Yi toqueꞌn xanseꞌn yi caꞌl Ryos yi mantial
40
1 Itzun bantz nintzun jilont Ryos tetz Moisés. Nintzun taltz:2 “Tul yi bajx kꞌej, tetz yi bajx xaw tetz yi yoba tajweꞌn tan awekol yi mantial, na iꞌtz yi amaꞌl kale na kacꞌulwit kib tzituchꞌ wok yi axwok xonl Israel. 3 Yil wekxij yi mantialaꞌtz baꞌn tzun tzꞌoc yi caẍaꞌ kale atit quiwel katrat tul yi mantialaꞌtz, nin baꞌn je jun xbuꞌk te yi amaꞌl tan jopleꞌn. 4 Nin baꞌn tzꞌoc yi mes awaꞌn xe yi mantial, nin baꞌn tzꞌoc yi jun chin wutzileꞌn cantil, nin baꞌn cheꞌ aban cyakil yi eꞌchk neꞌẍ txekbil teꞌj. Nchaꞌtz na taj nucꞌleꞌn yi mes. 5 Nchaꞌtz baꞌn tzꞌoc yi patbil insens yi oro cuꞌn tul yi mantial. Baꞌn tzꞌoc awaꞌn swutz yi xbuꞌk yi at swutz caẍaꞌ kale atit quiwel katrat. Nin baꞌn tzꞌoc yi xbuꞌk yi xconk tetz yi puertil yi mantial. 6 Ma yi patbil txꞌixwatz, baꞌn tzꞌoc awaꞌn swutz yi puertil yi mantial kale na kacꞌulwit kib tzituchꞌ yi axwok xonl Israel. 7 Nchaꞌtz yi jun chin wutzileꞌn plancan, oken txoꞌl yi mantial tu yi patbil txꞌixwatz nin baꞌn tzanojscuꞌn tan aꞌ. 8 Nin baꞌn tzawek yi peꞌm solteꞌj yi mantial. Ej nin baꞌn tzꞌoc yi xbuꞌk yi xconk tetz puertil.
9 ”Ej nin yil bnix, baꞌn tzun tzacyꞌaj tzaj muꞌẍ aceit, yi aceit yi na xcon tan xanseꞌn jun takleꞌn. Ej nin baꞌn tzachit nin tibaj yi mantial, nin tibaj cyakil yi eꞌchk maꞌcl yi at xe yi mantial. Tan yi xtxolbilaꞌseꞌj tzaxanseꞌ yi mantial tu cyakil yi eꞌchk maꞌcl yi at xeꞌ. Chin xan nin sbneꞌ cyakil. 10 Nchaꞌtz tzꞌan yi patbil txꞌixwatz, baꞌn tzachit nin yi aceit tibaj tan xanseꞌn. Nchaꞌtz tzꞌan yi eꞌchk maꞌcl yi na xcon teꞌj. Tan yi xtxolbilaꞌtz tzaxanseꞌ yi jun altaraꞌtz, nin tzꞌocopon tetz jun patbil itxꞌixwatz yi chin xan nin. 11 Nchaꞌtz tzawulej yi jun chin wutzileꞌn plancan tu yi xeꞌ. Baꞌn tzaxansaj. Tzꞌit nin yi aceit teꞌj tan xanseꞌn,” stzun Ryos tetz Moisés.
