Yi kꞌejlal yi na chijak yi eꞌ xonl Israel cuybil chipaj
16
1 Ej nin tzun jilon tzaj Kataj Ryos tetz Moisés, te yi nsken quen chiquim yi cob nitxajil Aarón, tampaj yi nim teꞌn cuꞌn cyocomponeꞌn chiẍkansal quib swutz yi amaꞌl kale na aꞌteꞌt Kataj Ryos. 2 Itzun saj tloltz tetz Moisés:“Alaj tetz yi awutzicy Aarón, yi quil tzꞌoc alchok tuꞌ kꞌejil tul yi amaꞌl yi wiꞌnin xanil yi at wutzcoc yi xbuꞌk,a yi at tcꞌuꞌl yi mantial. Na qui na waj yil xcyeꞌ cuꞌn iꞌ swutz yi jopbilil yi caẍaꞌaꞌtz, alchok tuꞌ kꞌejil, bantz qui quimeꞌn, na choꞌn na inchaj wib tibaj yi jopbilil yi caẍaꞌaꞌtz tul noc sbakꞌ yi chin pakꞌpuch nin. 3 Te yi ntaxk tzꞌoc Aarón le amaꞌl yi wiꞌnin xanil le mantial tetz molbil ibaj, tajweꞌn tan toyil jun tal neꞌẍ tor yi mam tetz xtxꞌixwatz iꞌ, bantz jakol cuybil paj iꞌ, nin nchaꞌtz tajweꞌn tan toyil jun cneꞌr yi spat-xok tircuꞌn yi wankil.b 4 Nin tajweꞌn tan toqueꞌn nin yi beꞌch tetz teꞌj, yi chukpiꞌn nin tuꞌ, yi lino cuꞌn, tuml yi eꞌchk wex yi lino nintz, nin tzꞌocopon tkꞌol yi cꞌalbil xe cꞌuꞌl, tu yi xbuꞌk yi na jeꞌ teꞌj wiꞌ. Tircuꞌn yi beꞌchokaꞌtz wiꞌnin xanil. Chaꞌstzun te tajweꞌn tan jichineꞌn iꞌ bajx.
5 ”Nchaꞌtz, tajweꞌn tan beneꞌn tcyꞌal Aarón cob mam chiw, tan jaleꞌn cuybil chipaj cyakil yi eꞌ xonl Israel, tu jun cneꞌr tan pat-xeꞌn tircuꞌn wankil tetz chitxꞌixwatz. 6 Stoyeꞌ tzun yi jun tal toraꞌtz swutz Kataj Ryos, tetz yi tetz xtxꞌixwatz, tan jaleꞌn cuybil paj iꞌ tuml yi tetz najal. 7 Kalenaꞌs tzun cheꞌ tcyꞌaj nin yi cob chiw swutz Kataj Ryos, stziꞌ cunin puertil yi mantial tetz molbil ibaj. 8 Ej tzꞌocopon tzuntz tan txꞌiluꞌn scye yi cob chiwaꞌtz, tan tilweꞌn yi naꞌ scyetz jun stzꞌoylok tetz Kataj Ryos, nin naꞌ scyetz jun yi tetz Azazelc sbneꞌ. 9 Copon tzun biyol Aarón yi jun mam chiw yi iꞌtz tetz Kataj mban. Copon biyol iꞌ tetz txꞌixwatz tan jaleꞌn cuybil chipaj yi eꞌ wunak. 10 Ma yi junt mam chiw yi tetz Azazel sbneꞌ, tzꞌopon tzuntz swutz Kataj Ryos itzꞌenleꞌn. Kalenaꞌs tzun mben tzakpuꞌn le amaꞌl tzꞌinunin tuꞌ tan tponeꞌn swutz Azazel. Iꞌ tzun tekan nin tircuꞌn quil yi eꞌ wunak swutz Azazel, le amaꞌl tzꞌinunin tuꞌ.
