Yi eꞌchk txꞌixwatz tampaj subul nakiꞌn
6
1 Ej, itzun bantz, nintzun cawun tzaj junt tir Kataj Ryos tetz Moisés, itzun taltz:2 “Ko at jun yaj yil sjuch cuꞌn til tzinwutz tajweꞌn tan ẍchojol til. Yi eꞌchk juchbeꞌnaꞌtz iꞌtz: Tan paj yi na oc tan subleꞌn junt wunak yi ja kꞌukeꞌ cꞌuꞌl teꞌj. Iꞌ jun subulnak kol tabnaj jun yaj muꞌẍ pwok nka alchok eꞌchk takleꞌn tetz, nin quiꞌt na pakxij taꞌn tetz taw; nka ko na cꞌam jun eꞌchk takleꞌn nin quiꞌt na pakxij taꞌn tetz taw. Nchaꞌtz ko na talkꞌaj jun eꞌchk takleꞌn, nka ja el majol jun eꞌchk takleꞌn tan puers; 3 nka ja cuꞌ tewal jun takleꞌn yi ja noj pon teꞌj, yi na nachon iꞌ teꞌj naꞌj taw; nka tampaj yi ja tal jun yol yi qui nin mmeꞌl cuꞌn kꞌab teꞌj. Alchok scyetz yi na ban jun scyeri eꞌchk ilaꞌtz, ja wiꞌt juch til tzinwutz. 4 Iꞌ aj paj sbneꞌ tan yi subulnakiꞌn. Nin chin tajweꞌn cunin yil tzꞌajt yi takleꞌnaꞌtz taꞌn yi ja el tzaj talkꞌal, nka yi mmeꞌl tzaj majol tan puers, nka tan paj qui moꞌc il tan quicyꞌleꞌn yi takleꞌn yi ja akꞌlij tetz tan colol, nka jun takleꞌn yi ja jeꞌ sicyꞌol, yi qui nin mmaꞌjt taꞌn tetz yi taw. 5 Nchaꞌtz ko quinin mmeꞌl cuꞌn te yol yi nsuknak, tajweꞌn tan teleꞌn cuꞌn teꞌj. Ej nin chin tajweꞌn cunin tan tkꞌol jun part te yi oꞌiꞌn part te yi jamel yi eꞌchk takleꞌnaꞌtz. Nchaꞌtz tajweꞌn tan toyeꞌn yi xtxꞌixwatz swetz, bantz jaleꞌn cuybil paj. Na ja oc tan subleꞌn jun wunak, nin nchaꞌtz ja oc tan insubleꞌn tan yi eꞌchk ajtzaꞌklaꞌtz. 6 Nin yi xtxꞌixwatz yi stoyeꞌ swetz tan jaleꞌn cuybil paj, tajweꞌn yi iꞌtz jun cneꞌr yi quiꞌc muꞌẍ tal yanaꞌsil. Nin yi jamel yi jun txꞌixwatzaꞌtz, aẍ bixbaꞌn tetz yi nicyꞌnaꞌ sbneꞌ jamel tan ẍchojol yi mult. Tajweꞌn yi choꞌn ltzꞌel tzaj yi cneꞌraꞌtz xoꞌl yi tawun yi aj juchunlaꞌtz, nin tajweꞌn tan toponeꞌn taꞌn swutz yi paleꞌ, tetz xtxꞌixwatz tan jaleꞌn cuybil paj. 7 Nin yi paleꞌ tzꞌocopon tan toyeꞌn yi xtxꞌixwatz yi junaꞌtz tzinwutz, nin tzincuyeꞌ paj te alchok ajtzaꞌkl kale yi njuchwit yi til.” stzun Ryos bantz tetz Moisés, tan tlol iꞌ scyetz yi eꞌ tanum yi eꞌ xonl Israel.a
Eꞌchk caꞌwl scyetz paleꞌ te yi mbil chiban tan toyeꞌn eꞌchk txꞌixwatz yi na pat-xij tircuꞌn
8 Itzun bantz nintzun jilon tzaj junt tir Ryos tetz Moisés, itzun taltz: 9 “Cawun nin tetz Aarón scyuchꞌ nitxajil, nin alaj yi eꞌchk caꞌwleꞌj scyetz, te eꞌchk txꞌixwatz yi na pat-xij tircuꞌn chiwankil.b
”Yi awun yi tzꞌocopon pateꞌn tetz txꞌixwatz, tajweꞌn yil cyaj cyen wi kꞌakꞌ wi yi altar tetz cyakil akꞌbal, bantz stzꞌeꞌeꞌn cuꞌn tan kꞌakꞌ. 10 Baꞌn tzꞌoc beꞌch tetz yi paleꞌ nin baꞌn xcon calsonsiy taꞌn yi lino cuꞌn. Nin baꞌn ben iꞌ tan molcheꞌn yi stzaꞌjil yi jun awunaꞌtz yi tzꞌeꞌnakt wi altar, nin tajweꞌn ltakꞌ cuꞌn xlaj yi altar. 11 Ma yil bnix cyakil yi xtxolbilaꞌtz, baꞌn tzun xtxꞌixplen yi beꞌch tetz, nin baꞌn tcyꞌaj nin yi stzaꞌjil joylaj len chinajbil wunak, tul jun amaꞌl yi xansaꞌnt.
