Yi eꞌchk txuc yi xan yi quiꞌc cuj tan chibajseꞌn, tu yi eꞌ txuc yi baꞌn chibajsaj
11
1 Ej, nintzun jilon tzaj Ryostz scyetz Moisés tu Aarón, itzun taltz:2 “Alwok scyetz yi eꞌ xonl Israel yi baꞌn chibajsaj cyakil eꞌchk jilwutz txuc yi at wi munt. 3 Baꞌn lbaj yi eꞌ txuc itaꞌn yi na chiwochꞌ cob tir chiwaꞌ, nin yi cob cuntuꞌ elnak chipacꞌ.
4 ”Ma na ẍchixoꞌl yi eꞌ txucaꞌtz yi na chiwochꞌ cob tir chiwaꞌ nin yi at chipacꞌ yi nkꞌeꞌtz cob cuntuꞌ elnak, quil baj itaꞌn. Quil baj yi eꞌ camey itaꞌn, na baꞌn na chiwochꞌ cob tir chiwaꞌ poro nkꞌeꞌtz cob cuntuꞌ elnak chipacꞌ, nin xan kol baj jun txucaꞌtz itaꞌn.
5 ”Nchaꞌtz yi xpitakꞌ, baꞌn na chiwochꞌ cob tir chiwaꞌ, poro nkꞌeꞌtz cob cuntuꞌ elnak yi pacꞌ, nin sjalok itil kol baj itaꞌn.
6 ”Nchaꞌtz yi eꞌ umul baꞌn na chiwochꞌ cob tir chiwaꞌ, poro nkꞌeꞌtz cob cuntuꞌ elnak chipacꞌ. Nin tajweꞌn tzꞌoc itaꞌn chi jun txuc yi xan, yi quiꞌc cuj tan bajseꞌn.
7 ”Quil baj chiꞌbaj boch itaꞌn, na at pacꞌ nin cob cuntuꞌ elnak, por qui na chiwochꞌ cob tir chiwaꞌ. Xan kol baj itaꞌn.
8 ”Quiꞌc rmeril tan bajeꞌn yi chichiꞌbel yi txucaꞌtz itaꞌn, nin quiꞌc cuj tan imacol chiwankil yi ko quimnakt, na sjalok itil kol tzimac.
9 ”Ma jaluꞌ, scye yi eꞌ txuc yi na chixon xe aꞌ baꞌn lbaj itaꞌn, poro ko ntin at chixicyꞌ nin ko at cxtiꞌlil cyeꞌj, nin yi choꞌn na chixon tul eꞌchk tzanlaꞌ nka xe mar. 10 Ma yi eꞌ txuc yi quiꞌc chixicyꞌ, nin quiꞌc cxtiꞌlil cyeꞌj, yi choꞌn nin najlcheꞌ-tz xe aꞌ, xan kol tzibajsan, nin chin xaꞌbil nin eꞌchk txucaꞌtz sbneꞌ tetz itetz. 11 Quil tzibajsaj yi chichiꞌbel yi eꞌ txucaꞌtz, nin ko quimnakeꞌt, chin xaꞌbil nin chiwankil sbneꞌ tetz itetz. 12 Tircuꞌn jilwutz txuc yi choꞌn ateꞌ xe aꞌ, nin yi quiꞌc chixicyꞌ tu cxtiꞌlil yi cyeꞌj, chin juntlenin sbneꞌ tetz itetz.
