Yi mbi tajweꞌn sban jun paleꞌ
21
1 Ej nintzun jilon tzaj junt tir Kataj Ryos tetz Moisés, tan talcheꞌn yi xtxolbileꞌj:“Jilonin scyetz yi eꞌ paleꞌ, yi eꞌ xonl Aarón, nin alaj scyetz yi chijoyeꞌ puntil tan qui cyoqueꞌn tetz tajlal jun yi qui xansaꞌnt, tan tuꞌ yil chimac yi wankil jun chixonl yi ja quim. 2 Ma na ko iꞌtz jun chixonl chi taneꞌn chitxuꞌ, chitaj, chinitxaꞌ, nka jun quitzꞌun, 3 nka jun cyanub yi qui ocnak chmil, nin yi choꞌn najlij scyuchꞌ, baꞌn tzun chimactz wankil yi almaꞌaꞌtz. 4 Poro quiꞌc cuj tan chimacol jun almaꞌ yi ko iꞌtz jun cyanub yi umnakt.
5 ”Quiꞌc cuj tan teleꞌn chijukul xiꞌil chiwiꞌ, nin quiꞌc cuj tan teleꞌn chixmatziꞌ cyaꞌn,a nin quiꞌc cuj tan qꞌuixpeꞌn chiwankil.b 6 Ma na tajweꞌn yi cyakꞌoꞌnt quib tan chixconeꞌn swetz, nin yi quil tzꞌel kꞌej imbiꞌ cyaꞌn na eꞌ na choꞌc tan pateꞌn eꞌchk txꞌixwatz tzinwutz, nin na cyoy yi pam yi wiꞌnin xanil swetz, chaꞌstzun te tajweꞌn yil choꞌc tetz tzꞌaknak cuꞌn.
7 ”Quiꞌc cuj tan tumeweꞌn jun paleꞌ tu jun wiꞌtz bnol tetz, nka tu jun xun yi poꞌtzaꞌnt, nka tu jun xnaꞌn yi xmaꞌlcaꞌn, na yi eꞌ paleꞌaꞌtz jatxij cheꞌ tan chixconeꞌn swetz. 8 Makaj bin chiwutz yi eꞌ paleꞌ te eꞌchk takleꞌnaꞌtz, na eꞌ na chopon tu yi eꞌchk oy tzinwutz. Nin chin skoj cuꞌn te cyalmaꞌ sbneꞌ ẍchiwutz tircuꞌn yi eꞌ wunak, na yi in wetz in iRyosil, nin chin tzꞌak nak cunin in, nin in na choꞌcsan tetz tzꞌaknak cuꞌn.
9 ”Yi ko at jun xun yi meꞌl jun paleꞌ, yil telsaj kꞌej stibil tib yil tzꞌoc tetz wiꞌtz bnol tetz, na el kꞌej yi taj taꞌn, nin tajweꞌn tan stzꞌeꞌseꞌn itzꞌenleꞌn.
10 ”Ej nin yi wiꞌtz paleꞌ, at rmeril tan xconsal yi beꞌchok yi wiꞌnin xanil, na jeꞌnak kojij yi aceit yi wiꞌnin xanil twiꞌ. Chaꞌstzun te quiꞌc rmeril tan jeꞌn ẍchitpul xiꞌil wiꞌ, nin quiꞌc rmeril tan cweꞌn katzol yi beꞌch tetz tan ẍchajleꞌn yi na bisun tan jun xonl yi na quim. 11 Nchaꞌtz quiꞌc rmeril tan toqueꞌn le jun amaꞌl kale atit jun almaꞌ, mpe ik yi taj, nka yi xtxuꞌ yi ja quim, na quiꞌc rmeril tan toqueꞌn yi wiꞌtz paleꞌ tetz jun wunak yi qui xansaꞌnt. 12 Quiꞌc rmeril tan teleꞌn tzaj le amaꞌl yi wiꞌnin xanil, kale najleꞌt Ryos, tan toqueꞌn tul jun amaꞌl kale atit jun almaꞌ, quiꞌc na ban ko iꞌtz yi taj nka yi xtxuꞌ, na ko yaꞌtz sban tzꞌelpon kꞌej yi amaꞌl yi wiꞌnin xanil taꞌn, na jeꞌnak kojij yi aceit twiꞌ yi na xcon tan xanseꞌn jun wiꞌtz paleꞌ. Banwok bin taneꞌn yi incaꞌwl na in Jehová iRyosil.
