Cobox caꞌwl scyetz eꞌ yaj yi na oc il cꞌol scyeꞌj
15
1 Ej, nin tzun jilon tzaj junt tir Kataj Ryostz tetz Moisés tu Aarón, itzun saj tloltz scyetz:2 “Txolwok yi xtxolbileꞌj scyetz tircuꞌn yi eꞌ itanum, nin tajweꞌn tan quibital yi eꞌ yaj, na alchok scyetz yi at jun yaꞌbil te yi ẍchiꞌol qui xansaꞌnt sbneꞌ. 3 Quiꞌc na ban ko na el poj nka quiꞌ, qui xansaꞌnt sbneꞌ.
4 ”Alchok txꞌachil kalel coyeweꞌt yi junaꞌtz, nka alchok chemil kalel cꞌoleweꞌt cuꞌn, tzꞌocopon tetz jun takleꞌn yi at il cꞌol teꞌj taneꞌn.
5 ”Nin ko at jun maconeꞌn yi xtxꞌach yi junaꞌtz, tajweꞌn tan xtxꞌajol yi tetz beꞌch tetz, nin tajweꞌn tan jichineꞌn, nin tzꞌocopon tetz tajlal jun wunak yi qui xansaꞌnt, jalen cuꞌn yil cuꞌ kꞌej.
6 ”Nin kol cꞌoleꞌ cuꞌn jun kale ncꞌoleweꞌt yi yabiꞌẍ, tajweꞌn tzuntz tan xtxꞌajol yi beꞌch tetz, nin tajweꞌn tan jichineꞌn, nin scyajk cyen tetz jun yi qui xansaꞌnt jalen cuꞌn yil cuꞌ kꞌej.
7 ”Alchok scyetz yil maqueꞌn yi junaꞌtz yi yabiꞌẍ, tajweꞌn tan xtxꞌajol yi beꞌch tetz, nin tajweꞌn tan jichineꞌn, nin tzꞌocopon tetz tajlal jun wunak yi qui xansaꞌnt jalen cuꞌn yil cuꞌ kꞌej.
8 ”Nin alchok scyetz yi yabiꞌẍ, nin stzub nin taꞌal stziꞌ teꞌj junt yi quiꞌc il cꞌol teꞌj, yi juntaꞌtz, tajweꞌn tan xtxꞌajol yi beꞌch tetz, nin tajweꞌn tan jichineꞌn, nin tzꞌocopon tetz tajlal jun wunak yi qui xansaꞌnt jalen cuꞌn yil cuꞌ kꞌej.
9 ”Alchok siyil chej kalel cꞌoleweꞌt jun yabiꞌẍ, tzꞌocopon il cꞌol te jun siyaꞌtz taꞌn.
10 ”Ej nin alchok scyetz yil maqueꞌn alchok takleꞌn yi ja cyaj cyen tzakꞌ yi yabiꞌẍ, tzꞌocopon tetz tajlal jun wunak yi qui xansaꞌnt jalen cuꞌn yil cuꞌ kꞌej.
”Nin alchok scyetz yil tekeꞌn yi eꞌchk takleꞌnaꞌtz, tajweꞌn tan xtxꞌajol yi beꞌch tetz, nin nchaꞌtz iꞌ, tajweꞌn tan jichineꞌn, nin tzꞌocopon tetz tajlal jun wunak yi qui xansaꞌnt, jalen yil cuꞌ kꞌej.
11 ”Nchaꞌtz alchok scyetz yil mac jun yabiꞌẍ yi at yi jun jilwutz yaꞌbilaꞌtz teꞌj, ej nin ko qui na xtxꞌaj chan yi kꞌabtz tajweꞌn tan xtxꞌajol yi beꞌch tetz, nin tajweꞌn tan jichineꞌn, na ja wiꞌt oc lacꞌp il cꞌol teꞌj taneꞌn jalen yil cuꞌ kꞌej.
12 ”Ej nin kol maqueꞌn yi yabiꞌẍ jun xaruꞌ yi txꞌotxꞌ, tajweꞌn tan cweꞌn pokꞌloꞌn. Nin ko iꞌtz jun maꞌcl yi tzeꞌ cuꞌn tajweꞌn yil txꞌajxij cunin.
