Yi xeꞌteꞌn Aarón, tan banleꞌn taneꞌn yi chimunl tu yi eꞌ cyꞌajl
9
1 Itzun bantz te yi nsken wiꞌt choꞌc cyen Aarón tetz paleꞌ, nin yi nsken icyꞌ wajxakix kꞌej, nintzun ben mantar Moisés tan chichakleꞌn, scyuchꞌ yi eꞌ wiꞌ banl wiꞌ tetz yi chitanum Israel. 2 Itzun taltz tetz Aarón: “Biy cuꞌn jun neꞌẍ tor, tan jaleꞌn cuybil ipaj, nin jun mam cneꞌr yi quiꞌc muꞌẍ tal yanaꞌsil, tan pat-xeꞌn swutz Ryos. 3 Ma yi eꞌ mas wunak, al nin scyetz tan cweꞌn chibiyol jun chiw tetz chitxꞌixwatz, bantz jaleꞌn cuybil chipaj tan yi eꞌchk quil, nin jun neꞌẍ tor, tu jun tal neꞌẍ cneꞌr yi junixeꞌt yob cyaꞌn, yi quiꞌc muꞌẍ tal chiyanaꞌsil tetz jun txꞌixwatz yi patuꞌn cuꞌn sbneꞌ. 4 Nchaꞌtz baꞌn lcuꞌ biyij jun mam tor tu jun mam cneꞌr tetz jun oy tetz tzatzin paz, nin yaꞌstzun yi tzitoyeꞌ tetz Ryos. Nchaꞌtz baꞌn tzitoy eꞌchk ixiꞌn triw yi cheꞌjaꞌnt nin yi yujijt tu aceitil oliw, na ninin jaluꞌ ẍchajeꞌ tib Kataj Ryos tziwutz.”5 Inin tzun cyulejtz, chi yi tal Moisés scyetz, nin ben quicyꞌal yi eꞌchk oy swutz yi mantial tetz molbil ibaj. Cyakil cunin tzun eꞌ nim juy saj chimolol quibtz swutz Kataj Ryos tan cꞌuꞌlajeꞌn iꞌ. 6 Beneꞌn tzun tlol Moiséstz scyetz: “Ryos ncawun tzitetz tan ituleꞌn tzoneꞌj, bantz itilol yi tetz kꞌej tu yi tetz pakꞌpuchal.”
7 Nchaꞌtz ben tlol Moiséstz tetz Aarón: “Ẍkans quen awib te yi altar nin nqueꞌn tan pateꞌn atxꞌixwatz. Jakaj cuybil apaj, nin jakaj cuybil chipaj cyakil yi eꞌ kawunakil, yi eꞌ xonl Israel. Nchaꞌtz akꞌeꞌn yi oy wi altar yi ja ul cyakꞌun yi eꞌ wunak tetz Ryos. Nchaꞌtz jakaj cuybil chipaj, na yaꞌstzun yi ntal iꞌ, yi tajweꞌn tan ibnol taneꞌn.”a
8 Beneꞌn tzun Aaróntz swutz yi altar, tan tocseꞌn jakꞌ kul yi tal neꞌẍ tor tetz xtxꞌixwatz tan yi tetz til. 9 Ma yi eꞌ cyꞌajl, eꞌ tzun icyꞌanin yi ẍchꞌel yi xtxꞌixwatz. Ma Aarón nin cuꞌ muꞌul yi wi kꞌabtz tul yi chichꞌ, nin oc sukꞌultz teꞌjak yi eꞌchk tucꞌ yi at te altar, ma yi sowril yi chichꞌ choꞌn tzun beneꞌn kojoltz txeꞌ cuꞌn yi altar. 10 Nin octz tan pateꞌn yi ẍepuꞌ tu yi xtxicunil yi at le cꞌuꞌl, tuml yi ẍepuꞌil yi xtxꞌotxꞌ yi xtxꞌixwatzaꞌtz. Yaꞌstzun tulejtz, na yaꞌtz tal Jehová Ryos tetz Moisés. 11 Poro yi ẍchiꞌbel tu yi stzꞌuml, choꞌn tzun toqueꞌn pateꞌntz joylaj len yi amaꞌl kale najlcheꞌt.