13 ”Tajweꞌn tan tumeweꞌn jun wiꞌtz paleꞌ tu jun xun yi txeꞌn cuꞌn til jun yaj. 14 Na quiꞌc cuj tan tumeweꞌn tu jun xmaꞌlcaꞌn yi ja quim chmil, nka tu jun xnaꞌn yi ja chipax tu chmil, nka tu jun xnaꞌn yi poꞌtzaꞌnt, nka tu jun xnaꞌn yi wiꞌtz bnol tetz. Quiꞌc cuj tan tokꞌbel tib tu alchok tuꞌ xnaꞌnil, ma na tajweꞌn tan tumeweꞌn tu jun xun yi txeꞌn cuꞌn til jun yaj, nin yi choꞌn tzꞌel tzaj taꞌn ẍchixoꞌl yi eꞌ tetz xonl, yi eꞌ xonl kꞌajtzun Leví. 15 Yi eꞌ wiꞌtz paleꞌ, tajweꞌn tan chibnol taneꞌn yi eꞌchk xtxolbilaꞌtz tan qui teleꞌn chikꞌej yi eꞌ chinitxaꞌ cyaꞌn ẍchixoꞌl chitanum, na yi in wetz, in nchixansan tan cyoqueꞌn tetz tzꞌaknak cuꞌn.”
Quiꞌc rmeril tan toqueꞌn jun paleꞌ tan toyeꞌn txꞌixwatz swutz Ryos ko at yanaꞌsil
16 Ej nin jilon tzaj junt tir Ryos tetz Moisés, tan talcheꞌn yi xtxolbileꞌj:
17 “Alaj tetz Aarón yi sbneꞌ opon tunintz, quiꞌc rmeril tan toqueꞌn jun tetz xonl yi at yanaꞌsil, tan toyeꞌn pam tzinwutz. 18 Yi xtxolbilaꞌtz na elpont, yi alchok scyetz yi at jun yanaꞌsil quiꞌc rmeril tan banleꞌn yi jun munlaꞌtz. Quiꞌc rmeril tan chixconeꞌn tetz paleꞌ yi eꞌ moyiꞌẍ, yi eꞌ coꞌx, scyuchꞌ yi eꞌ yi at yanaꞌsil yi juꞌ, nka ko at yanaꞌsil yi ẍchin, 19 nka wakꞌxnakt yi tkan, nka yi kꞌab, 20 nka yi at mucꞌuxil wutz coc, nka yi qui nin chꞌuy wutz tkan, nka yi muj nin tuꞌ teꞌj wutz, nka yi xlacꞌat wutz yi xcyꞌakach yi at teꞌj, nka yi at txꞌaꞌc te wankil, nka poꞌtnak yi chiquiwel. 21 Alchok scyetz scyeri eꞌ xonl Aarón yi at jun te eꞌchk yanaꞌsilaꞌtz teꞌj, quiꞌc cuj tan toqueꞌn tan banleꞌn jun munl swutz Ryos, yi patuꞌn na uꞌlij, nin quiꞌc cuj tan toqueꞌn tan toyeꞌn yi pam, na at yanaꞌsil. 22 Baꞌn lbaj yi pam taꞌn yi na oyij, nin baꞌn lbaj yi eꞌchk takleꞌn taꞌn yi wiꞌnin xanil. 23 Poro quiꞌc rmeril tan toqueꞌn tcꞌuꞌl yi amaꞌl yi wiꞌnin xanil yi choꞌn at tul yi mantial tetz molbil ibaj, nin quiꞌc cuj tan tocomponeꞌn ẍkansal tib te yi altar yi at le wutzkꞌanil, bantz qui teleꞌn keꞌj yi incaꞌl taꞌn, tan yi tetz yanaꞌsil. Na in yi iRyosil, yi mmakꞌon kꞌej yi eꞌchk takleꞌnaꞌtz.”
24 I nin tzun yol Moisésaꞌtz bantz tetz Aarón, quib yi tal Ryos tetz, nin nchaꞌtz iteꞌn nin talaꞌtz scyetz yi eꞌ nitxajil Aarón, nin scyetz cyakil yi eꞌ xonl Israel.