JUECES
Txꞌolbil Xoꞌl Yi Liwreꞌj
Yi liwr Jueces, na jilon te yi mbi cuꞌn bajij scyeꞌj yi eꞌ xonl Israel yi nsken wiꞌt quim Josué, yi wiꞌtz cyajcawil. Na yi quimeꞌn Josué, ja chicyaj cyen yi eꞌ xonl Israel chichuc. Quiꞌc jun ajcaw ban cyentz ẍchixoꞌl. Ej nin tampaj yi quiꞌc cawl cyetz, ja jal wiꞌnin oyintziꞌ ẍchixoꞌl. Ej nin nchaꞌtz yi eꞌ jilwutz wunak yi qui nin eꞌ xcyeꞌ tan chilajeꞌn len ẍchixoꞌl, eꞌ octz tan oyintziꞌ scyeꞌj.
Ej nin ẍkꞌokxoꞌl cun tu nin ja ul eꞌchk il ẍchiwutz yi eꞌ aj Israel. Nin quiꞌc nin baꞌn ateꞌt cuꞌnt te yi tiempaꞌtz. Nin at na bant cuꞌn ja chijal ajcaw ẍchixoꞌl, yi na aꞌlchij pujul xtisyaꞌ scyetz. Chaꞌstzun te yi biꞌ yi liwreꞌj iꞌtz “Jueces” le castiy, yi na elepont “Eꞌ Pujul Xtisyaꞌ” le ketz kayol. Yi eꞌ pujul xtisyaꞌaꞌtz, eꞌ len cuꞌn wiꞌtz ajcaw, nin eꞌ oc tan pujleꞌn ẍchixoꞌl yi eꞌ wunak tul yi tiempaꞌtz.
Nchaꞌtz yi liwreꞌj na xtxol te yi mbi cuꞌn eꞌ ban yi eꞌ ajcaweꞌj: Débora, Barac, Gedeón tu Sansón, scyuchꞌ yi eꞌ mas pujul xtisyaꞌaꞌtz. Na ilenin ja oc Kataj Ryos tan chicolcheꞌn yi eꞌ xonl Israelaꞌtz, nin ilenin ja takꞌ iꞌ jun wiꞌtz ajcaw tan toqueꞌn chi jun pujul xtisyaꞌ tan chicaweꞌn.
Yi cyoqueꞌn yi eꞌ xonl Israelaꞌtz tul il, qui nin chisotz, tampaj yi txaꞌijt cheꞌ tan Ryos. Na yi cyoqueꞌn wutz peꞌm, ja ul txꞌakx Kataj Ryos ẍchicꞌuꞌl. Chaꞌstzun te ja oc iꞌ tan chicolcheꞌn. Qui nin eꞌ cyaj cyen taꞌn chichuc. Poro cyakil tir yi eꞌ oc tan pajleꞌn caꞌwl Ryos, ja chitij wiꞌnin sotzaj cꞌuꞌlal.