LEVÍTICO
Yi txꞌixwatz yi na pat-xij cyakil yi wankil
1
1 Itzun bantz, nintzun jilon tzaj Kataj Ryos tetz Moisés, tul yi mantial tetz molbil ib tu Kataj. Itzun taltz: 2 “Chamweꞌ cuꞌn cyakil yi eꞌ atanum, yi eꞌ xonl Israel, nin alaj yi xtxolbileꞌj scyetz:”Cyakil axwok yil cxuꞌl wok tan toyeꞌn itxꞌixwatz tzinwutz, tajweꞌn cuꞌn yi choꞌn tzꞌel tzaj itaꞌn ẍchixoꞌl wacẍ nka ẍchixoꞌl cneꞌr.a
3 ”Ko at jun yi na taj toy jun wacẍ tetz xtxꞌixwatz, yi spat-xok tircuꞌn, tajweꞌn cuꞌn yi mam, nin yi quiꞌc muꞌẍ tal yanaꞌsil.b Nin tajweꞌn yil toy swetz tetz cuꞌn talmaꞌ. Nin choꞌn tzꞌopon itaꞌn swutz yi puertil yi peꞌmil yi mantial tetz molbil ibaj. 4 Tajweꞌn yil takꞌeꞌn yi aj oyinl yi kꞌab twiꞌ yi wacẍ yi spat-xok, bantz incuyul paj yi jun aj oyinlaꞌtz. 5 Ej, nin te yi nsken wiꞌt jeꞌ tkꞌol yi kꞌab twiꞌ yi wacẍaꞌtz, baꞌn tzun tzꞌoc jakꞌ kultz taꞌn.
”Ma yi eꞌ xonl Aarón yi eꞌ cuꞌn paleꞌ, baꞌn choꞌc tan sukeꞌn nin yi ẍchꞌel swetz, nin tan kojleꞌn nin tibaj nin xlajak yi patbil txꞌixwatz, yi choꞌn at nicyꞌal yi wutzkꞌanil yi mantial tetz molbil ibaj. 6 Ej, baꞌn tzun tzꞌoc yi aj oyinlaꞌtz tan telseꞌn cyakil yi stzꞌuml yi tetz xtxꞌixwatz, nin tan ẍekꞌleꞌn cuꞌn yi wankil yi txucaꞌtz. 7 Inti yi eꞌ paleꞌ, baꞌn lcyakꞌeꞌn kꞌakꞌ wi yi altar, yi patbil txꞌixwatz, nin baꞌn chinuqueꞌn yi siꞌ tibaj yi kꞌakꞌaꞌtz. 8 Kalenaꞌs tzun ljeꞌ txoliꞌn yi eꞌchk piẍaꞌl yi wacẍaꞌtz yi nsken ẍekꞌxij tibaj yi siꞌ. Nchaꞌtz sbneꞌ yi wiꞌ tuml cyakil yi ẍepuꞌil, baꞌn ljeꞌ takꞌleꞌn wi kꞌakꞌ. 9 Ma te yi ntaxk oc wi kꞌakꞌ, tajweꞌn yil tzꞌoc yi aj oyinl tan xtxꞌajleꞌn teꞌj yi lasuꞌ tu yi cux yi wacẍ. Kalenaꞌs tzun tzꞌoc yi paleꞌ-tz tan pateꞌn tircuꞌn, yi jun oyaꞌtz. Na niꞌcuꞌn chi iꞌtzk jun cumir yi na oylij swetz yi wiꞌnin cꞌoꞌcal tzinwutz, nin yi wiꞌnin na chintzatzin teꞌj.
10 ”Ma kol tzꞌeltzaj yi txꞌixwatz itaꞌn ẍchixoꞌl cneꞌr, nka ẍchixoꞌl chiw, tajweꞌn yi iꞌtz jun mam yi quiꞌc muꞌẍ tal yanaꞌsil. 11 Ej nin choꞌn tzꞌoc jakꞌ kul, tzinwutz yi in Jehová yi iRyosil, te yi jalaj xlaj yi altar yi na xmayinin jeꞌn tziꞌn.c Tajweꞌn tzun yil choꞌc yi eꞌ paleꞌ, tan xtxitleꞌn nin yi ẍchꞌel yi jun oyaꞌtz wi yi patbil txꞌixwatz nin nchaꞌtz xlajak. 12 Kalenaꞌs tzun tzꞌoc piẍeꞌn cuꞌntz. Nin tajweꞌn tzꞌoc yi paleꞌ tan nucꞌlejeꞌn yi chiꞌbajaꞌtz tibaj yi siꞌ yi at wi altar. Nin nchaꞌtz sbneꞌ iꞌ te yi wiꞌ, tuml until yi lasuꞌ. Tircuꞌn jepon nuqꞌuij wi altar. 13 Te yi ntaxk jeꞌ wi altar, tajweꞌn yil tzꞌoc yi aj oyinl, tan xtxꞌajleꞌn yi lasuꞌ tuml yi cux yi jun oyaꞌtz. Tzꞌocopon tzun jun paleꞌ-tz tan tocseꞌn kꞌaꞌkl tircuꞌn, tetz jun oy yi wiꞌnin cꞌoꞌcal tzinwutz, nin yi wiꞌnin na chintzatzin teꞌj.
14 ”Ma jaluꞌ, ko iꞌtz jun tal chꞌuꞌl yi spat-xok tetz oy, tajweꞌn cuꞌn yil xcon jun tal xmucuy, nka jun tal neꞌẍ sluꞌk. 15 Nin tajweꞌn yi choꞌn tzꞌoc yi paleꞌ tan banleꞌn yi munl swutz yi patbil txꞌixwatz. Tajweꞌn bajx skinlen wiꞌ yi tal txucaꞌtz, kalenaꞌs tzun lyutzꞌnin yi ẍchꞌel le jalaj xlaj yi patbil txꞌixwatz. Baꞌn tzun tzꞌoctz tan pateꞌn yi tal txucaꞌtz wi altar. 16 Poro te yi ntaxk oc yi paleꞌ tan pateꞌn, tajweꞌn yil tzꞌel yi xpatzquiꞌy taꞌn, tuml cyakil yi at le cꞌuꞌl, nin choꞌn mben tcyꞌal xlaj len yi patbil txꞌixwatz, kale na molxeꞌt yi tzaꞌj. 17 Nchaꞌtz, baꞌn cheꞌ stzꞌameꞌn yi xicyꞌ tan katzleꞌn yi tal txucaꞌtz. Poro quiꞌc cuj tan cweꞌn cobsal junawes. Kalenaꞌs tzun tzꞌoctz tan pateꞌn tibaj yi siꞌ yi at wi yi patbil txꞌixwatz, tetz jun oy yi wiꞌnin cꞌoꞌcal tzinwutz, nin yi wiꞌnin na chintzatzin teꞌj.