13 ”Ma jaluꞌ, chixoꞌl yi txuc yi na chixicyꞌin, quiꞌc cuj tan bajeꞌn yi jun txꞌakajeꞌj itaꞌn: yi eꞌ qꞌuilqꞌuitx, tu yi eꞌ waꞌkl bak, tu yi eꞌ aj cayinl yi choꞌn najlcheꞌ kale atit mar, 14 tu cyakil jilwutz kuꞌs, tu yi eꞌ kuꞌs yi ẍel, 15 nin tircuꞌn yi eꞌ jilwutz joj yi at, 16 tu yi eꞌ avestruz, tu yi eꞌ xitxꞌ, tu yi eꞌ gaviota, nin tu cyakil jilwutz qꞌuil qꞌuitx yi at, 17 tu cyakil jilwutz tucruj, nin yi junt jilwutz yi na chibiꞌaj cormorán, tu yi junt jilwutz yi na chibiꞌaj ibis, 18 tu yi junt jilwutz yi na chibiꞌaj cisne yi nim tkan quikan, tu yi junt jilwutz yi na chibiꞌaj pelícano, tu yi eꞌchk jilwutz joj, 19 tu yi eꞌ cigueña, nin cyakil yi eꞌchk jilwutz garza yi at, tu yi junt jilwutz yi na biꞌaj abubilla, tu yi sotzꞌ.
20 ”Nchaꞌtz yi eꞌ tal neꞌẍ txuc yi qui tunin ilwutz eꞌ, yi na chixicyꞌin, nin yi at cyaj quikan, chin xan nin kol baj yi jun jilwutz txucaꞌtz itaꞌn. 21 Poro txoꞌl yi tal txucaꞌtz, at eꞌ yi na chitzꞌitpun, nin je yi eꞌchk jilwutzeꞌj yi baꞌn lbaj itaꞌn: 22 Baꞌn lbaj tircuꞌn yi eꞌchk jilwutz sacꞌ itaꞌn, tu eꞌchk jilwutz tzuꞌ yi na chixicyꞌin, tu yi tal sacꞌ yi qui tunin ilwutz eꞌ. 23 Ma yi ko iꞌtz junt jilwutz neꞌẍ txuc, quiꞌc tzun cujtz tan bajeꞌn itaꞌn, na chin xan nin kol baj itaꞌn.
24 ”Ma jaluꞌ, yi eꞌchk takleꞌneꞌj yi swaleꞌ nin tzitetz, xcyek tan tocseꞌn lacꞌpuj yi il cꞌol tziteꞌj taneꞌn, kol cxom wok teꞌj:
”Alchok scyetz yil maqueꞌn yi wankil jun scyeri txucaꞌtz yi quimnakt, tzꞌocopon lacꞌp il cꞌol teꞌj taneꞌn jalen cuꞌn yil cuꞌ kꞌej, kalenaꞌs tzun tzꞌoc junt tirtz tetz tajlal yi eꞌ yi xansaꞌnt.
25 ”Alchok scyetz yil tekeꞌn jun scyeri txucaꞌtz, tajweꞌn cuꞌn tan xtxꞌajol chan beꞌch tetz na ja oc lacꞌp il cꞌol teꞌj taneꞌn jalen cuꞌn yil cuꞌ kꞌej. Kalenaꞌs tzun tzꞌoctz tetz xansaꞌnt junt tir.
26 ”Tircuꞌn yi eꞌ txuc yi at chipacꞌ, poro yi nkꞌeꞌtz cob cuntuꞌ elnak, nin yi qui na chiwochꞌ cob tir chiwaꞌ, xan kol baj itaꞌn. Nin alchok scyetz yil maqueꞌn chiwankil yi txucaꞌtz yi quimnakt, tzꞌocopon tetz jun yi ja oc lacꞌp il cꞌol teꞌj taneꞌn, na at il cꞌol taneꞌn te wankil yi txucaꞌtz.
27 ”Nin te cyakil yi eꞌ txuc yi at cyaj quikan, nin at chipacꞌ yi jatxoꞌn tib, xan kol tzꞌoc jun tan macleꞌn chiwankil yi eꞌ txucaꞌtz yi ja quim. Tzꞌocopon tzun lacꞌp il cꞌol teꞌj taneꞌn jaleꞌn cuꞌn yil cuꞌ kꞌej. Kalenaꞌs tzun tzꞌel il cꞌol teꞌj. 28 Nin alchok scyetz yil tek nin wankil jun scyeri txucaꞌtz yi quimnakt, tajweꞌn tan xtxꞌajol yi beꞌch tetz, na ja wiꞌt oc lacꞌp il cꞌol teꞌj taneꞌn. Jalen yil cuꞌ kꞌej, kalenaꞌs tzun tzꞌel il cꞌoltz teꞌj. Tajweꞌn tzꞌel itxum tetz, yi tircuꞌn chiwankil eꞌ txucaꞌtz, yi ẍchuc nchiquim, cyaꞌn il cꞌol cyaꞌn taneꞌn.
