Yi eꞌchk oy yi nxcon tan ẍchajleꞌn yi at tzatzin paz ẍchixoꞌl wunak tu Ryos
3
1 ”Ko at jun yil takꞌ jun oy tan ẍchajleꞌn yi ja jal tzatzin paz skaxoꞌl tuchꞌ, tajweꞌn yil toy jun mam tor nka jun tij wacẍ. Ej nin tajweꞌn yi quiꞌc muꞌẍ tal yanaꞌsil. 2 Yi jun yil tzꞌoponsan yi jun oyaꞌtz swutz cunin yi puertil yi peꞌmil yi mantial tetz molbil ibaj, tajweꞌn yi bajx ltakꞌeꞌn yi kꞌab twiꞌ, baꞌn tzun tzꞌoc jakꞌ kultz taꞌn. Kalenaꞌs tzun choꞌc yi eꞌ paleꞌ, yi eꞌ cyꞌajl Aarón, tan kojleꞌn nin yi ẍchꞌel tibaj, nin xlajak yi altar.3 ”Ej nin tajweꞌn yil pat-xij cyakil yi ẍepuꞌ yi at le cꞌuꞌl yi jun oyaꞌtz. 4 Nchaꞌtz, tajweꞌn yil patij yi cob xtxicunila tu yi ẍepuꞌ yi at scyeꞌjak, nin tu yi xtxꞌotxꞌb tu yi ẍepuꞌil. Tajweꞌn tzꞌel ticyꞌleꞌn tircuꞌn yi eꞌchk takleꞌnaꞌtz tan pat-xeꞌn. 5 Nin iꞌtz yi eꞌ paleꞌ yi chocopon tan pateꞌn tibaj teꞌn yi txꞌixwatz yi na pat-xij tircuꞌn wankil, yi na tzan kꞌaꞌkl wi altar, na yi eꞌchk ẍepuꞌilaꞌtz, na ẍchaj yi ja jal tzatzin paz skaxoꞌl tu yi jun aj oyinl iꞌtz jun oy yi stzꞌeꞌok, nin yi wiꞌnin cꞌoꞌcal tzinwutz, nin yi wiꞌnin na chintzatzin teꞌj.
6 ”Ej nin alchok scyetz yil tzꞌul tan toyeꞌn jun awun yi na ẍchaj yi ja jal tzatzin paz skaxoꞌl, tajweꞌn yi choꞌn tzꞌeltzaj yi oyaꞌtz txoꞌl yi tawun, nin chin tajweꞌn cunin yi iꞌtz jun mam, nka jun tij yi quiꞌc muꞌẍ tal yanaꞌsil. 7 Ma yi ko iꞌtz jun neꞌẍ cneruꞌ yil tzꞌopon oyiꞌn tzinwutz, 8 tajweꞌn yil tzꞌopon ticyꞌleꞌn swutz cunin puertil yi peꞌmil yi mantil tetz molbil ibaj. Nin yi aj oyinlaꞌtz tajweꞌn yi bajx ltakꞌen yi kꞌab twiꞌ yi tawunaꞌtz, kalenaꞌs tzun tzꞌoc jakꞌ kultz taꞌn. Nin yi eꞌ paleꞌ chocopon tan kojleꞌn nin yi ẍchꞌel tibaj, nin xlajak yi altar.
9 ”Ej nin te yi jun oyaꞌtz tetz tzatzin paz, stoyeꞌ tircuꞌn yi ẍepuꞌil tan pat-xeꞌn, tu yi jeꞌ. Nin tajweꞌn tzꞌel kuxij yi jeꞌ kale na xeꞌteꞌt tzaj wutz coc. Nchaꞌtz tajweꞌn tan pateꞌn cyakil yi ẍepuꞌ yi at te lasuꞌ, nin tircuꞌn yi at le cꞌuꞌl. 10 Nchaꞌtz tajweꞌn yil pat-xij cabil yi xtxicun tuml yi ẍepuꞌil, nin tu xtxꞌotxꞌ tuml yi ẍepuꞌil, tajweꞌn tzꞌel ticyꞌleꞌn tan pateꞌn, yil tzꞌel ticyꞌleꞌn yi xtxicun. 11 Ma yil bnix yi xtxolbilaꞌtz baꞌn tzun tzꞌoc yi paleꞌ-tz tan pateꞌn tircuꞌn yi mbi cuꞌn na el tzaj twankil yi oyaꞌtz wi altar, na niꞌcuꞌn chi iꞌtzk cumir yi na tzan toyeꞌn tan takꞌleꞌn inkꞌej.c
12 ”Ma ko iꞌtz jun chiw yil tzꞌopon jun tan toyeꞌn tetz xtxꞌixwatz tzinwutz, 13 baꞌn je kꞌab twiꞌ bajx, kalenaꞌs tzun tzꞌoc jakꞌ kultz taꞌn swutz cunin yi puertil yi peꞌmil yi mantial tetz molbil ibaj. Ma yi eꞌ paleꞌ, eꞌ tzuntz chocopon tan kojleꞌn nin yi ẍchꞌel tibaj nin xlajak yi altar.
14 ”Ej nin yil bnix yi xtxolbilaꞌtz, kalenaꞌs tzun tzꞌoc yi paleꞌ tan pateꞌn tircuꞌn yi ẍepuꞌil yi lasuꞌ, nin tircuꞌn yi ẍepuꞌ yi at le cꞌuꞌl, tetz jun oy yi patuꞌn cuꞌn sbneꞌ tzinwutz. 15 Nchaꞌtz tajweꞌn tan pat-xeꞌn cabil yi xtxicun tu yi ẍepuꞌil, nin tajweꞌn tan pat-xeꞌn yi xtxꞌotxꞌ tu yi ẍepuꞌil, tuml yi ẍepuꞌ yi at wutz coc. 16 Yil bnix yi xtxolbilaꞌtz, tzꞌocopon tzun yi paleꞌ-tz tan pateꞌn tircuꞌn yi ẍepuꞌil tuml yi xtxicun tu yi xtxꞌotxꞌ wi yi altar, na niꞌcuꞌn chi iꞌtzk cumir yi na tzan toyeꞌn tan takꞌleꞌn inkꞌej. Na tircuꞌn yi ẍepuꞌil iꞌtz wetz.
17 ”Ej nin yi xtxolbilaꞌtz iꞌtz jun caꞌwl tetz itetz, nin scyetz imamaj. Quiꞌc na ban alchok amaꞌlil kalel cxaꞌt cuꞌnt, tajweꞌn tan ibnol taneꞌn. Quiꞌc cuj tan ibajsal ẍepuꞌ nka chichꞌ,” stzun Ryos bantz tetz Moisés, tan tlol scyetz yi eꞌ tanum, yi eꞌ xonl Israel.