Yi eꞌchk oy yi tajweꞌn ltoy jun yi na juch til tan jun xubseꞌn
4
1 Itzun bantz, nintzun jilon tzaj junt tir Kataj Ryos tetz Moisés, itzun saj tloltz:2 “Alaj yi xtxolbileꞌj scyetz yi eꞌ atanum, yi eꞌ xonl Israel: Ko na xubsij jun, nin na juch til tampaj yi qui na ban taneꞌn jun scyeri incaꞌwl, tajweꞌn tan bnol yi xtxolbileꞌj:
Yi na xubsij jun wiꞌtz paleꞌ
3 ”Ko iꞌtz jun wiꞌtz paleꞌ yi na xubsij, na jal quil cyakil wunak tan paj, nin tajweꞌn yil toy jun tal neꞌẍ tor tetz xtxꞌixwatz yi quiꞌc muꞌẍ tal yanaꞌsil, tan jaleꞌn cuybil paj tzinwutz. 4 Tajweꞌn yil tcyꞌaj tzaj yi jun tal neꞌẍ wacẍaꞌtz stziꞌ cunin puertil yi peꞌmil yi mantial tetz molbil ibaj, nin baꞌn takꞌeꞌn kꞌab twiꞌ. Kalenaꞌs tzun tzꞌoc jakꞌ kultz taꞌn, tzinwutz. 5 Ej, nin iteꞌn nin yi wiꞌtz paleꞌaꞌtz, tzꞌicyꞌank nin muꞌẍ ẍchꞌel yi tal neꞌẍ toraꞌtz, le yi mantial tetz molbil ibaj. 6 Nin yil tzꞌopon tcꞌuꞌl yi mantial tetz molbil ibaj, copon muꞌul yi wi kꞌab tul yi chichꞌ yi cyꞌaꞌn taꞌn, nin tzinwutz cuꞌn, tajweꞌn yil stzꞌit nin juk tir te yi xbuꞌk yi chꞌinlij swutz yi amaꞌl yi chin xan nin. 7 Nchaꞌtz tzꞌocopon sukꞌul chichꞌ te eꞌchk tucꞌ yi altar kale na pat-xeꞌt yi insens yi wiꞌnin cꞌoꞌcal, yi choꞌn at le mantial tetz molbil ibaj. Nin yi sowril yi ẍchꞌel yi tal neꞌẍ toraꞌtz, choꞌn mben kojij stkan cuꞌn yi patbil txꞌixwatz yi choꞌn at wutzkꞌanil yi mantial tetz molbil ibaj. 8 Yil bajij tircuꞌn yi xtxolbilaꞌtz, baꞌn tzꞌoc yi wiꞌtz paleꞌ tan telseꞌn len tircuꞌn yi ẍepuꞌil yi at te lasuꞌ, nin tircuꞌn yi at le cꞌuꞌl, 9 baꞌn tcyꞌaj len tircuꞌn, tuml cabil yi xtxicun tu yi ẍepuꞌ yi at teꞌjak, nin yi xtxꞌotxꞌ tu yi ẍepuꞌil. 10 Tircuꞌn tzꞌelpon ticyꞌleꞌn, chi na uꞌlij jun mam tor yi na oylij tan ẍchajleꞌn yi at tzatzin paz. Tircuꞌn yi na el ticyꞌleꞌn teꞌj, choꞌn jepon tkꞌol yi paleꞌ wi altar tan toqueꞌn iꞌ tan pateꞌn. 11 Ma yi stzꞌumlil yi tal neꞌẍ toraꞌtz, tu yi wiꞌ, nin yi tkan tu yi lasuꞌ, nin yi xtxaꞌ, 12 nin tircuꞌn yi wankil, baꞌn ben ticyꞌleꞌn joylaj len yi amaꞌl kale najlcheꞌt yi eꞌ atanum, tul jun amaꞌl yi xansaꞌnt. Choꞌn tzun tzꞌocopon pateꞌntz kale na beneꞌt kojij yi tzaꞌj. Nucꞌxok yi siꞌ tibaj yi tzaꞌj, nin tzꞌocopon kꞌakꞌ tan pateꞌn cuꞌn yi xtxꞌixwatz yi wiꞌtz paleꞌ.
