taluꞌ ẍchiwutz cuꞌn yi cobox kastiweꞌj, nin ẍchiwutz cuꞌn yi kawiꞌ banl wiꞌ tetz tnum. Na yi iluꞌ teruꞌ mero chixonl cuꞌn quibuꞌ tu kꞌajtzun Elimelec. Nin yi kaley iꞌtz yi tajweꞌn yi iluꞌ lokꞌon tetz yi txꞌotxꞌ. Na kloꞌ waj lwit yi ko quil slokꞌuꞌ. Na yi ko quil slokꞌuꞌ, ej in tzun kloꞌ na waj tzinlokꞌ. Na nchaꞌtz in, in xonl kꞌajtzun almaꞌ, stzun Booz tetz yaj.

—Baꞌn bin, tzinlokꞌeꞌ bin, chij.

5 —Baꞌn, chij Booz. —Poro na kloꞌ waj wal claril teruꞌ. Na taj yil xtxumuꞌ yi kol slokꞌuꞌ yi xtxꞌotxꞌ Noemí, tajweꞌn cuꞌn tzun tzꞌoc Rut yi aj Moab tetz txkeluꞌ, bantz cyajeꞌn cyen yi txꞌotxꞌ te biꞌ jun xonl kꞌajtzun Elimelec, stzun Booz.

6 Yi tbital yi xonl kꞌajtzun almaꞌ nintzun taltz:

—Ko yaꞌtz, quil tzinlokꞌ yi txꞌotxꞌ. Na stzꞌakꞌonk mal te yi weri inherens. Poro yi ko na awaj tzalokꞌ, baꞌn atit. Nin swakꞌeꞌ amaꞌl tzatz tan alokꞌol, stzun yaj bantz.

7 Te yi tiempaꞌtz at jun chicstumbr yi eꞌ xonl Israel yi na takꞌ jun yaj amaꞌl tetz junt tan tetzal jun eꞌchk takleꞌn, nka yi na bnix jun trat ẍchixoꞌl cob wunak. Yi jun yi na akꞌon amaꞌl, nka yi jun yi na cꞌayin, na tcyꞌajlen jalaj xajab tan beneꞌn tkꞌol tetz yi lokꞌol, tetz quiwel chiyol.

8 I tzun yi tkꞌol yaj amaꞌl tetz Booz tan lokꞌol yi txꞌotxꞌ, nintzun el tcyꞌal jalaj xajab, nin ben tkꞌoltz tetz Booz, nin taltz tetz:

—Baꞌn tzalokꞌ.

9 Beneꞌn tzun tlol Booz scyetz yi eꞌ ajcaw, nin scyetz yi eꞌ mas yi ateꞌ-tz:

—Eꞌuꞌ bin stiw sbneꞌ jaluꞌ nin tzantzaj, yi in, nchinlokꞌon yi txꞌotxꞌ tetz Noemí, yi xtxꞌotxꞌbeꞌn kꞌajtzun almaꞌ Elimelec tu Quelión nin Mahlón. 10 Nchaꞌtz eꞌuꞌ stiw teꞌj yi tzꞌocpon yi xmaꞌlcaꞌn yi aj Moab yi na biꞌaj Rut tetz wuxkel. Yaꞌstzun lwulej bantz cyajeꞌn quen yi amaꞌl te biꞌ Mahlón yi kꞌajtzun chmil, nin tan qui sotzajeꞌn yi biꞌ iꞌ skaxoꞌl. Eꞌ binuꞌ stiw teꞌj, stzun Booz bantz scyetz yi eꞌ wiꞌ banl wiꞌ tetz tnum.

11 Cyalol tzun chicyakil yi eꞌ wiꞌ banl wiꞌ scyuchꞌ yi eꞌ yi ateꞌ-tz:

—Bintzi, oꞌ stiw teꞌj. Lok koj tzaj Kataj yi banl iꞌ tibaj yi xnaꞌnaꞌtz. Choꞌn nink chiban tal iꞌ chi banakeꞌ cyen Raquel tu Lea, kale ntzajeꞌt kaxeꞌ yi oꞌ xonl Israel. Ma iluꞌ teruꞌ lok tzꞌoc cyenuꞌ tetz jun balaj yaj skaxoꞌl tzoneꞌj Efrata. Nin lok jal kꞌejuꞌ tzoneꞌj Belén. 12 Lok takꞌ Kataj wiꞌnin anitxaꞌ te yi xnaꞌnaꞌtz. Nink chijal jun cꞌoloj axonl chi banak Fares yi chinitxaꞌ Tamar tu Judá, cheꞌch eꞌ wiꞌ banl wiꞌ bantz tetz Booz.

13 Yaꞌstzun bantz yi toqueꞌn Rut tetz txkel Booz. Nin tzun chiwitbej quibtz. Nin takꞌ Kataj amaꞌl tan toqueꞌn lacꞌp jun niꞌ teꞌj Rut. Jaleꞌn nintzun ban jun chinitxaꞌ-tz.

14 I tzun yi titzꞌeꞌn yi tal niꞌaꞌtz, nintzun cyal yi eꞌ xnaꞌntz tetz Noemí:

—Ntyoẍ tetz Kataj na ja takꞌ iꞌ jun aj colpinl teruꞌ yi tzꞌocopon tan qꞌuicyꞌleꞌnuꞌ. Lok jal kꞌej iꞌ ẍchixoꞌl cyakil yi eꞌ katanum xonl Israel. 15 Nin yi jun tal mamajuꞌ tzꞌocpon tan mayseꞌnuꞌ. Nin tzꞌocpon tan qꞌuicyꞌleꞌnuꞌ yil tijinuꞌ. Na yaꞌstzun tal yi jun tal tlibuꞌ yi wiꞌnin na pekꞌ teꞌjuꞌ, yi mas tcuꞌn balaj swutz ik juk taluꞌ, cheꞌch eꞌ xnaꞌn tetz Noemí.

16 Ma Noemí nintzun bentz tan ticyꞌleꞌn yi niꞌ tan toqueꞌn tan ẍchꞌuyseꞌn nin tan ẍchusleꞌn.

17 Yi quilol yi wisin yi tal niꞌ nintzun cyaltz:

—Ja itzꞌij jun tal Noemí taneꞌn.

Nintzun oc yi biꞌ-tz cyaꞌn tetz Obed. Yi Obed, yaꞌstzun yi taj Isaí. Ma yi Isaí iꞌ taj yi Luwiy ban.

18 Je yi eꞌ mam cyen Luwiy. Choꞌn na xeꞌtij teꞌj Fares, jun scyeri cyꞌajl Judá. Yi jun Faresaꞌtz iꞌ taj Hezrón. 19 Ma yi Hezrón iꞌ yi taj Ram. Ma yi Ram iꞌ yi taj Aminadab. 20 Yi Aminadab iꞌ yi taj Naasón. Ma Naasón iꞌ yi taj Salmón. 21 Yi Salmón iꞌ yi taj Booz. Ma Booz iꞌ yi taj Obed. 22 Ej nin yi Obed iꞌ yi taj Isaí. Ma Isaí iꞌ yi taj Luwiy.