Yi eꞌchk kꞌej yi na bajij tan takꞌleꞌn kꞌej Ryos
23
1 Ej nin tzun jilon tzaj junt tir Ryos tetz Moisés, itzun taltz tetz:2 “Txolaj yi xtxolbileꞌj scyetz yi eꞌ atanum yi eꞌ xonl Israel: Je biꞌ yi eꞌchk kꞌejlaleꞌj yi tajweꞌn tan itoqueꞌn tan incꞌuꞌlajeꞌn. Wiꞌnin xanil sbneꞌ eꞌchk kꞌejaꞌtz yil tzimoleꞌ itib tzinwutz.
3 ”Kakꞌ kꞌej cxakꞌuj wok ma le jukiꞌn kꞌej, iꞌtz jun kꞌej tetz ujleꞌna nin wiꞌnin xanil jun kꞌejaꞌtz sbneꞌ yil tzimol cun itib tzinwutz. Tajweꞌn tziban taneꞌn jun kꞌejaꞌtz alchok amaꞌlil kalel cxaꞌteꞌt, na wiꞌnin xanil jun kꞌejaꞌtz tan takꞌleꞌn inkꞌej, na in iTaj Jehová.
4 ”Je yi eꞌchk kꞌejlaleꞌj tan imolol itib tan takꞌleꞌn inkꞌej, nin wiꞌnin xanil eꞌchk kꞌejlalaꞌtz:
5 ”Yi cyajlaj tajlal yi bajx xaw, cweꞌn kꞌej, tajweꞌn tan ibnol taneꞌn yi Pasc, tan takꞌleꞌn inkꞌej.b
6 ”Nin le oꞌlajiꞌn kꞌej te iteꞌn nin xawaꞌtz, na taj ticyꞌseꞌn yi kꞌejlal tan bajseꞌn yi pam yi quiꞌc xtxꞌamil, tan takꞌleꞌn inkꞌej. Tetz juk kꞌej tajweꞌn tan ibajsal pam yi quiꞌc xtxꞌamil. 7 Nin yi bajx kꞌej te yi juk kꞌejaꞌtz, tajweꞌn tan imolol itib na wiꞌnin xanil yi jun kꞌejaꞌtz. Quil xakꞌuj wok le jun kꞌejaꞌtz. 8 Nin tul yi jujun kꞌejaꞌtz tajweꞌn tan ipatil itxꞌixwatz tzinwutz. Ej nin le jukiꞌn kꞌej, tajweꞌn tan imolol itib na wiꞌnin xanil yi jun kꞌejaꞌtz. Quiꞌc cuj tan ibnol jun jilwutz akꞌun.”c
Yi tzatziꞌn yi na bajij te yi bajx wutz yi ujul
9 Ej nin tzun jilon tzaj junt tir Ryos tetz Moisés, itzun taltz:
10 “Txolnin yi eꞌchk xtxolbileꞌj scyetz yi eꞌ atanum, yi eꞌ xonl Israel: Yi nsken wiꞌt cxoꞌc tul yi amaꞌl yil swakꞌeꞌ tzitetz, nin yil jeꞌ yi icosech tetz triw, tajweꞌn tzꞌopon yi bajx bocꞌoj itaꞌn tkꞌab yi paleꞌ. 11 Ma yi nsken wiꞌt icyꞌ yi jun kꞌej tetz ujleꞌn, tajweꞌn tzun tan sukil yi paleꞌ yi jun bocꞌoj triwaꞌtz tzinwutz chi jun oy yi wiꞌnin kꞌej, bantz wukꞌol amaꞌl tan ituleꞌn tzinwutz. 12 Nin le iteꞌn nin kꞌejaꞌtz yil cyoy yi jun bocꞌoj triwaꞌtz, tajweꞌn tan ipatil jun tal neꞌẍ cneruꞌ yi junixeꞌt yob, yi quiꞌc muꞌẍ tal yanaꞌsil, tan takꞌleꞌn inkꞌej. 13 Nchaꞌtz tajweꞌn tzicyꞌaj tzaj wajxak liwr tu niꞌcy te yi balaj jarin yi coꞌsiꞌnt tan aceitil oliw, tan ipatil. Iꞌtz jun oy yi wiꞌnin cꞌoꞌcal tzinwutz. Tajweꞌn tan itoyil jun litr win xe cꞌuꞌl yi jun oyaꞌtz. 14 Quil baj pam itaꞌn, nka triw yi woyiꞌnt, nka triw yi skejt, jalen cuꞌn yil tzꞌopon yi jun itoyaꞌtz itaꞌn tzinwutz. Ej nin yi jun xtxolbilaꞌtz, iꞌtz jun caꞌwl tetz cyakil ixonl tan chibnol taneꞌn sbneꞌ opon tunintz. Quiꞌc na ban naꞌl cxaꞌt cuꞌn wok.
