Eꞌchk takleꞌn yi quiꞌc cuj tan bnol jun yaj te jun xnaꞌn
18
1 Ej nin tzun jilon tzaj junt tir Kataj Ryostz tetz Moisés, je tzun saj tlol iꞌ-tzeꞌj:2 “Txolnin yi eꞌchk xtxolbileꞌj scyetz yi eꞌ atanum yi eꞌ xonl Israel: Yi in wetz in iRyosil, nin in Ajcaw tziteꞌj.
3 ”Quil cxom wok te cyajtzaꞌkl yi eꞌ aj Egipto, yi tnum kale ncxaꞌteꞌt.
”Quil cxom wok te cyajtzaꞌkl yi eꞌ aj Canaán kalel cxoponeꞌt waꞌn, nin quil cxom wok te yi eꞌchk chicxtumbr yi eꞌ wunakaꞌtz.
4 ”Xomen wok te eꞌchk incaꞌwl, nin ban wok taneꞌn. Na in iRyosil yi caꞌwl itetz.
5 ”Ban wok bin taneꞌn eꞌchk incaꞌwl, tu eꞌchk ley yi ja bixeꞌ waꞌn. Nin alchok scyetz yil xom teꞌj, mben ẍkon tetz tiempaꞌtz.a Na in yi Ryos yi itajcawil.
6 ”Quiꞌc cuj tan witbel tib jun yaj tu jun xnaꞌn, ko cyajwutz quib. Banwok taneꞌn incaꞌwl na in iRyosil.
7 ”Quil tzitelsaj kꞌej itaj, tan tuꞌ yil tziwitbej itib tu itxuꞌ, na iꞌtz itxuꞌ nin quiꞌc rmeril yil tziban yi jun ajtzaꞌklaꞌs.
8 ”Quil tzitelsaj kꞌej itaj, tan tuꞌ yil tziwitbej itib tu txkel.b
9 ”Quil tziwitbej itib tu itanub, quiꞌc na ban ko iꞌtz meꞌl itaj, nka tal itxuꞌ, quiꞌc rmeril yil tziban jun ajtzaꞌklaꞌtz. Nchaꞌtz quiꞌc na ban ko choꞌn mmitzꞌij teꞌj junt xnaꞌn, quiꞌc cuj tan iwitbel itib tuchꞌ.c
10 ”Quil cyelsajuꞌ chikꞌejuꞌ squibil quibuꞌ, tan tuꞌ yil chiwitbej quibuꞌ tu chimamajuꞌ, quiꞌc na ban ko iꞌtz meꞌl chicyꞌajluꞌ, nka tal chimeꞌluꞌ. Quiꞌc cuj tan chibnoluꞌ jun ajtzaꞌklaꞌtz.
11 ”Quil tziwitbej itib tuchꞌ yi tal yi txkel itaj, na niꞌcuꞌn itaj tuchꞌ, nin iꞌtz itanub. Quiꞌc cuj tan ibnol jun ajtzaꞌklaꞌtz.
12 ”Quil tziwitbej itib tuchꞌ yi tanub itaj, na iteꞌn nin ẍchꞌel itajaꞌtz cyaꞌn taꞌn.
13 ”Quil tziwitbej itib tuchꞌ jun stzicy, nka titzꞌun itxuꞌ, na iteꞌn nin ẍchꞌel itxuꞌaꞌtz cyꞌaꞌn taꞌn.
14 ”Quil tzitelsaj kꞌej stzicy, nka titzꞌun itaj, tan tuꞌ yil tziwitbej itib tuchꞌ yi txkel, na nchaꞌtz yi xnaꞌnaꞌtz iꞌtz itxuꞌd taneꞌn.e
15 ”Quil tziwitbej itib tuchꞌ itlib, na yaꞌstzun txkel icyꞌajl, nin quiꞌc cuj tan ibnol jun ajtzaꞌklaꞌtz.f
16 ”Quil tzitelsaj kꞌej itzicy, nka ititzꞌun, tan tuꞌ yil tziwitbej itib tu yi txkel.g
17 ”Quil tziwitbej itib tu yi tal jun xnaꞌn yi ja wiꞌt chiwitbej quibuꞌ tuchꞌ nin nchaꞌtz quil tziwitbej itib tuchꞌ yi mamaj yi jun xnaꞌnaꞌtz, quiꞌc na ban ko iꞌtz meꞌl yi tal, nka tal yi tal, quiꞌc cuj tan iwitbel itib tuchꞌ. Yi jun ajtzaꞌklaꞌtz chin juntlen nin, na junit len chiẍchꞌel tircuꞌn eꞌ xnaꞌnaꞌtz.h
18 ”Quil tzꞌoc yi titzꞌun, nka stzicy inajal itaꞌn tetz itxkel, nin quiꞌc cuj tan iwitbel itib tuchꞌ te itzꞌeꞌt inajal, tan qui jaleꞌn oyintziꞌ ẍchixoꞌl.
