Yi eꞌchk oy yi na akꞌlij tetz Ryos
22
1 Ej nintzun jilon tzaj junt tir Kataj Ryos tetz Moisés, itzun taltz:2 “Alaj tetz Aarón, nin scyetz yi eꞌ xonl iꞌ, yi cwent cuꞌn chiban te eꞌchk takleꞌn yi wiꞌnin xanil yi na oylij swetz, tan qui teleꞌn kꞌej imbiꞌ cyaꞌn, yi wiꞌnin xanil. Na in Jehová iRyosil.
3 ”Ej nin jaluꞌ, nin sbneꞌ opon tunintz, alchok scyetz ẍchixoꞌl yi paleꞌaꞌtz yil tzꞌoc tan banleꞌn chimunl yi eꞌ xonl Israel tzinwutz, tajweꞌn tan xansal tib bajx cuꞌn. Ko quil sban taneꞌn yi incaꞌwleꞌj, tajweꞌn tan teleꞌn lajuꞌn tzixoꞌl wok. Quiꞌc cuj tan xconeꞌn. Na in Jehová, iRyosil.
4 ”Quiꞌc cuj tan bajeꞌn eꞌchk takleꞌn yi wiꞌnin xanil, tan jun xonl Aarón yi ko at jun jilwutz txꞌaꞌc teꞌj yi xlacꞌat wutza, nka yi na el poj te wankil, jalen cuꞌn yil xansaj tib.
”Alchok scyetz tzitetz yil maqueꞌn jun almaꞌ, nka lmaqueꞌn junt wunak yi ja el taꞌal yi ẍchiꞌol, 5 nka alchok scyetz yil tzꞌoc quen tetz jun yi qui xansaꞌnt, tampaj yil maqueꞌn jun txuc yi tu na jut nin tuꞌ wankil wuxtxꞌotxꞌ, nka yil noj quen te jun wunak yi qui xansaꞌnt, 6 tzꞌocopon tzun tetz tajlal jun yi qui xansaꞌnt, jalen cuꞌn yil cuꞌ kꞌej, nin quiꞌc cuj tan bajeꞌn eꞌchk takleꞌn taꞌn yi wiꞌnin xanil, yi ko quil jichin te yi ntaxk oc tan bajseꞌn yi eꞌchk pamaꞌtz yi wiꞌnin xanil. 7 Jalen cuꞌn yil cuꞌ kꞌej, kalenaꞌs tzun tzꞌoctz tetz jun wunak yi xansaꞌnt swutz Ryos. Ej kalenaꞌs tzun at rmeriltz tan bajeꞌn yi eꞌchk oy taꞌn yi wiꞌnin xanil, na yaꞌstzun yi tetz waꞌ. 8 Quiꞌc cuj tan bajeꞌn ẍchiꞌbel jun txuc taꞌn yi quimnakt yi nnoj quen swutz, nin quiꞌc cuj tan bajeꞌn yi ẍchiꞌbel jun txuc taꞌn yi ritꞌij cuꞌn taneꞌn tan jun smaron txuc, bantz quil tzꞌoc lacꞌp il cꞌol teꞌj tan yi chiꞌbajaꞌtz. Na in Jehová iRyosil.
9 ”Al nin scyetz tan cyoqueꞌn tan banleꞌn taneꞌn eꞌchk incaꞌwl, nin quil chijuch quil tantuꞌ yi quil chiban taneꞌn, bantz quil chiquim. Na in Jehová iRyosil, yi na chinxansan yi eꞌ paleꞌaꞌtz.
10 ”Yi ko at jun yi nkꞌeꞌtz paleꞌ, quiꞌc cuj tan bajeꞌn yi eꞌchk takleꞌn yi wiꞌnin xanil taꞌn. Quiꞌc na ban ko iꞌtz jun wunak yi ja opon tu yi paleꞌ tan posariꞌn, nka yi aj chꞌeyanl le najbil yi paleꞌ, quiꞌc cuj tan bajeꞌn yi eꞌchk pamaꞌtz taꞌn yi wiꞌnin xanil.
