Yi jun yob tetz ujleꞌn, ej nin yi jun yob yi na biꞌaj jubileo
25
1 Itzun yi jiloneꞌn tzaj Kataj Ryos tetz Moisés, wi yi wutz yi na biꞌaj Sinaí, itzun saj tloltz tetz:2 “Txolnin yi eꞌchk xtxolbileꞌj scyetz yi eꞌ atanum yi eꞌ xonl Israel: Yil cxoꞌcwok tul yi amaꞌl yi swakꞌeꞌ tzitetz, tajweꞌn yil tzꞌujeꞌ yi txꞌotxꞌ jujun tiemp tan takꞌleꞌn kꞌej Ryos. 3 Ej baꞌn tzun tzꞌoc wutz yi txꞌotxꞌtz itaꞌn tetz kak yob. Nchaꞌtz baꞌn cxoꞌc tan poreꞌn yi uva yi awij itaꞌn, nin baꞌn tzimol yi eꞌchk wutz. 4 Ma le jukiꞌn yob, tajweꞌn tan tujeweꞌn yi txꞌotxꞌ, tan takꞌleꞌn kꞌej Kataj. Nin quil tzꞌoc wutz itxꞌotxꞌ itaꞌn, nin quil tziban baꞌn tetz eꞌchk uva yi awij itaꞌn. 5 Nin quil jeꞌ jun cosech te yi triw yi na jeꞌul ẍchuc tul yi jun yobaꞌtz,a nin quil molxij jun cosech te yi wutz yi uva yi na kꞌanax tul jun yobaꞌtz, na tajweꞌn tan tujeweꞌn yi txꞌotxꞌ. 6 Poro yi eꞌchk takleꞌn yi ẍchuc na chꞌuy tul yi jukiꞌn yobaꞌtz xcyek tan icꞌaꞌcheꞌn len, yi axwok itetz, scyuchꞌ yi eꞌ imos, scyuchꞌ yi eꞌ akꞌunwil, nin scyuchꞌ yi eꞌ awer nak yi najlcheꞌ tzixoꞌl. 7 Nchaꞌtz baꞌn chiwan yi eꞌ itawun, scyuchꞌ yi eꞌ smaron txuc teꞌj. Cyakil yi na jeꞌul ẍchuc baꞌn xcon tetz iwaꞌ.b
8 ”Ej, nin tajweꞌn tan itajlal juk tir juk yob, tan jeꞌmponeꞌn tajlal tetz caꞌwunak tu beluj yob. 9 Ej nin yi lajuj tajlal yi jukiꞌn xaw, yi kꞌej tetz Cuybil Paj, tajweꞌn tzꞌoc yi chun itaꞌn yi banij te tucꞌ cneꞌr, lakak tnum Israel, tan telseꞌn stziblal yi txant tan jeꞌmponeꞌn yi nicyꞌ cient yob. 10 Ma yil jepon yi nicyꞌ cient yobaꞌtz, tajweꞌn tzꞌoc itaꞌn tetz jun yob yi wiꞌnin xanil, na iꞌtz jun yob tan eleꞌn liwr. Tircuꞌn yi eꞌ esclaw chelpon liwr tan chipakxeꞌn te yi chinajal, nin baꞌn lcyetzaj junt tir yi chitxꞌotxꞌ yi benak cꞌaꞌy. 11 Yi jun yobaꞌtz yi na biꞌaj jubileoc, iꞌtz jun tiemp sbneꞌ tan cyeleꞌn cyakil wunak liwr, nin tul jun yobaꞌtz quiꞌc cuj tan tocseꞌn wutz yi eꞌchk cojbil, nin quiꞌc cuj tan jeꞌn yi triw yi na itzꞌij ẍchuc wi cojbil, nin quiꞌc cuj tan poreꞌn eꞌchk uva, nin quiꞌc cuj tan molcheꞌn eꞌchk wutz, 12 na iꞌtz jun yob yi wiꞌnin xanil, nin tan cyeleꞌn yi eꞌ pres liwr. Nin ntin cxwankwok te yi mbiꞌtz na chꞌuy ẍchuc swutz cojbil.