29 ”Ma jaluꞌ, ẍchixoꞌl eꞌ txuc yi yakaꞌn cuꞌn na chixon wuxtxꞌotxꞌ, at il cꞌol scyeꞌj taneꞌn, chi taneꞌn yi sakꞌaben, nin eꞌ itxꞌij, tu cyakil jilwutz txuc yi na chijutnin quib wuxtxꞌotxꞌ, 30 chitaneꞌn yi eꞌ camaleón, tu yi eꞌ lagart, tu yi eꞌ ẍuluꞌ, tu junt jilwutz yi na chibiꞌaj salamanquesa.
31 ”Tircuꞌn yi eꞌ jilwutz txucaꞌtz, yi na chijut nin chicꞌuꞌl wuxtxꞌotxꞌ, xan sbneꞌ tetz itetz. Na alchok scyetz yil maqueꞌn chiwankil yi txucaꞌtz yi quimnakt, tzꞌocopon lacꞌp il cꞌol teꞌj taneꞌn jaleꞌn cuꞌn tzꞌoc akaleꞌn.
32 ”Nchaꞌtz alchok scyeri eꞌ txucaꞌtz yi quimnakt yil saj txꞌakx tibaj alchok eꞌchk takleꞌn, chi taneꞌn tzeꞌ, jun beꞌchok, jun tzꞌuꞌm, jun cstal, nka jun maꞌcl tetz akꞌun, tzꞌocopon tetz xan kol kamac. Nin tajweꞌn tan cweꞌn xe aꞌ, jalen yil cuꞌ kꞌej, kalenaꞌs tzun xansij junt tir.
33 ”Alchok scyetz te yi txucaꞌtz yi quimnakt yil saj txꞌakx tul alchok lak, nka ẍwokꞌ yi txꞌotxꞌ, tzꞌocopon tircuꞌn yi at tul yi ẍwokꞌaꞌtz, tetz xan kol kamac. Tajweꞌn tan teleꞌn joꞌliꞌn, nin tajweꞌn tan cweꞌn paxiꞌn yi ẍwokꞌ. 34 Yi kol cuꞌ tzꞌit yi aꞌ yi at tul yi ẍwokꞌ yi qui xansaꞌnt, tibaj alchok jilwutz tꞌimbil, tircuꞌn yi tꞌimbil kalel nojcuꞌn yi aꞌaꞌtz tzꞌocopon tetz xan, nin yi aꞌ yi at tul yi ẍwokꞌaꞌtz, quiꞌc xac sbneꞌ, na xan yi ẍwokꞌ kale atit cuꞌnt yi aꞌ. 35 Alchok takleꞌnil kalel noj cuꞌnt yi chiwankil yi eꞌ txucaꞌtz yi quimnakt, tzꞌocopon tetz xan. Yi ko iꞌtz jun ẍchujil pam, nka jun chuj yi tal juy, tajweꞌn yil cuꞌ xituꞌn. Na xan kol xcon junt tir itaꞌn. Ej nin cyakil yi xtxolbilaꞌseꞌj tajweꞌn tzitocsaj, na yaꞌstzun yi mero bintzi.
36 ”Poro te yi aꞌ yi na mulkꞌin, nin yi aꞌ yi at tul pilaꞌ tetz ucꞌaꞌbil, ilenin xansaꞌnt sbneꞌ, na yaꞌstzun na eleꞌt tzaj yi itcꞌaꞌ, ntin cuꞌn yi eꞌ wunak yi na chimaqueꞌn chiwankil yi eꞌ txucaꞌtz yi quimnakeꞌt, na choꞌc tetz tajlal jun wunak yi ja oc lacꞌp il cꞌol teꞌj.