Yi na chixubsij cyakil yi eꞌ xonl Israel
13 ”Ma jaluꞌ, ko tircuꞌn eꞌ atanum na chijuch quil, tampaj yi ja el te chicꞌuꞌl yi quiꞌc cuj tan chibnol jun xtxolbil yi quiꞌc cuj tan banleꞌn, nin quiꞌc na ban ko cyaꞌl nin jun na el xtxum tetz yi ja chipaj incaꞌwl, ilenin at quil teꞌj. 14 Yi na lajluchax yi chipaltilaꞌtz ẍchiwutz, tircuꞌn tzun eꞌ-tz tajweꞌn tan chibeneꞌn tan toyeꞌn jun tal neꞌẍ tor tetz chitxꞌixwatz, tan jaleꞌn cuybil chipaj. Ej, nin tajweꞌn tan toponeꞌn cyꞌaꞌn swutz yi puertil yi peꞌmil yi mantial tetz molbil ibaj. 15 Nin tircuꞌn yi eꞌ wiꞌ banl wiꞌ tetz tnum, baꞌn jeꞌ chikꞌab twiꞌ yi tal neꞌẍ toraꞌtz, tzinwutz, nin taꞌsteꞌnin tzꞌoqueꞌt jakꞌ kultz cyaꞌn. 16 Ma yi wiꞌtz paleꞌ, baꞌn tcyꞌaj nin muꞌẍ ẍchꞌel yi chitxꞌixwatzaꞌtz tul yi mantial tetz molbil ibaj. 17 Nin yil tzꞌocopon iꞌ tul, copon muꞌul yi wi kꞌab tul yi chichꞌ yi cyꞌaꞌn taꞌn, nin baꞌn stzꞌit nin juk tir te yi xbuꞌk yi at swutz yi amaꞌl yi wiꞌnin xanil. 18 Nin iteꞌn nin yi chichꞌaꞌtz tajweꞌn yil sukꞌ quen te yi eꞌchk tucꞌ yi altar tetz patbil insens yi at tzinwutz, tcꞌuꞌl yi mantial tetz molbil ibaj. Ma yi sowril yi chichꞌ, choꞌn mben kojij xeꞌ cuꞌn yi patbil txꞌixwatz yi at wutzkꞌanil yi mantial. 19 Nchaꞌtz baꞌn tcyꞌajlen tircuꞌn yi ẍepuꞌil yi tal neꞌẍ toraꞌtz, nin baꞌn tzꞌoc tan pateꞌn wi yi patbil txꞌixwatz. 20 Niꞌcuꞌn yi xtxolbileꞌj chi na ban yi wiꞌtz paleꞌ tan jaleꞌn cuybil yi tetz paj. Ej nin iteꞌn nin xtxolbilaꞌtz na ban tan pateꞌn chitxꞌixwatz tircuꞌn wunak, tan jaleꞌn cuybil chipaj tzinwutz. Ej nin tan yi xtxolbilaꞌtz na cuylij chipaj. 21 Kalenaꞌs tzun tcyꞌaj nin tircuꞌn yi wankil yi tal neꞌẍ mam toraꞌtz, joylajeꞌl tzaj yi amaꞌl kale najlcheꞌt, nin tzꞌocopon iꞌ tan pateꞌn chi na tulej yi jun tal neꞌẍ tor tan jaleꞌn cuybil paj.
Yi mbiꞌtz tajweꞌn tan banol jun wiꞌtz ajcaw yi na juch til
22 ”Yi ko iꞌtz jun ajcaw tetz tnum yi na tzan tan banleꞌn eꞌchk takleꞌn yi na el kꞌej incaꞌwl taꞌn, tampaj yi ja el te cꞌuꞌl yi quiꞌc cuj tan banleꞌn, na juch til tampaj. Nin ptzun nkꞌeraꞌtzk nin tajbil tan banleꞌn eꞌchk takleꞌnaꞌtz, ilenin na juch til tzinwutz. 23 Ma yi na lajluchax swutz iꞌ yi na tzan tan juchleꞌn til, tajweꞌn tan tuleꞌn tcyꞌal jun mam chiw tan toyeꞌn tzinwutz, yi quiꞌc muꞌẍ tal yanaꞌsil, tan jaleꞌn cuybil paj. 24 Nin yil tzꞌul taꞌn tzinwutz, baꞌn takꞌeꞌn kꞌab twiꞌ, nin baꞌn tzꞌoc jakꞌ kul taꞌn, le yi amaꞌl kale na chibiyxeꞌt yi eꞌchk awun yi na pat-xij tircuꞌn chiwankil tetz txꞌixwatz, na yi jun mam chiwaꞌtz iꞌtz jun txꞌixwatz tan jaleꞌn cuybil paj jun wiꞌtz ajcaw. 25 Yi paleꞌ baꞌn tcyꞌaj nin muꞌẍ te ẍchꞌel yi jun chiwaꞌtz, nin tan yi wi kꞌab tzꞌocopon sukꞌul chichꞌ te eꞌchk tucꞌ yi altar kale na pat-xeꞌt eꞌchk txꞌixwatz. Nin yi sowril yi chichꞌ, baꞌn skoj nin xeꞌ cuꞌn yi altaraꞌtz. 26 Nchaꞌtz tzꞌocopon tan stzꞌeꞌseꞌn tircuꞌn yi ẍepuꞌil wi altar, chi na ban stzꞌeꞌseꞌn yi ẍepuꞌil jun oy tetz tzatzin paz. Nin tan yi xtxolbilaꞌtz, na jal cuybil paj yi wiꞌtz ajcaw tzinwutz.
