2
1 Yaꞌstzun ban Ryos tan banleꞌn yi tcyaꞌj tu yi wuxtxꞌotxꞌ, tu cyakil yi eꞌchk takleꞌn yi at beneꞌn tziꞌn wi munt. 2 Ej ma le jukiꞌn kꞌej, ujeweꞌn nin ban,a na nsken wiꞌt bnix cyakil taꞌn. 3 Nin takꞌ iꞌ banl tib yi jukiꞌn kꞌejaꞌtz. Chin xan nintzun yi jun kꞌejaꞌtz bantz taꞌn na yaꞌs tzun kꞌej yi tujeweꞌn iꞌ.Yi ateꞌ tzaj Adán le Edén
4 Je xtxolbileꞌj te yi ẍeꞌn cuꞌn bnixeꞌn yi tcyaꞌj tu yi wuxtxꞌotxꞌ.
Yi bnixeꞌn yi tcyaꞌj tu yi wuxtxꞌotxꞌ tan Kataj Ryos, 5 quiꞌc jun jilwutz xtzeꞌ at. Ej nin quiꞌc nin jun jilwutz ujul at, na ntaxk saj aꞌbal tan Kataj. Nin nchaꞌtz quiꞌc jun wunak at wuxtxꞌotxꞌ tan akꞌun. 6 Poro yi bnixeꞌn yi tcyaꞌj tu yi wuxtxꞌotxꞌ, nintzun jeꞌul mulkꞌuj yi aꞌ taꞌn, tan sijleꞌn yi wuxtxꞌotxꞌ tan jaleꞌn eꞌchk jilwutz xtzeꞌ. 7 Toqueꞌn tzun Kataj tan banleꞌn yi bajx wunak. Txꞌotxꞌ xcon taꞌn, tan banleꞌn. Ej nin yi bnixeꞌn taꞌn, nintzun oc juclul yi xewtz. Ma yi toqueꞌn juclul yi xewtz, oqueꞌn nin bantz tetz jun wunak yi itzꞌ.
8 Itzun bantz nintzun oc Kataj tan banleꞌn jun chum balaj cojbil jalen lilen, tul yi amaꞌl yi na biꞌaj Edén. Choꞌn tzun toponeꞌn yi yaj yi nsken bnix taꞌn tul yi jun cojbilaꞌtz. 9 Kataj jalsan cyakil jilwutz tzeꞌ tul yi jun cojbilaꞌtz. Chum balaj tzeꞌ jal taꞌn yi na takꞌ wutz,b nin yi baꞌn na bajsij. Ej nin nicyꞌal yi jun amaꞌlaꞌtz bnix jun balaj wiꞌ tzeꞌ yi na takꞌ itzꞌajbil. Nin nchaꞌtz bnix junt wiꞌ tzeꞌ yi na xcyeꞌ wutz tan teleꞌn katxum te eꞌchk takleꞌn balaj nin te eꞌchk takleꞌn cachiꞌ.
10 Ej nin tul yi jun amaꞌlaꞌtz yi na biꞌaj Edén at jun aꞌ yi xcon tan sijleꞌn cyakil yi amaꞌl. Te yi jun aꞌaꞌtz cyaj cuꞌn kꞌab na el. 11 Pisón biꞌ yi bajx, yi na icyꞌak tul cyakil amaꞌl Havila, kale atiteꞌt wiꞌnin oro. 12 Nin nchaꞌtz tul yi jun amaꞌlaꞌtz, at perfum yi chin cꞌoꞌc nin. Nin nchaꞌtz at eꞌchk balaj cꞌub yi na biꞌaj ónice. 13 Ma yi caꞌp scyeri aꞌaꞌtz, Gihón biꞌ nin iꞌtz yi aꞌ yi na icyꞌak tul cyakil amaꞌl cwent Cus. 14 Yi toxiꞌn scyeri yi aꞌaꞌtz, Tigris biꞌ, nin iꞌtz yi aꞌ yi na icyꞌak swutzlen yi amaꞌl cwent Asiria. Ma yi cyajeꞌn kꞌab yi jun aꞌaꞌtz Eufrates biꞌ.
