Yi chijatxol quib Josué scyuchꞌ yi eꞌ mas xonl Israel
24
1 Itzun bantz, nintzun ẍchak Josué cyakil yi eꞌ xonl Israel tan cyuleꞌn teꞌj le amaꞌl Siquem. Nintzun ben mantar tan chichakleꞌn yi eꞌ wiꞌ banl wiꞌ scyuchꞌ eꞌ mas wiꞌtz ajcaw, scyuchꞌ yi eꞌ juez, scyuchꞌ yi eꞌ cyajcawil yi eꞌ sanlar. 2 Yi chimolol quib, nintzun tal iꞌ scyetz:—Eꞌuꞌ intanum, je yol yi kaRyosileꞌj: “Tenẍchan yi eꞌ imam iteꞌ, yi Taré tu yi eꞌ cyꞌajl, yi Abraham tu Nacor, choꞌn cyaꞌteꞌn tzi tzanlaꞌ Eufrates, nin ocnakeꞌ tan chicꞌuꞌlajeꞌn eꞌchk chiryosil yi apart.a 3 Poro nin jeꞌ intxaꞌol yi Abraham, te yi najlij iꞌ tzi tzanlaꞌaꞌtz, nin ja saj incyꞌal tzoneꞌj le amaꞌl Canaán. Ja jeꞌ impucꞌsalb yi xonl iꞌ, nin ja jal yi bajx cyꞌajl iꞌ waꞌn yi na biꞌaj Isaac.c 4 Ma tetz Isaac, ja wakꞌ cob cyꞌajl iꞌ yi iꞌtz Jacow nin Esaú.d Nintzun wakꞌ yi wiꞌwtz Seire tetz Esaú tan najeweꞌn swutz. Ma tetz Jacow scyuchꞌ yi eꞌ xonl, choꞌn tzun chibeneꞌntz Egipto.f 5 Choꞌn ateꞌ-tz Egipto yi eꞌ beneꞌn inchakol Moisés tu Aarón tan chicolpeneꞌl tzaj. Nin ja chiloꞌon yi eꞌ aj Egipto waꞌn. Tircuꞌn eꞌ quimeꞌn yi bajx chicyꞌajl waꞌn. Kalenaꞌs tzun cyeleꞌn liwr yi eꞌ itaj itxuꞌ.g 6 Yi cyeleꞌn tzaj Egipto, nin yi cyoponeꞌn tzi Cyak Mar, nintzun eꞌ saj xomok yi eꞌ sanlar cwent Egipto tan chitzꞌamleꞌn kloꞌ. Yi eꞌ sanlaraꞌtz cyꞌaꞌn len eꞌchk careꞌt tu chej cyaꞌn tetz oyintziꞌ. 7 Cyoqueꞌn tzun yi eꞌ itaj tan jakleꞌn ẍchꞌeybil cyetz swetz. Cweꞌn tzun jun chin tzꞌoꞌtz waꞌn ẍchixoꞌl, scyuchꞌ yi eꞌ aj Egiptojaꞌtz. Nintzun saj inkojol yi mar squibaj yi eꞌ aj Egipto. Ej, nin sak cuꞌn tziwutzwok yi mbi mbajij scyeꞌj.h
”Ej, nin nchaꞌtz, nim tiemp ncxonwok tul yi amaꞌl tzꞌinunin tuꞌ, 8 jalen cuꞌn yi ncxuꞌlwok swutz yi chiꞌamaꞌl yi eꞌ amorreo yi ateꞌ swutz len yi tzanlaꞌ Jordán. Yi eꞌ wunakaꞌtz ja choꞌc tan oyintziꞌ tziteꞌj, poro ja wakꞌ amaꞌl tzitetz tan ixcyeweꞌn scyeꞌj, nin tan itetzal yi cyetz chiꞌamaꞌl,i na ja chimbajxij tziwutzwok tan chixiteꞌn cuꞌn. 9 Nchaꞌtz ban Balac, yi cyꞌajl Zipor, chireyil yi eꞌ aj Moab. Nin oc tan oyintziꞌ tziteꞌj. Nin oc chiyol tu Balaam, yi cyꞌajl Beor tan icunseꞌn kloꞌ. 10 Poro quinin wakꞌ amaꞌl tetz, ma na ja wakꞌ ibanl. Nin alaꞌ tir nxclaxwok waꞌn.j 11 Icyꞌeꞌn tzaj tzun ibanwok wi tzanlaꞌ Jordán,k nin ja cxuꞌlwok jalen Jericó, nin yi eꞌ aj Jericójaꞌtz eꞌ oc tan oyintziꞌ tziteꞌj, poro ja wakꞌ amaꞌl tzitetz tan ixcyeweꞌn scyeꞌj. Nchaꞌtz ja wakꞌ amaꞌl tzitetz tan ixcyeweꞌn scyeꞌj yi eꞌ amorreo, scyuchꞌ yi eꞌ ferezeo, scyuchꞌ yi eꞌ aj Canaán, scyuchꞌ yi eꞌ hitita, scyuchꞌ yi eꞌ gergeseo, scyuchꞌ yi eꞌ heveo, nin yi eꞌ jebuseo. 