LEVÍTICO
Txꞌolbil Xoꞌl Yi Liwreꞌj
Yi yol “Levítico” na elepont “cyetz yi eꞌ xonl Leví, yi eꞌ paleꞌ”. Yi eꞌ xonl Leví, yaꞌstzun yi eꞌ yi txaꞌij cheꞌ tan Ryos tan chixconeꞌn tetz chipaleꞌil yi eꞌ mas xonl Israel. Ej nin nchaꞌtz eꞌ cuꞌn qꞌuicyꞌlom te yi mantial tetz molbil ibaj, tu cyakil yi eꞌchk maꞌcl yi xcon cyaꞌn tan banleꞌn chimunl swutz Kataj Ryos. Tul yi liwreꞌj na jal wiꞌnin caꞌwl yi ẍeꞌn chiban yi eꞌ paleꞌaꞌtz tan banleꞌn yi cyetz chimunl. Nchaꞌtz at eꞌchk caꞌwl scyetz yi eꞌ mas xonl Israel te yi mbi tajweꞌn tan chibnol tan cꞌuꞌlajeꞌn Ryos, nin te yi mbi tajweꞌn tan chibnol tan chixansal quib swutz Ryos.
Yi mero xeꞌ te yi chusuꞌn yi na jal kaꞌn tul yi liwreꞌj iꞌtz yi wiꞌnin xanil Ryos. Ej nin yi chin tajweꞌn cunin tan cyoqueꞌn yi eꞌ xonl Israel tetz tzꞌaknak cuꞌn jakꞌ caꞌwl iꞌ.
Yi Weklil Yi Liwreꞌj
Yi bajx wekl (Cap. 1–7) na ẍchaj yi eꞌchk caꞌwl yi ẍeꞌn chiban tan toyeꞌn yi eꞌchk jilwutz oy, tu eꞌchk jilwutz chitxꞌixwatz yi tajweꞌn tan cyakꞌol tetz Ryos.
Yi caꞌp wekl (Cap. 8–10) na ẍchaj yi ẍeꞌn cuꞌn ban yi bixeweꞌn cyen Aarón scyuchꞌ yi eꞌ tetz cyꞌajl tetz paleꞌ.
Yi toxeꞌn wekl (Cap. 11–15) na jilon te eꞌchk caꞌwl yi tajweꞌn tan chibnol taneꞌn chicyakil cuꞌn tan chixansal quib swutz Ryos.
Yi cyajeꞌn wekl (Cap. 16) na jilon te yi jun kꞌej yi na biꞌaj Día de Expiación yi na elepont “yi kꞌejlal yi na cuylij chipaj yi eꞌ xonl Israel”.
Yi toꞌeꞌn wekl (Cap. 17–27) na jilon te yi ẍeꞌn chiban tan cyoqueꞌn tetz tzꞌaknak cuꞌn te yi ankꞌiꞌn yi akꞌij scyetz; nin te yi na choꞌc tan banleꞌn chimunl swutz Ryos.