Eꞌchk takleꞌn yi wiꞌnin xanil swutz Ryos
27
1 Ej, nintzun jilon tzaj junt tir Kataj Ryos tetz Moisés tan talcheꞌn:2 “Txolnin yi eꞌchk xtxolbileꞌj scyetz yi eꞌ atanum yi eꞌ xonl Israel: Alchok scyetz yi na taj ẍchoj yi jamel tan colpeꞌn jun wunak nka jun eꞌchk takleꞌn yi sukij swetz, je yi pwok yi tajweꞌn tan ẍchojleꞌn swetz tan colpeneꞌl tzaj tkꞌab yi yol yi nsuk swetz: 3 Ko iꞌtz jun yaj yi at tul junak yob jalen ox cꞌal yob yi jamel iꞌtz nicyꞌ cient piẍ sakal. Xom quen tuꞌ te yi walor yi jilwutz pwok yi na xcon le mantial tetz molbil ibaj. 4 Ma ko iꞌtz jun xnaꞌn yi nsukij swetz, yi jamel iꞌ iꞌtz, junaklaj piẍ sakal. 5 Ma scyetz yi eꞌ wunak yi ateꞌ tul oꞌ yob jalen junak yob yi nsukij swetz, yi chijamel iꞌtz junak piẍ sakal yi ko iꞌtz yaj, ma ko iꞌtz xnaꞌn, lajuj ntziꞌ tzuntz. 6 Ma scyetz yi eꞌ nitxaꞌ tan jun xaw jalen oꞌ yob, yi chijamel iꞌtz oꞌ ntziꞌ piẍ sakal ko iꞌtz xicy, ma ko xun ox ntziꞌ tzuntz. 7 Ma scyetz yi eꞌ yi ja tzꞌak ox cꞌal yob cyaꞌn, oꞌlaj tzun piẍ sakaltz, scyetz yi eꞌ yaj, nin lajuj scyetz yi eꞌ xnaꞌn. 8 Ma ko chin meꞌbaꞌ nin jun wunak, tan ẍchojleꞌn yi pwok yi bixbaꞌnt, tajweꞌn tzun tzꞌopontz tan yol tetz yi paleꞌ, tan tbiteꞌn yi nicyꞌnaꞌ ẍchojeꞌ, xomquen tuꞌ te yi walor yi jun yi sukin yi yol.
9 ”Ma jaluꞌ, yi ko iꞌtz jun awun yi sukiꞌnt swetz, quiꞌc tzun rmeriltz tan xiteꞌn yi jun trataꞌtz, na ja wiꞌt xansij. 10 Nin quiꞌc cuj tan jeꞌn txꞌexuꞌn tu junt awun. Quiꞌc na ban ko chin baꞌnt cunin, nka ajnakt tzaj cunin. Ma ko na txꞌeꞌxij jun awunaꞌtz yi sukiꞌnt, chicabil tzuntz na chixansija, yi jun yi at nintz, tu yi xel yi mopon oyiꞌn.
11 ”Ma ko iꞌtz jun txuc yi nkꞌeꞌtz xansaꞌnt, yi quiꞌc cuj tan toyeꞌn tetz Ryos, tajweꞌn tzuntz tan beneꞌn ticyꞌleꞌn yi jun awunaꞌtz swutz yi paleꞌ, 12 nin yi paleꞌ tzꞌaꞌlonk tzaj yi nicyꞌnaꞌ jamel yi jun txucaꞌtz. Nin yi jamelil yi na bixeꞌ tan yi paleꞌ, tajweꞌn tan cujil yi taw yi awun. 13 Nin ko na aꞌwij tan tajeꞌn junt tir yi awun, tajweꞌn tzuntz tan ẍchojol yi jamel yi bixbaꞌnt, tuml jun mult, yi iꞌtz jun part te oꞌ piẍ yi jamel yi awunaꞌtz.
14 ”Ko at jun yil suk yi caꞌl swetz, yi paleꞌ bixbank yi walor yi caꞌl, xomquen tuꞌ te yi balajil yi caꞌl, nin yi walor yi na bixbaj yi paleꞌ, tajweꞌn yil cuꞌ swutz yi taw caꞌl. 15 Ma jaluꞌ, ko na taj yi taw tan colpeꞌn junt tir yi caꞌl, tajweꞌn tzuntz tan ẍchojol yi walor yi caꞌl tuml jun part te yi oꞌ piẍ yi jamel yi caꞌl yi bixbaꞌnt tan yi paleꞌ, spakxok tzun junt tir yi caꞌl tkꞌab.
16 ”Ko at jun ja suk jun piẍ cojbil swetz, yi walor yi jun piẍ cojbilaꞌtz choꞌn xomok te yi nicyꞌnaꞌ cosech na jeꞌ swutz, yi walor iꞌtz nicyꞌ cient piẍ sakal te cyakil caꞌwunak cient tu caꞌwunak liwr cebada yi na jeꞌ swutz. 17 Nin kol suk yi txꞌotxꞌ tul yi yob yi na biꞌaj jubileo, tajweꞌn tan ẍchojleꞌn yi jamel cawal. 18 Poro kol suk swetz te nsken wiꞌt icyꞌ yi jun yobaꞌtz yi na biꞌaj jubileo, quiꞌc mas jamel sbneꞌ. Choꞌn xomok te jatnaꞌ yob na taj tan jeꞌn poneꞌn te yi jun yob tetz jubileo.
