Yi amaꞌl yi ntinaꞌtz xac tetz eꞌchk txꞌixwatz
17
1 Ej nin tzun jilon tzaj junt tir Kataj tetz Moisés, itzun saj tloltz:2 “Txolnin tetz Aarón nin scyetz yi eꞌ nitxajil, nin scyetz cyakil yi eꞌ mas itanum, yi xtxolbileꞌj:
3 ”Alchok scyetz tzitetz yil quim jun mam tor taꞌn, nka jun neꞌẍ cneꞌr, nka jun chiw tetz xtxꞌixwatz, 4 nin ko quil tzꞌopon taꞌn stziꞌ cunin puertil yi mantial tetz molbil ibaj tan ẍchajleꞌn chi jun oy, sjalok til taꞌn na mmeꞌl tuꞌ kojxuj yi ẍchꞌel yi xtxꞌixwatz, tajweꞌn tzuntz tan teleꞌn lajuꞌn tzixoꞌl wok tampaj. 5 Yi na elpont yi jun caꞌwlaꞌtz, iꞌtz yi cyawun yi nchiquim cyakꞌun sajleꞌn tul alchok amaꞌlil, tajweꞌn tan cyoyil jaluꞌ tetz Kataj Ryos, swutz yi mantial tetz molbil ibaj, baꞌn tzun tzꞌoc yi paleꞌ-tz tan toyeꞌn tetz Kataj Ryos, tetz jun oy tetz tzatzin paz. 6 Nin yi paleꞌ tzꞌocopon tan kojleꞌn nin yi chichꞌ wi altar, yi at swutz Kataj Ryos. Ej nin nchaꞌtz stziꞌ cunin puertil yi mantial tetz molbil ibaj, nin tzꞌocopon tan pateꞌn yi ẍepuꞌ, chi jun oy yi wiꞌnin cꞌoꞌcal swutz Kataj Ryos. 7 Nin quiꞌt lcyakꞌ yi eꞌchk oyaꞌtz scyetz yi eꞌ espíritu cwent Baybaꞌn yi najlcheꞌ le amaꞌl yi tzꞌinunin tuꞌ, na tampaj yi jun ajtzaꞌklaꞌtz ja ijuch itil swutz Kataj Ryos. Nin yi jun caꞌwlaꞌtz iꞌtz tetz cyakil tiemp, iꞌtz tetz itetz ax wok xonl Israel, nin nchaꞌtz scyetz yi eꞌ initxaꞌ, sbneꞌ opon tunintz.
8 ”Nchaꞌtz al nin scyetz yi eꞌ atanum, nka scyetz alchok awer nakil, yi choꞌn najlij tzixoꞌl, yi ko na taj lpat jun xtxꞌixwatz, nka na taj ltoy junt jilwutz xtxꞌixwatz, 9 tajweꞌn yi tzꞌopon taꞌn stziꞌ cunin yi puertil yi mantial tetz molbil ibaj, tan toyeꞌn tetz Kataj, nin ko quil xom te yi caꞌwlaꞌs, tajweꞌn tan teleꞌn lajuꞌn tzixoꞌl wok.
Quiꞌc cuj tan bajeꞌn chichꞌ
10 ”Alchok scyetz tzitetz, nka jun awer nak yi choꞌn najlij tzixoꞌl, yil baj ẍchꞌel alchok txuc taꞌn, jun cuꞌn incontr sbneꞌ teꞌj, nin tzꞌelpon cuꞌn waꞌn swutz.a 11 Na alchok scyetz yi na xon wuxtxꞌotxꞌ, itzꞌ tan tuꞌ yi chichꞌ yi na xon le wankil, nin ja wakꞌ tzitetz tan xconeꞌn itaꞌn wi altar, tetz ixel tan qui iquimeꞌn tan yi eꞌchk itil yi na ijuch tzinwutz, na yi chichꞌaꞌtz yi na el kojxuj wi altar, yaꞌstzun na chojon tircuꞌn yi itil.b
12 ”Chaꞌstzun te na walnin: Ax wok jun cꞌoloj xonl Israel, nchaꞌtz ax wok awer nak yi najlquix ẍchixoꞌl, quiꞌc cuj tan bajeꞌn muꞌẍ tal chichꞌ itaꞌn. 13 Chaꞌstzun te alchok scyetz tzitetz yil ben tan txuquiꞌn, nin yil sbiycuꞌn jun txuc, yi baꞌn lbaj taꞌn, tajweꞌn tan teleꞌn tircuꞌn yi ẍchꞌel yi jun txucaꞌtz, nin tajweꞌn tan cweꞌn mukul, 14 na tan yi chichꞌaꞌtz, yaꞌstzun na chixoneꞌt cyakil txuc wuxtxꞌotxꞌ. Chaꞌstzun te na wal nin, yi quiꞌc cuj tan bajeꞌn chichꞌ itaꞌn, nin alchok scyetz yil bajseꞌn yi ẍchꞌel jun txuc, tajweꞌn tan teleꞌn lajuꞌn tzixoꞌl wok.
15 ”Ej nin alchok xonl Israel, nka awer nak, yil bajseꞌn jun txuc yi quimnakt, nka junt txuc mbiyon cuꞌn, tajweꞌn tan xtxꞌajol yi beꞌch tetz yi at teꞌj, nin nchaꞌtz tajweꞌn tan jichineꞌn, nin tzꞌocopon iꞌ tetz tajlal jun yi qui xansaꞌnt jalen cuꞌn yil cuꞌ kꞌej. Ej kalenaꞌs tzun tzꞌoctz tetz tajlal jun yi xansaꞌnt. 16 Poro ko quil tzꞌoc tan xtxꞌajleꞌn yi beꞌch tetz, nin quil jichin, qui tzun ltzaj yi tilaꞌs yi njuch, nin iꞌ nin ajpaj sbneꞌtz teꞌj sbneꞌ opon tunintz.”