Yi na xcon jun txꞌixwatz tan jun wunak tan stzajseꞌn yi il cꞌol
5
1 ”Yi ko at jun yil chakxij tan testiwiꞌn jun takleꞌn yi ja til, nka yi ja tbit, nin quil takꞌ tib tan xtxoleꞌn yi mbi cuꞌn mbajij, na tzun elpont yi nchaꞌtz iꞌ aj paj, nin jepon yi jun ilaꞌtz teꞌj kul.2 ”Nchaꞌtz ko at jun yil mac alchok takleꞌn yi xan, chi taneꞌn yi wankil alchok jilwutz txuc yi quimnakt, nin quiꞌc na ban ko smaron nka awunaꞌn yi txucaꞌtz, ilenin tzꞌocopon lacꞌp ilcꞌol teꞌj taneꞌn, ptzun quiꞌk tzꞌicyꞌ tetz yi njeꞌ macol.
3 ”Ej nin alchok scyetz yil maqueꞌn eꞌchk takleꞌn juntlen yi na el twankil jun wunak, nka alchok takleꞌnil yi xcyek tan tocseꞌn il cꞌol teꞌj taneꞌn, nin qui tzꞌicyꞌ tetz yi ko ja mac eꞌchk takleꞌnaꞌtz, na oc il cꞌol teꞌj taneꞌn, ptzun buch tlenk lnachon iꞌ teꞌj.
4 ”Ej nin ko at jun yi joꞌleꞌn tlen tuꞌ ltal ‘Jun cuꞌn yol tzimbneꞌ, yi jeꞌj’, (quiꞌc na ban yi ko baꞌn nka ploj yi jun xtxolbilaꞌtz yi ja kloꞌ oc tan banleꞌn) poro qui nin meꞌl cuꞌn teꞌj yi yol yi nsuk, ilenin sjalok til tan paj.
5 ”Ej nin alchok scyetz yi na nachon te yi ja juch til tan yi eꞌchk xtxolbilaꞌtz, tajweꞌn yi quil jiẍ tib tan xtxoleꞌn tircuꞌn yi til yi njuch. 6 Nin tajweꞌn tcyꞌaj nin jun tij chiw tzinwutz, nka jun tij cneꞌr, tetz xtxꞌixwatz tan yi til yi njuch, nin tzꞌocopon yi paleꞌ tan toyeꞌn yi xtxꞌixwatz yi jun juchul ilaꞌtz tzinwutz tan teleꞌn yi til teꞌj kul.
7 ”Ma ko quiꞌc puꞌk jun tan lokꞌcheꞌn jun neꞌẍ cneruꞌ, nka jun neꞌẍ chiw, tajweꞌn ltoy jun lmuj tal sluꞌk, nka jun lmuj tal neꞌẍ plomẍ. Jun iꞌtz tan yi til yi njuch, tan yi xubseꞌn yi mban, nin yi junt iꞌtz chi jun txꞌixwatz yi spat-xok tircuꞌn. 8 Tajweꞌn tzꞌopon yi txꞌixwatzaꞌtz swutz yi paleꞌ, nin yi paleꞌ baꞌn tzꞌoc tan sukeꞌn nin yi jun yi squimok tetz oy tampaj yi il, nin tzꞌelpon kinol yi wiꞌ, poro quil tzꞌel junawes. 9 Kalenaꞌs tzun ben chꞌuliꞌn muꞌẍ te yi ẍchꞌel yi txꞌixwatzaꞌtz le jalaj xlaj yi altar, nin yi sowril yi chichꞌ tajweꞌn syutzꞌ nin xeꞌ cuꞌn yi altar. Na iꞌtz jun txꞌixwatz tan stzajseꞌn yi il yi njuchlij. 10 Ma yi junt, spat-xok tircuꞌn wankil chi na ban nin. Nin tzꞌocopon yi paleꞌ tan toyeꞌn yi txꞌixwatz yi jun juchul ilaꞌtz tzinwutz tan teleꞌn yi til teꞌj kul, nin scuylok paj.