13 ”Yi nsken ul yos tu yi yabiꞌẍ, juk tzun kꞌej sbneꞌ-tz tan xansal tib. Ma yil jepon tamp yi juk kꞌejaꞌtz, tajweꞌn tzun tan xtxꞌajol yi beꞌch tetz, nin tajweꞌn tan jichineꞌn tul aꞌ yi chin skoj nin wutz. Tan yi xtxolbileꞌj tzꞌocopon tzuntz tetz jun wunak yi xansaꞌnt. 14 Nin le wajxakiꞌn kꞌej, tajweꞌn tan toponeꞌn tcyꞌal cob tal xmucuy, nka cob tal plomẍ yi mam. Choꞌn tzun tzꞌopontz tan takꞌleꞌn tetz yi paleꞌ stziꞌ cunin yi puertil yi mantial tetz molbil ibaj, tzinwutz. 15 Nin yi paleꞌ tzꞌocopon tan toyeꞌn jun scyeri plomẍaꞌtz tzinwutz, tan jaleꞌn cuybil paj yi yabiꞌẍ. Ma yi junt spat-xok tircuꞌn, tan xanseꞌn yi yabiꞌẍ tan yi yaꞌbil yi njal te yi ẍchiꞌol.
16 ”Ko at jun yaj yil tzꞌel taꞌal yi ẍchiꞌol, tajweꞌn tan jichineꞌn, nin tzꞌocopon chi tajlal jun yaj yi qui xansaꞌnt, jalen cuꞌn yil cuꞌ kꞌej, kalenaꞌs na el yi il cꞌol teꞌj taneꞌn.
17 ”Tircuꞌn yi eꞌchk beꞌchok, nka jun takleꞌn yi tzꞌuꞌm cuꞌn, kalel nojeꞌt yi taꞌal yi ẍchiꞌol jun yaj, chin tajweꞌn cunin xtxꞌajleꞌn, nin tzꞌocopon tetz jun takleꞌn yi qui xansaꞌnt, jalen cuꞌn yil cuꞌ kꞌej.
18 ”Yi kol chiwitbej quib jun yaj tu jun xnaꞌn, tajweꞌn tan chitxꞌajol quib, nin chocopon tetz cob wunak yi qui xansaꞌncheꞌt, jalen cuꞌn yil cuꞌ keꞌj.
Cobox caꞌwl scyetz eꞌ xnaꞌn yi ja oc lacꞌpuj il cꞌol scyeꞌj taneꞌn
19 ”Yi na opon tiempil xtxꞌajoꞌn jun xnaꞌn, tzꞌocopon tetz tajlal jun wunak yi qui xansaꞌnt, tetz juk kꞌej.
”Ej nin alchok scyetz yil maqueꞌn yi jun xnaꞌnaꞌtz, nchaꞌtz iꞌ tzꞌocopon tetz tajlal jun yi qui xansaꞌnt, jalen cuꞌn yil cuꞌ kꞌej.
20 ”Ej nin alchok takleꞌnil, nka txꞌach kalel coyeweꞌt yi xnaꞌnaꞌtz te yi at tul jun tiempaꞌtz, tzꞌocopon tetz jun takleꞌn yi qui xansaꞌnt.
”Nchaꞌtz alchok takleꞌn kalel cꞌoleweꞌt, te yi tiempaꞌtz, tzꞌocoponintz tetz jun takleꞌn yi qui xansaꞌnt.
21 ”Nin alchok scyetz yil maqueꞌn yi amaꞌl, nka takleꞌn kale ncoyeweꞌt yi xnaꞌnaꞌtz, tajweꞌn tan jichineꞌn, nin tajweꞌn tan xtxꞌajol yi beꞌch tetz, nin tzꞌocopon tetz tajlal jun yi qui xansaꞌnt, jalen cuꞌn yil cuꞌ keꞌj.
22 ”Alchok scyetz yil maqueꞌn jun takleꞌn kale ncꞌoleweꞌt yi xnaꞌnaꞌtz, tajweꞌn tan xtxꞌajol yi beꞌch tetz, nin tajweꞌn tan jichineꞌn, nin tzꞌocopon tetz tajlal jun wunak yi qui xansaꞌnt jalen cuꞌn yil cuꞌ kꞌej. 23 Quiꞌc na ban ko ja jeꞌ macol yi takleꞌn kale ncoyeweꞌt, nka ja jeꞌ macol yi takleꞌn kale ncꞌoleweꞌt yi xnaꞌn, tzꞌocoponintz tetz tajlal jun yi qui xansaꞌnt, jalen cuꞌn yil cuꞌ keꞌj.