Yi kꞌej tetz bajx cosech
15 ”Ma yi nsken wiꞌt itoy yi jun bocꞌoj triwaꞌtz, tul yi kꞌej tetz ujleꞌn, itzun yi junt eklok tajweꞌn tan itajlal juk seman.d 16 Nin te yi junt kꞌej, tib yi caꞌwunak beluj kꞌejaꞌtz, iꞌtz jun kꞌej ujleꞌn, nin na jepon tajlal tetz nicyꞌ cient kꞌej. Ej nin te yi jun kꞌejaꞌtz tajweꞌn yil tzitoy wok swetz yi wutz yi acꞌaj cosech tetz triw. 17 Nin tajweꞌn tan beneꞌn chicyꞌal jujun najal cob pam yi at xtxꞌamil, yi na bnix te yi balaj jarinaꞌtz, yi cyaj liwr talal jujun, chi jun oy yi wiꞌnin kꞌej, tetz yi bajx wutz yi cosech tan itoyeꞌn tzinwutz, yi in Jehová yi iRyosil. 18 Nin tuml yi pamaꞌtz, tajweꞌn tan beneꞌn quicyꞌal juk neꞌẍ cneꞌr tan jun yob jujun, yi quiꞌc muꞌẍ tal chiyanaꞌsil, tu jun neꞌẍ tor, nin cob cneꞌr yi mam, tan chipat-xeꞌn tan takꞌleꞌn inkꞌej, na iꞌtz jun oy yi wiꞌnin cꞌoꞌcal tzinwutz. Tajweꞌn xomt nin yi eꞌchk oyaꞌtz tetz triw tu win, yi na chiquim yi eꞌ awunaꞌtz.
19 ”Nchaꞌtz tajweꞌn tan itoyil jun chiw, tan xtxꞌajleꞌn itil, nin cob tal neꞌẍ cneruꞌ tan jun yob jujun, tetz jun oy tetz tzatzin paz. 20 Nin yi paleꞌ tzꞌocopon tan sukeꞌn nin yi eꞌchk awunaꞌtz chi jun oy yi wiꞌnin kꞌej swutz Ryos, tuml yi pam yi na bnix te yi bajx wutz yi cosech, nin tuml yi cob neꞌẍ cneꞌr. Wiꞌnin xanil yi oyaꞌtz swutz Ryos, nin tetz yi paleꞌ sbneꞌ.