12 Ma yi eꞌ amorreo scyuchꞌ yi chireyil, ja cheꞌl ojk tan xoꞌw, na ja chixcon jun cꞌoloj xux wakꞌun tan chilajeꞌn len. Chaꞌstzun te quinin xcon yi imaꞌcl tetz oyintziꞌ, ma na in nchilajun len. 13 Chaꞌstzun te in mmakꞌon yi eꞌchk balaj cojbil tzitetz yi quinin ncxakꞌujwok tan banleꞌn baꞌn tetz. Nin nchaꞌtz yi eꞌchk balaj tnum in mmakꞌon tzitetz. Ej, nin yi balaj txꞌotxꞌ kale atixeꞌt jaluꞌ, kale atit wiꞌnin uva tu oliw, nkꞌeꞌtz axwok awal tetz. Poro in mmakꞌon tzitetz,” stzun Ryos bantz, chij Josué scyetz yi eꞌ xonl Israel. 14 Nchaꞌtz tal Josué scyetz:
—Chaꞌstzun te eꞌuꞌ intanum, cyekeꞌuꞌ ẍchiꞌ Ryos, nin chixconkuꞌ tetz, tetz cuꞌn cyalmaꞌuꞌ, nin tetz cuꞌn chichamiluꞌ. Quil choꞌcuꞌ tan chicꞌuꞌlajeꞌn eꞌchk ryos yi apart, chi banakeꞌ yi eꞌ kamam kateꞌ yi ateꞌ tzaj stzi tzanlaꞌ Eufrates, nin yi ateꞌ tzaj Egipto. Ma na mas balaj yil choꞌcuꞌ tan cꞌuꞌlajeꞌn yi Kataj yi kaRyosil. 15 Poro ko qui na cyajuꞌ chixomuꞌ te Kataj, baꞌn bin chitxaꞌeꞌnuꞌ ninin jalcuꞌn yi naꞌ scyetz jun chiryosiluꞌ sbneꞌ. Tajweꞌn tan bixeweꞌn cyanuꞌ kol chixomuꞌ te yi eꞌchk ryos yi xomnakeꞌ yi eꞌ kamam kateꞌ teꞌj, yi najlcheꞌ tzaj tzi tzanlaꞌ Eufrates, nko na cyajuꞌ chixomuꞌ te chiryosil yi eꞌ amorreo yi ateꞌ tzoneꞌj. Chin tajweꞌn cunin yil chitxaꞌeꞌnuꞌ. Poro yi in wetz, tu yi innajal kaxomok te Kataj, nin skabneꞌ taneꞌn yi tetz tajbil, chij Josué bantz scyetz yi eꞌ xonl Israel.
16 —Quiꞌ. Quil kakꞌ amaꞌl te yi xtxolbileꞌj, yi nink kilcyen yi Kataj yi kaRyosil tan kaxomeꞌn te junt ryos. 17 Na yi Kataj yi kaRyosil, iꞌ oꞌ elsan tzaj scyuchꞌ yi eꞌ kamam kateꞌ jakꞌ chicaꞌwl yi eꞌ aj Egipto, yi ocnakeꞌ tan kabuchleꞌn. Nin ja ẍchaj iꞌ yi eꞌchk balaj milawr sketz. Nchaꞌtz, ja koꞌ qꞌuicyꞌlej iꞌ te yi nkaxom tzaj ẍchixoꞌl yi eꞌ mas wunak. 18 Ej, nin nchaꞌtz ja cheꞌl lajul iꞌ cyakil yi eꞌ kacontr yi ateꞌ skawutz, scyuchꞌ yi eꞌ amorreo, yi tawbeꞌn yi amaꞌleꞌj yi atoꞌ swutz. Kaxomok bin te Kataj na iꞌ kaRyosil, cheꞌch bantz.
19 Poro nintzun tal Josué scyetz:
—Quiꞌc loꞌ rmeril tan ixomeꞌn te Kataj, na chin xan nin iꞌ, nin na jeꞌ swutz iꞌ yi qui na choꞌcuꞌ cꞌulutxum jakꞌ caꞌwl iꞌ, nin yi na chijuchuꞌ quiluꞌ.l 20 Kol quil cyenuꞌ Kataj tan chixomeꞌnuꞌ te junt ryos, jun cuꞌn yol tzꞌul chicawsuꞌ taꞌn. Ẍcheꞌlk cuꞌnuꞌ swutz. Quiꞌc na ban ko nsken ẍchaj iꞌ yi banl scyeruꞌ, stzun Josué scyetz.
21 —Quiꞌc rmeril tan kabnol yi xtxolbilaꞌtz, na yi oꞌ ketz skaxomok te Kataj yi kaRyosil, cheꞌch bantz.
