Eꞌchk caꞌwl scyetz wunak yi at jun yaꞌbil scyeꞌj yi na biꞌaj lepra
13
1 Ej, itzun bantz nin tzun jilon tzaj junt tir Kataj Ryos scyetz Moisés tu Aarón, itzun taltz: 2 “Alchok scyetz yi at jun yaꞌbil teꞌj, yi txꞌaꞌc wutz taneꞌn, nka jun cꞌuꞌ te wankil, yi ja ẍeẍax jun piẍ te wankil, ej nin yi lmaxeꞌn atit, tajweꞌn yil tzꞌopon ticyꞌleꞌn swutz Aarón yi paleꞌ, nka swutz alchok scyeri yi cob cyꞌajl iꞌ. 3 Nin yil tzꞌocopon swutz yi paleꞌaꞌtz, tajweꞌn tan toqueꞌn iꞌ-tz tan tilweꞌn yi txꞌaꞌc yi at te yi yabiꞌẍ. Ej nin ko nsken sakax yi xiꞌ yi at tul jun txꞌaꞌcaꞌtz, nin ko cuꞌnak tꞌok, na elepont yi iꞌtz jun yaꞌbil yi xlacꞌat wutz.a Staleꞌ tzun yi paleꞌ yi at il cꞌol tej taneꞌn. 4 ”Ma ko sak yi txꞌaꞌc nin ko qui cuꞌnak tꞌok, nin ko nkꞌeꞌtz sak yi xiꞌ, baꞌn tzun ltal yi paleꞌ tetz yi yabiꞌẍ yi tajweꞌn tan cyajeꞌn cyen, xe tetz caꞌl, tetz juk kꞌej. 5 Ej nin yi nsken wiꞌt icyꞌ yi juk kꞌejaꞌtz, stileꞌ tzun yi paleꞌ yi ẍeꞌn taneꞌn yi jun txꞌaꞌcaꞌtz. Yi ko na til yi qui mben loꞌon te wankil yi yabiꞌẍ, nin iẍnin taneꞌntz, tajweꞌn tzun tan tlol junt tir yi paleꞌ tetz yi yabiꞌẍ tan cyajeꞌn cyen xe tetz caꞌl, tetz jukt kꞌej. 6 Ej nin yi nsken wiꞌt icyꞌ yi jukt kꞌejaꞌtz, stileꞌ tzun junt tir yi paleꞌ yi mbi taneꞌnt nin yi txꞌaꞌc. Nin kol til yi ja skej yi txꞌaꞌc nin qui mben loꞌon, staleꞌ tzun yi paleꞌaꞌtz, yi qui nin moꞌc lacꞌp il cꞌol taneꞌn teꞌj jun wunakaꞌtz, na iꞌtz jun tuꞌ tal neꞌẍ txꞌaꞌc yi njal teꞌj. Poro tajweꞌn tan xtxꞌajol yi beꞌch tetz tan xansal tib.
7 ”Ma ko ja ben loꞌon yi jun txꞌaꞌcaꞌtz te yi nsken quen wiꞌt xansij, tajweꞌn yil tzꞌopon junt tir swutz yi paleꞌ. 8 Nin yil til yi paleꞌ yi nsken wiꞌt ben loꞌon yi jun maleꞌnaꞌtz te wankil yi yabiꞌẍ, staleꞌ iꞌ yi ja oc lacꞌp il cꞌol teꞌj taneꞌn. Nin staleꞌ yi paleꞌ yi yaꞌbil iꞌtz lepra.b
9 ”Alchok scyetz yi at yi jun jilwutz txꞌaꞌcaꞌtz teꞌj, tajweꞌn tan toponeꞌn tan chajoꞌn ib swutz yi paleꞌ. 10 Tzꞌocopon tzun yi paleꞌaꞌtz tan tilweꞌn yi yaꞌbil. Ej nin kol til, yi iꞌtz jun txꞌaꞌc, yi ja wiꞌt skojax yi xiꞌil, nin yi at pojil, na tzun elpont yi iꞌtz jun yaꞌbil yi quil tzꞌicyꞌ. 11 Staleꞌ tzun yi paleꞌ yi nkꞌeꞌtz tajweꞌn tan jopleꞌn yi yabiꞌẍ xe jun caꞌl, na tech cuꞌn tib yi ja wiꞌt oc lacꞌp il cꞌol teꞌj taneꞌn.
