Cobox caꞌwl yi tajweꞌn chiban taneꞌn yi eꞌ yi at txꞌaꞌc scyeꞌj
14
1 Ej itzun bantz nintzun jilon tzaj junt tir Kataj Ryos tetz Moisés, itzun taltz:2 “Je yi caꞌwleꞌj yi tajweꞌn tan bnol taneꞌn jun wunak yi at txꞌaꞌc teꞌj, tan xansal tib: Tajweꞌn tan toponeꞌn yi wunakaꞌtz swutz yi paleꞌ.a 3 Nin yi paleꞌ choꞌn tzꞌocopon tan tilweꞌn yi yaꞌbil yi wunakaꞌtz solteꞌjeꞌl tzaj yi amaꞌl kale najlcheꞌt tircuꞌn wunak, nin kol til yi paleꞌ yi tzan skejeꞌn yi txꞌaꞌc teꞌj, 4 staleꞌ tzun yi paleꞌ-tz yi tajweꞌn tcyꞌajnin yi yabiꞌẍ cob tal chꞌuꞌl yi itzꞌ, tan xconeꞌn tan xanseꞌn, nin yi quiꞌc muꞌẍ tal chiyanaꞌsil. Nchaꞌtz tajweꞌn tcyꞌaj nin jun piẍ jilwutz tzeꞌ yi na biꞌaj cedro, tu jun tal piẍ xbuꞌk yi cyak teꞌj tu jun tal kꞌab hisopo.b 5 Nin scawunk yi paleꞌ tan biyleꞌn cuꞌn jun scyeri cob tal chꞌuꞌlaꞌtz, tibaj jun xaruꞌ yi txꞌotxꞌ cuꞌn, yi at aꞌ tul yi choꞌn na el tzaj te jun boꞌm aꞌ. 6 Ma yi junt tal chꞌuꞌl, tu yi jun piẍ cedro, tu yi jun piẍ xbuꞌk yi cyak, tu yi jun tal kꞌab hisopo, copon tzun muꞌul cyakil tu yi tal chꞌuꞌl itzꞌenleꞌn, tul yi ẍchꞌel yi jun tal chꞌuꞌl yi ja quim, tibaj yi aꞌ yi at tul yi ẍwokꞌ. 7 Ma yi nsken wiꞌt bnix yi xtxolbileꞌj, mben tzun tzꞌituꞌn juk tir yi chichꞌaꞌtz teꞌj yi jun yi na tzan xanseꞌn, kalenaꞌs tzun tzꞌel yi il cꞌol yi at teꞌj taneꞌn. Nin yi jun tal chꞌuꞌlaꞌtz, yi qui nquim, tzꞌelpon tzakpuꞌn.
8 ”Nchaꞌtz yi jun yi na xansaj tib tajweꞌn tan banleꞌn yi xtxolbileꞌj: Tajweꞌn tan xtxꞌajol yi beꞌch tetz, nin tajweꞌn tan jichineꞌn, nin tajweꞌn tan teleꞌn tircuꞌn yi xiꞌ yi at teꞌj. Tan yi xtxolbilaꞌseꞌj, na tzun xansaj tibtz. Baꞌn tzun lnajantz ẍchixoꞌl yi eꞌ mas wunak yi ateꞌ tul yi amaꞌl kale najlcheꞌt, poro tajweꞌn yi quil tzꞌoc chan xe yi tetz mantial, jalen yi nsken wiꞌt el juk kꞌej. 9 Ma le jukiꞌn kꞌej, tajweꞌn tan teleꞌn junt tir tircuꞌn yi xiꞌil yi at te wankil, yi xiꞌil wiꞌ, tuml tircuꞌn yi xmatziꞌ, tuml tircuꞌn yi xwatz. Nin tajweꞌn tan xtxꞌajol tircuꞌn beꞌch tetz, nin tajweꞌn tan jichineꞌn, yaꞌstzun sbneꞌ-tz tan xansal tib. 10 Ma le wajxakiꞌn kꞌej, baꞌn chopon cob neꞌẍ cneꞌr taꞌn yi mam, yi quiꞌc muꞌẍ tal chiyanaꞌsil, yi inak nin jun yob cyaꞌn. Nchaꞌtz ban tzꞌopon junt tal neꞌẍ cneꞌr taꞌn yi tij