Yi quil Nadab tu Abiú
10
1 Itzun bantz nin eꞌ ben yi eꞌ cyꞌajl Aarón yi na chibiꞌaj Nadab tu Abiú, tan ticyꞌleꞌn tzaj yi chipatbil insens, nin tzun cuꞌ chinojsaltz tan xtxakꞌakꞌ, nin jeꞌ insens cyaꞌn tibaj yi kꞌakꞌaꞌtz, nin eꞌ octz tan toyeꞌn tetz Ryos. Poro yi jun oyaꞌtz nkꞌeꞌtz Ryos aꞌlon scyetz tan chibnol taneꞌn. 2 Teleꞌn tzaj tzun tincꞌuj jun chin kꞌakꞌ tan Kataj Ryos, nin yi jun kꞌakꞌaꞌtz xcyeꞌ tan chitzꞌeꞌseꞌn, nin tan chibiyleꞌn cuꞌn. 3 Nintzun ben tlol Moisés tetz Aarón:—Yaꞌstzun yi xtxolbileꞌj yi tal Jehová Ryos, na je yol iꞌeꞌj:
“Tzinchajeꞌ yi wiꞌnin inxanil scyetz yi eꞌ yi na chiban taneꞌn chimunl tzinwutz.
Nin tzinchajeꞌ yi at wiꞌnin inkꞌej scyetz cyakil eꞌ xonl Israel,” stzun Ryos, chij Moisés bantz. Quiꞌc nin tzun jun yol je tlol Aarónaꞌtz.
4 Lajkeꞌl nintzun beneꞌn mantar Moisés tan ẍchakleꞌn Misael tu Elsafán, yi eꞌ cyꞌajl Uziel, yi tío Aarón. Itzun ben tloltz scyetz:
—Or itetz lajkeꞌl, nin cyꞌajwokeꞌl tzaj chiwankil itzicy, swutz yi mantial, nin cyꞌajwokeꞌ nin joylaj len yi tnum.
5 Lajkeꞌl nin tzun cyoponeꞌntz, nin je chitzꞌamol yi beꞌch cyetz tan cyelseneꞌl tzaj chiwankil yi eꞌ almaꞌaꞌtz joylaj len yi tnum, quib yi tal Moisés scyetz.
6 Beneꞌn tzun tlol Moiséstz tetz Aarón scyuchꞌ yi eꞌ cyꞌajl yi na chibiꞌaj Eleazar tu Itamar:
—Quil tzichitpwok len xiꞌil iwiꞌ, nin quil tziritꞌ cuꞌn yi beꞌch itetz, tan qui iquimeꞌn, nin tan qui jaleꞌn ẍchiꞌchbeꞌn cꞌuꞌl Ryos te yi eꞌ katanum. Poro yi eꞌ mas wunak tetz yi tnum, tircuꞌn eꞌ, baꞌn chichunan tan ẍchajleꞌn yi bis yi ateꞌ cuꞌnt. 7 Nin quil cxeꞌltzaj wok solteꞌj yi mantial tetz molbil ibaj, na ko yaꞌtz xquimok wok, na jeꞌnak aceit tiwiꞌ tan ixanseꞌn tan Jehová Ryos.
Ej, yaꞌtznin tzun cyulejtz quib yi tal Moisés scyetz.
Coboxt caꞌwl scyetz yi eꞌ paleꞌ
8 Itzun bantz nin tal Ryos tetz Aarón:
9 “Quiꞌc cuj tan bajeꞌn win awaꞌn scyuchꞌ acyꞌajl, nka alchok jilwutz xcꞌalaꞌ, yi ntaxk cxoꞌc wok tul yi mantial tetz molbil ibaj, bantz qui iquimeꞌn. Yi jun xtxolbileꞌj iꞌtz jun caꞌwl tetz itetz scyuchꞌ eꞌ ixonl tetz ben kꞌej ben sak. 10 Yi xac yi jun caꞌwlaꞌtz iꞌtz tan lajluchaxeꞌn tziwutz yi mbiꞌtz xan, nin mbiꞌtz yi nkꞌeꞌtz xan. Nchaꞌtz iꞌtz tan lajluchaxeꞌn yi eꞌchk munl yi skoj cuꞌn teꞌj txoꞌl yi eꞌchk munl yi na jal itil taꞌn, 11 nin tajweꞌn tan ichusul yi eꞌ itanum te tircuꞌn yi eꞌchk caꞌwl yi walnak tetz Moisés, tan ixomeꞌn teꞌj.”