12 ”Poro ko ja ben loꞌon lajkeꞌl yi yaꞌbil te tircuꞌn wankil yi yabiꞌẍ, 13 tzꞌocopon tzun yi paleꞌ tan tilweꞌn, nin ko na til yi ja noj tircuꞌn wankil tan yi yaꞌbilaꞌtz, tajweꞌn tzun ltal yi paleꞌ yi xansaꞌnt yi yabiꞌẍ, na ja sakax cyakil yi wankil yi yabiꞌẍ, xansaꞌnt tzun iꞌ-tz, na quiꞌc il cꞌol teꞌj taneꞌn. 14 Poro kol tzꞌopon jun kꞌej yil jal txꞌaꞌc teꞌj yi wankil yi junaꞌtz ja tzun oc il cꞌol teꞌj taneꞌn. 15 Nin tajweꞌn tzꞌoc yi paleꞌ tan xmayeꞌn yi jun txꞌaꞌcaꞌtz, tan tilol yi ko bintzi nin ja oc lacꞌp il cꞌol teꞌj. Na yi jun txꞌaꞌcaꞌtz ja xcyeꞌ tan cꞌayseꞌn ẍchiꞌbel, nin lepra biꞌ yi jun yaꞌbilaꞌtz.
16 ”Ma yi kol jeꞌ txꞌixp wutz yi jun txꞌaꞌcaꞌtz, nin yi ko ja wiꞌt skej, tajweꞌn tzun tzꞌopon iꞌ tan ẍchajleꞌn tetz yi paleꞌ. 17 Baꞌn tzun tzꞌoc yi paleꞌaꞌtz tan tilweꞌn yi yaꞌbil teꞌj yi yaj, nin ko ja skojax yi txꞌaꞌc, tzꞌocopon tzun yi paleꞌ tan xanseꞌn yi jun yabiꞌẍaꞌtz, nin tzꞌocopon tetz tajlal yi eꞌ yi xansaꞌncheꞌt.
18 ”Nchaꞌtz alchok scyetz yil jal jun txꞌaꞌc te wankil, nin yil tzꞌicyꞌ tetz coboxt kꞌej, 19 nin kol ben mal yi muꞌẍaꞌtz kale icyꞌnakit yi jun txꞌaꞌcaꞌtz, nin sak nin tuꞌ sban, nka lbolbax yi jun piẍaꞌtz, tajweꞌn tzun tzꞌoc yi paleꞌ-tz tan tilweꞌn ko nim il taneꞌn. 20 Nin yi kol til yi paleꞌ yi ja wiꞌt cuꞌ xeꞌ yi jun piẍaꞌtz swutz yi wankil, nin ko ja skojax yi xiꞌ yi at-tz, staleꞌ tzun yi paleꞌ yi ja oc lacꞌp il cꞌol teꞌj taneꞌn. Na tul yi txꞌaꞌc yi at teꞌj ja lajluchax yi iꞌtz junt jilwutz txꞌaꞌc tul, yi na biꞌaj lepra. 21 Poro kol til yi paleꞌ yi quiꞌc jun xiꞌ yi ja skojax kale atit yi txꞌaꞌc, nin ko qui cuꞌnak xeꞌ yi jun piẍaꞌtz, ma na tzan skejeꞌn, baꞌn tzun ltal yi paleꞌ tetz yi yabiꞌẍ tan jopol tib xe caꞌl tetz juk kꞌej. 22 Ma ko wiꞌnin beneꞌn loꞌon yi txꞌaꞌc te tircuꞌn wankil yi junaꞌtz, staleꞌ tzun yi paleꞌ yi ja oc lacꞌp il cꞌol teꞌj taneꞌn, na yi txꞌaꞌcaꞌtz yi ja ben loꞌon te yi wankil, iꞌtz lepra. 23 Ma jaluꞌ, yi ko qui na ben loꞌon yi jun piẍaꞌtz yi loꞌnakt tan yi txꞌaꞌc, na tzun elpont-tz yi skejeꞌn atit. Ej nin, staleꞌ tzun yi paleꞌ yi qui nin moꞌc lacꞌp il cꞌol taneꞌn te yi yabiꞌẍ.