yi ja tzꞌak jun yob, nin yi quiꞌc muꞌẍ tal yanaꞌsil. Nchaꞌtz tajweꞌn tzꞌopon kak liwr te yi chumbalaj jarin, tetz jun oy yi ixiꞌn triw cuꞌn yi yujuꞌn tib tu aceitil oliw, nin nchaꞌtz yi toxeꞌn part te jun litr aceitil oliw. 11 Yi paleꞌ tajweꞌn tcyꞌaj nin yi jun wunakaꞌtz yi sxanseꞌ tib, stziꞌ cunin puertil yi mantial tetz molbil ibaj, tu yi eꞌchk takleꞌn yi ja wiꞌt aꞌlchij. 12 Nin stoyeꞌ jun scyeri cob cneꞌraꞌtz swutz Ryos, chi jun oy tan jaleꞌn cuybil paj yi jun wunakaꞌtz, tuml jun was aceit. 13 Choꞌn tzun tzꞌocopon jakꞌ kul yi jun cneꞌraꞌtz taꞌn le yi amaꞌl yi xansaꞌnt kale na chibiyxeꞌt yi eꞌ txꞌixwatz tan xtxꞌajleꞌn il nin yi eꞌ txꞌixwatz yi patuꞌn cuꞌn na uꞌlij chiwankil. Yi eꞌchk txꞌixwatz tan ẍchojleꞌn il tu yi eꞌchk txꞌixwatz tan xtxꞌajleꞌn il, tetz yi paleꞌ sbneꞌ, na wiꞌnin xanil yi eꞌchk oyaꞌtz.
14 ”Ej nin nchaꞌtz jepon tcyꞌal yi paleꞌ muꞌẍ te yi ẍchꞌel yi txꞌixwatzaꞌtz, nin tzꞌocopon sukꞌul te jalajt ẍchin yi at le sbal yi jun yi na xansaj tib. Tzꞌocopon te yi jun piẍil yi ẍchin yi chiꞌbaj cuꞌn. Nchaꞌtz tajweꞌn tzꞌoc sukꞌul te yi mamil wi kꞌab yi at le sbal, nin te yi mamil wi tkan yi at le sbal. 15 Ej, nin iteꞌn nin sbneꞌ yi paleꞌ te yi aceit. Copon kojol muꞌẍ le kꞌab yi max. 16 Nin copon muꞌul yi wi kꞌab yi sbal tul yi aceitaꞌtz yi cyꞌaꞌn taꞌn le kꞌab, nin mben stzꞌitul juk tir swutz Kataj Ryos. 17 Nin yi sowril yi aceitaꞌtz, choꞌn tzꞌocopon tkꞌol te yi tal ẍchiꞌbelil yi ẍchin yi sbal yi junaꞌtz yi na xansaj tib, nin te mamil wi kꞌab yi sbal, nin nchaꞌtz te mamil wi tkan yi sbal, tibaj yi amaꞌl kale moqueꞌt sukꞌij yi ẍchꞌel yi txꞌixwatz yi na xcon tan jaleꞌn cuybil paj. 18 Nin yi sowril yi aceit yi at le kꞌab yi paleꞌ, choꞌn tzun jepon kojoltz twiꞌ yi jun yi na xansaj tib. Nin tan yi xtxolbilaꞌs, ja tzun el yi junaꞌtz tkꞌab yi til. 19 Ma yi nsken wiꞌt bajij yi xtxolbileꞌj, tzꞌocopon tzun yi paleꞌ-tz tan pateꞌn xtxꞌixwatz yi junaꞌtz tan jaleꞌn cuybil paj tan til. Ej kalenaꞌs tzun tzꞌoc jakꞌ kul yi txꞌixwatz yi spat-xok tircuꞌn wankil. 20 Nin tzꞌocopon yi paleꞌ tan toyeꞌn yi txꞌixwatzaꞌtz, tu yi jun oy yi ixiꞌn triw cuꞌn wi altar. Nin tan yi xtxolbilaꞌs, scuyeꞌ Kataj Ryos paj yi jun wunakaꞌtz, nin sxansok.