19 ”Quil tziwitbej itib tu jun xnaꞌn, yi at cunin tul tiempil tetz yi tetz xtxꞌajoꞌn.i
20 ”Quil tziwitbej itib tuchꞌ yi txkel jun awisin, tan qui itoqueꞌn tetz tajlal jun yi qui xansaꞌnt, tan yi jun ajtzaꞌklaꞌtz.j
21 ”Quil tzitakꞌ nin jun initxaꞌ tetz yi ryos yi na biꞌaj Moloc.k Qui tzitelsaj xtxꞌix imbiꞌ tan yi jun ajtzaꞌklaꞌtz. Na yi in wetz in Jehová yi iRyosil.
22 ”Quil witbej tib jun yaj tu junt yaj, nka jun xnaꞌn tu junt xnaꞌn. Na chin txꞌixwil nin yi jun ajtzaꞌklaꞌtz.l
23 ”Quil tzixconsaj itib tu jun txuc, tan qui ijuchul itil tan yi jun ajtzaꞌklaꞌtz. Nchaꞌtz yi eꞌ xnaꞌn quiꞌc cu tan chixconsal quib tu jun txuc, na chin juntlen nin.m
24 ”Quil tzijuch itil tan yi eꞌchk ajtzaꞌklaꞌtz. Na tampaj yi eꞌchk xtxolbilaꞌtz chelpon inlajul yi eꞌchk tnum tul yi amaꞌl kalel cxoponeꞌt wok wakꞌun. 25 Nchaꞌtz ja jal til yi amaꞌl kale najlcheꞌt yi eꞌ wunakaꞌtz tan chipaj. Poro ja wakꞌ caws yi eꞌchk amaꞌlaꞌtz, chaꞌstzun te ja cheꞌl xit tircuꞌn yi eꞌ wunakaꞌtz tul yi cyetz chiꞌamaꞌl. 26 Ma jaluꞌ, ax wok jun cꞌoloj xonl Israel, scyuchꞌ yi eꞌ awer nak yi najlcheꞌ tzixoꞌl, nqueꞌnwok il tan banleꞌn taneꞌn yi eꞌchk incaꞌwl tu eꞌchk inley yi ja bixeꞌ waꞌn, nin quil tziban yi eꞌchk ajtzaꞌklaꞌtz, chi na chiban yi eꞌ mas wunak, bantz qui teleꞌn itxꞌix. 27 Na tircuꞌn yi eꞌchk ajtzaꞌklaꞌtz, yi chin txꞌixwil nin, yaꞌstzun eꞌ ban yi eꞌ wunak yi najlcheꞌ tzaj tzoneꞌj yi ntaxk cxuꞌl wok, nin tan chipaj ja oc tetz jun amaꞌl yi qui xansaꞌnt. 28 Qui bin cxom wok te cyetz cyajtzaꞌklaꞌtz. Na ko yaꞌtz, cxelepon wok lajuꞌn tan yi txꞌotxꞌ, chi mbajij scyeꞌj yi eꞌ mal wunakaꞌtz. 29 Alchok scyetz yil sban yi eꞌchk takleꞌnaꞌseꞌj yi chin txꞌixwil nin, tajweꞌn yil tzꞌel cuꞌn swutz. 30 Chaꞌstzun te nqueꞌnwok il tan banleꞌn taneꞌn yi eꞌchk incaꞌwl, nin quil tziban yi eꞌchk takleꞌn yi chin txꞌixwil nin, yi bajijnak sajleꞌnix tunintz tul yi amaꞌlaꞌs, nin quil tzijuch itil tampaj. Na in iRyosil yi cawl itetz.”