Yi eꞌ cꞌulutxum, sjalok cyetz chibanl
26
1 ”Quil tziban teblal eꞌchk ryos yi banijt cuntuꞌ quitaneꞌn, nin quil tzilokꞌ wutz eꞌchk teblal junt ryos, nin quil tzꞌoc eꞌchk cꞌub itaꞌn chi wiꞌnink xanil, nka eꞌchk cꞌub yi seꞌij tuꞌ wutz. Quil cxmejeꞌ wok swutz eꞌchk takleꞌnaꞌtz tan takꞌleꞌn keꞌj, na yi in wetz in Jehová iRyosil.a 2 Banwok taneꞌn eꞌchk kꞌej tetz ujleꞌn yi bixbaꞌnt waꞌn. Akꞌwok kꞌej yi mantial tetz molbil ibaj kale najlchineꞌt. Na yi in wetz in Jehová iRyosil, yi na chincawun tziteꞌj.b 3 ”Yi kol cxom wok te eꞌchk incaꞌwl, nin kol tziban taneꞌn tircuꞌn yi na walnin tzitetz, 4 tzꞌopon tzun yi aꞌbaltz waꞌn te yi tiempil, nin tircuꞌn eꞌchk ujul swutzink. 5 Nin yi triw yi jepon itaꞌn xtxꞌajeꞌ yil tzꞌucuꞌl tiempil yi uva, nin yi uva xtxꞌajeꞌ jalen yil tzꞌoc junt tir yi cosech wi yi cojbil. Nin quil xquim wok tan weꞌj, nin tan yi na cxtzan wok tan banleꞌn taneꞌn eꞌchk incaꞌwl quil sotz icꞌuꞌl le itanum.c 6 Nin sjalok tzatzin paz le itanum, nin quil cxob wok yil cxwit, nin cxincoleꞌwok ẍchikꞌab yi eꞌ smaron txuc, nin quil wakꞌ amaꞌl scyetz yi eꞌ icontr tan oyintziꞌ tziteꞌj. 7 Cxcyekwok tan chilajeꞌn len eꞌ icontr, nin ẍchiquimok tircuꞌn itaꞌn tan spar. 8 Ntin oꞌ ntziꞌ ixoneꞌn cxcyek tan chilajeꞌn len jun cient icontr, nin yi jun cient itetz, chixcyek tan chilajeꞌn len lajuj mil icontr, nin tircuꞌn ẍchiquimoklen itaꞌn tan spar. 9 Wiꞌnin ẍchin tzatzink tziteꞌj, nin cxpucꞌunk waꞌn, nin jun cuꞌn nelpon cuꞌn te inyol yi insuknak tzitetz. 10 Nin cxwankwok te yi cosech triw yi colijeꞌt itaꞌn, nin tajweꞌn tan teleꞌn tzaj itaꞌn le cuꞌlbel, tan icolol yi wutz yi acꞌaj cosech.
11 ”Yi in wetz naꞌtok tziteꞌj, nin quil tzinxajslen wib tziteꞌj. 12 Nin cyakil nin tiemp ẍchinxonk tzixoꞌl. Nin nocopon tetz iRyosil. Nin yi axwok cxocopon tetz intanum.d 13 Na in iRyosil yi itajcawil yi ncxeꞌlsan tzaj jakꞌ chicaꞌwl yi eꞌ aj Egipto, tan quiꞌt itaꞌteꞌn tetz chiꞌesclaw. Nin ja el yi yucuꞌ waꞌn te ikul yi tzꞌamol itetz, nin ja wakꞌ ikꞌej.
Eꞌchk xtxolbil tan makleꞌn chiwutz yi eꞌ pajol caꞌwl
14 ”Ma jaluꞌ, ko quil cxoꞌc cꞌulutxum jakꞌ incaꞌwl, nin ko quil tziban taneꞌn eꞌchk xtxolbil yi ja wiꞌt wal, 15 ma na ko quil tzicujij eꞌchk inley nin kol cxoꞌcwok tan telseꞌn kꞌej eꞌchk incaꞌwl, nin ko quil tziban taneꞌn, qui tzun cxeꞌl cuꞌn wok te yi katrat. 16 Ko yaꞌtz tziban wok, je tzimbaneꞌj tziteꞌj: Chin xoꞌwbil nin sbneꞌ, cupon yaꞌbil yi sbiyonk, tzꞌeluꞌl ikꞌaꞌkl, ẍchiyobtok iwutz, nin quil jal iwalor, nin quiꞌc wutzil yi eꞌchk ujul sbneꞌ yil tzitawaj, na yi eꞌ icontr eꞌ scambank yi wutz icosech. 17 Nocopon contr tziteꞌj, nin yi eꞌ icontr chixcyek tziteꞌj, nin ẍchicawunk yi eꞌ yi wiꞌnin na chiꞌch chicꞌuꞌl tziteꞌj, nin cxelpon ojk ptzun cyaꞌlk jun xomij tan itzꞌamleꞌn.