24 ”Nchaꞌtz, alchok scyetz yil tzꞌeꞌ yi wankil, nin kol jal muꞌẍ manch tul yi tzꞌeꞌnakaꞌtz yi ẍeẍ, nka yi sak yubel, 25 baꞌn tzun tzꞌoc yi paleꞌ tan xmayeꞌn. Ej nin ko ja sakax yi xiꞌ yi at tul yi manchaꞌtz, nin ko ja cuꞌ xeꞌ, na tzun elpont-tz yi iꞌtz lepra yi ja jal te yi tzꞌeꞌnak. Ej nin ko yaꞌtz, baꞌn ltal yi paleꞌ yi ja oc lacꞌp il cꞌol taneꞌn te jun wunakaꞌtz. 26 Poro kol til yi paleꞌ, yi qui nskojax yi xiꞌ yi at tul yi manchaꞌtz, nin qui cuꞌnak xeꞌ yi jun piẍaꞌtz, na elpont yi tzan skejeꞌn. Baꞌn tzun ltal yi paleꞌ tetz yi yabiꞌẍ tan jopol tib xe caꞌl tetz juk kꞌej. 27 Nin yil tzꞌicyꞌ yi juk kꞌejaꞌtz, baꞌn xmay junt tir yi paleꞌ yi ẍeꞌn taneꞌn nint yi yabiꞌẍ. Nin ko nsken wiꞌt ben loꞌon yi manchaꞌtz te wankil, baꞌn tal yi paleꞌ yi ja oc lacꞌp il cꞌol teꞌj taneꞌn, na yi txꞌaꞌc yi at teꞌj iꞌtz lepra. 28 Poro ko qui mben loꞌon yi txꞌaꞌcaꞌtz, ma na tzan ticyꞌeꞌn, na tzun elpont yi ja ben mal tampaj yi ja tzꞌeꞌ. Baꞌn tzun tal yi paleꞌ yi quiꞌc il cꞌol teꞌj taneꞌn, na iꞌtz ticyꞌbeꞌn tuꞌ yi tzꞌeꞌnak.
29 ”Ma jaluꞌ, kol jal jun txꞌaꞌc te wiꞌ jun yaj, nka te wiꞌ jun xnaꞌn, nka te chipetxꞌ, 30 tajweꞌn tzun tzꞌoc yi paleꞌ tan xmayeꞌn. Ej nin ko lajluch cuꞌn yi ja cuꞌ tꞌok, nin ko ja kꞌanix yi xiꞌil, nin ko ja cuꞌ jol, baꞌn tzun tal yi paleꞌ yi at il cꞌol te jun wunakaꞌtz taneꞌn, na yi txꞌaꞌc yi at te wiꞌ, nka te petxꞌ, chin xoꞌwbil nin. 31 Poro kol til yi paleꞌ yi iꞌtz jun txꞌaꞌc yi xcyꞌakach, nin qui cuꞌnak tꞌok, nin ko nkꞌeꞌtz kꞌan yi xiꞌ yi at tul yi jun piẍaꞌtz, tajweꞌn tzun tan jopol juk kꞌej yi paleꞌ yi jun wunakaꞌtz. 32 Ma le jukiꞌn kꞌej stileꞌ yi paleꞌ yi ẍeꞌn taneꞌnt nin yi txꞌaꞌc te yi yabiꞌẍ. Nin ko qui benak loꞌon yi jun yaꞌbilaꞌtz te wankil yi yabiꞌẍ, nin ko quiꞌc xiꞌ yi kꞌan yubel tul, nin nchaꞌtz ko qui cuꞌnak tꞌok yi, 33 baꞌn tzun tal yi paleꞌ-tz tetz, tan teleꞌn yi xmatziꞌ taꞌn, ma kale atit yi txꞌaꞌc baꞌn lcyaj tuꞌtz, nin tajweꞌn jopxij jukt kꞌej yi yabiꞌẍ tan yi paleꞌ. 34 Ma yil tzꞌicyꞌ yi juk kꞌejaꞌtz, xmayeꞌ tzun junt tir yi paleꞌ yi jun yaꞌbilaꞌtz yi niꞌcuꞌn tu xcyꞌakach. Nin ko qui benak loꞌon yi jun txꞌaꞌcaꞌtz, nin ko lajluch cuꞌn yi qui ncuꞌ tꞌok, staleꞌ tzun yi paleꞌ-tz yi quiꞌc il cꞌol te yi yabiꞌẍ. Nchaꞌtz tajweꞌn tzꞌoc yi yabiꞌẍ tan xtxꞌajleꞌn yi beꞌch tetz. 35 Poro ko nsken wiꞌt xansaj tib, ej nin kol jal junt tir yi jun txꞌaꞌcaꞌtz teꞌj, nin lben loꞌon te wankil, 36 tajweꞌn tzun tan xmayil junt tir yi paleꞌ yi yabiꞌẍaꞌtz. Nin ko ja nin ben loꞌon yi jun txꞌaꞌcaꞌtz, quiꞌt tzun na taj joyleꞌn yi xiꞌ ko kꞌan, nka quiꞌ, na lajluch cuꞌn yi at il cꞌol te yi yabiꞌẍ. 37 Poro ko quiꞌt mben loꞌon, nin ko ja kꞌekax yi xiꞌ tul, na elpont yi ja skej yi txꞌaꞌcaꞌtz. Ej, baꞌn tzun tal yi paleꞌ tetz, yi quiꞌct il cꞌol te yi jun wunakaꞌtz.
