Yi chipajol Adán tu Eva yi caꞌwl Ryos
3
1 Ẍchixoꞌl cyakil txuc yi bnix tan Kataj Ryos, at tzun jun luꞌbaj.a Chin list nin iꞌ ẍchiwutz cyakil smaron txuc. Nintzun opon yi jun luꞌbajaꞌtz te Eva, nintzun taltz:—¿Bintzij peꞌ yi ko ja tal Ryos tzitetz yi quiꞌc cuj tan ibajsal jun scyeri eꞌchk jilwutz loꞌbaj te yi at tzoneꞌj? stzun luꞌbaj tetz.
2 Sajeꞌn tzun tlol Eva tetz:
—Quiꞌ, at cuj tan kabajsal alchok jilwutz loꞌbaj. 3 Poro ntinaꞌtz jun yi quiꞌc cuj tan kabajsal wutz, iꞌtz yi jun wiꞌ loꞌbaj yi at nicyꞌal yi cojbileꞌj. Na ja tal Ryos yi ntin yi kol kamacquen skaquimok tan iꞌ.
4 —Nkꞌeꞌtz bintzi. Quil xquimwok. 5 Na je yi puntileꞌj, na na til Ryos yi kol baj itaꞌn sjalok itajtzaꞌkl. Tzꞌelepon itxum tetz eꞌch balaj ajtzaꞌkl, nin tzꞌelepon itxum tetz eꞌch ajtzaꞌkl cachiꞌ. Choꞌn sbneꞌ itxumuꞌn chi taneꞌn xtxumuꞌn Ryos. Chaꞌstzun te qui na taj iꞌ yil baj yi jun loꞌbajaꞌtz itaꞌn, stzun Baybaꞌn ban tetz Eva.
6 Toqueꞌn tzun yi xnaꞌn tan xmayeꞌn yi loꞌbaj. Chin elsbil almaꞌ nin, na chin yubeꞌn nin, nin baꞌn na bajsij. Toqueꞌn tzun tan xtxumleꞌn tan bajeꞌn jun taꞌn,b tan jaleꞌn yi tetz tajtzaꞌkl. Sajeꞌn tzun stzutul jun nin je bajsaltz, nin ben tkꞌol jun tetz yi chmil. Nin nchaꞌtz yi chmil nin bajtz taꞌn. 7 Yi wiꞌt bajeꞌn yi loꞌbaj cyaꞌn teleꞌn tzun pacxuj yi wutz yi cyajtzaꞌkl. Chinachoneꞌn tzuntz teꞌj yi txꞌanl cheꞌ cuntuꞌ. Cyoqueꞌn tzuntz tan stzꞌisleꞌn xak ibẍ tan toqueꞌn wutz quikan tan jopleꞌn chiwankil.
8 Itzun bantz yi cweꞌn kꞌej nin ben quibital yi na xon Kataj Ryos wi cojbil. Cyewal tzun quib xoꞌlak tzeꞌ. 9 Jiloneꞌn tzaj tzun Kataj Ryos scyetz itzun taltz:
—¡Adán! ¿Naꞌ atiẍeꞌt?
10 Sajeꞌn tzun stzaꞌwel Adán:
—Ja ben wital yi na xonuꞌ Taꞌ. Nin tantuꞌ yi txꞌanl chin cuntuꞌ ja chinxob, chaꞌstzun te ja wew wib, chij Adán tetz Kataj.
11 —¿Naꞌ tzun chij tzatz yi txꞌanl quiẍ cuntuꞌ? ¿Ja peꞌ baj yi loꞌbaj awaꞌn, yi walnak yi quiꞌc cuj tan abajsal?
12 —Ja Taꞌ, na yi xnaꞌn yi ntakꞌuꞌ tetz wuxkꞌajlab, iꞌ nmakꞌon yi loꞌbaj swetz tan bajeꞌn waꞌn, stzun Adán bantz tetz Kataj Ryos.
13 Beneꞌn tzun jakol Kataj Ryos tetz yi xnaꞌn:
—¿Mbi tzun ncuꞌ anucꞌul atz?
—“Bajseꞌn yi loꞌbaj,” chij luꞌbaj mban swetz. Ja tzun xcyeꞌ iꞌ tan insubleꞌn,c nin ja baj yi loꞌbaj waꞌn, chij xnaꞌn tetz Ryos.