18 ”Nin ko qui nin cxoꞌctz cꞌulutxum jakꞌ incaꞌwl, cxincawseꞌ jukt tir tampaj itil yi na ijuch. 19 Na itocsaj itib nim tu itajtzaꞌkl, poro tzinxiteꞌ cunin yi jun iyaꞌplaꞌtz, nin quiꞌt wakꞌ amaꞌl tan cweꞌn aꞌbal wiꞌak yi icojbil bantz quil wutzin itujul. 20 Nin yi itakꞌun tan chaꞌtz tuꞌ sbneꞌ, na quil wutzin, nin nchaꞌtz yi eꞌchk wiꞌ loꞌbaj quil jal jun tal ẍutuj wutz.
21 ”Nin ko qui nin tzꞌocopon incaꞌwl te iwiꞌ, nin iẍnin axwoktz tan pajleꞌn eꞌchk incaꞌwl, swakꞌeꞌ tzun jukt tir icaws, xomquen tuꞌ te ipajpal. 22 Swakꞌeꞌ amaꞌl tan cyoponeꞌn eꞌchk smaron txuc tan ibajseꞌn, nin ẍchibajk initxaꞌ cyaꞌn, nin chocopon tan chibajseꞌn eꞌchk itawun, nin chixcyek yi eꞌ txucaꞌtz tan chibiyleꞌn wiꞌnin wunak, nin quiꞌt jal mas ixoneꞌn tan xoꞌn lakak beꞌ.
23 ”Nin ko chin pajpuj nin axwok, nin chꞌinchꞌuj nin tunin axwok tan pajleꞌn eꞌchk incaꞌwl, 24 cxincawseꞌ jukt tir, tan eꞌchk itil yi na ijuch. 25 Nin copon jun chin wutzileꞌn oyintziꞌ waꞌn tzixoꞌl scyuchꞌ yi eꞌ icontr bantz wicyꞌsal incꞌuꞌl tziteꞌj, tampaj yi qui nin ncxeꞌl cuꞌn wok te katrat yi bnixnakt kaꞌn tzituchꞌ. Cxelpon ojkuj tan icolol itib leꞌak itanum, poro copon eꞌchk yaꞌbil waꞌn tzixoꞌl. Nchaꞌtz ncxben wok pres cyakꞌun yi eꞌ icontr.
26 ”Ej, nin yil tzaj yi iwaꞌ waꞌn, yi colij itaꞌn tan iwaneꞌn coboxt kꞌej teꞌj, lajuj cuꞌn xnaꞌn chocopon tan skꞌajseꞌn jun tal pam tul jun ntziꞌ tal chuj, nin piẍuꞌn cuꞌn sbneꞌ tziwutz, nin quil noj icꞌuꞌl taꞌn.
27 ”Ej, nin ko qui nin na ocopon inyol te iwiꞌ, nin chꞌinchꞌuj nin tunin axwok tan pajleꞌn incaꞌwl, 28 ẍchiꞌchok incꞌuꞌl tziteꞌj, nin cxincawseꞌ wok jukt tir yi nimteꞌn cuꞌn qꞌuixbel sbneꞌ, tan yi ipajpal. 29 Nin tan yi xtxolbilaꞌseꞌj, axwokteꞌn cxocopon tan chibajseꞌn initxaꞌ. 30 Nocopon tan xiteꞌn cuꞌn eꞌchk kꞌajbil yi na xcon itaꞌn tan cꞌuꞌlajeꞌn eꞌchk ryos. Nin cob cuntuꞌ chelpon eꞌchk patbil insens yi na xcon tzitetz. Nin yi iwankil yi quimnakt choꞌn jepon intenul tibaj chiwankil eꞌchk iryosil yi qui na chinachon. Tzinchajeꞌ tzuntz tzitetz yi qui na chimpekꞌ te itajtzaꞌkl. 31 Chin tzꞌinunin tuꞌ sbneꞌ itanum waꞌn. Nin tzinxiteꞌ eꞌchk icaꞌl kale na imolwit itib tan takꞌleꞌn kꞌej eꞌchk ryos. Nin quiꞌt chintzatzin te eꞌchk balaj insens yil tzitakꞌ swetz.