21 ”Nin te iteꞌn nin kꞌejaꞌtz, tajweꞌn tan ibnol jun moloꞌn ib yi wiꞌnin xanil, nin quil tziban jun akꞌun yi na taj wiꞌnin walor. Nin yi jun xtxolbileꞌj, iꞌtz jun caꞌwl sbneꞌ yi tajweꞌn tziban taneꞌn tetz cyakil tiemp, nin quiꞌc na ban naꞌ lcxaꞌt cuꞌnt.e
22 ”Yil tzꞌopon kꞌejlal tan jeꞌn icosech, quil tzisicyꞌeꞌn yi eꞌchk tal bakꞌwutz yi na cyaj cyen txꞌakxuj, nin quil tzitxoy yi eꞌchk wutz yi bakajiꞌn yi na cyaj cyen wi txꞌotxꞌ. Akꞌwok quen scyetz yi eꞌ tal prow meꞌbaꞌ, nin scyetz yi eꞌ awer nak. Na in iRyosil, yi na chincawun tziteꞌj.”f
Yi kꞌej tetz yi eꞌchk chun
23 Ej nintzun jilon tzaj junt tir Kataj Ryos tetz Moisés tan talcheꞌn:
24 “Txolaj yi xtxolbileꞌj scyetz yi eꞌ atanum yi eꞌ xonl Israel: Yi bajx kꞌej tetz yi jukiꞌn xaw, tajweꞌn tan ibnol taneꞌn jun kꞌej ujleꞌn, nin jun moloꞌn ib yi wiꞌnin xanil, nin tajweꞌn tzꞌoc chun te jun kꞌejaꞌtz. 25 Tajweꞌn tan ipatil jun oy tan takꞌleꞌn kꞌej Ryos, nin quiꞌc cuj tan ibnol jun jilwutz akꞌun yi na taj wiꞌnin walor.”
Yi kꞌejlal tan xtxꞌajleꞌn quil
26 Jiloneꞌn tzaj Kataj Ryos junt tir tetz Moisés, itzun taltz:
27 “Yi lajujiꞌn kꞌej tetz yi jukiꞌn xaw tetz cyakil yob, yaꞌstzun yi kꞌejlal tan xtxꞌajleꞌn itil. Nin tajweꞌn tan ibnol taneꞌn yi jun moloꞌn ib yi wiꞌnin xanil, nin tajweꞌn tan ibnol taneꞌn yi mucꞌleꞌn weꞌj, nin tajweꞌn tan ipatil jun oy tan takꞌleꞌn kꞌej Ryos le jun kꞌejaꞌtz. 28 Nin quil cxakꞌuj te jun kꞌejaꞌtz, na yaꞌstzun yi jun kꞌej tan intxꞌajol itil, nin sjalok cuybil ipaj swutz Ryos, yi itajcawil. 29 Alchok scyetz yi quil sban taneꞌn yi mucꞌleꞌn weꞌj le jun kꞌejaꞌtz, quiꞌc na ban mbi wunakil, tajweꞌn tan teleꞌn lajuꞌn le tnum. 30 Nin alchok scyetz yil tzꞌakꞌuj te jun kꞌejaꞌtz, quiꞌc na ban mbi wunakil, sotzel wutz sbneꞌ waꞌn.
31 ”Quil tziban jun akꞌun, na iꞌtz jun incaꞌwl tetz cyakil tiemp, yi tajweꞌn tan chibnol taneꞌn yi eꞌ initxaꞌ yi xomt cheꞌ tzaj, nin tajweꞌn tan ibnol taneꞌn quiꞌc na ban naꞌ lcxaꞌt cuꞌnt. 32 Yi jun kꞌejaꞌtz tajweꞌn tzꞌoc tetz itajal yi iꞌtz jun kꞌej tetz ujleꞌn, nin tetz mucꞌleꞌn weꞌj, nin tajweꞌn yil xeꞌtij yi jun kꞌejaꞌtz yi beluj tajlal yi xaw, cweꞌn kꞌej, jalen yil cuꞌ kꞌej le junt eklok, yaꞌstzun yil taneꞌ imunl.”g
Yi wutz kꞌej Scabteꞌ
33 Cawun tzaj Kataj Ryos junt tir tetz Moisés itzun taltz:
