Yi chibixeweꞌn Aarón scyuchꞌ yi eꞌ nitxajil, tan cyoqueꞌn tetz paleꞌ
8
1 Nintzun jilon tzaj junt tir Kataj Ryostz tetz Moisés, je tzun yol iꞌ bantzeꞌj:2 “Cyꞌajweꞌ tzaj Aarón scyuchꞌ yi eꞌ cyꞌajl, swutz yi puertil yi peꞌmil yi at solteꞌj yi mantial tetz molbil ibaj, nin cyꞌaj nin yi beꞌchok yi ntin na xcon cyakꞌun yi eꞌ paleꞌ, tu muꞌẍ aceit yi xconk tan chixanseꞌn. Nchaꞌtz cyꞌaj tzaj jun tal neꞌẍ wacẍ yi xconk tetz chitxꞌixwatz tan paj yi il cꞌol. Nchaꞌtz cob cneruꞌ tu jun miꞌt pam yi quiꞌc xtxꞌamil. 3 Ej nin molweꞌ nin cyakil nim juy swutz yi mantial tetz molbil ibaj.”
4 Ej i nin tzun tulej Moiséstz quib yi aꞌlchij tetz, na cyakil yi eꞌ wunak eꞌ mol quib swutz yi mantial tetz molbil ibaj. 5 Itzun ben tlol Moiséstz scyetz: “Je yi eꞌchk xtxolbileꞌj yi ja tal Kataj Ryos, yi tajweꞌn tan kabnol taneꞌn.”
6 Beneꞌn tzun tlol Moisés tetz Aarón scyuchꞌ yi eꞌ nitxajil, tan sajeꞌn chiẍkansal quib swutz iꞌ, tan xtxajleꞌn chiwankil. 7 Ma yi wiꞌt chitxꞌajoneꞌn, nintzun oc tkꞌol Moisés yi beꞌchok yi chukpiꞌn nin tuꞌ teꞌj Aarón, nin jeꞌ ẍinul yi xe cꞌuꞌltz tan jun cꞌalbil, nin oc tkꞌol yi xbuꞌk yi txowiꞌn quen tuꞌ, teꞌj Aarón. Nchaꞌtz oc tkꞌol yi beꞌch tetz yi na biꞌaj efod wutz cꞌuꞌl Aarón, nin cuꞌ cꞌalol yi eꞌchk juꞌ yi efodaꞌtz. 8 Nin tibaj yi jun efodaꞌtz oc tkꞌol yi junt tal xbuꞌk yi na biꞌaj pectoral, nin tcꞌuꞌl yi jun xbuꞌkaꞌtz baꞌn tzꞌoc cob tal neꞌẍ cꞌub yi na biꞌaj Urim tu Tumim. 9 Nin tzun je nucꞌul jun xbuꞌk teꞌj wiꞌ, nin swutz yi xbuꞌkaꞌtz oc tkꞌol jun tal placa yi oro cuꞌn, nin yi na ẍchaj yi Aarón iꞌ jun wiꞌtz paleꞌ. I nintzun tulej Moisésaꞌtz quib yi xtxolbil yi aꞌlchij tetz tan Kataj Ryos.a
10 Ej nintzun je tcyꞌal Moisés yi aceit, nin ben kojoltz tibaj yi mantial tetz molbil ibaj, nin tibaj yi eꞌchk maꞌcl yi at tul, yaꞌstzun tulejtz tan xanseꞌn tircuꞌn. 11 Nchaꞌtz nin ben kojol juk tir yi aceitaꞌtz tibaj yi altar, nin tibaj yi eꞌchk maꞌcl yi na xcontz te yi altar. Nchaꞌtz ben kojol tibaj yi pilaꞌ tu yi xeꞌ, yaꞌstzun tulejtz tan xanseꞌn tircuꞌn.
12 Nchaꞌtz jeꞌ kojol Moisés muꞌẍ te yi aceit tetz xansaꞌn ib twiꞌ Aarón, tan xanseꞌn iꞌ tetz wiꞌtz paleꞌ. 13 Sajeꞌn tzun ẍchakol Moisés yi eꞌ cyꞌajl Aarón, nintzun octz tan tocseꞌn beꞌch cyetz yi chukpiꞌn nin tuꞌ scyeꞌj, nin oc tkꞌol chicꞌalbil xe chicꞌuꞌl, nin jeꞌ tkꞌol yi xbuꞌk teꞌj chiwiꞌ, quib yi tal Kataj Ryos tetz. Ej nin yaꞌtz nin tulejtz.