21 ”Ma jaluꞌ, yi ko iꞌtz jun tal prow meꞌbaꞌ yi yabiꞌẍ, yi quiꞌc puꞌk tan lokꞌcheꞌn eꞌchk jilwutz txꞌixwatz yi ja wiꞌt kil, tajweꞌn tzun tan beneꞌn tcyꞌal jun tal neꞌẍ cneꞌr tetz xtxꞌixwatz tan jaleꞌn cuybil paj, chi jun oy yi na jeꞌ sukiꞌn tetz Kataj Ryos, nin chi jun oy yi na pat-xij, tetz xel iꞌ swutz Kataj, tu kak liwr yi jarin yi coꞌsiꞌnt tu aceit, tetz jun oy yi ixiꞌn triw cuꞌn, tu ox was aceitil oliw, 22 tu cob tal xmucuy, nka cob tal plomẍ yi mam. Xom quen tuꞌ te yi nicyꞌnaꞌ cuꞌn walor yi jun yabiꞌẍaꞌtz tan lokꞌcheꞌn. Jun scyeri cob tal txucaꞌtz tzꞌocopon tetz oy tan jaleꞌn cuybil paj, nin yi junt patuꞌn cuꞌn sbneꞌ. 23 Nin le waxakiꞌn kꞌej tajweꞌn tzꞌopon yi eꞌchk takleꞌnaꞌtz taꞌn, stziꞌ cunin puertil yi peꞌmil yi mantial tetz molbil ibaj, kale atit Kataj Ryos. 24 Nin yi paleꞌ mben tcyꞌal yi tal neꞌẍ cneꞌr tetz yi txꞌixwatz, tan jaleꞌn cuybil paj yi yabiꞌẍ, tu jun was aceit, nin tzꞌocopon tan sukeꞌn nin yi oyaꞌtz swutz Kataj Ryos, na iꞌtz jun oy yi apart swutz yi oy yi na cyoy yi eꞌ mas yi at chipuꞌk. 25 Nin tzꞌocopon tzun jakꞌ kul yi jun cneꞌraꞌtz tan yi paleꞌ, nin jepon tcyꞌal muꞌẍ te ẍchꞌel nin tzꞌocopon sukꞌultz te yi ẍchiꞌbelil yi ẍchin yi junaꞌtz yi na xansaj tib. Nin tzꞌocopon sukꞌul te mamil wi tkan yi sbal, nin nchaꞌtz te mamil wi kꞌab yi sbal. 26 Nin jepon tcyꞌal yi paleꞌ muꞌẍ te yi aceit, le kꞌab yi max, 27 nin copon muꞌul yi wi kꞌab yi sbal tul yi aceit yi at le junt kꞌab, nin tzꞌocopon tan stzꞌiteꞌn nin juk tir swutz tkan Kataj Ryos. 28 Nin te iteꞌn nin aceit yi at le kꞌab, tzꞌocopon sukꞌul muꞌẍ te yi tal ẍchiꞌbelil yi ẍchin yi yabiꞌẍ yi sbal, nin tzꞌocopon sukꞌul te yi mamil wi kꞌab yi sbal, nin nchaꞌtz te yi mamil wi tkan yi sbal, tibaj yi amaꞌl kale atit yi ẍchꞌel yi txꞌixwatz yi na cuꞌ biyij tan jaleꞌn cuybil paj yi yabiꞌẍ. 29 Nin yi sowril yi aceit yi at le kꞌab yi paleꞌ, choꞌn jepon kojol twiꞌ yi jun yi na xansaj tib, bantz stzajeꞌn yi til tzinwutz. 30 Nchaꞌtz, sukeꞌ jun scye yi cob tal xmucuy, nka jun scye yi cob tal plomẍ yi mam, quiꞌc na ban yi ko iꞌtz plomẍ nka xmucuy, ma na choꞌn na xom te yi nicyꞌnaꞌ cuꞌn walor yi jun tal prow meꞌbaꞌaꞌtz tan lokꞌcheꞌn. 31 Nin te yi xtxꞌixwatz yil tzꞌul taꞌn, jun tzun stzꞌoyloktz tetz xtxꞌixwatz tan jaleꞌn cuybil paj, nin yi junt spat-xok tetz xel iꞌ tan yi til, nin tajweꞌn tan toyeꞌn jun oy yi ixiꞌn triw cuꞌn. Tan yi xtxolbilaꞌs tzincuyeꞌ paj yi junaꞌtz, nin tzꞌocopon tetz jun wunak yi xansaꞌnt.”