12 Nchaꞌtz cuꞌ biyol Aarón yi xtxꞌixwatz iꞌ yi na pat-xij tircuꞌn wankil, nintzun ben quikꞌol yi eꞌ cyꞌajl yi ẍchꞌel yi xtxꞌixwatzaꞌtz tetz, nin choꞌn beneꞌn kojol iꞌ xlajak yi altar. 13 Te yi nsken wiꞌt bnix yi xtxolbileꞌj nintzun opon ticyꞌleꞌn swutz Aarón, yi wiꞌ yi txꞌixwatz tu yi ẍchiꞌbel yi kuxij cuꞌn taneꞌn, nintzun octz tan pateꞌn wi altar. 14 Nintzun octz tan xtxꞌajleꞌn tircuꞌn yi at le cꞌuꞌl yi xtxꞌixwatz, tu yi cux, kalenaꞌs tzun pat-xeꞌntz, tuml yi eꞌchk piẍaꞌl yi nsken wiꞌt jeꞌ nucꞌij wi altar.
15 Yi bajeꞌn yi xtxolbileꞌj, nin tzun octz tan toyeꞌn yi cyoy yi tanum. Nin xcon jun mam chiw taꞌn, tetz chitxꞌixwatz, nin oc jakꞌ kultz taꞌn, nin octz tan pateꞌn swutz Ryos, bantz jaleꞌn cuybil chipaj, chi ntulej yi tetz xtxꞌixwatz. 16 Nintzun octz tan toyeꞌn yi txꞌixwatz, quib yi caꞌwl yi at cyen. 17 Nchaꞌtz takꞌ iꞌ jun oy yi ixiꞌn triw yi cheꞌjaꞌnt, nintzun je tcyꞌal muꞌẍtz teꞌj, nintzun oc kꞌaꞌkltz taꞌn wi altar, chi mban yi jun txꞌixwatz yi mpat-xij jalchan.
18 Oc jakꞌ kul yi mam tor taꞌn tu yi cneruꞌ, tetz jun oy tetz tzatzin paz,b tetz cyakil yi eꞌ tanum. Ma yi eꞌ cyꞌajl Aarón, eꞌ oponsan yi ẍchꞌel yi txꞌixwatzaꞌtz tkꞌab iꞌ, nin tzun ben kojol Aaróntz tibaj nin xlajak yi altar. 19 Nin je tkꞌol Aarón yi ẍepuꞌil yi tor, tu yi ẍepuꞌil yi cneruꞌ, tu tircuꞌn yi jeꞌ, tu ẍepuꞌil yi lasuꞌ, yi xtxicun yi at le cꞌuꞌl, nin yi ẍepuꞌil yi xtxꞌotxꞌ, 20 nin je tkꞌol yi ẍepuꞌaꞌtz tuml yi wutz cꞌuꞌl wi yi altar. Nintzun oc kꞌaꞌkltz taꞌn. 21 Ej, nin oc Aarón tan sukeꞌn nin yi wutz cꞌuꞌl yi txꞌixwatz, tu yi cux yi sbal tetz Ryos. Yaꞌstzun bantz na iꞌtz jun oy yi jeꞌ sukiꞌn swutz Ryos, na yaꞌstzun caꞌwl yi tal Moisés tan bnixeꞌn.
22 Yi bnixeꞌn cyakil yi eꞌchk xtxolbilaꞌtz tan Aarón nintzun je tkꞌol kꞌabtz squibaj yi eꞌ wunak tan takꞌleꞌn chibanl,c nin eltzajtz te yi altar. 23 Nin eꞌ oc Moiséstz, tu Aarón le yi mantial tetz molbil ibaj. Ma yi cyeleꞌn tzaj nintzun cyakꞌ chibanl squibaj cyakil yi eꞌ wunak. Lajluchaxeꞌn tzun yi pakꞌpuchal Kataj Ryos ẍchiwutz tircuꞌn eꞌ. 24 Na nin cuꞌul tincꞌuj jun chin kꞌakꞌtz tan stzꞌeꞌseꞌn cuꞌn yi txꞌixwatz, tu yi eꞌchk ẍepuꞌ yi list tan pateꞌn wi altar.
Ma yi quilol yi xtxolbileꞌj, tircunin tzun eꞌ wunak eꞌ ẍchꞌintz, nin eꞌ cuꞌ jokloktz wuxtxꞌotxꞌ.