Yi na xansaj tib jun xnaꞌn yi na ul yos tuchꞌ
12
1 Ej itzun bantz nintzun jilon tzaj junt tir Kataj Ryos tetz Moisés, itzun taltz:2 “Alaj scyetz cyakil yi eꞌ atanum, yi axwok xonl Israel, yi xtxolbileꞌj: Yil tzꞌul yos tu jun xnaꞌn, nin ko iꞌtz jun tal xicy yi mitzꞌij, nkꞌeꞌtz xansaꞌnt sbneꞌ yi xnaꞌn tetz juk kꞌej. Niꞌcuꞌn yi xtxolbileꞌj te yi na tzan te yi tiempil tetz xtxꞌajoꞌn. 3 Ej nin le wajxakiꞌn kꞌej yi titzꞌleꞌnix yi niꞌ, tajweꞌn yil banlij circuncidar.a 4 Ej nin yi xtxuꞌ yi niꞌ tajweꞌn tan ẍchꞌiwal junaklaj tu ox kꞌej tan xansal tib. Nin quiꞌc cuj tan macol jun takleꞌn yi xan, nin quiꞌc cuj tan toponeꞌn le mantial tetz molbil ibaj, jalen cuꞌn yil tzꞌicyꞌ yi cobox kꞌejaꞌtz yi na xcon tan xansal tib. 5 Ej nin ko iꞌtz jun tal xun yi na itzꞌij, qui xansaꞌnt yi xnaꞌn sbneꞌ tetz cyajlaj kꞌej. Niꞌcuꞌn yi xtxolbileꞌj tu yi na icyꞌ yi tiemp tetz yi xtxꞌajoꞌn. Nin tajweꞌn yil ẍchꞌiw ox cꞌal tu kak kꞌej tan xansal tib tan paj yi chichꞌ yi mmeꞌl twankil.
6 ”Ej, ma yil jepon tamp yi jun tiempaꞌtz tan xansal tib, quiꞌc na ban yi ko iꞌtz tampaj jun tal yi xicy, nka tan jun tal yi xun yi mmitzꞌij, tajweꞌn tan beneꞌn tcyꞌal tetz yi paleꞌ jun tal neꞌẍ cneꞌr yi junixeꞌt yob taꞌn, tetz xtxꞌixwatz yi spat-xok tircuꞌn wankil, nin jun plomẍ, nka jun xmucuy tan jaleꞌn cuybil paj. Nin tajweꞌn chopon yi xtxꞌixwatzaꞌtz taꞌn stziꞌ cunin yi puertil yi peꞌmil yi mantial tetz molbil ibaj. 7 Nin yi paleꞌ tzꞌocopon tan sukeꞌn nin yi oyaꞌtz tzinwutz, nin tzꞌocopon tan pateꞌn yi xtxꞌixwatz tetz yi xnaꞌn, nin tan yi xtxolbilaꞌtz tzincuyeꞌ paj, nin tzꞌocopon junt tir tetz xansaꞌnt,” stzun Ryos bantz tetz Moisés.
Cyakil yi xtxolbilaꞌtz iꞌtz jun caꞌwl tetz jun xnaꞌn yi na talaj jun tal, nin quiꞌc na ban ko iꞌtz jun xun, nka iꞌtz jun xicy. 8 Ma na yi ko quil xcyeꞌ yi xnaꞌn tan lokꞌcheꞌn jun neꞌẍ cneruꞌ, baꞌn chopon cob tal xmucuy taꞌn, nka cob tal plomẍ yi mam.b Jun xconk tetz xtxꞌixwatz yi patuꞌn cuꞌn sbneꞌ, nin yi junt xconk tan ẍchojleꞌn yi til. Tzꞌocopon tzun yi paleꞌ tan banleꞌn yi munl swutz Ryos tan teleꞌn yi il cꞌol te yi xnaꞌn, nin tan xansal tib junt tir.