22 —Eꞌ teꞌnuꞌ stiw te yi chiyoluꞌ yi ja wiꞌt chisukuꞌ, yi chixomokuꞌ te Kataj, stzun Josué scyetz.
—Quiꞌc na ban, oꞌ stiw te kayol, cheꞌch bantz.
23 —Ko yaꞌtz, chij Josué scyetz chicyꞌajlen binuꞌ yi eꞌchk chiryosiluꞌ yi at scyuchꞌuꞌ. Nin chixomokuꞌ te Kataj. Chibneꞌuꞌ tajbil iꞌ tetz cuꞌn cyalmaꞌuꞌ, na iꞌ yi kaRyosil yi oꞌ xonl Israel, stzun Josué bantz.
24 —Yi oꞌ ketz kocopon jakꞌ caꞌwl Kataj. Nin kocopon tan banleꞌn yi tajbil iꞌ tetz cuꞌn kalmaꞌ, cheꞌch bantz chicyakil.
Yi bnixeꞌn jun trat tu Kataj Ryos
25 Taꞌsteꞌnin le amaꞌlaꞌtz, nin iteꞌn nin kꞌejaꞌtz, bnix jun chitrat Josué scyuchꞌ yi eꞌ mas xonl Israel swutz Ryos. Nin tal Josué eꞌchk caꞌwl tu eꞌchk ley scyetz. 26 Choꞌn tzun cweꞌn stzꞌibal cyakil yi eꞌchk caꞌwlaꞌtz tul yi liwr kale atit yi eꞌchk caꞌwl Ryos. Nchaꞌtz nin jeꞌ xtxicbal Josué jun chin wutzileꞌn cꞌub tzakꞌ yi jun wiꞌ bakch yi at xlaj yi amaꞌl yi wiꞌnin xanil. 27 Nintzun taltz scyetz cyakil yi eꞌ xonl Israel:
—Eꞌuꞌ intanum, yi jun cꞌubeꞌj, xconk sketz tetz jun techl, nin tetz stiw te cyakil yi mbi ntal Kataj sketz. Iꞌtz jun stiw sbneꞌ tan qui chisubuluꞌ Ryos, nin tan cyeleꞌn cunuꞌ te yi chiyoluꞌ yi ja wiꞌt chisukuꞌ tetz, stzun Josué scyetz.
28 Cawuneꞌnin tzun Josué tan cyajeꞌn lakak chiꞌamaꞌl.
Yi quimeꞌn Josué
(Jue 2:6-10)
29 Le coboxt kꞌej yi wiꞌt bajeꞌn yi xtxolbilaꞌtz, quimeꞌn nin tzun ban tetz Josué yi ẍchakum Ryos. Yi Josuéjaꞌtz, iꞌ cyꞌajl Nun. Ej, nin at iꞌ tul jun cient tu lajuj yob yi quimeꞌn. 30 Choꞌn tzun mukxeꞌn iꞌ-tz le yi tetz amaꞌl yi at Timnat-sera, yi at wiꞌwtz cwent yi chiꞌamaꞌl yi eꞌ xonl Efraín. Yi amaꞌlaꞌtz choꞌn at xlajeꞌn yi wiꞌwtz Gaas.
31 Te yi itzꞌ tzaj Josué, cyakil cuꞌn yi eꞌ xonl Israel eꞌ xom te yi caꞌwl Kataj. Ej nin nchaꞌtz, te yi nsken quim iꞌ, eꞌ xomeꞌt te yi caꞌwl Kataj, na itzꞌeꞌt yi eꞌ wiꞌ banl wiꞌ, yi eꞌ yi iꞌlon tetz yi eꞌchk milawr yi banak Ryos scyeꞌj.
32 Ma yi wankil yi kꞌajtzun Ẍep, yi saj chicyꞌal yi eꞌ xonl Israel Egipto, choꞌn mukxeꞌntz le amaꞌl Siquem. Yi jun amaꞌlaꞌtz iꞌtz yi lokꞌnak yi kꞌajtzun taj iꞌ, yi Jacow, tan jun cient piẍ sakal. Choꞌn lokꞌol iꞌ scyetz yi eꞌ cyꞌajl Hamorm yi taj Siquem. Poro yi teleꞌn tiemp, choꞌn cyajeꞌn cyen yi jun amaꞌlaꞌtz ẍchikꞌab yi eꞌ xonl Ẍep.
Yi quimeꞌn Eleazar yi paleꞌ
33 Nchaꞌtz quim Eleazar yi cyꞌajl Aarón. Choꞌn tzun mukxeꞌn cyen iꞌ-tz le xtxꞌotxꞌ Finees, yi cyꞌajl iꞌ. Choꞌn at yi jun amaꞌlaꞌtz wiꞌwtz kale najlcheꞌt yi eꞌ xonl Efraín.