12 ”Ma yi kꞌakꞌ yi na tzan wi altar, quiꞌc cuj tan stzajeꞌn tetz cyakil kꞌej. Nin tajweꞌn tan toqueꞌn yi paleꞌ tan nucꞌlejeꞌn siꞌ wi yi altaraꞌtz cyakil jalchan, nin tajweꞌn tan jeꞌn nucꞌuꞌl yi awun yi tzꞌocopon pateꞌn wi kꞌakꞌaꞌtz. Nchaꞌtz stzꞌeꞌsok ntin yi ẍepuꞌil yi eꞌ txꞌixwatz yi na akꞌlij tan ẍchajleꞌn yi ja jal tzatzin paz tu Ryos. 13 Quiꞌc rmeril tan stzajeꞌn yi kꞌakꞌ wi altar, tajweꞌn yi na tzan skꞌejl tu lakꞌbal.
Eꞌchk caꞌwl te yi eꞌchk oy yi ixiꞌn triw cuꞌn yi cheꞌjaꞌnt
14 ”Je bin yi eꞌchk xtxolbileꞌj yi tajweꞌn tan banleꞌn te eꞌchk oy, yi ixiꞌn triw cuꞌn yi cheꞌjaꞌnt: Tajweꞌn tzꞌopon jun scyeri eꞌ paleꞌ yi eꞌ xonl Aarón, tan toyeꞌn wi altar tzinwutz yi in Jehová iRyosil. 15 Ej, nin tajweꞌn tan jeꞌn xtxobol muꞌẍ te yi jarin yi na tzan toyeꞌn tu muꞌẍ aceitil oliw, tuml cyakil yi insens yi xomij xlaj yi oyaꞌtz, nin tzꞌocopon tan pateꞌn wi altar na yi jun txobaꞌtz yi na pat-xij, iꞌtz kꞌajbil tircuꞌn yi jarin tu yi aceit, na iꞌtz jun txꞌixwatz yi wiꞌnin cꞌoꞌcal tzinwutz nin yi wiꞌnin na chintzatzin teꞌj. 16 Ma yi sowril yi jun oyaꞌtz, baꞌn xcon tetz chiwaꞌ Aarón scyuchꞌ eꞌ nitxajil, baꞌn bnix pam cyaꞌn teꞌj yi quiꞌc xtxꞌamil, nin baꞌn baj cyaꞌn le kꞌanil yi mantial tetz molbil ibaj, yi wiꞌnin xanil. 17 Quiꞌc rmeril tan toqueꞌn xtxꞌamil yi jarinaꞌtz cyaꞌn. Na yaꞌstzun yi cyetz chipart yi ja wakꞌ scyetz te yi eꞌchk oy yi na akꞌlij swetz, yi wiꞌnin xanil chi taneꞌn yi eꞌchk txꞌixwatz tetz juchleꞌn il, nin yi eꞌchk txꞌixwatz tan jaleꞌn cuybil chipaj tan yi xubseꞌn yi nchiban. 18 Tetz ben kꞌej ben sak, nin sbneꞌ opon tunintz, cyakil yi eꞌ yaj yi eꞌ xonl Aarón, baꞌn lbaj yi cyetz chipart cyaꞌn te eꞌchk oy yi na pat-xij tzinwutz wetz. Xan kol maqueꞌn alchok wunakil yi eꞌchk oyaꞌtz,” stzun Ryos ban tzajtz tetz Moisés.