32 Yaꞌstzun yi eꞌchk caꞌwlaꞌtz scyetz yi eꞌ wunak yi na ul yos scyuchꞌ tan yi jun jilwutz txꞌaꞌc yi chin xlacꞌat wutz nin, nin yi pentuꞌ na jal puntil jamel yi chitxꞌixwatz cyaꞌn.
Eꞌchk caꞌwl tan xansajeꞌn jun najbil yi nojnak lepra wutzak yi tapijil
33 Ej, nin tzun jilon tzaj Kataj Ryostz tetz Moisés nin tetz Aarón, itzun saj tloltz scyetz:
34 “Yil cxoꞌc wok tul yi amaꞌl yi na biꞌaj Canaán, yi ja wiꞌt wakꞌ tzitetz, nin kol wakꞌ amaꞌl tan jaleꞌn manch, nka xpitakꞌ swutzak xanil jun caꞌl, 35 tajweꞌn yil ben yi taw yi caꞌlaꞌtz tan talcheꞌn stziblal tetz yi paleꞌ, nin je yol iꞌeꞌj sbneꞌ: ‘At jun takleꞌn chi taneꞌn manch ja jal xe innajbil.’
36 ”Mben tzun mantar yi paleꞌ-tz tan talcheꞌn yi cheꞌlken tircuꞌn yi eꞌchk takleꞌn yi at xe caꞌlaꞌtz, te ntaxk opon tan tilweꞌn, bantz quil noj yi yaꞌbil te yi eꞌchk takleꞌnaꞌtz yi at xe caꞌlaꞌtz. Tzꞌocopon tzun yi paleꞌ-tz tan tilweꞌn yi manch.
37 ”Ej nin ko lajluch cuꞌn yi at manch yi icuꞌn txaꞌx, nka chin ẍeẍ nin taneꞌn wutzak yi caꞌl, nin yi ja oc tcꞌuꞌl yi xan taꞌn, 38 tajweꞌn tzun tan teleꞌn tzaj yi paleꞌ-tz, nin slameꞌ yi caꞌl tetz juk kꞌej. 39 Nin le jukiꞌn kꞌej spakxok yi paleꞌ tan xmayeꞌnt yi caꞌl, nin kol til yi ja ben loꞌon yi manch swutzk yi tapijil, 40 mben tzun mantar yi paleꞌ-tz tan baleꞌn neꞌl tzaj yi eꞌchk cꞌub kale atit yi manch, nin tajweꞌn tan teleꞌn cꞌoxij joylaj len yi tnum, le jun amaꞌl yi qui xansaꞌnt. 41 Nin nchaꞌtz tajweꞌn tan teleꞌn kichuꞌn tircuꞌn wutzak tapijil yi caꞌl, nin yi puklajil tajweꞌn tan teleꞌn kojij joylajlen yi tnum, le jun amaꞌl yi qui xansaꞌnt. 42 Nin mben tcyꞌal yi paleꞌ jun txꞌakajt cꞌub nin copon taꞌn kale elnakit ticyꞌleꞌn yi jun txꞌakaj yi ja el cꞌoxij. Nin tzꞌocopon acꞌaj xkꞌol cyaꞌn swutzak tapijil yi caꞌl.
43 ”Nin kol jal junt tir yi manch swutz yi caꞌl, te nsken wiꞌt banlij baꞌn tetz, 44 tzꞌopon tzun junt tir yi paleꞌ tan tilweꞌn. Nin ko ja ben loꞌon junt tir yi manch swutz yi caꞌl, na tzun elpont-tz yi iꞌtz jun jilwutz manch yi cyꞌaꞌn quimichil taꞌn. Nin tan yi xtxolbileꞌj na elpont yi at il cꞌol te yi caꞌl. 45 Tajweꞌn cunin tzuntz tan cweꞌn woqꞌueꞌn yi caꞌl, nin tzꞌelpon quicyꞌal yi eꞌchk cꞌub, tu yi eꞌchk ptzoꞌmil yi caꞌl, tu cyakil yi puklajil, joylaj len yi tnum, tul jun amaꞌl yi qui xansaꞌnt. 46 Nin alchok scyetz yil tzꞌoc xe jun caꞌlaꞌtz te yi tiemp yi ja tal yi paleꞌ tan lamxeꞌn, tzꞌocopon il cꞌol teꞌj taneꞌn, jaleꞌn yil cuꞌ kꞌej kalenaꞌs tzun tzꞌoctz tetz jun yi xansaꞌnt. 47 Nin alchok scyetz yi ja wit xe jun caꞌlaꞌtz, tajweꞌn tan xtxꞌajol yi beꞌch tetz. Nchaꞌtz alchok scyetz yil wan tul, tajweꞌn tan xtxꞌajol yi beꞌch tetz, tan teleꞌn yi il cꞌol te yi beꞌch tetz.
