Yi beꞌch cyetz yi eꞌ paleꞌ
39
1 Yi toqueꞌn banleꞌn yi eꞌchk beꞌch cyetz yi eꞌ paleꞌ yi eꞌ xcon xe yi mantial, xcon yi eꞌchk nokꞌ yi txib yubil tu xkꞌaykꞌuj nin cyak. Nchaꞌtz bnix yi balaj beꞌch tetz Aarón, chi yi tal Ryos tetz Moisés.2 Yi toqueꞌn banleꞌn yi lantar xcon yi oro tu yi nokꞌ yi txib yubil tu xkꞌaykꞌuj nin cyak. Cyakil yi nokꞌaꞌtz iꞌtz balaj lino, yi bakꞌuꞌn wutz. 3 Oc xtxakꞌleꞌn yi oro tan martiy tan teleꞌn yi wutz. Ej nin eꞌ baj oc tan xtxꞌilcheꞌn cuꞌn tan toqueꞌn tetz nokꞌ. Ma yi toqueꞌn chi taneꞌn nokꞌ, nintzun oc ẍchemleꞌn xoꞌl yi lino yi txib yubil yi sak tu xkꞌaykꞌuj nin cyak. 4 Nin oc cob ganchil wi xulchub tan stzꞌamleꞌn yi lantaraꞌtz. 5 Ej nin chaꞌtz, bnix yi cꞌalbil yi tzꞌocopon tan cꞌalcheꞌn yi jun lantaraꞌtz. Choꞌn nin ban yi bambil tetz chi yi lantar, na xcon yi oro tan banleꞌn tu yi balaj lino yi bakꞌuꞌn wutz tu yi txib yubil tu xkꞌaykꞌuj nin cyak. Bnix yi jun lantaraꞌtz, chi yi tal Ryos tetz Moisés.
6 Ma yi cob neꞌẍ cꞌub yi ónice choꞌn toqueꞌn wi jun tzꞌambil tetz yi oro cuꞌn. Ej nin swutz yi cob neꞌẍ cꞌubaꞌtz oc chibiꞌ yi coblaj kꞌuꞌj xonl Israel. Ej nin choꞌn cuꞌn ban chi taneꞌn jun sey. 7 Yi bnixeꞌn nintzun oc tkꞌol Bezaleel tibaj yi cob ganch tetz yi jun lantaraꞌtz. Nin yi xac yi eꞌchk neꞌẍ cꞌubaꞌtz iꞌtz tan chinaꞌwseꞌn yi eꞌ xonl Israel swutz Ryos, chi yi tal Ryos tetz Moisés.
8 Ma yi jun tal neꞌẍ xbuꞌk yi oc wutz cꞌuꞌl, bnix chi yi ban yi lantar. Xcon oro teꞌj, nin xcon yi nokꞌ yi txib yubil tu xkꞌaykꞌuj, tu yi cyak. Cyakil yi nokꞌaꞌtz iꞌtz lino cuꞌn yi bakꞌuꞌn wutz. 9 Pakwutziꞌn ban nin cyaj xtxꞌuꞌcnakiꞌn ban cyentz. Junak cob centimetr ban yi jalajchak xlaj. 10 Ej nin te yi jun neꞌẍ xbuꞌkaꞌtz oc cyaj txol tal neꞌẍ balaj cꞌub yi wiꞌnin na yub. Te yi bajx txol oc jun tal neꞌẍ balaj cꞌub yi rubí nin oc jun crisólito, nin jun esmeralda. 11 Ma te yi caꞌp txol oc jun granate jun zafiro nin jun jade. 12 Ma te yi toxiꞌn txol oc jun jacinto, jun ágata nin jun amatista. 13 Ma te yi cyajiꞌn txol oc jun topacio jun cornalina nin jun jaspe. Cyakil yi eꞌchk tal neꞌẍ cꞌubaꞌtz tzꞌamij tan oro. 14 Coblaj neꞌẍ cꞌub xcon, na xomcyen tuꞌ te yi coblaj kꞌuꞌj xonl Israel. Te yi jujun tal neꞌẍ cꞌub at cyen yi jujun chibiꞌ yi jun kꞌuꞌj xonl Israelaꞌtz. Choꞌn taneꞌn chibiꞌ chi taneꞌn cyen te jun sey.