34 “Txolaj yi xtxolbileꞌj scyetz yi eꞌ atanum yi eꞌ xonl Israel: Cyakil yob, le oꞌlajiꞌn kꞌej tetz yi jukiꞌn xaw, tajweꞌn tan ibnol taneꞌn jun wutz kꞌej yi na biꞌaj Scabteꞌ. Juk tzun kꞌej sbneꞌ yi jun tzatzinaꞌtz, tan takꞌleꞌn kꞌej Ryos. 35 Nin le bajx kꞌej tajweꞌn tzimol itib. Nin chin xan nin jun moloꞌn ibaꞌtz sbneꞌ. Quil tziban jun jilwutz akꞌun yi quiw te yi jun kꞌejaꞌtz. 36 Nin tul yi juk kꞌejaꞌtz, tajweꞌn tan ipatil eꞌchk oy tzinwutz, nin le wajxakiꞌn kꞌej tajweꞌn yil tziban junt moloꞌn ib yi wiꞌnin xanil, nin tzipateꞌ junt oy tzinwutz. Na iꞌtz jun kꞌej tetz tzatziꞌn, nin quiꞌc cuj tan ibnol jun jilwutz akꞌun.h
37 ”Je yi eꞌchk kꞌej yi tajweꞌn tan ibnol taneꞌn tan takꞌleꞌn inkꞌej, nin tajweꞌn tan ibnol taneꞌn eꞌchk moloꞌn ibaꞌtz na at xanil. Nin tajweꞌn tan ipatil eꞌchk oy swutz Kataj Ryos, nin eꞌchk itxꞌixwatz yi na patij tircuꞌn wankil, tuml eꞌchk oy yi ixiꞌn triw cuꞌn, nin eꞌchk oy yi win cuꞌn, xom quen tuꞌ te yi mbi tajweꞌn tan itoyil le jujun kꞌej. 38 Nchaꞌtz tajweꞌn tan ticyꞌseꞌn eꞌchk kꞌej tetz ujleꞌn cyakil sman tan takꞌleꞌn inkꞌej. Nchaꞌtz baꞌn tzitakꞌ eꞌchk oy yi sukiꞌnt itaꞌn swetz tu yi eꞌchk oy yi tu na saj buꞌk te italmaꞌ.
39 ”Ej nin yi oꞌlaj tajlal yi jukiꞌn xaw, yi nsken wiꞌt jeꞌ yi cosech itaꞌn, tajweꞌn tan ibnol jun tzatziꞌn tetz juk kꞌej tan takꞌleꞌn kꞌej Ryos. Nin le bajx kꞌej te yi tzatziꞌnaꞌtz tajweꞌn tan itujeweꞌn. Ma yil jepon tamp yi juk kꞌejaꞌtz, tajweꞌn tan itujeweꞌn junt kꞌej. 40 Le bajx kꞌej baꞌn tzimol wok eꞌchk balaj loꞌbaj. Nchaꞌtz baꞌn tzimol wok eꞌchk xak xaꞌj, nin eꞌchk kꞌab tzeꞌ yi wiꞌnin xak, tu yi eꞌchk kꞌab kꞌan tzeꞌ yi choꞌn na jal tziꞌak aꞌ tan ibnol scabteꞌ. Nin te yi juk kꞌejaꞌtz cxtzatzinkwok tzinwutz. 41 Na tul yi jukiꞌn xaw tetz cyakil yob, tajweꞌn tan ibnol taneꞌn yi jun tzatziꞌnaꞌtz tetz juk kꞌej tan takꞌleꞌn inkꞌej. 42 Nin tul yi juk kꞌejaꞌtz, tircuꞌn axwok, yi ax intanum, tajweꞌn tan itaꞌteꞌn txeꞌak tal scabteꞌaꞌtz, 43 bantz tuleꞌn txꞌakx ẍchicꞌuꞌl yi eꞌ initxaꞌ yi mbi cuꞌn bajij yi woqueꞌn tan itelseneꞌltzaj le tnum Egipto, nin yi xconeꞌn tal scabteꞌ itaꞌn tetz inajbil. Ban wok bin taneꞌn eꞌchk incaꞌwl, na in Jehová iRyosil.”i
44 Yaꞌstzun yi eꞌchk xtxolbil yi talnak Moisés scyetz yi eꞌ xonl Israel, te eꞌchk kꞌej, yi tajweꞌn tan ticyꞌeꞌn cyaꞌn swutz Kataj Ryos.