Yi ẍchojoꞌnil yi pajol caꞌwliꞌn
20
1 Nin jilon tzaj junt tir Kataj Ryos tetz Moisés, itzun taltz tetz:2 “Txolnin yi xtxolbileꞌj scyetz yi eꞌ atanum: Alchok wunakil yil toy jun nitxajil tetz yi ryos Moloc, quiꞌc na ban ko iꞌtz jun xonl Israel nka jun awer nak yi choꞌn najlij tzixoꞌl wok, tajweꞌn cuꞌn tan cweꞌn biyij tan cꞌub cyakꞌun yi eꞌ nim juy. 3 Na yi in wetz, incontr sbneꞌ te yi junaꞌtz, nin stzꞌelk cuꞌn waꞌn swutz, na ja oc il cꞌol taꞌn te incaꞌl yi mantial tetz molbil ibaj, nin ja el kꞌej imbiꞌ taꞌn tan tuꞌ yi ja toy jun nitxajil tetz Moloc. 4 Ma jaluꞌ, ko qui na chixom yi eꞌ wunak te yi jun xtxolbilaꞌtz nin ko quil quim yi jun wunakaꞌtz cyaꞌn, 5 in tzun contr sbneꞌ-tz te junaꞌtz, tuml yi najal, nin stzꞌelk cuꞌn waꞌn swutz, scyuchꞌ yi eꞌ yi ja chixom teꞌj tan juchleꞌn quil swutz Moloc. 6 Ej nin ko choꞌn tzꞌopon jun swutz jun aj wutz mes, tan yol scyetz almaꞌ, sjucheꞌ til tampaj, nin in contr sbneꞌ-tz teꞌj, nin stzꞌelk cuꞌn waꞌn swutz.
7 ”Ma na ntin kꞌukek icꞌuꞌl sweꞌj, nqueꞌnwok tetz tzꞌaknak cuꞌn, na yi in wetz in iRyosil, yi na chincawun tziteꞌj. 8 Xanswok itib tan ixomeꞌn sweꞌj nin banwok taneꞌn eꞌchk incaꞌwl tetz cuꞌn italmaꞌ. Na in Jehová yi iRyosil yi ja noꞌc tan ixanseꞌn, nin tan ibixbajeꞌn tetz inxconsbeꞌtz.
9 ”Alchok scyetz yil tzꞌoc tan chijisleꞌn yi eꞌ taj xtxuꞌ, tajweꞌn tan cweꞌn biyij, na iꞌ teꞌn aj paj teꞌj yil cuꞌ biyij,a na ja oc tan telseꞌn chikꞌej yi eꞌ taj xtxuꞌ.
10 ”Yi ko at jun yaj lwitbej tib tu txkel junt, tajweꞌn tan quimeꞌn yi yaj tu yi xnaꞌn na ja chijuch quil.b
11 ”Ko at jun lwitbej tib tu txkel yi taj, na elpont yi na tzan tan telseꞌn kꞌej yi taj. Nin tan yi xtxolbilaꞌseꞌj, tajweꞌn tan quimeꞌn yi yaj, tu yi xnaꞌn na ja chijuch quil, nin eꞌ teꞌn aj paj te yil chicuꞌ biyij.c
12 ”Ko at jun lwitbej tib tu txkel yi cyꞌajl, tajweꞌn tan quimeꞌn yi yaj tu yi xnaꞌn, nin tajweꞌn tan toqueꞌn te cyajal yi ẍchiquimok, na eꞌ teꞌn aj paj te yil chicuꞌ biyij na yi jun ajtzaꞌklaꞌtz chin txꞌixwil nin.d
13 ”Ma jaluꞌ, kol witbej tib jun yaj te junt yaj, chi na witbej tib jun yaj tu jun xnaꞌn, tajweꞌn tan chiquimeꞌn chicabil, na eꞌ teꞌn ajpaj te yil chicuꞌ biyij, na chin txꞌixwil nin yi jun xtxolbilaꞌtz.e
14 ”Ko at jun ltokꞌbej tib tu jun xnaꞌn, nin ltokꞌbej tib tu xtxuꞌ yi jun xnaꞌnaꞌtz, na tzun tzantz tan poꞌtzaꞌn ib, nin tajweꞌn tan chipateꞌn cyoxlil, itzꞌenleꞌn, bantz quil jal junt tir yi takleꞌnaꞌtz yi chin txꞌixwil nin tzixoꞌlwok. f
15 ”Yi ko at jun yaj yil xcon jun txuc chi na xcon jun xnaꞌn, tajweꞌn tan cweꞌn biyij. Nin tajweꞌn tan cweꞌn biyij yi txuc.