12 Nchaꞌtz tal Ryos: “Baꞌn tzacyꞌaj nin Aarón scyuchꞌ yi eꞌ cyꞌajl stziꞌ yi puertil yi amaꞌl kale na kacꞌulwit kib tzituchꞌ yi axwok xonl Israel. Ej nin alaj scyetz tan chicweꞌn tan jichiꞌn. 13 Nin baꞌn tzawal tetz Aarón tan toqueꞌn yi balaj beꞌch tetz teꞌj, tetz paleꞌ. Nin baꞌn tzatzꞌitnin aceit teꞌj tan xanseꞌn, na tajweꞌn tan xanseꞌn iꞌ tan toqueꞌn tetz paleꞌ tzinwutz. 14 Nchaꞌtz cheꞌ awulej yi eꞌ cyꞌajl. Baꞌn chopon awaꞌn swutz yi mantial nin ok yi beꞌch cyetz yi chemij. 15 Nin baꞌn tzatzꞌitnin aceit scyeꞌj chi yi maban teꞌj Aarón. Banaj yi xtxolbilaꞌtz tan cyoqueꞌn tetz paleꞌ tzinwutz. Na tan yi aceit yi tzꞌocopon tzꞌituꞌn scyeꞌj chocopon tetz paleꞌ tzinwutz, sbneꞌ opon tunintz,” stzun Ryos bantz tetz Moisés.
16 Toqueꞌn tzun Moisés tan banleꞌn cyakil yi xtxolbil yi tal Ryos tetz iꞌ. 17 Yaꞌstzun ban tul yi caꞌp yob yi cyenleꞌn tzaj yi eꞌ xonl Israel Egipto. Nin tul yi bajx kꞌej tetz yi bajx xaw tetz yi yobaꞌtz, yaꞌstzun toqueꞌn wekleꞌn mantial yi xcon tetz yi caꞌl Ryos. 18 Toqueꞌn tzun Moisés tan banleꞌn, nin tan wekleꞌn yi mantialaꞌtz. Cuꞌ yi xeꞌ yi eꞌchk tkan. Nchaꞌtz oc yi eꞌchk tablón tu yi eꞌchk kꞌaꞌjil nin oc yi eꞌchk tkan yi xcon teꞌj. 19 Nin nchaꞌtz jeꞌ tkꞌol Moisés yi eꞌchk xbuꞌk yi xcon tetz paꞌtbil. Choꞌn jeꞌn tkꞌol tibaj yi cajonil yi mantial. Jeꞌn tzun tkꞌol iꞌ yi eꞌchk xbuꞌkaꞌtz tibaj yi cajonilaꞌtz chi alijt tan Ryos tetz.
20 Nchaꞌtz oc Moisés tan takꞌleꞌn cuꞌn yi cob lepaj cꞌub kale atit yi caꞌwl Ryos. Choꞌn tzun cweꞌn tkꞌol tul yi caẍaꞌ nin oc tkꞌol yi eꞌchk kꞌaꞌj te yi caẍaꞌaꞌtz. 21 Nin chaꞌtz jeꞌ tkꞌol Moisés yi jopsel tibaj yi caẍaꞌaꞌtz. Nin yi wiꞌt bnixeꞌn, nintzun oc taꞌn xeꞌ yi mantial nin jeꞌ ẍchꞌimbal yi xbuꞌk yi xcon tan jopleꞌn yi caẍaꞌ chi yi alijt tan Ryos tetz.
22 Nchaꞌtz oc yi mes taꞌn. Choꞌn tzun toqueꞌn cyen tul yi mantial nka yi amaꞌl kale na chicꞌulwit quib Ryos scyuchꞌ yi eꞌ xonl Israel. Choꞌn tzun cyajeꞌn cyen xlajeꞌn yi puert poro tcꞌuꞌl, nin solteꞌjeꞌl tzaj yi xbuꞌk yi nxcon tan jopleꞌn yi amaꞌl yi wiꞌnin xanil. 23 Ej nin tibaj yi jun mesaꞌtz jeꞌ tkꞌol Moisés yi pam yi ncyaj cyen swutz Ryos, chi alijt taꞌn.
24 Ma yi jun chin wutzileꞌn cantil, choꞌn toqueꞌn taꞌn xlaj cuꞌn yi puert. 25 Yi wiꞌt toqueꞌn yi jun cantilaꞌtz, nintzun oc tkꞌol Moisés kꞌaꞌkl yi eꞌchk tal neꞌẍ txekbil yi at teꞌj. Oc tkꞌol kꞌaꞌkl nin cyaj cyen swutz Ryos chi alijt taꞌn.
