Eꞌchk caꞌwl te txꞌixwatz yi na xcon tan ẍchojleꞌn jun caꞌwl yi mpajlij
7
1 ”At wiꞌnin xanil yi eꞌchk txꞌixwatz yi na xcon tan ẍchojleꞌn paj jun. 2 Yi awun yi stzꞌoylok, tajweꞌn yil tzꞌoc jakꞌ kul le amaꞌl kale na chibiyxeꞌt yi eꞌchk awun yi na chipat-xij, nin yi ẍchꞌel, tajweꞌn ben kojij tibaj, nin xlajak yi patbil txꞌixwatz. 3 Tajweꞌn tan toyeꞌn tircuꞌn yi ẍepuꞌil yi awunaꞌtz, yi ẍepuꞌ yi at te yi jeꞌ, nin tircuꞌn yi at te yi lasuꞌ, nin yi at le cꞌuꞌl. 4 Nchaꞌtz cabil yi xtxicun, tu yi ẍepuꞌil yi at scyeꞌjak, tu yi at xe cꞌuꞌl nin tu yi ẍepuꞌ yi at te yi xtxꞌotxꞌ, tajweꞌn tzꞌel ticyꞌleꞌn tuml yi cob xtxicun. 5 Kalenaꞌs tzun tzꞌoc yi paleꞌ tan pateꞌn tircuꞌn yi eꞌchk takleꞌnaꞌs wi yi altar, chi jun oy yi na pat-xij tan takꞌleꞌn kꞌej Ryos. Nin iꞌtz jun xtxolbil yi tajweꞌn tan bnol jun juchul il te xtxꞌixwatz, tan ẍchojleꞌn yi caꞌwl yi mpaj. 6 Nin tircuꞌn yi eꞌ paleꞌ baꞌn chiwan teꞌj, poro tajweꞌn tan chiwaneꞌn le jun amaꞌl yi xansaꞌnt, na wiꞌnin xanil yi jun waꞌnaꞌtz.7 ”Ej nin yi jun jilwutz txꞌixwatz yi na xcon tan ẍchojleꞌn yi caꞌwl yi mpajlij, niꞌcuꞌn tu yi txꞌixwatz yi na xcon tan xtxꞌajleꞌn til jun, yi eꞌchk caꞌwlaꞌtz niꞌcuꞌn tetz cabil xtxolbil. Ej nin yi oyaꞌtz iꞌtz tetz yi paleꞌ yi na oc tan banleꞌn yi jun munlaꞌtz. 8 Nchaꞌtz yi paleꞌ yi tzꞌocopon tan biyleꞌn yi tawun junt, yi ja toy tan pat-xeꞌn, tetz yi paleꞌaꞌtz sbneꞌ yi stzꞌuml yi jun txꞌixwatzaꞌtz. 9 Nchaꞌtz cyakil yi eꞌchk oy yi ixiꞌn triw cuꞌn, na ja oc tetz jarin, nin ja oc skꞌajseꞌn tul ẍchujil pam, nin tircuꞌn yi na bnix tul eꞌchk ẍwokꞌ tu apast, tetz yi paleꞌ sbneꞌ, na iꞌ na tzan tan toyeꞌn yi oyaꞌtz. 10 Nin iteꞌn nin sbneꞌ cyakil yi eꞌchk oyaꞌtz yi ixiꞌn triw cuꞌn yi cheꞌjaꞌnt, tuml yi eꞌchk oy yi na oc coꞌseꞌn tu aceitil oliw, nin tu yi eꞌchk oy yi skejenleꞌn, cyetz cyakil yi eꞌ nitxajil Aarón sbneꞌ, nin nicyꞌ nin tuꞌ na chibaj ben.
Coboxt caꞌwl te yi txꞌixwatz yi na ẍchaj yi at tzatzin paz tu Ryos
11 ”Ma jaluꞌ, je xtxolbileꞌj yi ẍeꞌn tzitulej, ko at jun yil takꞌ jun oy yi na ẍchaj yi ja jal tzatzin paz ẍchixoꞌl tu Ryos: 12 Yi ko iꞌtz tan tyoẍiꞌn tetz Ryos yi oy, tajweꞌn yil toy eꞌchk pam yi quiꞌc xtxꞌamil. Baꞌn takꞌ eꞌchk pam yi coꞌsiꞌnt tu aceit, nka baꞌn takꞌ eꞌch ẍec yi quiꞌc xtxꞌamil, nin yi chꞌuliꞌn aceit tibaj. Nchaꞌtz baꞌn ltoy junt jilwutz pam, yi na bnix te balaj jarin, yi coꞌsiꞌn tu aceit. 13 Ej nin tuml yi jun oyaꞌtz tetz tzatzin paz, tajweꞌn yi xomij pam yi at xtxꞌamil. 14 Te tircuꞌn eꞌchk oyaꞌtz tzꞌelpon ticyꞌleꞌn muꞌẍ teꞌjak, tan toyeꞌn swutz Kataj. Poro tetz yi paleꞌ sbneꞌ, na iꞌ na tzan tan kojleꞌn yi ẍchꞌel yi oy yi na ẍchaj yi ja wiꞌt jal tzatzin paz, xeꞌ cuꞌn yi altar.