11 ”Yi kol lokꞌ yi paleꞌ jun esclaw tan yi tetz puꞌk, yi jun esclawaꞌtz baꞌn lbaj yi eꞌchk takleꞌn taꞌn yi wiꞌnin xanil. Nchaꞌtz yi eꞌ yi choꞌn nchitzꞌij xe caꞌl yi paleꞌ, ban chiwan te eꞌchk wajaꞌtz.
12 ”Yi ko at jun xun yi meꞌl jun paleꞌ yi ja umeꞌ te jun yi quiꞌc tocbil tetz paleꞌ, quiꞌc rmeril tan bajeꞌn yi eꞌchk oyaꞌtz taꞌn yi na akꞌlij scyetz yi eꞌ paleꞌ. 13 Poro ko iꞌtz xmaꞌlcaꞌn, nka ja chipax tu chmil, nin quiꞌc tal, nin ja pakxij xe caꞌl yi taj, baꞌn wan te yi oy yi na akꞌlij tetz yi taj. Poro quiꞌc rmeril tan waneꞌn junt yi nkꞌeꞌtz paleꞌ te eꞌchk oyaꞌtz.
14 ”Yi ko at jun yi qui na til yi xanil yi eꞌchk takleꞌnaꞌtz, nin ja baj taꞌn, tajweꞌn tan xtxumul xel, tuml junt toꞌiꞌn part te yi mbaj taꞌn. 15 Poro yi eꞌ paleꞌ quiꞌc rmeril tan cyakꞌol amaꞌl tan cyoqueꞌn eꞌ xonl Israel tan telseꞌn kꞌej yi eꞌchk takleꞌnaꞌtz yi wiꞌnin xanil, yi na oylij swetz, 16 nin quil cyakꞌ amaꞌl tan chijuchul quil, tan yil baj yi eꞌchk oyaꞌtz cyaꞌn. Na in yi Ryos, yi na akꞌon chikꞌej yi eꞌ paleꞌ.”
Eꞌchk xtxolbil yi tajweꞌn tan banleꞌn taneꞌn te eꞌchk awun yi na xcon tetz txꞌixwatz
17 Ej nintzun jilon tzaj junt tir Ryos tetz Moisés, itzun saj tloltz:
18-19 “Jilonin tetz Aarón tuml yi eꞌ cyꞌajl, nin scyetz yi eꞌ atanum, nin txolnin yi eꞌchk xtxolbileꞌj scyetz: Yi ko at jun scyeri eꞌ kaxonl Israel, nka jun scyeri eꞌ awer nak yi najlij skaxoꞌl yil toy jun xtxꞌixwatz tetz Ryos tan pat-xeꞌn tircuꞌn wankil, tajweꞌn yi iꞌtz jun txuc yi mam nin yi quiꞌc muꞌẍ tal yanaꞌsil, bantz stzatzineꞌn Ryos teꞌj. Quiꞌc na ban ko iꞌtz tan teleꞌn kꞌab te jun yol yi sukiꞌnt taꞌn swetz, nko iꞌtz jun oy yi tetz cuꞌn talmaꞌ na takꞌ tetz Ryos. Nin tajweꞌn yi iꞌtz jun mam tor, nka iꞌtz jun tal mam cneruꞌ yi junixeꞌt yob, nka jun mam chiw. 20 Poro quiꞌc rmeril ko at chiyanaꞌsil yi eꞌ tawunaꞌtz, na quil cꞌuꞌlchij ko yaꞌtz quitaneꞌn yil chopon tzinwutz.b