11 ”Ej nin yi ko at jun yi quil xcyeꞌ tan lokꞌcheꞌn cob tal neꞌẍ sluꞌk, nka cob tal neꞌẍ plomẍ, tajweꞌn tcyꞌajnin cyaj liwr te yi chumbalaj jarin. Poro quiꞌc cuj tan beneꞌn yujul aceitil oliw txoꞌl, nin quiꞌc cuj tan beneꞌn yujul insens txoꞌl yi jarinaꞌtz, na iꞌtz jun oy tan jaleꞌn cuybil paj. 12 Nin tajweꞌn tan beneꞌn tcyꞌal yi jarinaꞌtz swutz yi paleꞌ. Nin yi paleꞌ baꞌn xtxobeꞌn jun chiꞌm te yi jarinaꞌtz, tetz kꞌajbil tircuꞌn yi jarin, nin baꞌn ben tan pateꞌn wi yi patbil txꞌixwatz txoꞌl yi eꞌchk txꞌixwatz yi na tzan pateꞌn tzinwutz. Iꞌtz jun txꞌixwatz tan jaleꞌn cuybil paj. 13 Yaꞌstzun sbneꞌ yi paleꞌ tan toyeꞌn yi xtxꞌixwatz junaꞌtz, tan jaleꞌn cuybil paj. Inti sowril yi jarin, baꞌn lcyaj cyen tetz waꞌ yi paleꞌ, chi na ban yi ixiꞌn triw yi cheꞌjaꞌnt yi na opon oyiꞌn,” stzun Ryos bantz tetz Moisés.
Yi eꞌchk oy tan ẍchojleꞌn juchbeꞌn jun
14 Itzun bantz nintzun jilon tzaj junt tir Kataj Ryos tetz Moisés, itzun taltz:
15 “Alchok scyetz yi qui na el cuꞌn te jun munl iꞌ tzinwutz, na tzun juch til tampaj. Yil nachon te til, tajweꞌn tzun ltcyꞌaj tzaj jun mam cneꞌr yi quiꞌc muꞌẍ tal yanaꞌsil, tan ẍchojleꞌn yi til, nka tajweꞌn tan ẍchojol jun mult chi yi walor yi jun mam cneꞌraꞌtz. Yi jun multaꞌtz choꞌn na xom te jamel yi jun cneꞌraꞌtz yil bixeꞌ cyakꞌun yi eꞌ paleꞌ. Nin tajweꞌn tan ẍchojleꞌn tan yi jun jilwutz pwok yi na xcon cyakꞌun eꞌ paleꞌ. 16 Tajweꞌn yil ẍchoj yi walor yi juchbeꞌn, na at wiꞌnin xanil yi eꞌchk munlaꞌtz tzinwutz. Tajweꞌn tan ẍchojleꞌn tuml jun mult yi iꞌtz jun part te oꞌ piẍ yi jamel yi cneꞌraꞌtz. Choꞌn stkꞌeꞌ yi jamel yi tawun tu yi mult tetz yi paleꞌ. Ma yi paleꞌ tajweꞌn tzꞌoc tan pateꞌn yi xtxꞌixwatz yi junaꞌtz, nin tzincuyeꞌ paj.
17 ”Ej nin ko at jun yil juch til tampaj yi qui nin nxom te jun incaꞌwl, nin ptzun quiꞌk tzꞌicyꞌ tetz yi ploj mban, ilenin sjalok til, nin tajweꞌn tan ẍchojol yi mult. 18 Tajweꞌn ltcyꞌaj tzaj jun mam cneꞌr, yi quiꞌc muꞌẍ tal yanaꞌsil tetz xtxꞌixwatz, tetz xel iꞌ tan yi til. Nin aẍ Moisés tzꞌaꞌlon yi nicyꞌnaꞌ sbneꞌ jamel yi jun awunaꞌtz, nin tajweꞌn tcyꞌaj nin yi juchul il swutz yi paleꞌ, tetz xel yi juchbeꞌn, nin tan jaleꞌn cuybil paj, na qui tzꞌicyꞌ tetz yi njuch til, nin scuylok tzun pajtz tan yi xtxꞌixwatz. 19 Yi jun txꞌixwatzaꞌtz iꞌtz tetz xel yi juchbeꞌn, na yi junaꞌtz iꞌ aj paj tzinwutz,” stzun Ryos ban tzajtz tetz Moisés.