15 ”Yi txꞌixwatz yi na oylij tan tyoẍiꞌn tetz Ryos, nin tetz tzatzin paz, tajweꞌn yil baj te iteꞌn nin kꞌejaꞌtz yi na oylij. Quiꞌc rmeril tan cyajeꞌn cyen colij jun tal piẍ tetz junt kꞌej. 16 Ma jaluꞌ yi awun yi na tzan toyeꞌn swetz, ko iꞌtz tan teleꞌn cuꞌn te jun yol yi suknak swetz, nka na tzan tan toyeꞌn tan tuꞌ yi at tzatzin te talmaꞌ, baꞌn baj yi jun oyaꞌtz te iteꞌn nin kꞌejaꞌtz, poro ko at sowril, baꞌn lcyaj colij, nin baꞌn lbaj cyaꞌn le junt eklok. 17 Ma yi ko atit nin sowril yi jun oyaꞌtz le toxiꞌn kꞌej, chin tajweꞌn cunin yil patij tircuꞌn. 18 Nin kol bajsij sowril yi oyaꞌtz na ẍchaj yi at tzatzin paz skaxoꞌl, le toxiꞌn kꞌej, qui tzun chintzatzin te yi jun aj oyinlaꞌtz, nin quil jal kꞌej tzinwutz. Nchaꞌtz yi oy, niꞌcuꞌn yi jak oc il cꞌol teꞌj, nin yi eꞌ yil bajsan yi chiꞌbajaꞌtz, sjalok quil teꞌj.
19 ”Kol nojquen lacꞌp alchok takleꞌn yi xan, yi cyꞌaꞌn il cꞌol taꞌn, te yi chibaj, tzꞌocopon tzun lacꞌp yi ilcꞌolaꞌtz te yi chibaj, nin quiꞌc cuj tan bajeꞌn. Tajweꞌn tzun yil tzꞌoc pateꞌn tircuꞌn. Ma ko quiꞌc jun eꞌchk takleꞌn yil nojquen te yi xan quiꞌc tzun il cꞌol te yi chiꞌbajaꞌtz, baꞌn tzun lbajtz tan alchok wunak yi xansaꞌnt.
20 ”Poro kol baj tan alchok yi qui xansaꞌnt, tajweꞌn yil tzꞌel lajuꞌn tzixoꞌl wok, na ja oyaꞌtz ja wiꞌt oylij swetz, nin wiꞌnin xanil.
21 ”Nchaꞌtz alchok scyetz yil maqueꞌn jun takleꞌn yi chin juntlen nin, chi taneꞌn eꞌchk takleꞌn yi na el twankil jun wunak, nka yi na el twankil jun txuc, nka alchok takleꞌn yi chin xaꞌbil nin, yi at il cꞌol teꞌj taneꞌn, ej nin ko tzꞌocopontz tan bajseꞌn yi chiꞌbaj tetz tzatzin paz, yi wiꞌnin xanil, yi na oylij swetz, tajweꞌn tan teleꞌn lajuꞌn tzixoꞌl wok,” stzun Ryos ban tzajtz tetz Moisés.
Eꞌchk caꞌwl te yi ẍepuꞌ tu yi chichꞌ
22 Itzun bantz nintzun jilon tzaj Ryos junt tir tetz Moisés, itzun taltz:
23 “Txolnin scyetz yi eꞌ axonl Israel yi eꞌchk xtxolbileꞌj: Quiꞌc rmeril tan bajeꞌn muꞌẍ tal ẍepuꞌil mam tor, nka ẍepuꞌil neꞌẍ cneꞌr, nka yi ẍepuꞌil jun mam chiw itaꞌn. 24 Ma yi ẍepuꞌil jun awun yi ẍchuc nquim, nka yi ja quim tan jun smaron txuc, baꞌn xcon te alchok takleꞌn, poro quiꞌc cuj tan jeꞌn ibajsal.