15 Nin tan stzꞌamleꞌn yi jun tal neꞌẍ xbuꞌkaꞌtz bnix cob caren yi oro cuꞌn ban nin bakꞌuꞌn ban wutz. 16 Nchaꞌtz bnix cob stzꞌambil tetz yi oro cuꞌn nin bnix cob argoy yi oro cuꞌn ban. Choꞌn tzun toqueꞌn yi cob argoyaꞌtz yi oro cuꞌn stziꞌ yi jalaj xlaj yi at twiꞌeꞌn yi neꞌẍ xbuꞌkaꞌtz. 17 Nin yi eꞌchk caren choꞌn toqueꞌn te yi eꞌchk argoyaꞌtz. 18 Ma yi juꞌ yi cob carenaꞌtz choꞌn toqueꞌn te yi cob stzꞌambil tetz yi at wi xulchub, nin choꞌn toqueꞌn cꞌalij te lantar. 19 Ej nin nchaꞌtz bnix cobt argoy. Nintzun oc wutz coc, xtxꞌuꞌc cuꞌn tzaj yi jun tal neꞌẍ xbuꞌkaꞌtz, poro wutz coc kale na tokꞌbeꞌt tib tu yi lantar. 20 Nchaꞌtz bnix cobt argoy yi oro cuꞌn, choꞌn tzun toqueꞌn tzꞌisij te yi lantar yi at swutz, poro choꞌn cyajeꞌn cyen nakaꞌjil yi stzꞌisbil kale na icyꞌeꞌt yi cꞌalbil tetz yi lantar. 21 Cweꞌn tzun cꞌalij yi cob argoyaꞌtz yi at sjuꞌak yi tal neꞌẍ xbuꞌk, yi tzꞌocopon wutz cꞌuꞌl yi paleꞌ, tu yi argoy yi at te yi lantar, tan jun cꞌalbil yi txib yubil. Choꞌn tzun cyajeꞌn cyen yi jun tal neꞌẍ xbuꞌk swutz yi lantar, nin tibeꞌn tzaj muꞌẍ tal yi cꞌalbil yi lantaraꞌtz. Nin junawes cyajeꞌn cyentz. Ja bnix cyakil chi yi tal Ryos tetz Moisés.
22 Nchaꞌtz bnix yi xbuꞌk yi cyaj cyen jakꞌ yi lantar. Txib cuꞌn ban yubil. 23 Ma yi kul, nintzun je cꞌapluꞌn chi na ban jun colbaj. Nin yi stziꞌak yi kul, nintzun oc baltzꞌeꞌn tan qui katzeꞌn. 24 Baj oc len yubil stziꞌak yi jun xbuꞌkaꞌtz. Oc eꞌchk yubil yi wolojiꞌn ban, tan yi nokꞌ lino yi bakꞌuꞌn wutz tu yi txib yubil tu xkꞌaykꞌuj nin cyak. 25 Ej nin nchaꞌtz bnix eꞌchk tal neꞌẍ cumpanuꞌ yi oro cuꞌn ban. Nin octz cyakꞌun stziꞌak tircuꞌn. 26 Jun tzun woloj nokꞌ oc nin jun tal neꞌẍ cumpanuꞌ octz stziꞌak cyakil yi xbuꞌkaꞌtz. Yi jun xbuꞌkaꞌtz xcon tetz yi paleꞌ yi na oc tan banleꞌn yi munl swutz Ryos xe yi mantial. Bnix cyakil, chi yi tal Ryos tetz Moisés.
27 Nchaꞌtz bnix yi xbuꞌk yi chitpun nintuꞌ tan balaj lino.a Chemij ban tan jun wiꞌtz chemol. Iteꞌn nin banaꞌtz beꞌch cyetz yi eꞌ cyꞌajl Aarón. 28 Nin nchaꞌtz ban yi xbuꞌk yi jepon te chiwiꞌ tu yi yubil lino cuꞌn ban. Ej nin ja bnix eꞌchk neꞌẍ wex tan balaj lino yi tzꞌocopon scyeꞌj tan teweꞌn yi chiwankil. 29 Ma yi cꞌalbil ja bnix tan nokꞌ lino yi bakꞌuꞌn wutz tu yi txib yubil tu xkꞌaykꞌuj nin cyak. Chemij tzun ban nin chin cꞌotij cunin cyulej. Bnix cyakil chi yi tal Ryos tetz Moisés.