32 ”Sloꞌonk yi tnum waꞌn, nin yi eꞌ icontr yil chuꞌl tan najeweꞌn tul chelpon yab te yi squileꞌ. 33 Nin cxelpon xit waꞌn beneꞌn tziꞌn ẍchixoꞌlak eꞌchk tnum; nin nocopon tan ibiyleꞌn cuꞌn tan spar; nin yi itanum tzꞌocopon tetz jun amaꞌl yi tzꞌinunin tuꞌ yi chin xoꞌwbil nin. 34 Nin tan yi xtxolbilaꞌtz stzꞌujek yi txꞌotxꞌ, nin tzꞌelpon xel yi tiemp tziteꞌj yi qui nin mitakꞌ tan tujeweꞌn. Te yi tiemp yil cxaꞌtijwok tan najeweꞌn le chitanum eꞌ icontr, yaꞌstzun yi tiemp yi stzꞌujek yi txꞌotxꞌ. 35 Cyakil yi tiemp yil cyaj yi txꞌotxꞌ ẍchuc, yaꞌstzun yi xel yi tiemp yi qui nin mitakꞌ tan tujeweꞌn te yi atix tzaj wok swutz.
36 ”Nin yi axwok yil cxclax cyen ẍchikꞌab yi eꞌ icontr te yi atix ẍchixoꞌl, swakꞌeꞌ wiꞌnin xoꞌw tzitetz, nin cxelpon ojkuj tan tuꞌ yil tzibitnin yi na cutzaj txꞌakxuj jun tal xak xtzeꞌ, cxelpon ojkuj swutz, niꞌcuꞌn chi alk jun xomij wutz icoc tu spar tan ibiyleꞌn cuꞌn. Ej nin cxjepon trimp tan biꞌl nin ojkeꞌl. Poro cyaꞌl xomij tan itzꞌamleꞌn. 37 Nin ichucteꞌn tzibowleꞌ itib. Na niꞌcuꞌn chi najk icol itib tkꞌab jun chin wutzileꞌn oyintziꞌ, poro cyaꞌl jun xomij tan itzꞌamleꞌn. ¡Nin cyaꞌl nin jun tzitetz yi nink jal walor tan oyintziꞌ tu icontr! 38 Nin yi eꞌ mas tnum chocopon tan itelseꞌn cuꞌn swutz, nin xquimok wok cyakꞌun yi eꞌ icontraꞌtz. 39 Ej nin yi eꞌ yi quil chiquim le chitanum yi eꞌ icontraꞌtz, ẍchiquimok tampaj yi cyetz quil. Ẍchiquimok scyuchꞌ chitaj chitxuꞌ, na nchaꞌtz eꞌ, at len quil.
40 ”Ma yi eꞌ ixonl yil chixomtzaj, mpe nink chinachon te chipaj tu chipaj yi eꞌ chimam chiteꞌ, yi eꞌ yi oc tan contriꞌn sweꞌj tan yi cyajtzaꞌkl yi chin pajpuj nin,e 41 ilenin nocopon tan contriꞌn scyeꞌj, nin swakꞌeꞌ amaꞌl tan chibeneꞌn pres chikꞌab chicontr. Kalenaꞌs tzun chitxꞌixwok nin chichojeꞌ yi pajpal yi cyajtzaꞌkl. 42 Kalenaꞌs tzun tzꞌul txꞌakx yi trat tincꞌuꞌl, yi bnixnak waꞌn tu Jacowf, nin Isaacg, nin tu Abraham.h Ej nin nchaꞌtz tzꞌul txꞌakx yi txꞌotxꞌ tincꞌuꞌl yi sukiꞌnt waꞌn tzitetz. 43 Na yi txꞌotxꞌaꞌtz tzꞌujek tikꞌab. Nin tzatzin cuꞌn tzꞌujek yi cobox yobaꞌtz yi qui nin mitakꞌ ujleꞌn tetz, na quibix axwok sbneꞌ tan akꞌun swutz. Na yaꞌs tzun icaws, tan paj yi qui nin mitakꞌ kꞌej eꞌchk incaꞌwl tu eꞌchk inley, na qui nin ixomwok tan banleꞌn taneꞌn.
44 ”Nin te yi na itijwok cyakil eꞌchk cawsaꞌtz, le chi amaꞌl yi eꞌ icontr, quil cxeꞌlwok te incꞌuꞌl junawes, nin quil cxeꞌl wok cuꞌn waꞌn swutz junawes, na quil tzꞌel yi trat te incꞌuꞌl yi mbnixnak waꞌn skaxoꞌl, scyuchꞌ yi eꞌ imam iteꞌ, na yi in wetz in Jehová, yi iRyosil. 45 Ma na chuꞌl txꞌakx eꞌ tincꞌuꞌl tan paj yi trat yi mbnixnak waꞌn scyuchꞌ, yi cyeleꞌn tzaj waꞌn Egipto, ẍchiwutz jun cꞌoloj nación, tan woqueꞌn tetz chiRyosil. Na in Jehová iRyosil.”i
46 Yaꞌstzun yi eꞌchk ley tu eꞌchk caꞌwl, tu eꞌchk chusuꞌn, yi cyaj tlol Kataj Ryos tetz Moisés wi wutz Sinaí, tan xtxolil scyetz yi eꞌ xonl Israel.