Yi eꞌchk oy yi ixiꞌn triw cuꞌn yi cheꞌjaꞌnt
2
1 ”Ma jaluꞌ, yi ko at jun yil tzꞌoc tan toyeꞌn alchok jilwutz ixiꞌn, baꞌn tzꞌul balaj jarin taꞌn tzinwutz. Nin baꞌn ben aceitil oliw taꞌn txoꞌl yi jarinaꞌtz, nin tajweꞌn yi xomij insens xlaj yi oyaꞌtz yil bnix. 2 Ma yi list taneꞌn, baꞌn tzun tzꞌultz taꞌn ẍchiwutz yi eꞌ xonl Aarón, yi eꞌ paleꞌ. Nin jun scyeri eꞌ paleꞌaꞌtz baꞌn xtxobeꞌn jun txob te yi jarinaꞌtz yi yujuꞌn tib tu aceit. Ej nin baꞌn tzꞌoc tan pateꞌn yi jun txobaꞌtz wi altar, tuml cyakil yi insens. Yi jun txobaꞌtz yi na pat-xij, iꞌtz kꞌajbil tircuꞌn yi jarin tu yi aceit. 3 Ma yi sowril yi jarinaꞌtz, yaꞌstzun tetz Aarón yi wiꞌtz paleꞌ, scyuchꞌ yi eꞌ nitxajil, nin wiꞌnin xanil yi jun jarinaꞌtz chi yi jun txob yi na patij swutz Kataj.4 ”Ma ko at jun yi na taj toy jun pam yi choꞌn na bnix tul ẍchujil pam, tajweꞌn yil bnix te balaj jarin yi quiꞌc xtxꞌamil, nin tajweꞌn yil coꞌsij tu aceit. Nchaꞌtz baꞌn bnix chi taneꞌn ẍec yi quiꞌc xtxꞌamil, nin baꞌn ben chꞌuliꞌn aceit tibaj.
5 ”Ma ko at jun yi na toy jun pam yi choꞌn na bnix wi xcꞌoꞌn, nchaꞌtz tajweꞌn yil bnix te balaj jarin yi quiꞌc xtxꞌamil nin yi coꞌsiꞌnt tu aceit. 6 Yil bnix, baꞌn tzun lcuꞌ piẍuꞌntz, nin baꞌn ben chꞌuliꞌn aceit tibaj.
7 ”Ej nin ko at jun yi na toy jun jilwutz pam yi choꞌn na bnix tul jun sartén, nchaꞌtz tajweꞌn yil bnix te balaj jarin tu aceit. 8 Baꞌn tzun tzꞌul ticyꞌleꞌn eꞌchk oyaꞌtz tzinwutz yi in Jehová yi iRyosil, nin tajweꞌn tan takꞌleꞌn tetz yi paleꞌ. Nin iꞌ tzun tzꞌicyꞌank nintz kale atit yi altar. 9 Nin tajweꞌn stzꞌameꞌn jun piẍ te yi oyaꞌtz tetz kꞌajbil tircuꞌn yi pam, nin tajweꞌn ltakꞌeꞌn wi altar tan pat-xeꞌn. Iꞌtz jun oy yi spat-xok, yi wiꞌnin cꞌoꞌcal tzinwutz, nin yi wiꞌnin na chintzatzin teꞌj. 10 Ej nin yi sowril yi jun oyaꞌtz baꞌn xcon tetz chiwaꞌ Aarón scyuchꞌ yi eꞌ nitxajil. Wiꞌnin xanil yi pamaꞌtz chi taneꞌn yi jun piẍ yi na patij tzinwutz.
11 ”Quiꞌc rmeril tan cweꞌn xtxꞌamil eꞌchk oyaꞌtz, na quiꞌc rmeril tan toyeꞌn jun takleꞌn swetz yi ko at xtxꞌamil. Nchaꞌtz quiꞌc rmeril tan cweꞌn caꞌbil wunak txuc tul eꞌchk oyaꞌtz yi na patij tetz jun oy yi wiꞌnin na chintzatzin teꞌj. 12 Ma yi eꞌchk oy yi na akꞌlij tetz yi bajx cosech, baꞌn tzun cuꞌ xtxꞌamil tu caꞌbil wunak txuc tul. Ma yi eꞌchk oyaꞌtz tetz bajx ujul, quiꞌc cu tan xconeꞌn tetz xel yi eꞌchk oy yi na akꞌlij swetz, yi wiꞌnin cꞌoꞌcal, nin yi wiꞌnin na chintzatzin teꞌj.
13 ”Nchaꞌtz tajweꞌn tan cweꞌn atzꞌum tul tircuꞌn eꞌchk oy yi ixiꞌn triw cuꞌn yi tzitakꞌeꞌ swetz, na yi atzꞌumaꞌtz, na ẍchaj yi bixbaꞌnt cyen jun trat skaxoꞌl.a
14 ”Ej nin kol tzitakꞌ jun oy yi ixiꞌn triw cuꞌn tetz yi bajx wutz icosech, tajweꞌn cuꞌn yi woyiꞌnt, nka yi cheꞌjaꞌnt. 15 Nin tajweꞌn tzikoj nin aceitil oliw tu insens tibaj yi jun oyaꞌtz, na iꞌtz jun oy yi ixiꞌn triw cuꞌn. 16 Ma yil bnix yi jun oyaꞌtz yi cheꞌjaꞌnt, tajweꞌn ben yi paleꞌ tan pateꞌn muꞌẍ tal te yi oyaꞌtz yi yujijt tu aceitil oliw, nin tu cyakil yi insens. Yi muꞌẍ triwaꞌtz tu yi aceitil oliw yi spat-xok, iꞌtz kꞌajbil tircuꞌn yi oy. Iꞌtz jun oy yi stzꞌeꞌok, yi at wiꞌnin cꞌoꞌcal tzinwutz, nin yi wiꞌnin na chintzatzin teꞌj.