30 Nin nchaꞌtz bnix yi jun neꞌẍ placa yi oro cuꞌn yi xcon tan ẍchajleꞌn yi xansaꞌnt iꞌ tetz paleꞌ. Bnix chi na ban banleꞌn jun sey. Je yi yoleꞌj yi oc swutz: “Xansaꞌnchoꞌt tetz Jehová yi kajcawil”. 31 Yi bnixeꞌn, nintzun oc chicꞌalol tan jun cꞌalbil yi txib yubil, kalenaꞌtz tzun toqueꞌn te yi xbuꞌk yi jepon te wiꞌ. Bnix chi yi tal Ryos tetz Moisés.
Yi bnixeꞌn yi mantial
32 Bnixeꞌn tzun yi caꞌl Ryos, yi mantial kale na chicꞌulwit quib Ryos scyuchꞌ yi eꞌ xonl Israel. Bnix yi jun caꞌlaꞌtz, chi yi tal Ryos tetz Moisés. 33 Yi bnixeꞌn tircuꞌn cyakꞌun yi akꞌunwil, nintzun eꞌ jatx tetz Moisés. Nchaꞌtz eꞌ jatx cyakil yi eꞌchk maꞌcl, chi taneꞌn yi staqui, tu yi eꞌchk tzꞌlum, tu yi eꞌchk kꞌaꞌj, tu yi tkan caꞌl, tu cyakil eꞌchk xeꞌ tkan caꞌl. 34 Nin chaꞌtz eꞌ jatx yi stzꞌuml cneꞌr yi ocnak yi stzꞌacl yi cyak yubil, yi xconk tan jopleꞌn yi wiꞌ mantial, tu yi balaj stzꞌuml txuc, nin yi xbuꞌk yi xcon tan jatxleꞌn xoꞌl yi amaꞌl yi chin xan nin. 35 Nchaꞌtz eꞌ jatx yi caẍaꞌ kale atit yi caꞌwl Ryos tuml tetz kꞌaꞌjil, nin nchaꞌtz yi jopsel yi na xcon tan jopleꞌn yi caẍaꞌaꞌtz. 36 Nchaꞌtz eꞌ jatx yi mes tu yi eꞌchk maꞌcl yi xconk teꞌj tu yi pam yi xansaꞌnt tetz Ryos. 37 Nchaꞌtz eꞌ jatx yi jun wutzileꞌn cantil yi oro cuꞌn, tircuꞌn tuml cyakil yi eꞌchk neꞌẍ txekbil yi at teꞌj, tu cyakil yi eꞌchk mas maꞌcl yi xconk teꞌj, tuml yi aceit yi xconk tetz yi txekbilaꞌtz. 38 Nin nchaꞌtz eꞌ jatx yi patbil insens yi oro cuꞌn, tu yi aceit yi xconk tan xanseꞌn jun takleꞌn, nin yi insens yi wiꞌnin cꞌoꞌcal, tu yi xbuꞌk yi xcon tetz yi puertil yi mantial kale na chicꞌulwit quib Ryos scyuchꞌ yi eꞌ xonl Israel. 39 Nchaꞌtz eꞌ jatx yi patbil txꞌixwatz tu yi pariyil yi brons cuꞌn, tu cyakil yi kꞌaꞌjil nin cyakil yi eꞌchk maꞌcl yi xcon teꞌj. Nchaꞌtz yi jun chin wutzileꞌn plancan tu cyakil yi xeꞌ. 40 Nchaꞌtz eꞌ jatx yi eꞌchk xbuꞌk yi xconk tetz yi peꞌmil yi mantial, tu yi eꞌchk tkan peꞌm, tu eꞌchk xeꞌ tkan peꞌmaꞌtz. Nchaꞌtz yi xbuꞌk yi xconk tetz yi puertil yi peꞌm, tu eꞌchk akwil yi xconk tan cꞌalcheꞌn, tu cyakil eꞌchk estaque. Cyakil yi eꞌchk maꞌclaꞌtz yi xconk xe yi caꞌl Ryos, eꞌ jatx tkꞌab Moisés. 41 Nchaꞌtz eꞌ jatx yi beꞌch cyetz yi eꞌ yi chixconk xe yi mantial. Akꞌlij yi balaj beꞌch tetz yi paleꞌ Aarón. Nchaꞌtz akꞌlij yi beꞌch cyetz yi eꞌ cyꞌajl Aarón.
42 Bnixeꞌn tzun cyakil yi akꞌunaꞌtz cyakꞌun yi eꞌ xonl Israel, chi yi tal Ryos tetz Moisés.
43 Itzun bantz yi tilol Moisés yi baꞌn mban cyakꞌun yi eꞌ xonl Israel, chi yi tal Ryos tetz, tkꞌol tzun iꞌ yi banl squibaj yi eꞌ xonl Israel.