15 Nintzun takꞌ Kataj Ryos amaꞌl tetz Adán tan taꞌteꞌn tul yi jun amaꞌlaꞌtz, nin tan toqueꞌn tan cojleꞌn wutz. 16 Itzun tal Kataj tetz: “Baꞌn lbaj cyakil yi eꞌchk loꞌbaj awaꞌn yi at tzoneꞌj. 17 Poro quiꞌc rmeril tan abajsal yi wutz yi jun wiꞌ tzeꞌ yi na xcyeꞌ tan ẍchajleꞌn yi eꞌchk takleꞌn balaj tu eꞌchk takleꞌn cachiꞌ. Kol baj awaꞌn, jun cuꞌn yol ẍquimok,”c stzun Ryos.
18 Toqueꞌn tzun Kataj tan xtxumleꞌn yi qui na yub yi ẍchuc yi yaj at. “Tajweꞌn noꞌc tan banleꞌn jun xkꞌajlab yi baꞌn tetz iꞌ, nin yi baꞌn xcon tan ẍchꞌeyeꞌn,” stzun Ryos tcꞌuꞌl cuntuꞌ. 19 Ma yi eꞌ txuc yi nsken chibaj bnix tan Kataj, yi eꞌ yi na chixon wuxtxꞌotxꞌ, scyuchꞌ yi eꞌ yi na chixicyꞌin tcyaꞌj, txꞌotxꞌ tuꞌ xcon taꞌn tan chibanleꞌn. Ej nin eꞌ opon cyakil yi eꞌ txucaꞌtz tan Kataj swutz yi yaj tan toqueꞌn iꞌ tan tocseꞌn chibiꞌ. Yi chibiꞌ yi eꞌ txuc yi eꞌ baj oc taꞌn, i nin chibiꞌaꞌtz at jaluꞌ. 20 Iꞌ ocsan chibiꞌ yi eꞌ txuc yi baꞌn tetz awuꞌn, nin iꞌ ocsan chibiꞌ yi eꞌ txuc yi na chixicyꞌin, nin iꞌ ocsan chibiꞌ yi smaron txuc. Poro quiꞌc nin jun scyeri eꞌ txuc yi oc chibiꞌ taꞌn yi nink xcon tetz xkꞌajlab iꞌ, nka nink xcon tan ẍchꞌeyeꞌn.
21 Joyol tzun Kataj puntil, nin cu watzal yi yaj. Nin te yi na wit, nin eltzaj tcyꞌal jun tembl. Ma yi teleꞌn tzaj tcyꞌal, iteꞌn nin ban cyen yi ẍchiꞌbel yi yaj tan Kataj chitaneꞌn nin. 22 Te yi jun tembl yaj yi eltzaj tcyꞌal Kataj, bnix jun xnaꞌn taꞌn. Yi bnixeꞌn yi xnaꞌn toponeꞌn tzun tan Ryos swutz yi yaj.
23 Yi beneꞌn tilol yaj yi xnaꞌn nintzun taltz: “Yi juneꞌj iꞌtz mero imbakil, iꞌtz mero inwankil. Xnaꞌn tzꞌaꞌlchok tetz, na choꞌn mmeꞌltzaj tinwankil tan Kataj,” stzun iꞌ bantz.
24 Chaꞌstzun te cyakil yi eꞌ yaj, yi na oc quixkel na quil cyen chitaj chitxuꞌ, tan chinajeweꞌn tu quixkel.d Ej nin yi jun lmujaꞌtz yi na cyokꞌbej quib, junit na ban chiwankil.
25 Yi bnixeꞌn yaj tu xnaꞌn tan Kataj txꞌanlcheꞌ cuntuꞌ, poro quiꞌc muꞌẍ tal nak chitxꞌixwij squibil quib.