Yi aceit yi na xcon tetz txekbil
24
1 Ej nintzun jilon tzaj junt tir Ryostz tetz Moisés itzun taltz tetz:2 “Cawunin scyetz yi eꞌ atanum yi eꞌ xonl Israel tan cyakꞌol aceitil oliw te yi balaj, bantz quil chitzaj yi eꞌchk txekbil. 3 Nin tajweꞌn yil tzꞌoc Aarón tan nucꞌleꞌn yi eꞌchk cantil, bantz quil chitzaj yi eꞌchk txekbil yi at swutz Kataj Ryos le mantial tetz molbil ibaj, swutzeꞌltzaj yi xbuꞌk yi at swutz yi caẍaꞌ kale atit cuꞌnt yi cob lepaj cꞌub tetz yi trat. Nin yi xtxolbileꞌj iꞌtz jun caꞌwl tetz cyakil tiemp, yi tajweꞌn tan quibital yi eꞌ initxaꞌ yi xomt cheꞌ tzaj. 4 Tajweꞌn bin tan nucꞌleꞌn yi eꞌchk txekbilaꞌtz yi ateꞌ nintz le chicuꞌlbil, yi oro cuꞌn, tan chitxekuneꞌn swutz Ryos.
Yi pam yi ilenin na opon swutz Ryos
5 ”Xconken yi chumbalaj jarin awaꞌn, nin banaj coblaj pam yi wajxak liwr tu niꞌcy talal jujun sban, 6 nin baꞌn jeꞌ yi pamaꞌtz awaꞌn wi yi mes, yi oro cuꞌn yi at tzinwutz, nin baꞌn tzatxoleꞌn cob txol tan kakchak nin tuꞌ yi jujun txol.a 7 Nin baꞌn tzꞌicyꞌ cuꞌn yi insens awaꞌn tibaj yi jujun txol pam, na yi insensaꞌtz spat-xok swutz Kataj tan takꞌleꞌn kꞌej iꞌ, yi jun xtxolbilaꞌtz sbajok sbneꞌ opon tunintz. 8 Nin yi pamaꞌtz tajweꞌn tan toponeꞌn swutz Kataj Ryos, cyakil tir yi na bajij yi jun kꞌej ujleꞌn, chi jun trat tetz cyakil tiemp. 9 Nin yi eꞌchk pamaꞌtz cyetz Aarón scyuchꞌ yi eꞌ nitxajil sbneꞌ,b nin baꞌn lbaj cyaꞌn le jun amaꞌl yi xan, na wiꞌnin kꞌej yi jun oyaꞌtz txoꞌl cyakil yi eꞌchk oy yi na opon swutz Ryos.”
Yi chicastiw yi eꞌ wunak yi na choꞌc tan telseꞌn kꞌej Kataj Ryos
10-11 Ej itzun bantz at tzun jun yaj yi xonl Israel yi xtxuꞌ, ma yi taj iꞌtz aj Egipto. Nin yi biꞌ yi xtxuꞌ iꞌtz Selomit, nin yi xnaꞌnaꞌtz iꞌ tal Dibri, nin iꞌ jun chixonl yi eꞌ aj Dan. Nin tzun jeꞌ chiyajol quib yi jun yajaꞌtz tu jun xonl Israel. Itzun yi jun yajaꞌtz yi xonl Israel xtxuꞌ, nintzun octz tan telseꞌn kꞌej yi biꞌ Kataj Ryos. Ej nin tzun ben ticyꞌleꞌntz swutz Moisés. 12 Ej, nin te yi na chitzan tan ẍchꞌiweꞌn yi tajbil Kataj Ryos tan chibnol, nin tzun octz cyakꞌun xetzeꞌ. 13 Sajeꞌn tzun tlol Kataj Ryos tetz Moisés, itzun taltz:
14 “Cyꞌajlen yi junaꞌtz yi mmoꞌc tan telseꞌn inkꞌej, le yi amaꞌl kale najlquixeꞌt, nin tircuꞌn yi eꞌ yi ja quibit yi mmoꞌc tan telseꞌn inkꞌej baꞌn ljeꞌ chikꞌab twiꞌ tan ẍchajleꞌn yi juncuꞌn iꞌ ajpaj. Nin tircuꞌn yi eꞌ wunak tetz tnum baꞌn lchibiy cuꞌn tan cꞌub. 15-16 Ma jaluꞌ, txolnin yi xtxolbileꞌj scyetz yi eꞌ xonl Israel: Alchok scyetz yil tzꞌoc tan telseꞌn kꞌej yi biꞌ yi kaRyosil, iꞌ aj paj, nin tircuꞌn yi eꞌ xonl Israel chocopon tan biyleꞌn cuꞌn, tan cꞌub. Nin quiꞌc na ban ko iꞌtz jun xonl Israel, nka jun awer nak yil tzꞌoc tan telseꞌn kꞌej Ryos, tajweꞌn tan quimeꞌn.
17 ”Nchaꞌtz alchok scyetz yil biycuꞌn jun wunak, tajweꞌn tan quimeꞌn.c
18 ”Alchok scyetz yil quim tawun junt taꞌn, tajweꞌn tan tkꞌol xel.
19 ”Nin alchok scyetz yil ban quen jun takleꞌn teꞌj junt, tajweꞌn tan tijol yi mbi cuꞌn mban. 20 Ko at jun yi ja wakꞌxij bakil junt taꞌn, tajweꞌn tan wakꞌxeꞌn tetz bakil, ko ja el wutz jun tan junt, tajweꞌn tan teleꞌn wutz yi jun yi meꞌlsan wutz yi tuchꞌ, ko ja el teꞌ jun tan junt tuchꞌ, nchaꞌtz tajweꞌn tan teleꞌn teꞌ yi junaꞌtz.d Bantz tijol yi qꞌuixcꞌuj yi na icyꞌpon tan yi jun yi na loꞌon.
21 ”Alchok scyetz yil biy cuꞌn tawun junt, tajweꞌn tan tkꞌol xel. Ma na alchok scyetz yil biy cuꞌn jun wunak, tajweꞌn tan cweꞌn biyij.
22 ”Na yi eꞌchk caꞌwlaꞌtz nicyꞌ nintuꞌ sbneꞌ scyetz yi eꞌ xonl Israel, scyuchꞌ yi eꞌ awer nak yi najlcheꞌ-tz.e Ban wok bin taneꞌn eꞌchk incaꞌwl na in yi Ryos yi itajcawil.”
23 Jiloneꞌn tzun Moiséstz scyetz yi eꞌ xonl Israel, nin tzun el tzaj quicyꞌal yi junaꞌtz yi oc tan telseꞌn kꞌej Kataj Ryos, nin tzun cuꞌ chibiyoltz tan cꞌub. Quib yi tal Ryos tetz Moisés, inin tzun cyulej yi eꞌ xonl Israeltz.