11 ”Ma yi tal neꞌẍ tor, tzꞌocopon jakꞌ kul tan Aarón tan quimeꞌn tetz xel iꞌ, nin tan jaleꞌn cuybil paj iꞌ tuml yi eꞌ tetz najal. 12 Mben tzuntz tan ticyꞌleꞌn jun patbil insens, yi nojnak cuꞌn tan xtxakꞌakꞌil yi altar yi at swutz cunin Kataj Ryos, nin cob chiꞌm insens yi cheꞌjaꞌnt, yi nternin na paxin cꞌoꞌcal. Choꞌn tzun mben tcyꞌaltz tcꞌuꞌl cyen yi amaꞌl yi wiꞌnin xanil. 13 Tzꞌocopon tzun iꞌ-tz tan pateꞌn yi insens swutz Kataj, na yi sibel yi insensaꞌtz xcyek tan teweꞌn yi jopbilil yi caẍaꞌ kale atit yi cob lepaj cꞌub kale tzꞌibaneꞌt yi lajuj caꞌwl. Nin tan yi sibel yi insensaꞌtz quil xcyeꞌ tan tilweꞌn yi jopbilil yi caẍaꞌaꞌtz, bantz qui quimeꞌn iꞌ. 14 Nchaꞌtz jepon tcyꞌal muꞌẍ te ẍchꞌel yi jun neꞌẍ toraꞌtz, nin tan yi wi kꞌab tzꞌocopon tan stzꞌiteꞌn nin tibaj yi jopbilil yi caẍaꞌ. Nchaꞌtz mben stzꞌitul juk tir yi chichꞌaꞌtz swutz cuꞌn yi caẍaꞌaꞌtz. 15 Kalenaꞌs tzun sbiy cuꞌn yi chiw tetz chitxꞌixwatz tircuꞌn yi eꞌ wunak, nin mben tcyꞌal yi ẍchꞌel tcꞌuꞌl quen yi amaꞌl yi chin xan nin.d Tzꞌocopon tzuntz tan stzꞌiteꞌn nin yi chichꞌaꞌtz tibaj yi jopbilil yi caẍaꞌ nin swutz cunin yi caẍaꞌaꞌtz. Iteꞌn nin puntilaꞌtz stulejeꞌ chi ntulej yi ẍchꞌel yi jun neꞌẍ tor. 16 Nin tan yi xtxolbilaꞌtz xcyek yi chichꞌ tan xansajeꞌn yi amaꞌl yi wiꞌnin xanil tan paj yi nkꞌeꞌtz xansaꞌnt yi eꞌ wunak, nin tan paj cyakil yi il cꞌol yi cyꞌaꞌn len cyaꞌn. Nchaꞌtz iteꞌn xtxolbilaꞌtz sbneꞌ Aarón tan xansajeꞌn yi mantial tetz molbil ibaj yi choꞌn cunin at nicyꞌal yi amaꞌl kale najlcheꞌt cyakil yi eꞌ wunakaꞌtz, yi eꞌ pajol caꞌwl.
17 ”Te yi at Aarón tul yi amaꞌl yi wiꞌnin xanil tan jaleꞌn cuybil paj, quiꞌc rmeril tan taꞌteꞌn jun wunak tul yi mantial tetz molbil ibaj. Jalen cuꞌn yil tzꞌel tzaj iꞌ. Ej nin yi nsken wiꞌt jal cuybil paj iꞌ tu yi tetz najal, nin tuml cyakil yi eꞌ mas tanum, 18 tzꞌeluꞌl tzuntz tan xanseꞌn yi altar yi at swutz Kataj. Jepon tcyꞌal muꞌẍ te ẍchꞌel yi jun tal neꞌẍ tor, tu muꞌẍ ẍchꞌel yi chiw, nin chꞌon tzun tzꞌocopon sukꞌultz teꞌjak yi eꞌchk tucꞌ yi at te yi altar. 19 Ej juk tzun tir mben stzꞌitul yi chichꞌaꞌtz wi altar tan wikꞌab. Nin tan yi xtxolbilaꞌtz, xansok yi altar tkꞌab yi il cꞌol yi at cyakꞌun wunak.
20 ”Ma yil xcyeꞌ Aarón tan xanseꞌn yi amaꞌl yi wiꞌnin xanil, tu cyakil yi mantial tetz molbil ibaj, nin tu yi altar, mben tzun mantartz tan ticyꞌleꞌn tzaj yi junt chiw yi itzꞌeꞌt. 21 Jepon tzun tkꞌol kꞌabtz twiꞌ yi jun chiwaꞌtz, nin tzꞌocopon tan xtxoleꞌn nin tircuꞌn yi quil, tu chipajpal yi eꞌ xonl Israel. Nin tan yi xtxolbileꞌj, yi chiw mben tekal tircuꞌn yi quil, nin apart junt wunak mben tan stzakpeꞌn tul yi amaꞌl yi tzꞌinunin tuꞌ. 22 Nin yi na ben yi chiw joylaj, tul yi amaꞌl yi tzꞌinunin tuꞌ, na tek nin tircuꞌn yi quil tul eꞌchk amaꞌl yi tzꞌinunin tuꞌ. 23 Te yi nsken wiꞌt bajij yi xtxolbileꞌj, tzꞌocopon tzun junt tir Aarón tul yi mantial tetz molbil ibaj, nin tzꞌelpon tcyꞌal yi beꞌch tetz yi lino cuꞌn, yi oc tkꞌol teꞌj bajx cunin tan toqueꞌn tul yi amaꞌl yi wiꞌnin xanil, nin choꞌn scyajk cyentz taꞌn. 24 Nin taꞌsteꞌnintz tul yi mantial tetz molbil ibaj, sjichink junt tir, nin te yi nsken wek tib, tzꞌeluꞌl tzuntz tan pateꞌn yi tetz xtxꞌixwatz tuml yi chitxꞌixwatz yi eꞌ tanum, nin tan yi xtxolbilaꞌs scuylok tzun tetz pajtz, tuml chipaj tircuꞌn yi eꞌ tanum, yi eꞌ xonl Israel. 25 Yi ẍepuꞌil yi txꞌixwatz tan jaleꞌn cuybil paj, choꞌn na patij wi altar. 26 Nin yi jun yi mben tan stzakpeꞌn yi chiw tetz Azazel, tajweꞌn tan xtxꞌajol yi beꞌch tetz yi at teꞌj, nin tajweꞌn tan jichineꞌn, nin baꞌn tzun tzꞌoctzajtz le amaꞌl kale najlcheꞌt tircuꞌn yi eꞌ mas wunak.