Yi na juch jun sloj wunak til
27 ”Yi ko iꞌtz jun sloj wunak yil juch til, tampaj yi na tzan tan banleꞌn eꞌchk takleꞌn yi quiꞌc cuj tan banleꞌn nin ptzun buch tlenk tzꞌel xtxum tetz yi ploj mban, na juch til. 28 Nin yil lajluchax swutz, yi ploj mban, tajweꞌn tan tuleꞌn tcyꞌal jun tij chiw tetz xtxꞌixwatz yi quiꞌc muꞌẍ tal yanaꞌsil, tan jaleꞌn cuybil paj. 29 Nin jepon tkꞌol yi kꞌab twiꞌ yi jun oyaꞌtz, yi xtxꞌixwatz, nin tzꞌocopon jakꞌ kul taꞌn kale na oqueꞌt jakꞌ chikul yi eꞌ txꞌixwatz yi na pat-xij tircuꞌn chiwankil. 30 Yi paleꞌ mben tcyꞌal muꞌẍ te ẍchꞌel yi jun tij chiwaꞌtz, nin tan wi kꞌab tzꞌocopon sukꞌul te yi eꞌchk tuqꞌuil yi patbil txꞌixwatz, yi altar. Ma yi sowril yi chichꞌ, baꞌn skoj nin xeꞌ cuꞌn yi altaraꞌtz. 31 Baꞌn tzꞌoc tan telseꞌn len tircuꞌn yi ẍepuꞌil, niꞌcuꞌn chi na uꞌlij te yi oy tetz tzatzin paz, nin baꞌn tzꞌoc tan pateꞌn tibaj yi patbil txꞌixwatz yi altar, na iꞌtz jun oy yi wiꞌnin cꞌoꞌcal tzinwutz. Yaꞌstzun stulejeꞌ yi paleꞌ tan cuyxeꞌn paj yi jun sloj wunakaꞌtz, nin tan yi xtxolbilaꞌtz scuyeꞌ paj.a
32 ”Ej nin kol tzꞌul jun tal neꞌẍ cneruꞌ taꞌn yi jun sloj wunakaꞌtz tetz toy tampaj yi til, tajweꞌn yi tij, nin yi quiꞌc muꞌẍ tal yanaꞌsil. 33 Baꞌn ltakꞌeꞌn yi kꞌab twiꞌ yi toyaꞌtz, nin baꞌn tzꞌoc jakꞌ kul taꞌn le amaꞌl kale na chibiyxeꞌt yi eꞌchk txꞌixwatz yi patuꞌn cuꞌn na chuꞌlij. 34 Yi paleꞌ baꞌn tcyꞌaj nin muꞌẍ te ẍchꞌel yi jun oyaꞌtz, nin tan yi wi kꞌab baꞌn sukꞌ quen chichꞌ te yi eꞌchk tuqꞌuil yi patbil txꞌixwatz yi altar. Ma yi sowril yi chichꞌ, baꞌn lkoj nin xeꞌ cuꞌn yi altaraꞌtz. 35 Tajweꞌn tcyꞌajlen tircuꞌn yi ẍepuꞌil yi oyaꞌtz, chi na ban yi tal neꞌẍ cneruꞌ yi na ẍchaj yi ja jal tzatzin paz, nin baꞌn tzꞌoc tan pateꞌn yi ẍepuꞌaꞌtz wi yi altar, tuml yi eꞌchk oy yi spat-xok tan takꞌleꞌn inkꞌej. Nin tan yi xtxolbileꞌj, xcyek yi paleꞌ tan jaleꞌn cuybil paj yi jun wunakaꞌtz yi ja juch til, nin scuyeꞌ paj.