19 ”Ma na ko na taj yi taw yil pakxij junt tir yi xtxꞌotxꞌ tkꞌab, tajweꞌn tan ẍchojol yi walor yi txꞌotxꞌ tuml jun part te oꞌ piẍ yi jamel. Stetzajeꞌ tzun junt tir yi txꞌotxꞌ. 20 Poro ko quil cambaj yi txꞌotxꞌ, nin lben cꞌaꞌy tetz junt wunak, quiꞌct tzun cuj tan cambal junt tir yi txꞌotxꞌ. 21 Nin yil jepon yi jun yob yi na biꞌaj jubileo, quiꞌc jun taw sbneꞌ, ma na ntin in, nin yi paleꞌ iꞌ tzꞌocopon tan qꞌuicyꞌleꞌn yi txꞌotxꞌaꞌtz.
22 ”Ko at jun ltakꞌ jun piẍ txꞌotxꞌ swetz yi ja lokꞌ, nin nkꞌeꞌtz herens yi at tkꞌab, cyakꞌun taj, 23 stileꞌ yi paleꞌ nicyꞌnaꞌ jamel sbneꞌ jalen yil jepon yi jun yob jubileo. Nin te iteꞌn nin kꞌejaꞌtz na taj ẍchojleꞌn. 24 Ma yil tzꞌopon yi jun yob jubileo, spakxok tzun junt tir yi txꞌotxꞌ tkꞌab yi mero taw banak.
25 ”Tircuꞌn jamel eꞌchk takleꞌn tajweꞌn yi choꞌn lxom te yi jun jilwutz pwok yi na xcon le yi mantial tetz molbil ibaj.
26 ”Ma jaluꞌ, je xtxolbileꞌj scye yi awun yi bajx na chitzꞌij.b Yi eꞌaꞌs yi bajx na chitzꞌij wetz sbneꞌ, quiꞌc rmeril tan sukeꞌn swetz, na bixbaꞌnt waꞌn yi wetz sbneꞌ. Quiꞌc na ban ko iꞌtz jun tal wacẍ, nka jun tal neꞌẍ cneꞌr, wetz sbneꞌ. 27 Ma jaluꞌ, ko iꞌtz bajx tal jun txuc yi xan kol bajsij, baꞌn colpij. Ntin na taj ẍchojleꞌn yi jamel yi na bixeꞌ tan yi paleꞌ, tuml jun mult yi iꞌtz jun part te oꞌ piẍ yi jamel yi jun txucaꞌtz. Poro ko quil jeꞌ colpiꞌn, baꞌn lben cꞌaꞌy tan yi paleꞌ chi yi jamel yi ja wiꞌt bixeꞌ.
28 ”Ko at jun yi ja wiꞌt suk yi meꞌbiꞌl swetz, quiꞌc na ban ko iꞌtz wunak, tawun, nka jalaj txꞌotxꞌ yi yaꞌstzun yi herens yi ncyaj chikꞌol yi eꞌ taj xtxuꞌ. Quiꞌc cuj tan beneꞌn cꞌaꞌy, nin quiꞌc rmeril tan cambeꞌn junt tir na yaꞌstzun xac yi ja akꞌlij swetz, nin wiꞌnin xanil tzinwutz.c 29 Nin nchaꞌtz quiꞌc cuj tan colpeꞌn jun wunak yi sukiꞌnt swetz, ma na tajweꞌn tan quimeꞌn.
30 ”Yi lajujiꞌn piẍ te yi eꞌchk cosech yi na jeꞌ wi yi cojbil, tu yi wutz eꞌchk tzeꞌ iꞌtz wetz. 31 Ma ko at jun na taj tan colpeꞌn muꞌẍ te yi lajujiꞌn piẍaꞌtz, tajweꞌn tan ẍchojol yi jamel tuml oꞌiꞌn part te tircuꞌn yi jamel.
32 ”Jun te yi lajuj awun, tajweꞌn tan takꞌleꞌn swetz, na yaꞌstzun yi lajujiꞌn part, 33 nin quiꞌc cuj tan takꞌleꞌn junt xel yi baꞌnt cuꞌn, nka ploj muꞌẍ tal. Nin kol jeꞌ txꞌexuꞌn jun awun, chicabil tzuntz ẍchicyajk tetz wetz, nin quiꞌc cuj tan chicolpeꞌn.”d
34 Yaꞌstzun yi eꞌchk caꞌwl yi takꞌ Kataj Ryos tetz Moisés wi yi wutz yi na biꞌaj Sinaí, tan xtxolil scyetz yi eꞌ tetz tanum, yi eꞌ xonl Israel.