16 ”Ko at jun xnaꞌn yil xcon jun txuc chi na xcon jun yaj, tajweꞌn tan cweꞌn biyij yi xnaꞌn tu yi txuc. Na chipaj nin cyeraꞌtz.g
17 ”Ko at jun ltokꞌbej tib tu jun tanub, quiꞌc na ban ko nkꞌeꞌtz junit chitaj chitxuꞌ, nin lchiwitbej quibtz, sotzel chiwutz sbneꞌ, na yi na witbej tib jun tu tanub iꞌtz jun xtxolbil yi chin txꞌixwil nin, nin eꞌ teꞌn ajpaj sbneꞌ te yil chicuꞌ biyij.h
18 ”Ko at jun lwitbej tib tu jun xnaꞌn yi na tzan quen cunin tul tiempil yi xtxꞌajoꞌn, na tzun tzantz tan telseꞌn kꞌej yi xnaꞌn, nin nchaꞌtz yi xnaꞌn iꞌ aj paj teꞌj, na ja cujij yi jun ajtzaꞌklaꞌtz, nin tan yi xtxolbilaꞌtz tajweꞌn tan chicweꞌn biyij.i
19 ”Quil tziwitbej itib tu jun titzꞌun, nka stzicy itxuꞌ, nin nchaꞌtz tu jun titzꞌun, nka stzicy itaj, na eꞌ teꞌn ixonl, nin ko yaꞌtz tziban tzichojeꞌ itil.
20 ”Alchok scyetz yi na witbej tib tu txkel yi xibin yi xtxuꞌ, na el kꞌej yi xibin yi xtxuꞌ taꞌn, nin chicabil jepon cyeklal yi quilaꞌtz, nin quil jal jun chinitxaꞌ.j
21 ”Alchok scyetz yil majlen txkel yi titzꞌun, nka stzicy, na el kꞌej yi titzꞌun, nka stzicy taꞌn. Nin yi jun ajtzaꞌklaꞌtz na takꞌ chiꞌch cꞌuꞌlal, nin yi eꞌaꞌtz yil chijuch quil, quil jal chinitxaꞌ.k
22 ”Banwok bin taneꞌn eꞌchk incaꞌwl, tu eꞌchk inley yi bixbaꞌnt waꞌn, bantz quil cxeꞌlwok lajuꞌn le yi tnum yi na chintzan tan iticyꞌleꞌn nin tul tetz inajbil. 23 Quil cxomwok te cyajtzaꞌkl yi eꞌ wunak yi chelpon inlajul swutz yi amaꞌlaꞌtz. Na yi eꞌaꞌtz ja chiban yi eꞌchk yab ajtzaꞌklaꞌtz yi chin juntlenin, chaꞌstzun te qui nin mintxꞌaj yi cyajtzaꞌkl, nin chelpon inlajul swutz yi amaꞌlaꞌtz. 24 Jun cuꞌn swaleꞌ nin tzitetz, yi itetz sbneꞌ yi jun amaꞌlaꞌtz yi chum balaj nin.l
”In iRyosil, yi ja cxjeꞌ intxaꞌol ẍchixoꞌl yi eꞌ mas jilwutz wunak. 25 Chaꞌstzun te tajweꞌn tan teleꞌn itxum scyetz yi eꞌ txuc yi xan tu yi eꞌ yi nkꞌeꞌtz xan tan ibajsal nka tan imacol. Quil tzitelsaj ikꞌej tan tuꞌ yil tzibajsaj nka yil tzimac yi eꞌ txucaꞌtz yi xan. 26 Yi ax itetz tajweꞌn tan itoqueꞌn tetz jun jilwutz wunak yi xansaꞌnt tzinwutz, na yi in wetz in Jehová, nin chin xan cunin in, nin ja cxjeꞌ intxajol ẍchixoꞌl tircuꞌn yi eꞌ wunak yi ateꞌ wuxtxꞌotxꞌ tan itoqueꞌn tetz intanum.
27 ”Alchok yaj nka alchok xnaꞌn yi na chijoy puntil tan xconeꞌn jun aj wutz mes tetz chiyolol scyuchꞌ almaꞌ, tajweꞌn tan quimeꞌn tan cꞌub. Nin eꞌ teꞌn aj paj te yil chicuꞌ biyij,” stzun Ryos bantz.