13 ”Te yi jun yobaꞌtz yi na biꞌaj jubileo, tircuꞌn eꞌ yi benak chitxꞌotxꞌ cꞌaꞌy tajweꞌn tan cyetzal junt tir. 14 Na ko at jun slokꞌ jun piẍ txꞌotxꞌ, nka scꞌay nin jun piẍ txꞌotxꞌ, quiꞌc cuj tan paysal wutz yi jun yi na tzan tan cꞌayeꞌn, nka yi jun yi na tzan tan lokꞌcheꞌn. 15 Na yi wunak yi lokꞌon jun piẍ txꞌotxꞌ, ntin ẍchojeꞌ yi tajlal cosech yi sjalok jalen yil tzꞌucuꞌl junt tir yi jun yob yi na biꞌaj jubileo, nin yi jun yi na cꞌayin tetz yi txꞌotxꞌ, ntin sjakeꞌ yi jamel yi eꞌchk cosechaꞌtz yi txeꞌn jeꞌ swutz yi cojbil.d 16 Xom quen tuꞌ te yi jatnaꞌ tlen cosech txeꞌn jeꞌ, yaꞌtz nin jamel yi cojbil sbneꞌ-tz. Nin yi ko coboxteꞌn yob cosech tan jeꞌn, ajnak tzaj nin tzun sbneꞌ jameltz, na yi na cꞌaylij iꞌtz yi tajlal eꞌch cosech.
17 ”Qui tzun tzipaysaj iwutz tzitibil itib. Ma na ek wok inchiꞌ, na yi in wetz in iRyosil yi na cawun tziteꞌj. 18 Banwok taneꞌn eꞌchk incaꞌwl tu eꞌchk inley yi bixbaꞌnt waꞌn. Nqueꞌn wok cꞌulutxum tan banleꞌn taneꞌn, bantz penin skꞌil cxnajank wok le itanum. 19 Stkꞌeꞌ tzun itxꞌotxꞌ balaj cosech, nin cxtzatzink wok swutz icojbil, nin sbajk yi eꞌchk wutz yi eꞌchk cosechaꞌtz itaꞌn jaleꞌn cuꞌn yil noj icꞌuꞌl.
20 ”At loꞌ eꞌ scyaleꞌ: ‘¿Mbil baj kaꞌn yil koꞌc tul yi jukiꞌn yob, na quiꞌc cuj tan kakꞌujeꞌn wi cojbil, nin quiꞌc cuj tan kabeneꞌn tan jeꞌseꞌn kacosech?’ 21 Je puntileꞌj, yi in wetz, swakꞌeꞌ imbanl tzitibaj le kakiꞌn yob, nin yi cosech yil jeꞌ itaꞌn xcyek tan icꞌaꞌcheꞌn tetz ox yob. 22 Cxwank tzun woktz te yi colij itaꞌn, jalen yil cxoꞌc wok tan tawleꞌn itujul le wajxakiꞌn yob, nin xcyek yi colij itaꞌn tan icꞌaꞌcheꞌn jalen yil jeꞌ yi acꞌaj cosech.
23 ”Yi txꞌotxꞌ quiꞌc rmeril tan beneꞌn itaꞌn cꞌay tetz cyakil tiemp, na iꞌtz wetz, nin yi axwok itetz, niꞌcuꞌn chi axwok tuꞌk cꞌamol taneꞌn swutz incojbil. 24 Chaꞌstzun te yi txꞌotxꞌ yi at tikꞌab, baꞌn tzitakꞌ amaꞌl tetz yi taw banak, tan lokꞌol junt tir tzitetz.