38 ”Ma jaluꞌ, yi kol tzꞌeluꞌl manch sak teꞌj jun yaj, nka teꞌj jun xnaꞌn, 39 tzꞌocopon tzun yi paleꞌ tan xmayeꞌn yi cyeꞌj. Nin ko sak nin tuꞌ taneꞌn yi manchaꞌtz, yil til yi paleꞌ, nin ko at eꞌchk piẍ yi xkꞌaykꞌuj wutz, iꞌtz tu tzun jun yaꞌbil yi na jal te stzꞌumlil chiwankil, quiꞌc tzun il cꞌoltz teꞌj yi jun wunakaꞌtz.
40 ”Ma kol cuꞌ jol xiꞌil wiꞌ jun yaj, nin quiꞌct muꞌẍ xiꞌil wiꞌ lcyaj cyen, quiꞌc il cꞌol sbneꞌ teꞌj. 41 Nchaꞌtz ko ntin lcuꞌ jol yi xiꞌil wiꞌ wutz plaj, quiꞌc na ban, na quil tzꞌoc il cꞌol teꞌj, tampaj tuꞌ yi na cuꞌ jol xiꞌil wiꞌ. 42 Poro je jun xtxolbileꞌj: Yi ko na lajluchax jun txꞌaꞌc te wiꞌ jun yaj yi sak ẍeẍ nin tuꞌ wutz, kale cuꞌnakit jol yi xiꞌil wiꞌ, quiꞌc na ban ko swutz, nka wutz coc, na elpont yi iꞌtz yi txꞌaꞌc tetz lepra yi tzan telmuleꞌn teꞌj. 43 Tajweꞌn tzun tan tilol yi paleꞌ, nin ko sak ẍeẍ nin tuꞌ wutz yi txꞌaꞌcaꞌtz niꞌcuꞌn chi yi ẍeẍal yi txꞌaꞌc yi na jal te chiwankil, 44 na tzun elpont-tz yi iꞌtz lepra yi at teꞌj, nin yi ja oc lacꞌp ilcꞌol taneꞌn teꞌj. Nin tajweꞌn tan teleꞌn stziblal tan yi paleꞌ yi iꞌtz jun yaj yi at il cꞌol teꞌj taneꞌn tan yi yaꞌbil.
45 ”Ej nin alchok scyetz yil jal yi txꞌaꞌcaꞌtz teꞌj, tajweꞌn xcon beꞌchok taꞌn yi ritꞌuꞌnt, nin quil tew yi wiꞌ tan xbuꞌk, ma na tajweꞌn tan tewal yi juꞌ tu yi stziꞌ tan xbuꞌk, nin tajweꞌn ẍchꞌin: ¡At il cꞌol sweꞌj! ¡At il cꞌol sweꞌj! 46 Nin te yi tiemp yi at yi txꞌaꞌc teꞌj, at il cꞌol teꞌj taneꞌn, nin qui xansaꞌnt yi jun wunakaꞌtz. Nchaꞌtz tajweꞌn tan najeweꞌn ẍchuc, le jun tetz caꞌl joylaj len yi amaꞌl kale najlcheꞌt yi eꞌ mas wunak, yaꞌstzun sban na chin xlacꞌat wutz nin yi txꞌaꞌc yi at teꞌj.
