GÉNESIS
Yi xeꞌtzbil wuxtxꞌotxꞌ
1
1 Yi tcyaꞌj tu yi wuxtxꞌotxꞌ, Ryos ncuꞌ xtxumul tetz le xeꞌtzbil tzaj. 2 Poro yi wuxtxꞌotxꞌ quiꞌc xtxolbil taneꞌn. Na aꞌ cuꞌn piꞌlij tibaj cyakil luwar. Ej nin tzꞌoꞌtz nintunin beneꞌn tziꞌn. Quiꞌc jun takleꞌn at. Poro yi Porer Ryos na nin xon teraꞌtz tibaj yi aꞌ yi piꞌlij.3 Itzun bantz, nin tal Ryos: “Na waj yil jal yi tkan skil.”a Jaleꞌn nintzun ban tkan skil.b 4 Nintzun til Ryos yi chumbalaj nin yi jaleꞌn tkan skil. Ej nin cu jatxol yi tkan skil, tu yi tzꞌoꞌtz. 5 Nin oc tkꞌol Ryos biꞌ tkan skil tetz “skꞌejl,” ma yi tzꞌoꞌtz, “lakꞌbal” tzun ban biꞌ-tz taꞌn. Icyꞌeꞌn nintzun ban yi bajx kꞌej.
6 Ej itzun tal iꞌ le caꞌp kꞌej: “Tajweꞌn yil jatx tib yi aꞌ yi piꞌlij tibaj cyakil luwar, bantz at aꞌ sban tul cob amaꞌl.” Ej i nintzun bantz chi yi tal iꞌ. 7 Bnix yi jatxbil xoꞌl yi aꞌ taꞌn. Jun txꞌakaj aꞌ cyaj tzakꞌ yi jatxbil tetz. Ej nin junt txꞌakaj aꞌ cyaj cyen tibaj. 8 Yi jatxbil xoꞌl yi aꞌ, “tcyaꞌj”,c ban biꞌ tan Ryos. Icyꞌeꞌn nintzun ban yi caꞌp kꞌej.
9 Ej itzun tal iꞌ le toxiꞌn kꞌej: “Yi aꞌ yi at wuxtxꞌotxꞌ, na waj yil ẍchamcuꞌn tib tul jun ntziꞌ amaꞌl, bantz jaleꞌn jun amaꞌl yi skej.” I nintzun bantz. 10 Yi amaꞌl yi skej, kale quiꞌcleꞌt aꞌ, “txꞌotxꞌ” tzun ban biꞌ-tz taꞌn. Ma yi aꞌ yi piꞌlij, “mar” tzun ban biꞌ-tz. Nin til Ryos yi baꞌn atiteꞌt cyakil.
11 Nchaꞌtz tal iꞌ: “Na waj yil txaꞌxan cyakil yi wuxtxꞌotxꞌ. Nin na waj yil jal cyakil jilwutz ujul yil takꞌ tijal. Na waj yil jal eꞌchk jilwutz itzaj yil takꞌ wutz. Nin na waj yil jal eꞌchk jilwutz tzeꞌ yil takꞌ loꞌbaj.” Nin yaꞌtz nin bantz chi tal iꞌ. 12 Jal cyakil jilwutz ujul. Nin nchaꞌtz jal eꞌchk jilwutz itzaj yi na takꞌ tijal. Nin jal eꞌchk jilwutz tzeꞌ yi na takꞌ loꞌbaj. Nin til Ryos yi baꞌn atiteꞌt cyakil. 13 Icyꞌeꞌn nintzun ban yi toxiꞌn kꞌej.
14-15 Ej itzun taltz le cyajiꞌn kꞌej: “Na waj yil lajluchax yi eꞌchk txekbil tcyaꞌj tan xtxekeꞌn yi wuxtxꞌotxꞌ, nin tan jatxleꞌn yi skꞌejl tu yi lakꞌbal. Nchaꞌtz tan ẍchajleꞌn yi eꞌchk yob tu eꞌchk kꞌejlal.” Nin yaꞌtz nin bantz.
