Eꞌchk caꞌwl tan xansal tib jun wunak, nin tan jaleꞌn jun cyajtzaꞌkl yi jicyuch teꞌj
19
1 Ej nin tzun jilon tzaj junt tir Kataj tetz Moisés itzun saj tloltz:2 “Alaj yi xtxolbileꞌj scyetz yi eꞌ atanum Israel: Nqueꞌnwok tetz jun jilwutz wunak yi xansaꞌnt, na yi in wetz yi iRyosil, chin xan nin in, nin chin tzꞌaknak cunin in.a
3 ”Akꞌwok len kꞌej itaj itxuꞌ.b
”Nchaꞌtz banwok taneꞌn eꞌchk kꞌej tetz ujleꞌn yi txumijt waꞌn.c Na yi in wetz in iRyosil, yi na chincawun tziteꞌj.
4 ”Quil tzilokꞌwok wutz junt ryos,d nin quil tziban junt ryos yi chꞌichꞌ cuꞌn.e Na yi in wetz in iRyosil, yi na chincawun tziteꞌj.
5 ”Yil cxopon tan toyeꞌn yi oy yi na ẍchaj yi ja jal tzatzin paz skaxoꞌl, oyinwok skꞌil cuꞌn, nin banwok yi eꞌchk xtxolbil yi na chintzatzin teꞌj. 6 Yi itawun yil tzitoy, tajweꞌn tan bajeꞌn itaꞌn te iteꞌn nin kꞌejaꞌtz, nin nchaꞌtz baꞌn lbaj le caꞌpiꞌn kꞌej, poro yi sowril yil cyaj tetz yi toxiꞌn kꞌej, tajweꞌn tan pat-xeꞌn. 7 Yi kol jeꞌ bajsaꞌn yi jun oyaꞌtz le toxiꞌn kꞌej, quiꞌc xac sbneꞌ tzinwutz, nin quil chintzatzin teꞌj. 8 Alchok scyetz yil bajseꞌn, sjalok til, nin stzꞌelk cuꞌn swutz, tampaj yi ja poꞌtzaj yi oy yi wiꞌnin kꞌej tzinwutz.
9 ”Yil tzꞌopon kꞌejlal yil jeꞌ yi icosech, quil tzisicyꞌeꞌn yi eꞌchk tal bakaj yi na cyaj cyen txꞌakxuj, nin quil cxoꞌc tan xtxoyeꞌn txoꞌlak yi stzꞌisil yi ja el quen. 10 Nchaꞌtz quil cxoꞌc tan xtxoyeꞌn wutz yi uva, nin quil tzisicyꞌeꞌn yi eꞌchk wutz yi na cyaj cyen txꞌakxuj, cyajk tuꞌtz itaꞌn scyetz yi eꞌ tal prow meꞌbaꞌ, nin scyetz yi eꞌ awer nak. Na yi in wetz in iRyosil, yi na chincawun tziteꞌj.f
11 ”Quil cxalkꞌij.g Nchaꞌtz quil tzijal jun wi itakꞌ, nin quil tzijop iwutz tzitibil itib.h
12 ”Quil tzisuk jun iyol tan imbiꞌ, yi quil cxeꞌl cuꞌn teꞌj,i na ko yaꞌtz tziban na tzun elpont-tz yi na cxtzan tan telseꞌn inkꞌej. Na yi in wetz in Jehová iRyosil, yi na chincawun tziteꞌj.
13 ”Quil cxoꞌcwok tan oyintziꞌ tu junt, nin quil tzimajlen yi eꞌchk takleꞌn yi at tuchꞌ. Nin chojwok chikꞌej yi eꞌ imos te iteꞌn nin kꞌejaꞌtz. Quil tzichꞌiw junt kꞌej tan chichojleꞌn.j
14 ”Quil cxoꞌc tan xbajtzijeꞌn jun chcan wiꞌ.
”Quil tzitakꞌwok cuꞌn eꞌchk takleꞌn le chibeꞌ yi eꞌ moyiꞌẍ tan chijeꞌn trimp teꞌj.k Ma na chajwok icꞌulutxumil tzinwutz. Na yi in wetz in Jehová iRyosil, yi na chincawun tziteꞌj.
15 ”Yil cxoꞌc tan pujleꞌn xtisyaꞌ, quil tzitakꞌeꞌn ikꞌab twiꞌ jun. Quil xom iwiꞌ tan colcheꞌn jun prow meꞌbaꞌ, yi ko iꞌ nin aj paj, nin quil xom iwiꞌ tan colcheꞌn jun ric, yi ko iꞌ nin aj paj. Nicyꞌnin tuꞌ tzitulej caꞌwbeꞌn cyetz alchok jilwutz wunak.l
16 ”Quil cxoꞌc wok tan ẍchaqꞌueꞌn yol ẍchixoꞌl yi eꞌ itanum.
”Quil cxoꞌcwok tan biyleꞌn cuꞌn junt iwunakil. Na yi in wetz in Jehová iRyosil, yi na chincawun tziteꞌj.
17 ”Quil tzitawaj chiꞌch cꞌuꞌlal tetz italmaꞌ, te jun ititzꞌun, nka te jun itzicy.
”Ej nin ko na itil yi tajweꞌn tan makleꞌn wutz jun iwisin, baꞌn tzimak wutz.m Quil cxom te yi tetz tajtzaꞌkl, ko na tzan tan juchleꞌn til.
18 ”Quil tziticyꞌseꞌ icꞌuꞌl tzitibil itib, nin quil tzitawaj chiꞌch cꞌuꞌlal scyeꞌj yi eꞌ itanum. Lokꞌwok chiwutz iwisin, na niꞌcuꞌn axwok scyuchꞌ.n Na yi in wetz in Jehová iRyosil, yi na chincawun tziteꞌj.