48 ”Poro kol tzꞌoc yi paleꞌ tul, nin ltil yi qui nin mben loꞌon yi manch xe caꞌl swutz yi acꞌaj xkꞌol yi ja oc swutz xan, staleꞌ tzun yi paleꞌ yi quiꞌc yaꞌbil tul yi caꞌl, na ja tzaj yi manch. 49 Nin tan xanseꞌn yi caꞌl, tajweꞌn tan cyoponeꞌn ticyꞌleꞌn cob tal chꞌuꞌl, nin jun piẍ jilwutz tzeꞌ yi na biꞌaj cedro, tu jun tal piẍ xbuꞌk yi cyak teꞌj, nin jun tal kꞌab hisopo. 50 Tzꞌocopon tzun jakꞌ kul jun scyeri cob tal chꞌuꞌlaꞌtz taꞌn, tibaj jun xaruꞌ, yi txꞌotxꞌ cuꞌn, yi at aꞌ tul yi chin skoj nin wutz yi choꞌn na el tzaj te jun boꞌm. 51 Nchaꞌtz jepon tcyꞌal yi tzeꞌ yi na biꞌaj cedro, tu yi jun tal kꞌab hisopo, nin tu yi jun tal piẍ xbuꞌk yi cyak teꞌj, tuml yi junt tal chꞌuꞌl yi itzꞌ, nin cheꞌ copon muꞌul tircuꞌn tul yi ẍchꞌel yi jun tal chꞌuꞌl yi choꞌn mpon kojxuj ẍchꞌel tul xaruꞌ. Ej tzꞌocopon tzuntz tan stzꞌiteꞌn nin yi chichꞌaꞌtz juk tir xe yi caꞌl. 52 Sxansok tzun yi caꞌltz tan yi ẍchꞌel yi tal chꞌuꞌl, tu yi aꞌ yi chin skoj nin wutz, nin tan yi junt tal chꞌuꞌl yi itzꞌ, nin tan yi xan tzeꞌ yi na biꞌaj cedro, nin tan yi hisopo, tu yi xbuꞌk yi cyak teꞌj. 53 Ma yi nsken wiꞌt bajij yi xtxolbilaꞌs, tzꞌelpon tzun stzakpul yi jun tal chꞌuꞌl yi itzꞌeꞌt, solteꞌj yi tnum. Nin tan yi xtxolbilaꞌtz, ja tzun el yi il cꞌoltz teꞌj yi caꞌl, nin ja skojax cyen.”
54 Yaꞌstzun yi eꞌchk caꞌwlaꞌtz te alchok manchil txꞌaꞌc, nka eꞌchk manch yi iꞌtz xcyꞌakach, 55 nin te yi eꞌchk yaꞌbil yi na wan te eꞌchk beꞌchok, tu yi na jal swutzak xanil jun caꞌl. 56 Nin te yi eꞌchk cꞌuꞌ yi na jal te kawankil, nka eꞌchk neꞌẍ txꞌaꞌc, nka eꞌchk xcyꞌakach yi sak nin tuꞌ wutz. 57 Yi eꞌchk caꞌwlaꞌtz iꞌtz tan teleꞌn katxum tetz yi ko cyꞌaꞌn il cꞌol taꞌn, nka quiꞌ. Yaꞌstzun yi eꞌchk caꞌwlaꞌtz yi tajweꞌn lbajij taneꞌn ko na jal manchil jun yaꞌbil skeꞌj nka te jun kacaꞌl.