25 ”Yi ko at jun itanum yil ben tul il, nin scꞌay icyꞌ tzaj yi xtxꞌotxꞌ tzitetz, baꞌn tzilokꞌ. Poro ko at jun xonl iꞌ yi nakaꞌj chixoꞌl tuchꞌ, yi na taj tan colpil yi txꞌotxꞌ yi ja wiꞌt ben cꞌay, baꞌn tzitakꞌ amaꞌl tetz tan lokꞌol junt tir tetz yi mero taw.e
26 ”Ma jaluꞌ, ko iꞌtz jun itanum yi quiꞌc tetz xonl tan xcyeweꞌn tan colpeꞌn yi txꞌotxꞌ, baꞌn tzꞌoc il tan molcheꞌn puꞌk tan lokꞌolt tzitetz. Yil jal yi tajweꞌn taꞌn, 27 tzꞌocopon tan telseꞌn cwent te yi jatnaꞌ yob na taj tan jeꞌmponeꞌn te yi yob tetz jubileo, nin yaꞌstzun jamel yi stkꞌeꞌ tzitetz tan tetzal junt tir yi txꞌotxꞌ. 28 Ma jaluꞌ, ko quil xcyeꞌ yi yaj tan molcheꞌn yi pwok yi tajweꞌn, scyajk tzun yi txꞌotxꞌaꞌtz tcwent yi jun yi nlokꞌon jalen cuꞌn yil tzꞌopon yi jun yob yi na biꞌaj jubileo tan tetzal junt tir, na yaꞌstzun yi jun tiempaꞌtz yi na pakxij junt tir chitxꞌotxꞌ cyakil wunak ẍchikꞌab.
29 ”Ko at jun yi ja cꞌay jun caꞌl tul jun tnum yi tapij cuꞌn teꞌj, ntin at rmeril tan lokꞌolt tul yi bajx yob yi benleꞌnix cꞌay. 30 Poro ko quil xcyeꞌ junt tir tan lokꞌcheꞌn yi caꞌl, te jun yobaꞌtz, scyajk yi caꞌl tetz yi junt wunak yi nlokꞌon, tetz cyakil tiemp, nin quiꞌt xcyeꞌ yi taw banak cyen tan colpeꞌn, mpe ik tul jun yob yi na biꞌaj jubileo. 31 Ma yi eꞌch caꞌl yi choꞌn jeꞌnakeꞌ tul eꞌchk tnum yi quiꞌc tapij solteꞌj, niꞌcuꞌn sbajok scyeꞌj chi na bajij te jun piẍ txꞌotxꞌ yi baꞌn lokꞌxij kol xcyeꞌ yi taw tan colpeꞌn junt tir, ma ko quiꞌ, spakxok tzuntz tkꞌab yi taw yil jepon yi jun yob tetz jubileo.
32 ”Ma yi eꞌ xonl Leví, baꞌn chilokꞌ junt tir eꞌchk chicaꞌl yi choꞌn at tul jun tnum yi tapij cuꞌn teꞌj. 33 Yi kol ben jun caꞌl cꞌaꞌy tan jun xonl Leví yi choꞌn at le jun tnum yi tapij cuꞌn teꞌj, nin ko quil xcyeꞌ tan lokꞌcheꞌn junt tir, tajweꞌn yil pakxij tkꞌab iꞌ yil jepon yi yob tetz jubileo. Na yi eꞌchk chicaꞌl yi eꞌ xonl Levíjaꞌtz yaꞌstzun yi cyetz chicaꞌl tetz cyakil tiemp. 34 Nin yi eꞌchk amaꞌl tetz pstorbil, yi choꞌn at ẍchikꞌab yi eꞌ xonl Leví, quiꞌc rmeril tan beneꞌn cꞌaꞌy, na yi eꞌchk amaꞌlaꞌtz iꞌtz cyetz, tetz cyakil tiemp sbneꞌ opon tunintz.
Yi eꞌch cꞌmoꞌn yi na akꞌlij scyetz yi eꞌ prow meꞌbaꞌ
35 ”Ko at jun itanum, yil cyajcyen meꞌbaꞌ, nin ltzꞌopon tan jakleꞌn ẍchꞌeybil tetz tzitetz, tajweꞌn tan ichꞌeyal chi na ichꞌey jun awer nak tbeꞌ, nin tajweꞌn tan itkꞌol posar.f 36 Quil tzimajwok len jun takleꞌn tetz, nin quil tzitzꞌam taꞌal yi pwok yi ja cꞌam tzitetz, quil tziban jun xtxolbilaꞌtz, ma na ekwok ẍchiꞌ iRyosil, nin akꞌwok posar yi jun prowaꞌtz. 37 Quil tzijak taꞌal yi pwok yi na itakꞌ tan cꞌmoꞌn tetz,g nin quil jeꞌ jamel yi waꞌ itaꞌn. 38 Na in iRyosil, yi itajcawil, nin ja cxeꞌlwok tzaj waꞌn ẍchikꞌab yi eꞌ aj Egipto, tan woqueꞌn tetz iRyosil, nin tan itoponeꞌn le tnum yi na biꞌaj Canaán.