24 ”Nin ko at jun yaj yil witbej tib tuchꞌ, tzꞌocopon yi junaꞌtz tetz tajlal jun wunak yi qui xansaꞌnt, tetz juk kꞌej, tuml yi amaꞌl kale ncoyeweꞌt cuꞌn.
25 ”Ma jaluꞌ, yi ko na el ẍchꞌel jun xnaꞌn, nin nkꞌeꞌtz tul yi tiemp tetz yi xtxꞌajoꞌn, nin ltzꞌaꞌtij tetz alaꞌ kꞌej, nka yi tiemp tetz yi xtxꞌajoꞌn ltzꞌicyꞌ tibaj yi tetz tiempil nin, tzꞌocopon tzuntz tetz tajlal jun wunak yi qui xansaꞌnt, te yi tiemp yi na el ẍchꞌel, nka te yi tiemp yi qui na makxij yi xtxꞌajoꞌn, niꞌcuꞌn xtxolbil tu yi choꞌnk at tul yi tiempil yi xtxꞌajoꞌn.
26 ”Alchok amaꞌlil kalel coyeweꞌt yi junaꞌtz, yi yabiꞌẍ, nin nchaꞌtz alchok amaꞌlil kalel cꞌoleweꞌt cuꞌn te yi tiemp yi qui na makxij yi yaꞌbil, tzꞌocopon tetz tajlal jun yi qui xansaꞌnt, niꞌcuꞌn chi cheꞌnk at tul yi tiempil yi xtxꞌajoꞌn.
27 ”Nin alchok wunakil yil maqueꞌn yi eꞌchk takleꞌnaꞌtz, tzꞌocopon tetz tajlal jun wunak yi qui xansaꞌnt. Ej nin tajweꞌn tan xtxꞌajol yi beꞌch tetz yi at teꞌj, nin tajweꞌn tan jichineꞌn, nin qui xansaꞌnt iꞌ sbneꞌ jalen cuꞌn yil cuꞌ kꞌej.
28 ”Nin yil makxij yi yaꞌbilaꞌtz te alchok xnaꞌn, tajweꞌn tzuntz yil tzꞌoc teꞌj tajal yi tajweꞌn tan ticyꞌeꞌn juk kꞌej tan xansal tib. 29 Ma le wajxakiꞌn kꞌej, mben tcyꞌal cob tal xmucuy, nka cob tal plomẍ yi mam cuꞌn chicabil, tetz yi paleꞌ stziꞌ cunin yi puertil yi mantial tetz molbil ibaj. 30 Nin yi paleꞌ stoyeꞌ jun, chi jun oy tan jaleꞌn cuybil paj yi xnaꞌn, nin yi junt oy, spat-xok tircuꞌn tetz xel yi xnaꞌn tan yi yaꞌbil. Nin tan yi xtxolbilaꞌtz, tzincuyeꞌ paj yi jun yabiꞌẍaꞌtz. 31 Tan yi xtxolbilaꞌtz, chelpon tzun yi eꞌ itanum itaꞌn swutz yi eꞌchk juchleꞌn ilaꞌtz, bantz quil chiquim tan tuꞌ yi na chitzan tan poꞌtzeꞌn yi amaꞌl kale najlchineꞌt.”
32 Yi eꞌchk caꞌwlaꞌtz, iꞌtz scyetz yi eꞌ xnaꞌn yi qui na makxij chitxꞌajoꞌn, nin iꞌtz scyetz yi eꞌ yaj yi na el taꞌal yi chichiꞌol, na na choꞌc tetz tajlal jun wunak yi qui xansaꞌnt, tan yi eꞌchk xtxolbilaꞌtz. 33 Nchaꞌtz, iꞌtz scyetz yi eꞌ xnaꞌn, yi ateꞌ tul yi tiempil yi chitxꞌajoꞌn, nka tircuꞌn yi eꞌ yi na el taꞌal chiwankil, quiꞌc na ban ko iꞌtz jun xnaꞌn, nko iꞌtz jun yaj. Ej nin iꞌtz scyetz yi eꞌ yaj yi na chiwitbej quib tu quixkel yi at quen cunin tul tiempil yi xtxꞌajoꞌn.