14 Ma yi wiꞌt bnixeꞌn cyakil yi xtxolbileꞌj, nintzun ben mantar Moisés tan ticyꞌleꞌn tzaj jun tal neꞌẍ tor, yi na patij tampaj juchleꞌn il, nintzun jeꞌ chikꞌol Aarón scyuchꞌ yi eꞌ nitxajil chikꞌabtz twiꞌ. 15 Kalenaꞌs tzun toqueꞌn jakꞌ kultz tan Moisés, nin ben muꞌul yi wikꞌabtz tul yi chichꞌ, nin oc sukꞌultz teꞌjak eꞌchk tuqꞌuil yi altar, tan xanseꞌn, ma yi sowril yi chichꞌ nin tzun ben kojoltz xeꞌ cuꞌn yi altar. Yaꞌstzun bantz tan xanseꞌn yi altar, tan jaleꞌn cuybil chipaj tan eꞌchk quil.b
16 Ej nintzun eltzaj tcyꞌal Moisés tircuꞌn yi ẍepuꞌil yi lasuꞌ, tu yi xtxꞌotxꞌ tu cyakil yi ẍepuꞌil, tuml cabil yi xtxicun tu yi ẍepuꞌil, nintzun octz tan pateꞌn tircuꞌn wi altar. 17 Ma yi ẍchiꞌbel tu yi stzꞌuꞌmil, tu yi tircuꞌn yi at le cꞌuꞌl, nin oc kꞌaꞌkl taꞌn solteꞌj yi amaꞌl kale najlcheꞌt, quib yi tal Kataj Ryos tetz.
18 Beneꞌn tzun mantar Moisés tan ticyꞌleꞌn tzaj yi cneruꞌ yi bak wiꞌ yi spat-xok tircuꞌn wankil, nin jeꞌ chikꞌol Aarón scyuchꞌ yi eꞌ cyꞌajl chikꞌabtz twiꞌ yi cneruꞌaꞌtz. 19 Nintzun oc jakꞌ kultz tan Moisés, nin ben kojol yi ẍchꞌel tibaj nin xlajak yi altar. 20 Nin cuꞌ kuxul yi cneruꞌaꞌtz, piẍuꞌn cuꞌn tulejtz, nin octz tan pateꞌn yi wiꞌ tu cyakil yi wankil yi piẍuꞌnt tu tircuꞌn yi ẍepuꞌil. 21 Nchaꞌtz, nin octz tan xtxꞌajleꞌn yi lasuꞌ tu yi eꞌchk cux, nin tuml yi eꞌchk tkan, nin octz tan pateꞌn tircuꞌn wi altar tetz jun txꞌixwatz yi patuꞌn cuꞌn na uꞌlij, na iꞌtz jun oy yi wiꞌnin cꞌoꞌcal swutz Ryos, nin yi wiꞌnin na tzatzin iꞌ teꞌj. Yaꞌstzun tulej Moiséstz quib yi tal Kataj Ryos tetz.
22 Ej nin ben mantar Moisés tan ticyꞌleꞌn tzaj yi junt cneruꞌ yi xcontz tan chixanseꞌn Aarón scyuchꞌ yi eꞌ cyꞌajl, nintzun jeꞌ chikꞌabtz twiꞌ yi jun cneruꞌaꞌtz. 23 Kalenaꞌs tzun toqueꞌn jakꞌ kultz tan Moisés, nin je tcyꞌal muꞌẍ te yi ẍchꞌel yi jun cneruꞌaꞌtz nin oc sukꞌul muꞌẍ te yi ẍchin yi at le sbal Aarón. Nchaꞌtz oc sukꞌul te mamil wi kꞌab yi sbal. Nchaꞌtz oc te mamil wi tkan yi at le sbal. 24 Nintzun eꞌ saj ẍchakol yi eꞌ cyꞌajl Aarón, nin oc sukꞌul muꞌẍ chichꞌ te yi ẍchiꞌbelil yi chiẍchin yi at le chisbal, nchaꞌtz te yi mamil wi chikꞌab tu yi mamil wi quikan yi at le chisbal. Yi wiꞌt bnixeꞌn yi xtxolbileꞌj nintzun ben kojol yi chichꞌ yi sowrin, tibaj nin xlajak yi altar.