25 ”Alchok scyetz yil bajseꞌn yi ẍepuꞌil jun awun yi na oylij swetz chi inwaꞌ taneꞌn, tajweꞌn tan teleꞌn lajuꞌn tzixoꞌl wok.
26 ”Alchok amaꞌlil kalel cxaꞌt cuꞌnt, quiꞌc cuj tan bajeꞌn muꞌẍ chiẍchꞌel yi eꞌ txuc itaꞌn, 27 nin ko at jun yil bajseꞌn alchok jilwutz chichꞌ, tajweꞌn cuꞌn tan teleꞌn lajuꞌn tzixoꞌl.”a
Yi part yi paleꞌ te yi eꞌchk txꞌixwatz
28 Itzun bantz nintzun jilon tzaj junt tir Kataj Ryos tetz Moisés, itzun taltz:
29 “Alaj scyetz yi eꞌ axonl, yi alchok scyetz yil toy jun oy tetz tzatzin paz, tajweꞌn tzꞌopon muꞌẍ te yi oyaꞌtz tzinwutz. 30 Nin tajweꞌn yi iꞌ teꞌn nin tzꞌicyꞌan nin yi muꞌẍ te yi oyaꞌtz yi spat-xok tzinwutz. Mben tzun tcyꞌal yi ẍepuꞌil tu tircuꞌn yi wutz cꞌuꞌl, yi tzꞌocopon yi paleꞌ tan sukeꞌn nin tcyaꞌj tetz jun balaj oy tzinwutz. 31 Ej nin yi paleꞌ tzꞌocopon tan pateꞌn yi ẍepuꞌ wi altar, ma yi wutz cꞌuꞌl, iꞌtz tetz waꞌ Aarón scyuchꞌ yi eꞌ tetz xonl. 32 Nchaꞌtz tzitkꞌeꞌ yi jalaj cux yi sbal yi oyaꞌtz tetz ẍchib yi paleꞌ. 33 Na iꞌ mmoꞌc tan pateꞌn yi ẍepuꞌil tu yi ẍchꞌel yi jun oyaꞌtz yi na ẍchaj yi ja wiꞌt jal tzatzin paz skaxoꞌl. 34 Yi wutz cꞌuꞌl yi oyaꞌtz, nin yi cux yi oy yi na saj sukiꞌn swetz, iꞌtz jun balaj oy yi na intzꞌam scyetz yi eꞌ ixonl tan toyeꞌn scyetz Aarón scyuchꞌ yi eꞌ nitxajil. Tajweꞌn tan cyakꞌol yi eꞌ atanum yi jun oyaꞌtz tetz Aarón, scyuchꞌ eꞌ xonl, sbneꞌ opon tunintz,” stzun Ryos bantz.
35 Yaꞌstzun chiwaꞌ Aarón scyuchꞌ yi eꞌ xonl te yi eꞌchk oy yi na akꞌlij tetz Kataj Ryos, te yi toqueꞌn cunin iꞌ tetz paleꞌ tan xconeꞌn tetz ẍchakum Kataj. 36 Na yaꞌstzun caꞌwl Kataj Ryos tan chibnol taneꞌn, jetz yi jeꞌn aceit twiꞌ Aarón, tan ẍchajleꞌn yi iꞌ yi wiꞌtz chipaleꞌil, nin yi xtxolbilaꞌtz iꞌtz jun caꞌwl yi tajweꞌn tan chibnol taneꞌn tetz cyakil tiemp.
37 Ej nin cyakil yi eꞌchk caꞌwlaꞌtz yi ja wiꞌt kil, yaꞌstzun yi xtxolbil yi mbi cunin tajweꞌn tan chibnol te yi eꞌchk txꞌixwatz yi na pat-xij, tu yi eꞌchk oy yi ixiꞌn triw cuꞌn yi cheꞌjaꞌnt, tu yi eꞌchk txꞌixwatz tan xtxꞌajleꞌn il, tu yi eꞌchk oy yi na xcon tan ẍchojleꞌn yi caꞌwl yi mpajlij, tu yi eꞌchk oy yi na xcon tan chixanseꞌn yi eꞌ paleꞌ, tu eꞌchk oy tetz tzatzin paz. 38 Yaꞌstzun yi eꞌchk caꞌwlaꞌtz yi takꞌnak Kataj Ryos tetz Moisés tul yi amaꞌl yi tzꞌinunin tuꞌ, wi yi wutz yi na biꞌaj Sinaí, tan cyakꞌol yi eꞌchk cyoy swutz iꞌ.