Génesis i

GÉNESIS

Txꞌolbil Xoꞌl Yi Liwreꞌj

Yi yol Génesis na elepont “xeꞌtzbil” le ketz kayol. Ej nin yaꞌstzun yi bajx liwr yi na jal kaꞌn tul yi Bíblia. Yi chusuꞌn yi na jal kaꞌn tul cyakil yi liwr iꞌtz yi Kataj Ryos, iꞌ xtxumul tetz cyakil yi eꞌchk takleꞌn yi at. Nin nchaꞌtz na xtxol yi ocnak Ryos tan chicawseꞌn yi eꞌ pajol caꞌwl. Poro nchaꞌtz na xtxol yi ocnak Ryos tan chiqꞌuicyꞌleꞌn yi eꞌ yi na chipekꞌ tan banlen taneꞌn tetz caꞌwl.

Yi Weklil Yi Liwreꞌj

Yi bajx wekl (Cap. 1–11) na xtxol sketz yi xeꞌtzbil yi eꞌchk takleꞌn yi at, nin yi ẍeꞌn cuꞌn bnixeꞌn yi bajx wunak tan Ryos. Na xtxol yi xeꞌtzbil tetz yi ilcꞌol. Na xtxol yi ẍeꞌn ban yi cweꞌn jun chin wutzileꞌn aꞌbal yi xcyeꞌ tan chitzotzajeꞌn cyakil eꞌ wunak te tiemp tetz Noé. Nchaꞌtz na xtxol yi mbi mbajij te yi tiemp yi xiteꞌn yi torre tetz “Babel”.

Yi caꞌp wekl (Cap. 12–50) na xtxol yi ẍeꞌn cuꞌn ban yi xeꞌteꞌn yi tanum Ryos te Abram, tu Isaac, nin Jacow. Nchaꞌtz na xtxol yi ẍeꞌn cuꞌn eꞌ ban yi coblaj cyꞌajl Jacow; nin yi ẍeꞌn cuꞌn jaleꞌn kꞌej Ẍep ẍchiwutz yi eꞌ tetz stzicyaꞌtz; nin yi ẍeꞌn cuꞌn ban yi tponeꞌn yi tanum Ryos jalen Egipto.