25 Ej nintzun je tcyꞌal Moisés yi ẍepuꞌ, tu yi jeꞌ, nin tircuꞌn yi ẍepuꞌ yi at teꞌjak yi lasuꞌ, tu yi ẍepuꞌ yi at teꞌj xtxꞌotxꞌ, tu cabil yi xtxicun, tu yi cux yi at le sbal. 26 Nin te yi jun tal miꞌt pam yi quiꞌc xtxꞌamil, yi na opon takꞌleꞌn swutz Kataj Ryos, nintzun je tcyꞌal jun pam yi quiꞌc xtxꞌamil tu junt yi coꞌsiꞌnt tu aceit, nchaꞌtz jun tal wotzꞌ, nintzun cuꞌ-tz xlaj yi ẍepuꞌ, tu yi cux yi sbal. 27 Beneꞌn tzun tkꞌol tircuꞌn le chikꞌab Aarón tu yi eꞌ cyꞌajl, tan chibnol chimunl, tan chichajol swutz Ryos. 28 Beneꞌn tzun Moiséstz tan ticyꞌleꞌn tzaj tircuꞌn yi at ẍchikꞌab, nintzun octz tan pateꞌn wi altar, tibaj yi txꞌixwatz yi na tzan pateꞌn. Iꞌtz jun oy yi ja xcon tan chixansajeꞌn, nin iꞌtz jun oy yi wiꞌnin cꞌoꞌcal, yi na pat-xij tan takꞌleꞌn keꞌj Ryos.
29 Ej nintzun je tcyꞌal Moisés yi wutz cꞌuꞌl yi jun mam cneruꞌaꞌtz, nintzun octz tan banleꞌn taneꞌn yi munl tan sukeꞌn nin tetz Ryos. Yi jun piẍ wutz cꞌuꞌlaꞌtz iꞌtz tetz Moisés, na yaꞌstzun saj tlol Kataj Ryos tetz.
30 Ej nin je tcyꞌal Moisés muꞌẍ te yi aceit yi na xcon tan xansaꞌn, nin muꞌẍ te yi chichꞌ yi at wi altar, nin ben stzꞌitultz ẍchiwiꞌ Aarón tu yi eꞌ cyꞌajl, nin te yi beꞌch cyetz. Yaꞌstzun tulejtz tan chixanseꞌn Aarón scyuchꞌ yi eꞌ nitxajil, nin tan xanseꞌn yi beꞌch cyetz, yi na xcon cyaꞌn.
31 Nintzun cawun Moisés scyetz Aarón tu yi eꞌ cyꞌajl: “Txicywokeꞌn yi chiꞌbaj stziꞌ cunin yi puertil yi peꞌmil yi mantial tetz molbil ibaj, nin baꞌn cxwanwok teꞌj, le iteꞌn nin amaꞌlaꞌtz. Nin baꞌn lbaj yi pam itaꞌn yi quiꞌc xtxꞌamil yi at tul tal miꞌt. Ej inin tzitulejaꞌtz, chi tal Kataj Ryos swetz, yi tlol iꞌ: ‘Yi Aarón tuml yi eꞌ cyꞌajl ilenin chiwank te yi chiꞌbajeꞌj.’ 32 Tajweꞌn tan toqueꞌn kꞌaꞌkl yi sowril yi chiꞌbaj tu yi pam. 33 Nin quil cxeꞌl wok tzaj le yi amaꞌl kale atit yi puertil yi peꞌmil yi mantial tetz molbil ibaj, tetz juk kꞌej, na yaꞌstzun yi tiemp tetz xansaꞌn ib. 34 Yi Kataj Ryos ja cawun tzaj tan banleꞌn eꞌchk munlaꞌtz chi mbajij te cobox kꞌejeꞌj, tan stzajseꞌn itil yil tzijuch. 35 Chaꞌstzun te tajweꞌn yil xcyaj wok cyen skꞌejl tu lakꞌbal stziꞌ yi puertil yi peꞌmil yi mantialeꞌj, tetz juk kꞌej. Nqueꞌn wok bin cꞌulutxum jakꞌ caꞌwl Kataj Ryos tan qui iquimeꞌn, na yaꞌstzun yi caꞌwl yi ja tal iꞌ swetz.”
36 Inin tzun cyulej Aaróntz tuml yi eꞌ cyꞌajl, chi yi caꞌwl yi tal Kataj Ryos tetz Moisés tan tlol scyetz tan chibnol taneꞌn.