37 ”Yi kol cuꞌ txꞌakx chiwankil yi txucaꞌtz yi quimnakt txoꞌl eꞌchk ij, yi txant tan toqueꞌn xtxꞌopleꞌn, ilenin xansaꞌnt sbneꞌ. 38 Ma jaluꞌ, yi ko acꞌsaꞌnt yi ij, nka choꞌn at ij tul aꞌ, nin lcuꞌ txꞌakxuj wankil yi txucaꞌtz tibaj, tzꞌocopon tzun tetz xan.
39 ”Ej nin yi kol quim jun itawun tan yaꞌbil nka ẍchuc lquim quiꞌc itocbil tan bajseꞌn. Ej nin alchok scyetz yil maqueꞌn yi wankil yi jun awunaꞌtz yi quimnakt tzꞌocopon lacꞌp il cꞌol teꞌj taneꞌn jalen cuꞌn yil cuꞌ kꞌej, kalenaꞌs tzun tzꞌoc junt tir tetz xansaꞌnt. 40 Nin alchok scyetz yil baj yi ẍchiꞌbel yi jun awunaꞌtz taꞌn, tajweꞌn cuꞌn tan xtxꞌajol yi beꞌch tetz, nin tzꞌocopon lacꞌp il cꞌol teꞌj jalen cuꞌn yil tzꞌoc akaleꞌn. Nchaꞌtz yi jun yil tzꞌoc tan telseneꞌltzaj wankil yi awunaꞌtz, tajweꞌn tan xtxꞌajol yi beꞌch tetz, nin tzꞌocopon lacꞌp il cꞌol teꞌj jalen cuꞌn yil tzꞌoc akaleꞌn.
41 ”Tircuꞌn jilwutz txuc yi tu na chijut nin tuꞌ chiwankil wuxtxꞌotxꞌ, chin xan nin eꞌ, nin quiꞌc cuj tan bajeꞌn chichiꞌbel itaꞌn.
42 ”Quiꞌc cuj tan bajeꞌn jun txuc itaꞌn yi na jut nin cꞌuꞌl wuxtxꞌotxꞌ, mpe jun yi at cyaj tkan, nka at wiꞌnin tkan, quiꞌc cuj tan bajeꞌn itaꞌn, na xan tetz itetz. 43 Qui bin tzitakꞌ amaꞌl tan toqueꞌn lacꞌp il cꞌol tziteꞌj tan tuꞌ bajseꞌn yi eꞌ txucaꞌtz yi xan, yi eꞌaꞌs yi na chijut nin tuꞌ chiwankil wuxtxꞌotxꞌ. 44 Na yi in wetz in Jehová yi iRyosil, tajweꞌn bin yil tzixansaj itib, na yi in wetz chin xan nin in. Qui bin tzipoꞌtzaj iwankil tan tuꞌ jun txuc yi na jut nin cꞌuꞌl wuxtxꞌotxꞌ. 45 Na in iTaj Jehová, nin ja cxeꞌl wok tzaj waꞌn jakꞌ chicaꞌwl eꞌ aj Egipto, nin in iRyosil. Chaꞌstzun te tajweꞌn tan ixansal itib, na yi in wetz chin xan nin in.”a
46 Yaꞌstzun yi eꞌchk xtxolbilaꞌtz yi tajweꞌn tan banleꞌn taneꞌn ẍchixoꞌl cyakil yi txuc yi ateꞌ wuxtxꞌotxꞌ, nin ẍchixoꞌl yi eꞌ yi na chixicyꞌin, nin ẍchixoꞌl yi eꞌ yi choꞌn ateꞌ xe aꞌ, nin yi eꞌ yi tu na chijut nin tuꞌ chicꞌuꞌl wuxtxꞌotxꞌ. 47 Yi eꞌchk xtxolbilaꞌtz iꞌtz tan teleꞌn itxum tetz yi naꞌ scyetz txuquil yi xan nin naꞌ scyetz eꞌ yi nkꞌeꞌtz xan nin naꞌ scyetz eꞌ yi baꞌn tzibajsaj, nin yi eꞌ yi quiꞌc cuj tan ibajsal.