39 ”Yi kol cyajcyen jun itanum tul meꞌbaꞌil te yi at tan posariꞌn tzituchꞌ, nin lcꞌaytib tzitetz tan akꞌun, quil tzibuch chi jun esclaw taneꞌn, 40 ma na tajweꞌn tzitakꞌ kꞌej chi na itakꞌ kꞌej jun akꞌunwil, nka chi na itakꞌ kꞌej jun aj posarinl. Nin stzꞌakꞌujk tzituchꞌ jalen yil tzꞌopon kꞌejlal yi jun yob tetz jubileo, tan teleꞌn liwr. 41 Kalenaꞌs tzun tzꞌeltz liwr tuml yi najal, tan taꞌteꞌn ẍchixoꞌl yi eꞌ tetz xonl, nin tan taꞌteꞌn swutz yi tetz cojbil, chibanak cyen. 42 Na axwok len cuꞌn inchakum, na ja cxeꞌltzaj waꞌn jakꞌ caꞌwl Egipto, nin quiꞌc rmeril tan ibeneꞌn cꞌayiꞌn chi na ben cꞌayiꞌn jun esclaw. 43 Qui bin cheꞌ ibuch, ma na chajwok yi na itek inchiꞌ.
44 ”Ko na itaj tzilokꞌ jun esclaw yaj nka xnaꞌn, baꞌn tzilokꞌ, poro yi choꞌn ljal ẍchixoꞌl yi eꞌ awer nak tetz junt tnum. 45 Nchaꞌtz baꞌn tzilokꞌ yi eꞌ awer nak yi najlcheꞌ tzixoꞌl, tuml chinitxaꞌ yil chijal te yi ateꞌ le itanum, baꞌn lcheꞌ ilokꞌ tetz esclaw. 46 Nin baꞌn chicyaj cyen itaꞌn tetz esclaw scyetz initxaꞌ yil cxquim itetz. Poro quiꞌc rmeril tan itoqueꞌn tan chibuchleꞌn yi eꞌ itanum yi ko eꞌ esclaw tzituchꞌ.h
47 ”Ma jaluꞌ, ko at jun awer nak yil tzꞌoc tetz ric, nin ko at jun itanum yi ja ben tul txꞌokꞌbeꞌn, nin na cꞌay tib tetz yi jun ricaꞌtz, nka na cꞌay tib tetz alchok awer nakil, 48 at cuj tan ẍchojol jamel tan teleꞌn liwr, nin quiꞌc na ban ko ja wiꞌt cꞌay tib. Baꞌn colpij tan jun titzꞌun, nka jun stzicy, 49 nka tan jun quitzꞌun, nka quitzicy yi eꞌ taj xtxuꞌ, nka alchok jun scyetz yi eꞌ xonl yi nakaꞌj nin chixoꞌl tuchꞌ. Nchaꞌtz baꞌn colpij tib kol xcyeꞌ teꞌj ẍchuc cuntuꞌ. 50 Nin na taj telseꞌn ajal te yi jatnaꞌ tiemp na taj tan jeꞌmponeꞌn te yi yob tetz jubileo, nin yi jamel tan teleꞌn liwr iꞌtz yi tajlal yi eꞌchk yob yi quil xcon tetz yi patrón. Yi pwok choꞌn xomok te yi na chitxꞌac yi eꞌ akꞌunwil tul jun kꞌej. 51 Nin ko at tzaj nin coboxt yob yi qui njepon te yi jun yob jubileo, tajweꞌn tan tkꞌol muꞌẍ te yi pwok yi nstzꞌam yi beneꞌn cꞌayil tib. 52 Ko coboxteꞌn yob tan jeꞌmponeꞌn te yi jun yob tetz jubileo, ntin ẍchojeꞌ yi jamel yi muꞌẍt tiempaꞌtz. 53 Nin tajweꞌn tzꞌiꞌlwij wutz chi jun akꞌunwil yi na akꞌuj tan yobiꞌn, quil tzitakꞌ amaꞌl tan toqueꞌn buchleꞌn.