26 Ma yi patbil insens yi oro cuꞌn, choꞌn tzun toqueꞌn tul yi amaꞌl kale na chicꞌulwit quib Ryos scyuchꞌ yi eꞌ xonl Israel, nin choꞌn cyajeꞌn cyen swutz yi xbuꞌk tcꞌuꞌl cyen. 27 Toqueꞌn tzun iꞌ-tz tan pateꞌn yi insens yi wiꞌnin cꞌoꞌcal chi alijt tan Ryos tetz.
28 Nchaꞌtz oc Moisés tan tocseꞌn yi eꞌchk xbuꞌk yi xcon te yi puertil yi mantial. 29 Ej nin nchaꞌtz oc tkꞌol Moisés yi patbil txꞌixwatz swutz yi puertil yi mantial. Toqueꞌn tzun Moisés tan pateꞌn yi chitxꞌixwatz. Oc iꞌ tan pateꞌn yi eꞌchk txuc tu jarin nin aceit, chi alijt tan Ryos tetz.
30 Nchaꞌtz ban yi jun chin wutzileꞌn plancan, choꞌn tzun cyajeꞌn cyen txoꞌl yi patbil txꞌixwatz tu yi amaꞌl kale na chicꞌul wit quib Ryos scyuchꞌ yi eꞌ xonl Israel. Cweꞌn tzun nojsal Moisés tan aꞌ. 31 Choꞌn tzun na jetzaj aꞌ yi na xcon tan xtxꞌajleꞌn chikꞌab tu quikan Moisés tu Aarón scyuchꞌ yi eꞌ cyꞌajl Aarón. 32 Na ilenin na chitxꞌaj chikꞌab tu quikan yi na choꞌc tan banleꞌn chimunl xe yi mantial, ej nin yi na chocopon te yi patbil txꞌixwatz. Yaꞌstzun na cyulejtz, na yaꞌstzun alijt tan Ryos tetz Moisés.
33 Wiꞌtzbil tlen oc Moisés tan tocseꞌn yi xbuꞌk solteꞌj yi mantial tu yi patbil txꞌixwatz. Nin oc yi xbuꞌk yi xcon tetz puertil yi peꞌm. Yaꞌstzun bnixeꞌn yi wiꞌtzbil akꞌun tan Moisés.
Yi jun bocꞌoj sbakꞌ yi aꞌtij tibaj yi amaꞌl kale na chicꞌul wit quib Ryos scyuchꞌ yi eꞌ xonl Israel
34 Yi wiꞌt bnixeꞌn cyakil yi mantial, nintzun cuꞌul jun bocꞌoj sbakꞌ tibaj. Ej nin noj cyakil yi mantial tan yi kꞌej tu pakꞌpuchal Ryos. 35 Quiꞌc tzun rmeril tan toqueꞌn Moisés tul yi amaꞌlaꞌtz tan paj yi sbakꞌ yi ncuꞌul, nin tan paj yi kꞌej tu pakꞌpuchal Ryos yi at. 36 Te cyakil yi tiemp yi nchixon yi eꞌ xonl Israel, qui nin chicyꞌ tul junt amaꞌl jalen yi na jeꞌ yi jun bocꞌoj sbakꞌaꞌtz yi at tibaj yi mantial. Yi na jeꞌ yi sbakꞌ kalenaꞌs tzun na choꞌc tan molcheꞌn beꞌch cyetz tan quicyꞌeꞌn. 37 Poro ko qui na jeꞌ yi sbakꞌ, nchaꞌtz yi eꞌ xonl Israel qui na chicyꞌ. 38 Nin te cyakil yi chibeꞌ yi eꞌ xonl Israel, ja quil yi jun bocꞌoj sbakꞌaꞌtz tibaj yi mantial. Chajkꞌej choꞌn at yi sbakꞌaꞌtz tibaj yi caꞌl. Ma lakꞌbal na oc tetz jun bocꞌoj kꞌakꞌ yi na aꞌtij tibaj yi jun mantialaꞌtz.