47 ”Ma yi kol jal jun jilwutz txꞌaꞌc te alchok beꞌchok, quiꞌc na ban ko iꞌtz nokꞌ, nka lino cuꞌn yi xbuꞌk, 48 nka te waꞌ alchok xbuꞌk, nka te waꞌ yi xbuꞌk yi lino cuꞌn, nka te jun piẍ tzꞌuꞌm, nka te eꞌchk takleꞌn yi banij te tzꞌuꞌm, 49 nin ko txaꞌx nin tuꞌ, nka ẍeẍ nin tuꞌ yi manch yi at te eꞌchk takleꞌnaꞌtz, quiꞌc na ban ko lino, nka nokꞌ cuꞌn yi xbuꞌk, na tan tuꞌ yi jun manchaꞌtz na elpont yi at ticyꞌbeꞌn yi txꞌaꞌc teꞌj. Nin tajweꞌn cuꞌn tzun tan ẍchajleꞌn tetz yi paleꞌ. 50 Tzꞌocopon tzun yi paleꞌ tan tilweꞌn yi jun takleꞌnaꞌtz yi at manchil txꞌaꞌc teꞌj, nin tajweꞌn tan teweꞌn yi eꞌchk takleꞌnaꞌtz tetz juk kꞌej. 51 Ma yil jepon yi juk kꞌej mben yi paleꞌ tan tilweꞌn yi manch. Nin yi ko ja ben loꞌon te yi beꞌchok, nin ko ja noj txoꞌl yi waꞌ yi xbuꞌk, nka te alchok takleꞌnil chi taneꞌn eꞌchk takleꞌn yi na bnix te tzꞌuꞌm, yi ko ja ben loꞌon na elpont yi iꞌtz jun jilwutz txꞌaꞌc yi chin xoꞌwbil nin yi at il cꞌol ekaꞌn taꞌn. 52 Tajweꞌn tzuntz tan pateꞌn tircuꞌn yi eꞌchk takleꞌnaꞌtz na chin xoꞌwbil nin yi yaꞌbilaꞌtz. 53 Ma jaluꞌ, yil til yi paleꞌ le jukiꞌn kꞌej, ko qui mben loꞌon yi manch te yi beꞌchok, nin qui mben loꞌon te yi waꞌ yi xbuꞌk, nka qui mben loꞌon te alchok takleꞌnil yi tzꞌuꞌm cuꞌn, 54 staleꞌ tzun yi paleꞌaꞌtz yi ntin na taj xtxꞌajleꞌn junt tir, nin tajweꞌn tan colcheꞌn tetz jukt kꞌej.
55 ”Ej nin te yi nsken wiꞌt el txꞌajij yi manch, tzꞌocopon yi paleꞌ tan xmayeꞌn yi ko iẍnin taneꞌn yi manch te jun takleꞌnaꞌtz. Ko na til yi paleꞌ yi atit nin yi manch na tzun elpont yi iꞌtz jun manch yi cyꞌaꞌn il cꞌol taꞌn nin tajweꞌn tan toqueꞌn yi eꞌchk takleꞌnaꞌtz wi kꞌakꞌ, quiꞌc na ban yi ko ja ben loꞌon nka quiꞌ. Na iꞌtz jun yaꞌbil, nin quiꞌc na ban yi ko choꞌn at tul nka solteꞌj. 56 Poro kol til yi paleꞌ yi quiꞌt lajluch yi ticyꞌleꞌn tampaj yi ja txꞌajxij, tajweꞌn tzun tan teleꞌn cꞌapluꞌn yi jun piẍaꞌtz te yi beꞌchok, nka te yi xbuꞌk. 57 Nin kol lajluchax junt tir te yi xbuꞌk, nka te yi waꞌ yi buꞌy, nka te alchok takleꞌnil yi tzꞌuꞌm cuꞌn, yi tzan beneꞌn loꞌon junt tir, tajweꞌn tzuntz tan pateꞌn yi jun takleꞌnaꞌtz. 58 Ma jaluꞌ, yi beꞌchok, nka yi xbuꞌk, nka alchok takleꞌnil yi tzꞌuꞌm cuꞌn, yi ntxꞌajxij, tajweꞌn tan xtxꞌajxeꞌn junt tir, tan skojaxeꞌn cunin.”
59 Yaꞌstzun yi eꞌchk caꞌwlaꞌtz te yi eꞌchk manchil txꞌaꞌc yi na noj te waꞌ eꞌchk beꞌchok yi lino cuꞌn, nka yi nokꞌ cuꞌn, nin te alchok takleꞌnil yi tzꞌuꞌm cuꞌn, tan lajluchaxeꞌn yi skoj cuꞌn, nin yi quiꞌct il cꞌol teꞌj taneꞌn.