19 ”Banwok taneꞌn yi eꞌchk incaꞌwl.
”Quil tzitakꞌ amaꞌl tan chisakcheꞌn yi itawun tu junt jilwutz txuc.
”Quil tziyuj cuꞌn junt jilwutz ij txoꞌl yi ij yi na itaw wok swutz itxꞌotxꞌ.
”Quil tzꞌoc jun beꞌch itetz tziteꞌj, ko banij taneꞌn tan cobox jilwutz nokꞌ.o
20 ”Yi ko at jun lwitbej tib tu jun xun esclaw yi iꞌtz tetz junt yaj, nin txeꞌn lokꞌxij yi jun xunaꞌtz tan teleꞌn liwr, yi junaꞌtz yi nwitbej tib tuchꞌ, tajweꞌn tan ẍchojol yi paltil. Poro nkꞌeꞌtz sotzel chiwutz sbneꞌ, na yi jun xunaꞌtz atiteꞌt jakꞌ cawl yi patrón. 21 Nin yi junaꞌtz yi nwitbej tib tu yi xun yi esclaw, tajweꞌn tan toyil jun cneꞌr tzinwutz tan jaleꞌn cuybil paj, nin tajweꞌn tan beneꞌn tcyꞌal kale atit puertil yi mantial tetz molbil ibaj. 22 Nin tan yi jun cneꞌraꞌtz, tajweꞌn tan jakol yi paleꞌ cuybil paj yi jun yajaꞌtz swetz, nin tzincuyeꞌ paj.
23 ”Yil tzicambaj yi amaꞌl yi sukiꞌnt waꞌn tzitetz, yi na biꞌaj Canaán, nin yil tzitawaj eꞌchk tzeꞌ yi na takꞌ loꞌbajil, quiꞌc cuj tan cweꞌn tzaj yi wutz itaꞌn, nin quiꞌc cuj tan bajeꞌn yi wutz itaꞌn tetz ox yob. 24 Ma le cyajiꞌn yob, tircuꞌn yi wutz yi eꞌchk tzeꞌaꞌtz, xansok tzinwutz, nin tircuꞌn wunak ẍchimoleꞌ quib tan xanseꞌn yi eꞌchk loꞌbaj. 25 Ma le oꞌiꞌn yob, baꞌn tzun baj wutz yi eꞌchk tzeꞌaꞌtz itaꞌn. Nin tan yi xtxolbilaꞌtz yi tzeꞌ wiꞌnin wutz sbneꞌ opon tunintz. Na yi in wetz in iRyosil, yi na chincawun tziteꞌj.
26 ”Quil tzibajsaj jun takleꞌn yi at ẍchꞌel.p
”Quil cxoꞌcwok tan wutz mesiꞌn, nin quil tzijoy puntil tan tilweꞌn yi mbi sbajok ek caꞌp.q
27 ”Quil tzꞌel xiꞌil iwiꞌ itaꞌn yi junit setej sban, nin quil tzꞌel juꞌ ixmatziꞌ itaꞌn.
28 ”Quil tziqꞌuixpuj iwankil tampaj tuꞌ yi na quim jun. Nin quil tzꞌoc jun itechl itaꞌn te iwankil.r Na yi in wetz in Jehová iRyosil, yi na chincawun tziteꞌj.
29 ”Quil tzitelsaj kꞌej imeꞌl, tan tuꞌ yil tzꞌoc itaꞌn tetz jun wiꞌtz aj bnol tetz.s Quil tzipoꞌtzaj itanum tan eꞌchk ajtzaꞌkl yi chin xaꞌbil nin.
30 ”Banwok taneꞌn eꞌchk kꞌej tetz ujleꞌn yi bixbaꞌnt waꞌn. Akꞌwok kꞌej yi mantial tetz molbil ibaj kale najlchineꞌt. Na yi in wetz in iRyosil, yi na chincawun tziteꞌj.t
31 ”Quil tzijak itajtzaꞌkl scyetz yi eꞌ almaꞌ, nin scyetz yi eꞌ aj wutz mes.u Quil tzijuch itil tan yi eꞌchk takleꞌnaꞌtz. Na yi in wetz in iRyosil, yi na chincawun tziteꞌj.
32 ”Akꞌwok chikꞌej yi eꞌ yi ja tijin chicꞌuꞌl, baꞌn cxcyeꞌeꞌn wok ẍchiwutz tan takꞌleꞌn chikꞌej. Chajwok icꞌulutxumil, tan imbiꞌ. Na yi in wetz in Jehová iRyosil, yi na chincawun tziteꞌj.
33 ”Quil cheꞌ ibuch yi eꞌ awer nak yi najlcheꞌ tzixoꞌlwok. 34 Chajwok lokꞌ ib scyetz chi na ilokꞌ itib itetz tzitibil itib. Lokꞌwok chiwutz, na niꞌ cuꞌn axwok scyuchꞌ, na nchaꞌtz ax itetz, ax awer nak banak Egipto.v Banwok taneꞌn, na yi in wetz in iRyosil, yi na chincawun tziteꞌj.
35 ”Quil tziban tramp, te alchok jilwutz maꞌlbil. 36 Tajweꞌn xcon eꞌchk maꞌlbil itaꞌn yi tzꞌaknak cuꞌn yi talal.w Na in iRyosil, yi ncxeꞌlsan tzaj Egipto.
37 ”Ma jaluꞌ, banwok bin taneꞌn eꞌchk incaꞌwl, tu eꞌchk ley yi bixbaꞌnt waꞌn. Xomenwok teꞌj. Na yi in wetz in Jehová iRyosil, yi na chincawun tziteꞌj.”