16 Yi bnixeꞌn yi eꞌchk txekbilaꞌtz, ja bnix cob lmak txekbil taꞌn. Yi jun yi mas na txekun yaꞌstzun yi jun yi na xcon tan xtxekeꞌn tkan skil. Ma yi junt yi quiꞌc mas na txekun, yaꞌstzun na xcon tan xtxekeꞌn lakꞌbal, nin nchaꞌtz bnix yi eꞌchk txꞌuml taꞌn. 17 Cyakil yi eꞌchk txekbil yi at tcyaꞌj, Ryos txumul tetz tan xtxekeꞌn yi wuxtxꞌotxꞌ. 18 Ryos txumul tetz yi eꞌchk txekbilaꞌtz tan xconeꞌn tetz katxekbil, nin nchaꞌtz tan jatxleꞌn xoꞌl yi skꞌejl tu lakꞌbal. Ej nin til Ryos yi baꞌn atit. 19 Icyꞌeꞌn nintzun ban yi cyajiꞌn kꞌej.
20 Ej itzun taltz le toꞌeꞌn kꞌej: “Na waj yil jal wiꞌnin txuc xe aꞌ. Nchaꞌtz na waj yil jal wiꞌnin jilwutz txuc yi baꞌn chixicyꞌin.” I nintzun banaꞌtz chi tal iꞌ. 21 Ryos txumul tetz cyakil jilwutz txuc yi at xe mar. Lmak loꞌtz, coꞌchk loꞌtz, iꞌ txumul tetz tircuꞌn. Nchaꞌtz iꞌ txumul tetz cyakil jilwutz txuc yi baꞌn na chixicyꞌin. 22 Yi tilol Ryos yi baꞌn atiteꞌt cyakil, tkꞌol tzun iꞌ banl squibaj. Nintzun tal iꞌ-tz: “Na waj yil pucꞌun chiwutz cyakil yi txuqueꞌj. Na waj yil noj xe mar cyakꞌun. Nchaꞌtz na waj yil jal wiꞌnin jilwutz txuc yil chixicyꞌin tcyaꞌj.” 23 Icyꞌeꞌn nintzun ban yi toꞌiꞌn kꞌej.
24 Ej itzun taltz le kakiꞌn kꞌej: “Nchaꞌtz na waj yil jal wiꞌnin txuc wuxtxꞌotxꞌ. Na waj yil chijal txuc tetz awunaꞌn, nin na waj yil chijal smaron txuc. Nchaꞌtz na waj yil chijal txuc yi tul chijutnin tu quib wuxtxꞌotxꞌ.” I nintzun banaꞌs chi tal iꞌ. 25 Ryos mbanon tetz cyakil jilwutz txucaꞌtz. Nin til iꞌ yi chumbalaj nin cyakil.
26 Ej nintzun taltz: “Nchaꞌtz skabneꞌ wunak. Niꞌcuꞌn cheꞌ kulej chi kutaneꞌn ketz.d Nin eꞌ ajcaw sbneꞌ scyeꞌj cyakil jilwutz txuc, nin scyeꞌj cyakil jilwutz cay, nin scyeꞌj cyakil jilwutz txuc yi na chixicyꞌin tcyaꞌj. Nin eꞌ ajcaw sbneꞌ scyeꞌj cyakil yi eꞌ yi na chijutnin tu quib wuxtxꞌotxꞌ.”
27 Itzun bantz yi cweꞌn xtxumul Ryos yi eꞌ wunak, choꞌn cuꞌn eꞌ tulej chi taneꞌn iꞌ tetz. Yaj tu xnaꞌn eꞌ tulej.e
28 Ej nin takꞌ Ryos banl squibaj. Nin tal iꞌ scyetz: “Na waj yil cxpucꞌunwok. Na waj yil xcawunwok tzoneꞌj wuxtxꞌotxꞌ. Axwok ajcaw sbneꞌ scyeꞌj cyakil jilwutz txuc, chi taneꞌn cay, nin cyakil yi eꞌ txuc yi na chixicyꞌin, nin scyeꞌj cyakil yi eꞌ txuc yi na chibiknin quib nka yi na chijut nin quib wuxtxꞌotxꞌ,” chij iꞌ bantz.f
29 Ej nin nchaꞌtz tal iꞌ junt xtxolbil scyetz: “Bitwok tzaj. Cyakil jilwutz chꞌim tu tzeꞌ yi na takꞌ wutz, yaꞌstzun baꞌn baj itaꞌn tetz iwaꞌ. 30 Ma yi eꞌ txuc, chꞌim cuꞌn sbajk cyaꞌn, tu eꞌchk jilwutz xtzeꞌ,” chij Ryos bantz. I nintzun bantz chi tal Ryos scyetz. 31 Wiꞌnin stzatzineꞌn Ryos te cyakil yi akꞌun yi mbnix taꞌn. Icyꞌeꞌn nintzun ban yi wukakiꞌn kꞌej.