Yi cyoy yi eꞌ paleꞌ
19 Itzun bantz nintzun cawun tzaj junt tir Kataj Ryos tetz Moisés, itzun taltz: 20 “Je yi jilwutz oyeꞌj yi tajweꞌn ltoy Aarón scyuchꞌ yi eꞌ xonl, tetz Kataj Ryos, yil tzꞌopon yi kꞌej yil choꞌc quen tetz paleꞌ: cyaj liwr te yi chumbalaj jarin, chi jun oy yi ixiꞌn triw cuꞌn yi cheꞌjaꞌnt, nin tajweꞌn cob txꞌakaj sban, stzꞌoyxok jun txꞌakaj jalchan nin yi junt txꞌakaj, cweꞌn kꞌej, nicyꞌ nin tuꞌ sbneꞌtz tetz cyakil tiemp. 21 Tajweꞌn yi choꞌn skꞌajsij yi oyaꞌtz tul jun sartén, nin tajweꞌn yujleꞌn tu aceitil oliw, nin yil tzꞌopon oyiꞌn tajweꞌn yi piẍuꞌn cuꞌn sban, na iꞌtz jun oy yi wiꞌnin cꞌoꞌcal tzinwutz, nin yi wiꞌnin na chinzatzin teꞌj. 22 Choꞌn tzun scyulejeꞌ yi eꞌ paleꞌ, yi eꞌ xonl Aarón yil choꞌc cyen tetz wiꞌtz paleꞌ, na tetz Kataj tircuꞌn yi oy nin tajweꞌn yi patuꞌn cuꞌn tzꞌuꞌlij. 23 Tircuꞌn yi eꞌchk oyaꞌtz, tajweꞌn yi patuꞌn cuꞌn tzꞌuꞌlij, nin quiꞌc cuj tan bajeꞌn muꞌẍ tal cyaꞌn te yi oyaꞌtz,” stzun Ryos ban tzajtz tetz Moisés.
Coboxt caꞌwl te yi txꞌixwatz tan xtxꞌajleꞌn yi til jun yaj
24 Itzun bantz nintzun cawun tzaj junt tir Ryos tetz Moisés, itzun taltz:
25 “Txolaj yi eꞌchk caꞌwleꞌj tetz Aarón scyuchꞌ yi eꞌ nitxajil, te yi mbi tajweꞌn tan banleꞌn te eꞌ txꞌixwatz yil xcon tan xtxꞌajleꞌn quil: Yi awun yi stzꞌoyxok tampaj quil, tajweꞌn yil tzꞌoc jakꞌ kul tzinwutz, le yi amaꞌl kale na chibiyxeꞌt yi eꞌchk awun yi na patij tircuꞌn chiwankil, na iꞌtz jun txꞌixwatz yi wiꞌnin xanil. 26 Yi paleꞌ yi tzꞌocopon tan toyeꞌn yi txꞌixwatzaꞌtz, baꞌn lwan teꞌj, poro tajweꞌn lbaj taꞌn le jun amaꞌl yi xansaꞌnt, yi choꞌn at wutzkꞌanil yi mantial tetz molbil ibaj. 27 Alchok takleꞌnil yil noj quen te yi txꞌixwatzaꞌtz sxansok cyen, nin yi kol noj chichꞌ te yi beꞌch tetz yi paleꞌ, tajweꞌn tan xtxꞌajleꞌn tul jun amaꞌl yi wiꞌnin xanil. 28 Yi ẍwokꞌ txꞌotxꞌ kale ntxicyxeꞌt yi oy, tajweꞌn yil cuꞌ paxuꞌn. Ma yi ko choꞌn ntxicyxij tul jun ẍwokꞌ yi brons cuꞌn, tzicuꞌn tzuntz yi ntin jeꞌ txꞌajij wutz.
29 ”Yi jun txꞌixwatzaꞌtz wiꞌnin xanil. Nin ntin yi eꞌ paleꞌ baꞌn lchiwan teꞌj. 30 Poro quiꞌc rmeril tan bajeꞌn jun awun cyaꞌn yi na oylij tampaj quil, ko ja opon ticyꞌleꞌn yi ẍchꞌel le mantial tetz molbil ibaj, tan jaleꞌn cuybil paj, na yi wankil yi jun txꞌixwatzaꞌtz tajweꞌn tan pat-xeꞌn tircuꞌn yi wankil.