14 Beneꞌn tzun tlol Kataj Ryos tetz yi luꞌbaj:
—Tan yi awil yi ncuꞌ ajuchul, swakꞌeꞌ acaws. Nin swakꞌeꞌ mas acaws ẍchiwutz cyakil yi eꞌ mas txuc. Tajweꞌn yil tzabiknin acꞌuꞌl wuxtxꞌotxꞌ sbneꞌ opon tunintz. Nin nchaꞌtz sbajk txꞌotxꞌ awaꞌn. 15 Nin je ẍwulejeꞌj: Icontr itib sbneꞌ tu yi xnaꞌn. Ej nin nchaꞌtz chicontr quib sbneꞌ yi eꞌ ara xonl scyuchꞌ yi eꞌ xonl yi xnaꞌn. Nin yi awiꞌ, sloꞌonk tan yi xonl yi xnaꞌn. Ma yi xonl yi xnaꞌn ntin ẍchuꞌs tkan sloꞌonk awaꞌn,d chij Kataj Ryos bantz.
16 Itzun ben tlol Kataj tetz xnaꞌn:
—Ma aẍ atz, qꞌuixcꞌuj tzawalaj jun awal. Ej nin yi tajbil yi awankil tetz yi awuchmil sbneꞌ. Nchaꞌtz ajcaw sbneꞌ iꞌ tzaweꞌj.
17 Itzun ben tlol Kataj tetz yi yaj:
—Ma jaluꞌ, tan paj yi ja cxom te tajtzaꞌkl yi awuxkel, nin tan paj yi ja baj yi loꞌbaj awaꞌn yi walnak yi quiꞌc cuj tan abajsal, spoꞌtok yi wuxtxꞌotxꞌ waꞌn. Tan awil yi ncuꞌ ajuchul, sbneꞌ opon tunintz chin qꞌuixcꞌujnin ljaleꞌt awaꞌ swutz yi txꞌotxꞌ. 18 Tan apaj sjalok wiꞌnin txꞌiꞌx nin xtzeꞌ wuxtxꞌotxꞌ.e Sbajk eꞌchk jilwutz xtzeꞌ awaꞌn tetz awaꞌ. 19 Ej nin tan tuꞌ yi mapaj incaꞌwl, tajweꞌn tzꞌel aꞌ te awiꞌ tan awaneꞌn. Yaꞌstzun cẍwulej jalen yil cẍoꞌc junt tir tetz txꞌotxꞌ. Na txꞌotxꞌ tuꞌ ncẍbnixeꞌt, nin txꞌotxꞌteꞌn nin cẍtzajpont, stzun Ryos bantz.
20 Toqueꞌn tzun biꞌ txkel Adán taꞌn tetz Eva, na iꞌ chitxuꞌcyꞌeꞌx cyakil jilwutz wunak beneꞌn tziꞌn. 21 Nintzun oc Kataj Ryos tan banleꞌn beꞌch cyetz. Stzꞌuml txuc xcon taꞌn. Yi bnixeꞌn taꞌn nin octz tan chiwekleꞌn.
22 Itzun tal Kataj Ryos: “Niꞌcuꞌn cyajtzaꞌkl jaluꞌ chi kutaneꞌn ketz, na na el chitxum tetz naꞌj scyetz eꞌchk ajtzaꞌkl balaj, nin na el chitxum tetz naꞌj scyetz eꞌchk ajtzaꞌkl cachiꞌ. Lastum kol baj wutz yi tzeꞌ cyaꞌn, yi tzeꞌ yi na takꞌ itzꞌajbilf tetz ben kꞌej ben sak, na kol baj cyaꞌn quiꞌt chiquim sbneꞌ pon tunintz,” stzun Ryos bantz.
23 Chaꞌstzun te cyeleꞌn lajul Kataj Ryos, le cojbilaꞌtz, yi na biꞌaj Edén. Eꞌ el lajul tan quicyꞌeꞌn tul junt amaꞌl, tan cyakꞌujeꞌn wi txꞌotxꞌ, wech na txꞌotxꞌ teꞌn eꞌ. 24 Yi cyeleꞌn lajul Ryos, nintzun cyaj tkꞌol cobox querubimg swutz yi jun balaj cojbilaꞌtz. Nchaꞌtz cyaj tkꞌol jun spar yi nternin na tzan kꞌaꞌkl, nin yi lajkeꞌlnin na weltin tuꞌtz tan qꞌuicyꞌleꞌn yi jun wiꞌ tzeꞌaꞌtz, yi na takꞌ itzꞌajbil. Yaꞌstzun tulejtz tan qui cyocomponeꞌn teꞌj.