27 ”Yi jun tal neꞌẍ tor, tu yi jun chiw yi ja chiquim, tan quil yi eꞌ wunak, nin yi chiẍchꞌel yi ja opon ticyꞌleꞌn le amaꞌl yi wiꞌnin xanil, tan jaleꞌn cuybil chipaj, tajweꞌn tan cyeleꞌn ticyꞌleꞌn joylaj len yi amaꞌl kale najlcheꞌt.e Nchaꞌtz yi chitzꞌuml, tu chichiꞌbel, tuml yi eꞌchk lasuꞌ yi na el ẍchiwankil, tajweꞌn tan pateꞌn cuꞌn joylaj len yi tnum. 28 Nin yi jun yi tzꞌocopon tan pateꞌn yi eꞌchk takleꞌnaꞌtz, tajweꞌn tan xtxꞌajol yi beꞌch tetz, nin tajweꞌn tan jichineꞌn yil baj wiꞌ yi munl, at tzun rmeriltz tan toqueꞌn tzaj le yi amaꞌl kale najlcheꞌt tircuꞌn yi eꞌ wunak.
29 ”Ma yi xtxolbilaꞌtz iꞌtz jun caꞌwl tetz itetz, tetz cyakil tiemp: Te yi lajuj tajlal yi belujiꞌn xaw, tajweꞌn yil tzijatx yi jun kꞌejaꞌtz tan mucꞌleꞌn weꞌj, nin quil cxakꞌuj te jun kꞌejaꞌtz, nin iteꞌn nin xtxolbilaꞌtz sbneꞌ scyetz eꞌ awer nak yi najlcheꞌ-tz tzixoꞌl, 30 na yaꞌstzun kꞌejlal yil jal cuybil ipaj swutz Kataj Ryos.f Nin cxelpon liwr tkꞌab tircuꞌn yi eꞌchk itil. 31 Wiꞌnin xanil yi jun kꞌejaꞌtz sbneꞌ tetz itetz, na iꞌtz jun kꞌej tetz ujleꞌn, nin tajweꞌn tzimucꞌ weꞌj. Nin iꞌtz jun caꞌwl tetz cyakil tiemp. 32 Yi paleꞌ yi ja jeꞌ sicyꞌij, nin yi ja akꞌlij yi caꞌwl tetz tan cyajeꞌn cyen le luwar yi taj chi jun wiꞌtz paleꞌ, iꞌ tzꞌocopon tan banleꞌn eꞌchk munlaꞌtz, bantz jaleꞌn cuybil chipaj. Nin tajweꞌn tan toqueꞌn yi beꞌchok teꞌj, yi lino cuꞌn yi xansaꞌnt. 33 Ej nin xanseꞌ yi amaꞌl yi wiꞌnin xanil, tu yi mantial tetz molbil ibaj, tu yi altar, nin sjalok cuybil chipaj yi eꞌ paleꞌ tan eꞌchk quil yi na chijuch, nin sjalok cuybil chipaj tircuꞌn yi wunak yi najlcheꞌ-tz.
34 ”Yi jun xtxolbilaꞌtz, iꞌtz jun caꞌwl tetz cyakil tiemp. Tajweꞌn yi jun tir le jujun yob tziban taneꞌn eꞌchk munlaꞌtz, tan jaleꞌn cuybil chipaj tircuꞌn yi eꞌ wunak, tan eꞌchk quil yi mbaj chijuchul.”
Ej nin yaꞌtz nin tzun tulej Moiséstz, quib yi tal Kataj tetz.