12 Nintzun tal Moiséstz tetz Aarón scyuchꞌ yi cob cyꞌajl, Eleazar tu Itamar, yi jaltaꞌtz cob eꞌ eꞌ cyaj cyen:
—Baꞌn xcon yi oy yi ixiꞌn triw cuꞌn itaꞌn, yi ja cyaj cyen te yi eꞌchk oy yi ja pat-xij swutz Jehová Ryos, nin baꞌn tzibajswokeꞌn, poro quil tzꞌoc xtxꞌamil yi eꞌchk pamaꞌtz itaꞌn. Bajswokeꞌn nakaꞌjil yi patbil txꞌixwatz, na iꞌtz jun oy yi wiꞌnin xanil. 13 Yi jun jilwutz oyaꞌtz axwok bajsank tetz, sbneꞌ opon tunintz. Nin tajweꞌn tan bajeꞌn itaꞌn tul jun amaꞌl yi wiꞌnin xanil, na yaꞌstzun itetz sbneꞌ. Iꞌtz ipart te eꞌchk oy yi na pat-xij swutz Kataj Ryos tan takꞌleꞌn keꞌj iꞌ.a Na yaꞌstzun jun scyeri caꞌwl yi takꞌ Kataj Ryos swetz. 14 Nin nchaꞌtz baꞌn cxwan wok tej yi wutz cꞌuꞌl yi txꞌixwatz yi sukiꞌn mmuꞌlij, yi wiꞌnin kꞌej. Nin baꞌn cxwan wok te yi cux yi sbal, yi jun txꞌixwatzaꞌtz yi na oylij tetz Ryos. Nin tajweꞌn tan ibajsal scyuchꞌ yi eꞌ acyꞌajl nin scyuchꞌ eꞌ ameꞌl, tul jun amaꞌl yi xan, na yaꞌstzun itetz ipart te eꞌchk oy tetz tzatzin paz yi na cyakꞌ yi eꞌ itanum tetz Kataj Ryos. 15 Yi cux yi txꞌixwatz yi sbal, tu yi wutz cꞌuꞌl yi sukiꞌn na uꞌlij tetz Kataj Ryos, yi na chicyꞌaj tzaj yi ẍepuꞌ yi na patij swutz Ryos, cyakil yi chiꞌbajaꞌtz yaꞌstzun itetz sbneꞌ nin scyetz initxaꞌ tetz ben kꞌej ben sak. Na yaꞌstzun alijt cyen tan Kataj Ryos swetz.b
16 Ej nintzun oc Moisés tan jakleꞌn tkanil yi jun mam chiw yi akꞌlij tan jaleꞌn cuybil chipaj, poro nsken wiꞌt pat-xij. Nintzun jeꞌ lajp wiꞌ Moiséstz scyeꞌj Eleazar tu Itamar, yi eꞌ cyꞌajl Aarón, itzun taltz:
17 —¿Mbi tzuntz yi qui mbaj yi txꞌixwatz itaꞌn yi na xcon tan jaleꞌn cuybil paj jun, tul jun amaꞌl yi xan? Na, chin xan nin yi jun oyaꞌtz,c na ja takꞌ Ryos tzitetz tan beneꞌn tekal tircuꞌn yi quil yi eꞌ itanum. 18 Na yi ẍchꞌel yi jun txꞌixwatzaꞌtz qui nin mben ticyꞌleꞌn tul yi mantial tetz molbil ibaj, chaꞌstzun te ja kloꞌ baj yi chiꞌbaj itaꞌn le jun amaꞌl yi xan, quib yi walnak tzitetz.
19 Stzaꞌwel tzun Aarón yi yol Moisés, itzun taltz:
—Jaluꞌ, ja cyoy yi eꞌ wunak chitxꞌixwatz tan jaleꞌn cuybil chipaj, nin ja cyoy chitxꞌixwatz yi patuꞌn cuꞌn na uꞌlij swutz Jehová Ryos, poro ilenin ja bajij eꞌchk il sweꞌj, nin yi wetz yi na waj tzꞌel intxum tetz iꞌtz: ¿Yi jajk chinwan te yi txꞌixwatzaꞌtz, ja ptzun kloꞌ tzatzin Ryos teꞌj? 20 Nintzun cu cꞌuꞌl Moiséstz tbaꞌn tan yi xtxolbil yi ben tbital teꞌj Aarón.