21 ”Alchok scyetz yil tzꞌopon tan takꞌleꞌn jun oy tetz tzatzin paz, quiꞌc na ban ko iꞌtz tan teleꞌn kꞌab te jun yol yi sukiꞌnt tetz Ryos, nka iꞌtz jun oy yi tetz cuꞌn talmaꞌ na takꞌ, tajweꞌn yil toy eꞌ mam tor, nka eꞌ cneruꞌ, yi quiꞌc muꞌẍ tal chiyanaꞌsil, bantz stzatzineꞌn Ryos teꞌj. 22 Quil tzitoywok eꞌchk awun swetz yi moyiꞌẍ, nka qꞌuixpnakeꞌ, nka quiꞌc junt quikan, nka yi jeꞌnak txꞌanol tib muꞌẍ chichiꞌbel, nka at xcyꞌakach scyeꞌj, nin quil tzitakꞌ tan chipat-xeꞌn tetz oy wi altar tzinwutz. 23 Ma jaluꞌ, ko iꞌtz jun oy yi na toy jun tan tuꞌ yi na tzatzin, baꞌn tzun ltakꞌ jun mam tor, nka jun cneꞌr yi at jalaj tkan juy, poro ko iꞌtz tan banleꞌn taneꞌn jun caꞌwl, qui tzun tzꞌakꞌlij amaꞌltz tetz tan toyil jun awun yi nkꞌeꞌtz tzꞌaknak. 24 Quiꞌc rmeril tan itkꞌol eꞌchk awun swetz yi qꞌuixpnak chiquiwel, nka loꞌonsaꞌnt, nka elnakt tzutij, nka elnak kuxij. Quil tzitoywok yi jun jilwutz awunaꞌtz swetz. 25 Nchaꞌtz quil tzitzꞌamwok eꞌchk awunaꞌtz tetz jun awer nak tetz inwaꞌ yi in iRyosil, na yi eꞌ txucaꞌtz at chiyanaꞌsil, nin quil tzintzꞌam tikꞌab.”
Eꞌchk xtxolbil yi tajweꞌn lbanlij taneꞌn tan biyleꞌn jun awun yi na oylij tetz Ryos
26 Ej nin jilon tzaj junt tir Kataj Ryos tetz Moisés, itzun taltz tetz:
27 “Yil tzꞌitzꞌij jun tal neꞌẍ tor, nka yil tzꞌitzꞌij jun tal neꞌẍ cneruꞌ, nka jun tal neꞌẍ chiw, tajweꞌn yil cyajcyen te yi xtxuꞌ tetz juk kꞌej, ma yil tzꞌicyꞌ yi juk kꞌejaꞌtz, stzꞌocsok tzuntz tan pat-xeꞌn tetz oy tzinwutz.
28 ”Quil tzibiy cuꞌn jun wacẍ, nka jun cneꞌr tu tal te iteꞌn nin kꞌejaꞌtz.
29 ”Yil tzitakꞌwok jun oy tan tyoẍiꞌn swetz, puntil cuꞌn tzitulej, bantz intzatzineꞌn teꞌj. 30 Nin bajswokeꞌn tircuꞌn te iteꞌn nin kꞌejaꞌtz nin quil tzitakꞌwok cyen sowril tetz junt kꞌej. Na in Jehová iRyosil yi na chincawun tziteꞌj.
31 ”Banwok taneꞌn eꞌchk incaꞌwl, xomenwok teꞌj. Na in Jehová iRyosil yi na chincawun tziteꞌj.
32 ”Quil tzitelsaj kꞌej imbiꞌ yi chin xan nin, bantz jaleꞌn inkꞌej tzixoꞌlwok, yi axwok xonl Israel. Na in, in Jehová yi iRyosil, yi ja ixansij tan ixconeꞌn swetz. 33 Nin ja cxeꞌl tzajwok waꞌn Egipto, tan woqueꞌn tetz iRyosil. Na in Jehová iRyosil yi na tzan tan talcheꞌn eꞌchk caꞌwlaꞌtz tzitetz,” stzun Ryos bantz tetz Moisés tan talcheꞌn scyetz wunak.